Say Komatlon Milenyo—Kasin Sumpalen Toray Ilalo Yo?
SAY panagbilang so ginmapo. Sakey a di-numeron relo ed arapan na sentro na kultura diad Beaubourg ed Paris, Pransya, ipanengneng to so natitilak iran bilang na segundo. Mantultuloy so agnapatundan panagbilang anggad pegley-labi na Disyembre 31, 1999. Diad satan a panaon, bengatlan atasian ya aminsan labat sakbay na Komon a Panaon tayo so nagawa: say iloloob na balon milenyo, say komatlon milenyo.
“Say 2000 so, ed arum a dalan, ‘sankabalgan ya ebenton’ iilaloan ed awaran na too diad dinan man a panaon,” so isusuhiri na managsukimat ed sosyal a si Bernward Joerges na Berlin, Alemanya. Akin ya ontan lan tatalaranan? Tutal, say taon 2000 so sakey lambengat a petsa ed agus na panaon. Sakey ni, say petsa so bibidbiren labat na saramay manutumbok na kalendaryo ed Sagur. Unong ed Islamikon kalendaryo, say 2000 K.P. so mipetekan legan na Islamikon taon a 1420; unong ed Judion kalendaryo, 5760 A.M.
Ingen diad sakey ya interbio ed peryodiko na Swedish a Dagens Nyheter, si Propesor Joerges so angipaliwawa: “Lapud kolonianismo tan imperialismo, say Griegorian kronolohiya tayo, onggapo ed padisir ya inkianak nen Kristo, so nalmoan ed malaknab a pasen na mundo.” Say taon 2000 sirin so sankamundoan a panagtanda na panaon para ed babaleg a kabiangan na katooan. Ikuan nen Propesor Joerges: “Amin a totoo so mangidalatdat na personal dan bayograpya tan ontan met ed amin a bengatla ni nipaakar ed sayan ebento.”
Ingen amayamay ni so walad kanonotan na dakel nen say basta pantatanda ed panaon. “Saray ankabaleg-kalaknab a proyekto tan saray programa a ‘manmarka’, so mangiter na kabaliksan tan selebraan iyan ebento so nagagawa la ed amin a sakup na bilay tan ed amin a kipapasen ed sosyal,” so binidbir nen Joerges. Inyarum to “a diad interon globo, say baleg iran managgawa-na-proyekto ed negosyo tan ‘saray onsianon manangiparungtal’ so mangukugip tan mangidedesenyo na ankakabaleg iran ebento.” Arum a managparles so angikuan a “sikatayo so nalelener ed karakel na saray libro ed apalabas a siglo. Amin a palapagan so naambagel diad iloob na milenyo. Sakey ya estasyon na TV ed Sagur ya Alemanya so mangipaplano na 24-oras a panangipalapag ed ibubutay-na-agew ed interon dalin.”
Say palapagan so maseguron manggawa na dakel ed kaunoran a nianak ya ugaw ed 1999 tan say ununan nianak ed 2000. Manpilalek iray dyurnalista a mananap ed natitilak iran arum a kapananak ed koma-19 siglo pian tepetan no anto so liknaan ed impanbilay da ed loob na taloran siglo tan duaran milenyo! Liknaen na arum ni ingen ya amin na sayan milenyon kalastogan so mamarngat na gewgew ed lapag a katooan. Unong ed sakey a makapasinagem a pasakbay, diad isabi na pegley-labi na satan a Balon Taon, dakel so manbitkel.
Anggaman ontan iran mapatnag ya inkalablabas, natalosan a satan ya ebento so makapasagyat. Para ed dakel ed magonigon a mundo tayo, say milenyo so impasen a parola na ilalo, dalan a mamaarap ed magmaong ya arapen. Arum so onnengneng ed siensia tan teknolohya a mamawala na arapen a panganan tayo na magmaong tan manbilay na andukdukey, mantrabaho na daiset tan mansiansia ed abung a malaglaem; a saray robot so mangiter ed sikatayo na kawayangan manlapud makapasawan kimkimey; a say kinontrol a fusion et pagmaliwen to’y danum ya apuy. Sikaray mangipapasingawey na arapen a holograph TV, Picturephones, de-kolor iran fax machine, tan tampulan-a-managpatalos iran telepono. Sikara so mankukugip a mansukimat ed Bulan, Mars, odino arum nin mangatatawen iran pinalsa, ya aanapen iray kayamanan da.
Balet aliwan amin so optimistiko. Nanengneng na arum iran managsukimat ed balon milenyo ya onloob ed sakey a panaon na agnakontrol ya ibubulaslas na populasyon ed mundo tan say kageba na kaliberliber. Say polusyon ed dagem so manggawa ed liwang na dalin ya onleluag a greenhouse. Natunaw iray latip na yelo tan saray danum ed dayat so ontagey, a dedelapen to so mabunga, matoon pasen ingen pagmaliwen toray nilaksalaksan ektarya na daralusan a kabueran. Natatakiling da so kageba na ekonomya na mundo, agkaligenan ed pulitika a manenyeg ed saray gobierno tan sosyedad, agnasolbar iran krimen, tan sankaugsan ed amin, say palaspas-a-panagderal na nuklear a mangerep ed amin a bilay na too.
Saray managpasakbay so abayaglan manpapalbeng anggaman makulang ira ed panseguro no nipaakar ed manasingger a milenyo. Ontan met a dakel iran agnanengneng a sengegan so alanor diad dugan panangipasakbay ed arapen. Sakey a propesyonal a maapisyon-ed-arapen so angiyaliling ed satan diad panggalaw na chess: “Sakbay a gawaen ko so ontumbok a kurang onnengneng ak ed dakel iran kurang ya ununa anggad nayarian ko. Balet kayari na kalaban kon manggawa na kurang to, gawaen ko lamet iyan amin manlapud gapo.”
No anto labat so nagawa ed taon 2000, panaon lambengat so makapangibaga. Agkabaliksan na saya, anggaman ontan, a say arapen yo so panduaruwaan. Say Biblia so angiparaan na dakel ya ebidensya a sikatayo et asingger la ed isabi na maslalon makabaliksan a milenyo nen samay sakey a ginmapo ed kulang a dekada la. Sayan manasingger a Milenyo so manalonan tuloy ed anggan dinan iran iilaloan na too! Anto so eksakton kabaliksan na saya? Anto so lalanoren to? Imbitaan mi kayon mangonsidera ed ontumbok ya artikulo tayo tan aralen no anto so ibaga na Biblia.