Kasin Say Kaabigan na Dios So Mangayat ed Sikayo?

KASIN walaan ka na sankaapitan a kaaro? No ontan, kasin amorekdek mo la no anto so angayat ed sika ed satan a too? Kasin say indengan to? Kasin say katuaan a sikayon dua so interesado ed saray parehon bengatla? Odino kasin saray aragdalem a kalidad, a singa say kaabigan odino kakabatan? No say kalidad ya animento ed impankaaro yo et say kaabigan, sirin peteg a walaan ka na mayaman a relasyon. Say puron kaabigan so mataltalag a naromog natan sano, para ed maslak a kabiangan, saray totoo so “andian na aro ed kaabigan.”​—2 Timoteo 3:3.

Para ed sakey a Kristiano, say sankaimportantian a relasyon ed bilay et aliwan say diad sananey a too noagta diad Dios. Sirin sano sayan relasyon so isipen mo, kasin inumameng mo la: ‘Dinan ed saray kalidad na Dios so amaasingger a tuloy ed siak diad Dios?’

Saray Manunan Atributos na Dios

Diad tua, dedeskribien na Biblia so dakel iran matalonan kalidad na Dios. Gendagendat a saray apatiran nipabitar et say aro to, inkahustisya to, kakabatan to, tan say makapanyarin-amin a pakayari to. (Deuteronomio 32:4; Job 12:13; Salmo 147:5; 1 Juan 4:8) No sikatayo so manpili ed limog na sarayan apatiran matalonan kalidad, anganko ta ibaga tayon say aro na Dios so angayat ed sikatayo a nagkalalo. Maapit a nisiglaot ed aro to, anggaman kuan, et say matalonan kaabigan to. Saray managsulat na Biblia so angisulat a mabitar ed saya, tan say ontan a kaabigan so mamaasingger ed saray totoo diad sakey a mabunigas, maligsan relasyon ed Manamalsa ra.

Alimbawa, saginonor ed komanem a siglo K.K.P., imbesngaw nen propeta Zacarias so nipaakar ed si Jehova: “Agaylan baleg so kaabigan to, tan agaylan baleg so inkadakep to!” (Zacarias 9:17) Dakel a taon sakbay nen Zacarias, miulibay a dinayew nen Isaias so Dios sanen insulat to: “Say maaron-panangasi nen Jehova so salambiten ko, . . . anggan say daakan a kaabigan to ed abung na Israel ya insaklang to ed sikara.”​—Isaias 63:7.

Taloran siglos ed asasakbay, makatenyeg ed liknaan ya insulat nen Arin David so nipaakar ed kaabigan na Dios. Si David so nansulat a manlapud eksperiensia, a sayan kaabigan so nanggayagaan to ed interon bilay to. Say Dios so maong a tuloy ed kinen David, nagkalautla ed kayari na saray sankaseryosoan a kasalanan to a misiglaotan ed si Batsheba tan si asawa ton Urias, sanen impanengneng na Dios ed sikato so panangasi. (2 Samuel 12:9, 13) Diad Salmo 31:19, inyabawag nen David a tekep na apresasyon: “Agaylan daakan so kaabigan mo, a tinipon mo a para ed saraman so ontakot ed sika!”

Kasin papablien mo so kaabigan na Dios a singa ginawa na saraman so managdayew ed inmunan panaon? No ontan, naeksperiensiam so peteg a “kareenan na Dios a talonaan to so amin a kanonotan,” tan ontan met a natenyeg a tuloy a manggawa ed linawa na Dios ed amin a panaon. (Filipos 4:7) Imanoen tayo ed pigaran bekta natan no anto so isasakup na kaabigan na Dios tan no panon a makapakelaw so kalaknab to. Peteg a saya so mamaaralem na apresasyon tayo ed maaron mangatatawen ya Ama tayo.