Panangiwalwal “ed Too na Kaugsan”
“Ompaway ed sikato, baley ko, no agyo labay so minabang ed sikato diad saray kasalanan to, tan . . . mangawat ed kabiangan na saray bakbak to.”—APOCALIPSIS 18:4.
1, 2. (a) Panon so pakabidbir ed too na kaugsan? (b) Anto so panmoria na Dios ed saraman so mangibabagan manlilingkor ed sikato balet ta sikara so makasalanan-ed-dala? (Mateo 7:21-23)
IMPASAKBAY na Salita na Dios so isabi na sakey a “too na kaugsan.” Impasakbay to met a sayan mauges ya elemento so ‘naandi tan nitarok ed kaandi’ diad panamegley na mangatatawen a Manamatey na Dios, si Kristo Jesus. (2 Tesalonica 2:3-8) A singa impanengneng na saray akaunan artikulo, satan a too na kaugsan et say klero na Kakristianoan. Abayaglan inkaindan daray katuaan na Salita na Dios tan saray paganon bangabangat so inadapta ra, a singa say Trinidad, impiernon-apuy, tan imortalidad na kamarerwa. Niarum, sikara so amawala ed saray bunga a sumlang ed saray ganggan na Dios. A singa saraman so amasakbayan nen Pablo ed si Tito, “lapag ya iyaabawag dan kabat da so Dios, balet ta sikato so intapat da diad panamegley na saray gawa ra, lapud sikara so makapadimla tan matunganga tan agnaabobonan ed maabig a gawa na anggan anton nengneng.”—Tito 1:16.
2 Imbaga nen Jesus: “Manalwar ed saray tilan propetas ya onsabi ed sikayo ya akakawes na karnero, balet diad loob et sikara so mangasiban lobo. Diad saray bunga ra et nibiig yo ra.” Saray tilan propetas so mamawala na “andi-kanan bunga.” (Mateo 7:15-23) Say ebidensya na mauges a bunga na klero et say abalbaleg a kasalanan da ed dala. Diad saray siglos et sikara so anuporta ed saray krusada, inkisisyon, tan saray bakabakal ya amaagus ed dala na saray nilaksalaksa. Sikara so angipikasi tan amendisyon ed saray nantupag a dapag diad bakal a saray membro na dilin relihyon da so nampapateyan. Diad piduma, ayarian nen Pablo ya imbaga: “Siak so malinis a manlapud dala na amin a totoo.” (Gawa 20:26) Saray klero so andi. Diad saray ontan et imbaga na Dios: “Anggaman sikayo so manggawa na dakel a pikakasi, siak so ag-ontalineng; diad impamaagus-ed-dala et saray dilin lima yo so napno.”—Isaias 1:15.
3. Antoran ebento na sankagloboan a kakanaan so maples a manasingger?
3 Say panaon ed pangidapo na Dios na panangukom to a sumpad too na kaugsan so maples a manasingger. Magano la, a singa impasakbay nen Jesus, “wala so baleg a kairapan ya agni agawa nanlapulad gapo na mundo ya angga ed natan, andi, nisay nagawa lamet.” (Mateo 24:21) Satan ya agnaisip a panaon na gulo so onggapo ed kaderal na Babilonia a Baleg, say sankamundoan ya imperyo na palson relihyon, a mangisasakup ed saray relihyon na Kakristianoan. Saray mapulitikan elemento “so mamisangbisang tan manlakseb ed sikato, tan kanen daray malaman a kabiangan to tan sigpot a poolan da ed apuy.” (Apocalipsis 17:16) Say baleg a kairapan so manampot diad kaderal na nakekeraan a mundo nen Satanas diad Armagedon, ‘say bakal na baleg ya agew na Dios a Makapanyarin-amin.”—Apocalipsis 16:14, 16; 19:11-21.
Obligadon Mangaro ed Arum
4. Anto so lawas nonoten na saraman so mandadayew ed Dios “ed espiritu tan katuaan”?
4 Lapud sarayan mananenyeg-mundon nagawgawa so magano lan onsabi ed panaayaman a dalin, anton obligasyon so nipasakbat ed saraman so “mandadayew ed Ama ed espiritu tan katuaan”? (Juan 4:23) Nepeg dan nonoten so imbaga nen Jesus: “No sumpalen yoray ganggan ko, sikayo so mansiansia ed arok, unong a siak so anumpal ed saray ganggan na Ama tan nansiansia ed aro to. . . . Saya so ganggan ko, a manaarowan so sakey tan sakey ed sikayo unong a singa impangarok ed sikayo. Anggapo so walaan na aro a babaleg nen say saya, a say sakey so mangitalaga na kamarerwa to a nisengeg ed kakaaro to. Sikayoray kakaarok no gawaen yo so igaganggan ko ed sikayo.”—Juan 15:10-14; 1 Juan 5:3.
5, 6. (a) Anto so ingganggan nen Jesus ed saray babangatan to a gawaen a mangipabidbir ed sikara? (b) Diad anton pantalos a saya so balon ganggan?
5 Saray tuan Kristianos so obligado sirin a mangaro ed arum a totoo, nagkalautla ed saray Kristianon agagi ran lalaki tan bibii ed amin a dalin. (Gawa 10:34; Galacia 6:10; 1 Juan 4:20, 21) Peteg, saray kaparan Kristianos so nepeg a nawalaan na “mabiskeg ya aro ed balang sinansakey.” (1 Pedro 4:8) Satan a nengneng na aro ed sankagloboan a kalaknab so mangipabidbir ed sikara a bilang tuan managdayew, ta inkuan nen Jesus: “Ikdan takayo na sakey a balon ganggan, a manaarowan so sakey tan sakey ed sikayo; a singa impangarok ed sikayo, pian sikayo met so manaarowan ed sakey tan sakey. Diad saya et naamtaan dan amin a sikayoray babangatan ko, no walaan kayo na aro ed limog yon dili.”—Juan 13:34, 35.
6 Anto so balo ed satan a ganggan? Agta saray Judios a walad silong na Mosaikon Ganggan so naikdan na ganggan, “Aroen mo so kaparam a too a singa sikan dili”? (Levitico 19:18) On, balet impanengneng nen Jesus so bengatlan kaaruman sanen inkuanto, “A singa impangarok ed sikayo.” Say panangaro to so angisakup diad impangiter to ed bilay to a nisesengeg ed arum, tan saray babangatan to so nepeg a mabulos a manggawa met na ontan. (Juan 15:13) Satan so atagtagey a sukat na aro, lapud say ontan a sakripisyo so agkinaukolan ed Mosaikon Ganggan.
7. Dinan a relihyon so angunor ed ganggan na aro ed sayan siglo?
7 Diad siglo tayo, dinan a relihyon so angunor ed sayan ganggan na aro? Peteg ya aliwan saray relihyon na Kakristianoan, lapud sikara so nampapateyan ed balang sinansakey diad saray pigamplon laksalaksa ed duaran guerra mundial tan diad arum iran panggugutgutan. Saray Tasi nen Jehova so angunor ed ganggan na aro ed sankadalinan. Impansiansia ra so estrikton neutralidad ed saray bakabakal na nasyones, lapud imbaga nen Jesus a saray patumbok to so nepeg ya “aliwan kabiangan na mundo.” (Juan 17:16) Sirin, nayarian dan ibaga, singa si Pablo, a sikara so “malinis a manlapud dala na amin a totoo.” Bilang sakey ya ehemplo, imanoen so manangilukas a kabiangan na sakey a resolusyon ya inadapta na saray ariripen nen Jehova ed Washington, D.C., a kumbension nen Nobyembre 27, 1921:
“Bilang Kristianos a magunaet a manbabanikel a manumbok ed saray bangat nen Kristo Jesus a Katawan tayo tan saray Apostoles to, iyalibansa mi a: say bakal so sakey a relikon barbarismo, makaderal ed maabig a moral tan kabalawan ed saray Kristianon totoo; a saray prinsipyon imbangat na Katawan a Jesu-Kristo so mangipuera ed saray konsagradon Kristianos diad pibiang ed bakal, panamaagus-ed-dala odino karawalan ed anggan anton nengneng.”
8. Anto so ibabaga na maawaran a kuritan nipaakar ed saray Tasi nen Jehova kaleganan na Guerra Mundial II?
8 Panon so inkiyaplika na satan a panmoria kaleganan na Guerra Mundial II? Diad saman a sankaugesan a bakal ed amin ya awaran na too, 50 laksan totoo so pinatey. Balet anggapo so anggan sakey a pinatey na saray Tasi nen Jehova! Alimbawa, ngalngalin amin a kleron Aleman so aktibo odino pasapasan anuporta ed Nazismo. Diad piduma, saray Tasi nen Jehova ed leksab na uley na Nazi so amemben na estrikton neutralidad tan agda nilabay ya irayew si Hitler odino magmaliw a kabiangan na militaryan kurang to. Sirin, agda pinatey so anggan dinan ed saray espiritual ya agagi ra ed arum a bansa, odino siopaman ni a nisesengeg ed satan a pamaakaran. Tan saray Tasi nen Jehova ed amin iran arum a dalin so nansiansian neutral met.
9. Anto so agawa ed saray Tasi nen Jehova ed Alemanya tan Austria ed leksab na uley na Nazi?
9 Dakel ed saray Tasi nen Jehova so angisuko na kamarerwa ra a nisesengeg ed saray kakaaro ra diad panangunor ed ganggan na aro. Sakey ya impanrepaso ed libron Kirchenkampf in Deutschland (Fight of the Churches in Germany), nen Friedrich Zipfel, so angikuan nipaakar ed saray Tastasi: “Nobentay-siete porsiento ed saray membro na sayan melag a relihyoson grupo et biktima na impamasegsegang na Sosyalistiko [Nazi] Nasyonal. Sakey a kakatlo ed sikara so pinatey, balanglan diad impamatey, odino arum iran maruksan gawa, eras, sakit odino impamairap ed trabaho. Say sankaugesan ed sayan asagmak so andian na akauna tan satan so nansumpalan na agmikukumpromison pananisia ya agmitukoyan ed Sosyalistiko Nasyonal ya ideolohya.” Diad Austria, 25 porsiento ed saray Tasi nen Jehova so pinatey, pinekpek ya anggad patey, odino inatey ed sakit odino inkaapusan ed saray kampo na Nazi.
10. Anton talek so wala ed saraman so inatey diad panangunor ed ganggan na aro?
10 Saraman so minartir diad panangunor ed ganggan na aro so matalek a say “Dios so aliwan agmatunong ta pian nalingwanan to so gawa [ra] tan say aro ya impanengneng [da] ed ngaran to.” (Hebreos 6:10) Amta ra a “say mundo so napaso tan ontan met ed pilalek to, balet siopaman a manggawa ed linawa na Dios so mansiansia lawas.” (1 Juan 2:17) Sikara so walaan na maseguron ilalo ed kapaoli a tekep na panmoria ed maandon bilay.—Juan 5:28, 29; Gawa 24:15.
11. Diad anton dalan a saray ariripen nen Jehova so nikadkaduma, tan anton propesiya so nasusumpal ed sikara?
11 Saray ariripen nen Jehova so nikadkaduma diad panangunor ed totontonen a sinalita nen Pedro tan arum ya apostoles ed atagey a korte: “Nepeg min tuloken so Dios a bilang manuley nen saray totoo.” (Gawa 5:29) Lapud saya so gagawaen na saray Tasi nen Jehova, sikara so papabiskegen na “masanton espiritu to, ya inter na Dios ed saraman so manguunor ed sikato a bilang manuley.” (Gawa 5.32) Satan so pakayarin manggawa ed sikara a makayarin manumpal ed propesiya ed Isaias 2:2-4. Impasakbay to a diad panaon tayo et say tuan panagdayew so niletneg-lamet tan saray totoo a manlapud amin a nasyones tan saray relihyon so onagus ditan. Sakey a pansumpalan so: “Pandayen daray kampilan da a pagmaliwen a dingding na lukoy tan saray gayagayang da a kalkalawit. Say nasyon so agla mangitagey na kampilan a sumpad nasyon, aglaran balot manaral na bakal.” Lapud saray ariripen nen Jehova so manpaparaan a para ed bilay diad sakey a balon mundon mareen, sikara so aglan balot manaral na bakal. Aralen da so ganggan na aro.—Juan 13:34, 35.
12. Anto so nepeg a gawaen na saraman so manguunor ed ganggan na aro ed arum?
12 Lapud say Kristianon aro so mangisakup na ‘pangaro ed kaabay mo a singa sikan dili,’ saray ariripen na Dios so agnayarin masiblet ed saman so amta ra. (Mateo 22:39) Wala niran siansiay dakel nin arum a malabay a manlingkor ed Dios tan manbilay ed balon mundo to. Ambegyan wala ni so panaon, saraya met so nakaukolan a mangaral nipaakar ed ganggan na aro tan saray dakerakel nin arum a katuaan a misiglaotan ed Sankatalbaan a Soberano, si Jehova a Dios. Sikara so nepeg a nibangat a si Jehova lambengat so makana ed panagdayew tayo tan no panon so kisaklang na ontan a panagdayew. (Mateo 4:10; Apocalipsis 4:11) Saraman so akaaral la ed sarayan bengatla so wala ed leksab na obligasyon a mangibaga ed arum nipaakar ed saratan ta pian sikara met so nayarin onsabi ed pabor nen Jehova.—Ezequiel 33:7-9, 14-16.
Panangiwalwal ed Too na Kaugsan
13. Bilang kabiangan na sankamundoan a panagtasi tayo, anto so nepeg tayon ipakabat, tan akin?
13 Imbaga nen Jesus a say “maong a balita na panarian so nipulong ed amin a panaayaman a dalin ya onkanan pantasi ed amin a nasyones; tan insan onsabi so anggaan.” (Mateo 24:14) Bilang kabiangan na sayan sankamundoan a panagtasi, saray ariripen na Dios so wala ed leksab na obligasyon a mangipakabat ed panangukom to a sumpa ed palson relihyon, nagkalautla ed klero na Kakristianoan. Saraya so nagkalalon sankaugesan ed pakanengneng na Dios lapud sikara so mangibabagan Kristiano. Nepeg a sikara so niwalwal ta pian saraman so malabay a manlingkor ed Dios so nabulos a manlapud impluensya ra tan makala ed manepeg a kundang na kililiktar. A singa imbaga nen Jesus: “Say katuaan so mangibulos ed sikayo.”—Juan 8:32.
14. Anton mabitar a mensahe so nepeg ya iyabawag nipaakar ed palson relihyon?
14 Sirin, saray Tastasi nen Jehova so nepeg a mangipakabat ed sayan apuyanan a mensahe nipaakar ed palson relihyon: “Ompaway ed sikato, baley ko, no agyo labay so minabang ed sikato diad saray kasalanan to, tan no agyo labay so mangawat ed kabiangan na saray bakbak to. Ta say kasalanan to so alusbo ya angga ed tawen, tan saray gawa na kaugsan to so ninonot na Dios. . . . Diad sakey ya agew et saray bakbak to so onsabi, patey tan pannangis tan eras, tan sikato so sigpot a napoolan ed apuy, lapud si Jehova a Dios, ya angukom ed sikato, so mabiskeg.”—Apocalipsis 18:4-8.
15. Panon a say taon 1914 so onkiwas a kabiangan ed orasan nen Jehova, tan anto so nansumpalan kayari na Guerra Mundial I?
15 Ipapanengneng na saray propesiya na Biblia a “saray kaunoran ya agew” na sayan sistema na bengabengatla so ginmapo ed sankaatapan a taon nen 1914. (2 Timoteo 3:1-5, 13; Mateo 4:3-13) Nanlapulad saman a taon et sikatayo la so wala ed “panaon na anggaan.” (Daniel 12:4) Kayarin tuloy na Guerra Mundial I, mitukoyan ed orasan nen Jehova, saray ariripen to so ginmapon magunaet a mangilaknab ed panangiyabawag da ed Panarian na Dios a singa nipasakbay ed Mateo 24:14. Sikara met so ginmapon mangiwalwal ed palson relihyon a lalon mabiskeg, nagkalautla ed mauges a kleron klase na apostatan Kakristianoan.
16. Panon a say panangiwalwal ed too na kaugsan so anipon na biskeg ed masulok a 70 taon?
16 Diad masulok lan 70 taon natan, ed lawas ombabaleg a biskeg, saray ariripen na Dios so amasakbay ed saray totoo ed manamalikdon kimey na too na kaugsan. Wala lambengat so piganlibon Tastasi a manggagawa ed saya kayari na Guerra Mundial I. Balet natan et sikara so nagmaliw a “sakey a makapanyarin nasyon” na masulok a talora-tan-kapalduan milyon ya aktibon ministron naorganisa ed masulok ya 60,000 kongregasyon ed amin a dalin. (Isaias 60:22) Diad onnanatnat a kalaknab, saray ariripen na Dios so magunaet a mangiyaabawag ed Panarian na Dios a bilang say mogmon ilalo na katooan tan, ontan met, iwawalwal da so klero ed kipapasen da—sakey a manamalikdon too na kaugsan.
Akin ya Ontanlan Mabiskeg?
17. Akin a saray ariripen nen Jehova so mabisbiskeg ya angiwalwal ed too na kaugsan?
17 Akin a saray ariripen nen Jehova so mabiskeg ya angiwalwal ed too na kaugsan ed amin na sarayan taon? Lapud saray minilmilyon ed baleg ya ulop na karnero nen Jehova a wala la ed dalan a mamaarap ed kilalaban so nepeg a nasalimbengan a manlapud mundo nen Satanas tan say palson relihyon to. (Juan 10:16; Apocalipsis 7:9-14) Nagkalalo ni, likud no saray klero so niwalwal, saray masimpit-impampuson totoo ya aliwa nin kabiangan na pulok na Dios so agmakaamta no panon so ipaliis ed lingon kurang. Kanian sikara so nepeg a napakabatan, a singa impangipakabat nen Jesus ed saray totoo sanen inkuanto nipaakar ed saray masimpisimpitan a relihyoson papangulo ed agew to: “Sikara so bulag a manangitabin. No, sirin, say toon bulag so mangitabin ed sakey a toon bulag, sikaran dua so napelag ed abut.”—Mateo 15:14; nengengen met so 2 Corinto 4:4; 11:13-15.
18. Anto so nakaukolan ya amtaen na saray manag-anap na katuaan?
18 Saray klero so kabiangan na mundo nen Satanas. (Juan 8:44) Balet satan so sakey a mundon magano lan tawtawen na Dios ed kiwawala. (2 Pedro 3:11-13; 1 Juan 2:15-17) Sirin ipapasakbay na Salita na Dios: “Siopaman, sirin, a malabay a kaaro na mundo so manggagawa ed inkasikato a sakey a kabusol na Dios.” (Santiago 4:4) Ipupulisay na klero itan a pasakbay tan itutultuloy da so mibabali ed saray kurang na pulitika. Ibabaga ra ed saray patumbok da ya onsabi so magmaong a mundo ed panamegley na saray sagpot na pulitiko. Balet satan so palson ilalo, lapud sayan mundo ed leksab nen Satanas so mamapaarap la ed katawtaw to. Sirin saray totoon onnengneng ed sayan mundo a para ed ilalo so napapalikdo. Nakaukolan a nibaga ed sikara so katuaan nipaakar ed no iner so aarapen na mundo tan no anton linawa so nagawa.—Uliran 14:12; 19:21; Mateo 6:9, 10; Apocalipsis 21:4, 5.
19. Panon a say inkamundo na arum a klero so niwalwal ed saray palapagan ed agano niran taon?
19 Say inkamundo na arum a klero so niwalwal ni ed saray palapagan ed agano niran panaon, a singa alimbawa ed saray marutak tan luksurion estiloy-bilay na arum iran klero na TV. Sakey a modernon managsulat-na-kanta so anibukel na sakey a kanta diad titulon: “Kasin si Jesus so Mangisulong na [$10,000] a [relon] Rolex diad Paway To ed Telebisyon?” Say kanta so mangituloy a mangikuan: “Kasin si Jesus so magmaliw a pulitikal sano Sikato so ompawil ed dalin, kasin say komaduan abung To et diad [luksurio] a Palm Springs tan salien to ya iyamut so kablian To?” Niarum, lalon ondarakel a klero so minununong odino manggagawa na homoseksualidad. Anggan natan et say Katolikon Iglesia ed Estados Unidos so mambabayar na minilmilyon a dolyar ed damyos a pambayar ed kasalanan na saray papari diad seksual a panangabuso ed saray ugugaw.—Roma 1:24-27; 1 Corinto 6:9, 10.
20. Akin a saray ariripen na Dios so mantultuloy a mangiwalwal ed too na kaugsan?
20 Saray ontan a gawan-mauges so agnayarin ibaliwala na saray ariripen na Dios noagta nepeg a sikara so niwalwal diad pankaabigan na arum. Say baleg ya ulop na arum a karnero so nepeg a nasalimbengan a manlapud saraman so manalin mangitonton ed sikara a mamuyak ed saray ganggan na Dios. Tan saraman so “mannangis tan mansibek ed amin na saray makapadimlan bengatlan nagagawa” so nakaukolan ya anapen tan natipon ed mananalimbeng a panangiwanwan na Baleg a Pastol, si Jehova a Dios, tan “say maabig a Pastol,” si Kristo Jesus.—Ezequiel 9:4; John 10:11; Uliran 18:10.
21. Anto so itultuloy ya iyabawag na saray Tastasi nen Jehova?
21 Sirin, saray totoo na Dios so agmanabalan mangiyabawag ed panangibales to a sumpad amin ed mundo nen Satanas, a pati say too na kaugsan to, say klero na Kakristianoan. Sikara so mangiyabawag a tekep na ligsa ed anghelikon mensahe diad Apocalipsis 14:7: “Takotan so Dios tan iter ed sikato so gloria, lapud say oras na pangukom to so sinmabi.” Tan isakup da ed sayan panangiyabawag so maganat a pasakbay ed Apocalipsis 18:4 nipaakar ed palson relihyon: “Ompaway ed sikato, baley ko, no agyo labay so minabang ed sikato diad saray kasalanan to, tan . . . mangawat ed kabiangan na saray bakbak to.”
Tepetepet ed Repaso:
◻ Anto so sagmaken na too na kaugsan, tan akin?
◻ Anto so obligasyon na saray ariripen nen Jehova nipaakar ed arum?
◻ Panon a saray totoo nen Jehova so nansiansian bulos a manlapud dala na amin a totoo?
◻ Anto so nepeg tayon gawaen nipaakar ed Babilonia a Baleg?
◻ Akin ya itultuloy tayo so mabiskeg a mensahe tayo nipaakar ed too na kaugsan?
[Litrato ed pahina 21]
Imbaga na saray apostoles ed atagey a korte: “Nepeg min tuloken so Dios a bilang manuley nen saray totoo”
[Litrato ed pahina 22]
Saray masimoon a totoo so nakaukolan a makaamta ed no iner so arapen na mundo tan saray relihyon to