Siopa ray Onlad Impierno?

Say ebat na Biblia

Say impierno (“Sheol” tan “Hades” diad orihinal iran lenguahe na Biblia) et say mismon lubok, aliwan maapoy a pasen ya panagpairapan. Siopa ray onlad impierno? Parehon maong tan mauges a totoo. (Job 14:13; Salmo 9:17) Ibabaga na Biblia a sayan pasen ya kawalaan na inaatey ya totoo so “pansumpalan na amin a mabilay.”​—Job 30:23, Maung a Balita.

Anggan si Jesus et linmad impierno nen inatey. Balet sikatoy “agpinaulyan a mansiansia ed impierno,” lapud binilay lamet na Dios.​—Gawa 2:31, 32, The Bible in Basic English.

Kasin agnaandi so impierno?

Amin ya oonlad impierno et ompawil, ta bilayen ira nen Jesus panamegley na pakapanyari na Dios. (Juan 5:28, 29; Gawa 24:15) Sayan nagawa ed arapen et nipropesiya ed Apocalipsis 20:13 ya kuan ton “say patey tan impierno et inter da ray inaatey da.” (King James Version) No anggapo lay karga na impierno, naandi la itan; anggapo lay onla ditan ta “anggapo lay ipapatey.”​—Apocalipsis 21:3, 4; 20:14.

Balet aliwan amin ya ompatey et onlad impierno. Ipapanengneng na Biblia a wala ray totoon sobra lay inkauges da ya agla ran balot manguman. (Hebreos 10:26, 27) No ompatey iratan, aliwan diad impierno so laen da, noagta diad Gehenna, ya simbolo na anggapoy anggaan ya kadederal. (Mateo 5:29, 30) Singa bilang, napatnagan ed saray imbaga nen Jesus ya arum ed saray lider na relihyon ed panaon to ya mankunkunwarin makadios et onlad Gehenna.—Mateo 23:27-33.