Siopan Dios So Dadayewen Yo?

DIAD liktob na mundo, onebat iray totoo ed satan a tepet ed nanduruman dalan. Naimano nen apostol Pablo: “Walara so dakel a ‘dirios’ tan dakel a ‘kakatawan,’” tan natan saray dirios a nadadayew so manbilang na nilaksalaksa. (1 Corinto 8:5) Kabat yo ta, anggaman kuan, a dakel a totoo so mandadayew na duman dios a manlapud samay sakey ya isisipen dan dadayewen? Tan amoria yo ta a dakel ya ateista so mas debotado nen saramay manisia ed sakey a dios? Diad anton dalan?

Bueno, sakey a kabaliksan na panagdayew et “ikuentan baleg, anggan alablabas a respeto, galang, odino debosyon.” Diad orihinal iran leguahe ed Biblia, saray salitan panagdayew so mangipasen ed kanonotan a linkor odino ituek ed arap na sakey. Sinononot ed saya, nengnengen tayo no panon a saray totoo et nalingo ed no siopa tan no anton peteg so dadayewen da.

Alaokan a Panagdayew

Imanoey alimbawa na kadaanan iran Samaritanos. Dakel ed saraya so datin estranghero ya impakabat na saray Asiryano ed Palestina pian salatan iray akautibon samploran abalaten a tribo na Israel. Datidati, sikaray walan tinmunbok ed paganon dirios, balet natan nanggunaetan dan aralen so nipaakar ed si Jehova, say Dios na Israel. Kasin intalirak da so daan a relihyon da? Andi. Isalaysay na Biblia: “Unong itan ed gendat iran relihyon da a sikaray onkikiwas. Tan sarayan nasyones so nagmaliw a matakot ed si Jehova, balet say mismon imbolik iran talintao da so apaneknekan a panlilinkoran da.” (2 Arari 17:​40, 41) Kanian saray Samaritanos, anggaman nengneng day mamibidbir ed si Jehova et siansian nanlinkor ed daan a dirios da, sirin manaagamil na sakey a klase na alaokan a relihyon.

Bengatlan mipadpara so agawa sanen impakabat na saray misionero so Romano Katolisismo ed Sagur ya America. Kinumberte da so kaslakan na karaklan, balet singa kadaanan iran Samaritano, say karaklan so ag-akalingwan ed datin dirios da. Kanian, diad Brazil say paganon ritual a voodoo so siansian aagamilen na “saray Kristianos,” a singa ed saray selebrasyon a mangagalang ed kadaanan a dirios, a singa diosa ya Iemanjá. Mipadpara iran bengatla so nagagawa ed arum a Sagur a daldalin ya America.

Niarum ni, say relihyon ya impakabat na saraman a misionero ed Sagur ya America so alaokan a relihyon a mismo. Dakel ed saray doktrina to, a singa Trinidad, impiernon apoy, tan ag-ompatey a kamarerwa, et nanlapud kadaanan a pagano iran relihyon tan pilosopya. Sikaray peteg ya agnaromog ed Biblia. Mipadpara, saray piesta to​—a mangilaktip ed Christmas tan Easter–​so aliwan-Kristianon lapuan.a Kasin posible a mangobserba ed ontan a pagano iran piesta tan manisia ed ontan iran aliwan-Kristiano a doktrina tan siansian mandayew ed Dios na Biblia, ya angikuan: “Nepeg ya anggapoy sananey a dirios mo ed arap ko”? (Exodo 20:3) Petepeteg ya andi!

“Bantayan Yo so Inkasikayo a Manlapud saray Talintao”

Ipasen so sananey a dalan a napapalikdo iray totoo ed pamaakaran na panagdayew. Insulat nen apostol Juan: “Anako, bantayan yo so inkasikayo a manlapud saray talintao.” (1 Juan 5:21) Ngalngali sanlibon nilaksan totoo so nilista bilang kayaryan na Kakristianoan, tan nayarin ibabaga na saraya a mandayew ed parehon Dios a dinayew nen Juan. Ingen, nilasus nilaksalaksa ed sikara so manguusar na imahen na “sasantos,” nen Jesus, tan ed birhen Maria ed panagdayew da.

Walara so nagkalalon makapalikdo a nengneng na panagtalintao. Diad taon 44 K.P., si Arin Herod Agrippa so angiter na mapublikon paliwawa, tan saray totoo so nagmaliw ya ontanlan nikelawan a sikaray inmeyag: “Sakey a boses na dios, tan aliwan ed too!” (Gawa 12:​21, 22) On, sikaray maniidolo ed si Herod, a sikatoy gagawaen a dios. Mipadpara iran bengatla so nagagawa natan. Diad marawal a panaon sanen onaaligwas ed pakayari so Nazismo diad Europa, say eyag a “Heil, Hitler!” so peteg ya eyag na panagdayew. Dakel so mabulos a mibakal tan ompatey parad si Fuhrer a kuanmono sakey a dios, say manangilaban na nasyon. Ingen, kaslakan na saramay manaagamil na ontan a panamaglang so membro na saray iglesia na Kakristianoan!

Sakbay tan kayari nen Hitler, saray arum a politikon papangulo so walaan na mipadparan panangiyalibansa ed inkasikara bilang sakey a manangilaban a pigura tan amilit na naspot a debosyon. Saramay sinmuko pinagmaliw dan dirios irayan lalaki, anggan antokaman so pamaakaran na pormal a relihyon ya akiulopan na “saray managdayew’ odino angganno ibabagan ateista ra. Say dayew ya aawaten na saray manunaan ed karismatikon esport, saray artista na sine, tan arum iran managpaliket a manlapud saray apisyunado et miulibay ed panagdayew.

Panagdayew ed Kuarta

Niarum ni, isipen iray tutukoyen na saray salita nen Jesus sanen inkuanto: “Anggapoy paaripen ed duaran katawan; ta balanglan busulen to so sakey tan aroen so sananey, odino mikasakey ed sakey tan balawen so sananey. Agkayo paaripen ed Dios tan Kayamanan.” (Mateo 6:24) Wala ta so siopaman a kabat yo a membro na relihyon balet say manunan interes to ed bilay et pamadaak ed kuarta? Siopa, sirin, so peteg a panlilinkoran na ontan, say Dios o kayamanan? Pigaran agmananisia so kabkabat yon narel ed maganat-a-panangusil na kuarta? Petepeteg, sikara met so managdayew na kuarta, nayarin lalon masimoon nen dakel iran mananisia.

Insalaysay nen apostol Pablo so parehon prinsipyo sanen insulat to: “Pateyen, yo sirin, so kabiangan yo a wala dia ed tapew na dalin no nipaakar ed panaglawan, inkarutak, kaalakan, mauges a getma, tan inka-agum, a satan so panagtalintao.” (Colosas 3:5) No sikatayoy managum ed sakey a bengatlan maomaong a nausar tayoy amin iran panaon tayo ed pakagamor ed satan, nayarin anggan ed isiwawi ed ganggan kaleganan to, sirin diad sikatayo satan a bengatla so sakey a talintao, sakey a dios. (Efeso 5:5) Diad sananey a sulat, insulat nen Pablo ed pigaran managgaway kaugsan: “Say dios da et eges da.” (Filipos 3:19) No say interon gagala tayo ed bilay et mamaliket ed inkasikatayo, a singa no pepeselen tayo so eges tayo, sirin diodiosen tayoy inkasikatayo. Pigara so kabkabat yo a mandadayew ed sayan nengneng na dios?

On, singa insulat nen apostol Pablo: “Walara so dakel a ‘dirios’ tan dakel a ‘kakatawan.’ ” Tan ed dakel iran kipapasen, saray managdayew da so singa kadaanan iran Samaritano, a manlilinkor ed sakey a dios ed saray salita da tan sananey ed saray kiwas da. Anggaman ontan, diad tua, wala lambengat so saksakey a Dios a makanepegan ed dayew tayo. Kabat yo ta no siopa? Niarum ni, wala so sakey a bengatlan mamasakey ed panagdayew na amin ya arum a dirios a nilikud ed sikato. Anto itan? Nengnengen tayo ed ontumbok ya artikulo.

[Paimano ed leksab]