Siopan Dios so Dayewen?

SIKATAYON totoo so walaan na pakayarin mandayew, ya aliwan singa saray ayayep. Kabiangan iya na inkagawa tayo nanlapulad inkianak. Walaan itayo met na moral a sentido, sakey konsiensian mangiwanwan ed sikatayo ed no anto so susto tan aliwa. Amin tayo so manutumbok ed satan a konsiensia ed nanduruman pamaakaran, tan nisengeg ed satan, dakel so impaiwanwan ed sakey a dios odino ed dirios.

Diad ngalngalin apalabas a duaran siglo, arum iran makabat ed mundo so nansasangsangan ed kiwawala na sakey a makapanyarin-amin a Dios tan Manamalsa. Nen 1844, inyabawag nen Karl Marx so relihyon bilang “say opium na totoo.” Diad saginonor, intarok nen Charles Darwin so teoryan ebolusyon. Insan niwala so rebolusyon nen Bolshevik. Diad Mamabukig a Europa say ateismo so nagmaliw ya opisyal a totontonen na estado, tan sinisian say relihyon so naandipat ed kailalakan na 1917. Ingen agnauman na saratan ya ateista so inkagawa na totoo. Saya so mabitar ed inyemwas na relihyon ed Mamabukig a Europa ya anggad sayan panaon.

Anggaman ontan, unong ya ibabaga na Biblia, dakel iray “natatawag a ‘dirios,’ balanglan diad tawen odino diad dalin, unong a dakel iray ‘dirios’ tan ‘kakatawan.’” (1 Corinto 8:5) Diad inlabas na saray panaon dakel iran dirios so dinayew na katooan. Wadtan iray dirios na inkamabuna, aro, bakal, tan ed alak tan alablabas a liket. Dia lambengat ed relihyon a Hindu et nilaksa iray dirios.

Saray santatlon dirios so alusbo ed Babilonia, Asiria, tan Ehipto, tan ontan met ed Budistan daldalin. Say Kakristianoan met so walaan na “masanton” Trinidad. Say Islam, ya angipulisay ed Trinidad, so “andian na dios noag si Allah.” Nagkalalo ni, anggan saramay manmudmora ed ideya na agnanengneng, makapanyarin-amin a Dios so walaan na dilin dirios da. Alimbawa, diad Filipos 3:19, sasalitaen na Biblia iray totoon apatitan ed materialistikon gegemtan: “Say dios da et say eges da.”

Dadayewen na kaslakan a totoo so dios o dirios na dalin o sosyedad a nianakan da. Saya so mamalesa na saray tepet. Kasin amin a nengneng na panagdayew so ompugta ed parehon pasen​—a singa nanduruman dalan a mamaarap ed toktok na palandey? Odino kasin say mistiko iran dalan na dakel a relihyon so mamapaarap ed desyang​—a singa saray basbas a mamapaarap ed kelas? Kasin walaray dakel a suston dalan na panagdayew odino wala lambengat so sakey? Kasin dakel a dirios so manepeg a dayewen odino wala lambengat so sakey a Makapanyarin-amin a Dios a mankanepegan na nikabkabiig a debosyon tan dayew?

Say Inlesa na Palson Dirios

Saray tepet ed tagey so mankanepegan na maalwar a panangusisa tayo. Akin? Lapud say sankadaanan a nisulat ya autoridad ed relihyon, say Biblia et deskribien to no panon a say sakey a palson dios, ya angusar ed sakey ya uleg, so anagyat ed inmunan atateng tayo ed makadesyang a kurang. Anggan diad sayan agew et naeeksperiensia tayo so makapagonigon iran nansumpalan na kasiliban to. (Genesis 3:1-13, 16-19; Salmo 51:5) Si Jesus, “say Anak na Dios,” so analambit ed satan a rebelden dios a bilang “say manuley na sayan mundo.” Sakey ed saray apostol nen Jesus so anawag ed sikaton “say dios na sayan sistema na bengabengatla.” (Juan 1:34; 12:31; 16:11; 2 Corinto 4:4) Sikato so adeskribe ed Apocalipsis kapitulo 12, bersikulo 9 a bilang “say daan ya uleg, say sakey a tatawagen na Diablo tan Satanas, a mamapalikdo ed interon panaayaman a dalin.” Say sankamundoan ya imperyo na palson relihyon so mandukdukol ed panamanlong nen Satanas.

Si Satanas so manunan manamalikdo. (1 Timoteo 2:14) Say nisipor a pilalek na katooan a mandayew so uusaren ton pamalikdo pian iyalibansa so dakel iran nengneng na dirios​—espiritu na atateng, idolo, saray icon, tan Madona. Imparungtal to ni ingen so panagdayew ed toon dirios, a singa saray makapanyarin manuley, matalonggaring iran heneral, tan saray bantog ed pelikula tan esport. (Gawa 12:21-23) Maabig a sikatayo so manalwar, aralen tan dayewen so alenleneg a tuan Dios, a diad peteg et “ag-arawi ed balang sakey ed sikatayo.”​—Gawa 17:27.

Sirin, siopa so nikadkaduman Dios a nepeg tayon dayewen? Diad apalabas a 3,000 taon et sikatoy deniskribe na salmista na Biblia a bilang “say Sankatagyan . . . , say Sakey a Makapanyarin-amin . . . , Dios ko, a panmatalekan ko,” tan tinawag to ed matalonggaring a ngaran ton​—“Jehova.” (Salmo 91:1, 2) Nipaakar ed sikato et inkuan nen Moises lan akadkauna: “Si Jehova a Dios tayo so sakey a Jehova.” (Deuteronomio 6:4) Tan inaon nen propeta Isaias so impangikuan na Dios a mismo: “Siak si Jehova. Satan so ngaran ko; tan agko iter naani so dilin gloriak ed siopakaman, nisay say dayew ko ed imbolik iran talintao.”​—Isaias 42:8.

Ingagala nen Jehova a Dios a linisan so ngaran to ed amin a balaw ya intarok na palson dios a si Satanas ed satan. Nen taon 1513 K.K.P. et inyilustra to no panon so panggawa to ed saya, sanen inusar to si propeta ton Moises pian iliktar so totoon Israel manlapud panamairap na Ehipto. Diad satan a kipapasen, insaglawi na Dios so ngaran to a Jehova ed sarayan salita: “Ipanengneng ko no siopa ak.” (Exodo 3:14, 15) Alangonen to so inkasikato a sumpad si Paraon na Ehipto, balet inkuan ton inmuna ed sayan marelmeng a manuley: “Nisengeg ed saya et sika so impansiansiak, pian ipanengneng ko ed sika so pakapanyarik tan pian niyabawag so ngaran ko ed interon dalin.”​—Exodo 9:16.

Mipadpara so kipapasen natan. Singa si Paraon nensaman, si Satanas, say dios na sayan mundo so sinmumpad si Jehova a Dios tan sisisilib a mibabakal ed espiritual sumpad saramay totoon manangaro ed inkatunong tan katuaan. (Efeso 6:11, 12, 18) Maminsan lamet, et ingagala na Dios ya itandoro so ngaran to diad arap na isusumpa nen Satanas. Anggaman ontan, sakbay ton ipanengneng so pakayari to diad paneral ed si Satanas tan saray gawa to, ibaki na Dios iray managdayew to pian iyabawag so ngaran To ed amin a dalin. Sayan panagtasi ed ngaran to so makanan kabiangan na tuan panagdayew.

Matukotukoy, imbaga na Dios a mismo a sarayan managdayew so magmaliw a tastasi to, Tastasi nen Jehova, “say baley a ginawak nipaakar ed siak a dili, pian ipatnag da so dayew ko.” (Isaias 43:10-12, 21) Panon dan ipatnag so dayew nen Jehova? Sikaray manpupulong tan manbabangat ed inkalapagan tan ed kabkaabungan, a mangiyaabawag na maong a balita a say Panarian nen Jehova, ya uleyan na Anak to, si Jesu-Kristo, so mangitarok na maando iran bendisyon ed matulok a katooan ed sayan dalin. Kanian, dadayewen da so Dios ya “andi-tunda,” a singa met saray tuan Kristianos nen inmunan siglo. (Gawa 5:42; 20:20, 21)