Siopan Dios So Nepeg Yon Dayewen?

UNUNA, siopa iman so sakey a Dios a sikaton bokbokor so nepeg a nadayew? Say Biblia so onebat ed diretson dalan. Iyabawag na libro na Apocalipsis: “Makanepegan ka na dayew, Jehova, say Dios mi, a mangawat na gloria tan galang tan pakayari, ta pinalsam ya amin a bengatla, tan lapud linawam sikaray linmesa tan apalsa.” (Apocalipsis 4:11) On, si Jehova, say Manamalsa, so say Dios lambengat a makanepegan na dayew tayo. Akin? Ompawil tayo ed satan a tepet ed saginonor. Balet ununa ed amin, tontongen tayoy nipaakar ed arum a dirios a dadayewen na katooan.

Diad Benegan na Amin a Palson Dirios

Anggaman manlinkor iray totoo ed dakel a dirios, say katuaan et amin ya agawaan a dayew ed amin a dirios diad amin a nasyones​—a nilikud ed agawaan a dayew ed si Jehova, say Manamalsa–​so nanserbi ed gagala na saksakey a dios lambengat. Diad anton dalan? Basaen iray salita nen apostol Pablo ed saray Kristianos ed Corinto. Diad satan a syudad dakel iray dirios a nadadayew, a manlapud mabanday ya Aphrodite ya anggad si Aesculapius, say dios da ed panagtambal. Impanengneng nen Pablo, anggaman ontan, a petepeteg a wala lambengat so saksakey a mauges a pakayari ed benegan na amin na saraman a dirios. Insulat to: “Saray bengatlan ibabagat na saray nasyones et ibabagat ed saray demonyos, tan aliwan ed Dios.” (1 Corinto 10:20) On, saray paganon taga-Corinto so nandayew ed saray demonyos.

Saray demonyos so walaan na lapuan ed isusumpa. Say manuna tan sankabalgan ed sikara so anghelikon palsa ya amalikdo ed si Eva ed isumlang ed ganggan na Dios nen saman ed hardin na Eden. (Genesis 3:1-6; Juan 8:44) Diad panggawa ed saman, sayan palsa so sinmumlang a sumpad inkasoberano na Manamalsa. Diad saginonor, nagmaliw ya atawag a Satanas, kabaliksay “Sumusumlang.” Agnambayag, arum ya espiritu iran palsa so akiulop ed sikato ed isusumlang. Sikara met so nagmaliw a demonyos, tan si Satanas so abidbir bilang “say manuley na saray demonyos.” (Mateo 12:24, 26) Diad libro na Apocalipsis, sarayan demonyos so atawag ya “angheles” nen Satanas. (Apocalipsis 12:7) Sirin say panagdayew ed saray demonyos so panagdayew lanlamang ed Satanas.

Si Satanas so walaan na makapataktakot ya impluensya. Inkuan na apostol a Juan a “say interon dalin” so mandukdukol ed pakayari to, tan sikatoy tinawag nen Pablo a “dios na sayan sistema na bengabengatla.” (1 Juan 5:19; 2 Corinto 4:4) Sirin, say panagdayew ed antokaman a dios a nilikud ed si Jehova so petepeteg a dayew ed si Satanas. Diad kamelagmelagan, manserbi itan ed saray gagala nen Satanas ta say getma to et palikdoen iray ananak nen Adan tan si Eva pian onsumlang a sumpad si Jehova. Lapud si Satanas so “mamalikdo ed interon atooan a dalin,” mapatnag a sikatoy walan tinmalona ed kaslakan iran kaso. (Apocalipsis 12:9) Balet aliwa ed amin. Walara nin siansia so nilaksalaksan manggugunaet a mandayew ed si Jehova. Akin?

Saray Bunga na Aliwan Panagdayew

Sakey a bengatla ed pigara, kabat da a say dayew ed dirios a nilikud ed si Jehova et manbili na nagkalalo nen labay dan bayaran. Saray archaeological excavation na kadaanan a Carthage ed Abalaten ya Aprika et akaromog na sakey a pomponan na saray ugugaw. Diad satan et walaray pukepukel na tobonbalon walan imbagat ed Phoenician dios a si Baal. Say panagbagat na ugaw so teriblen bayar ed saramay Cartaginios ya imbayar parad dayew ed si Baal. Saray medieval a Katolisismo so nansinggil na bayar sanen angipakseb na agnasukat a panamairap ed masebeg iran Manag-krusada tan maruksan Inkuisition. Say panagdayew ed dirios na Inca na inmunan-Columbian America et alanor ed ritual ya impamatey ed nilibo.

Diad lalon modernon panaon, nanduruman porma na panagdayew so walan akibiang ed pakyawan a panagpatey ed India, tan sikaray tinmulong ed seryoson politiko iran problema ed Middle East tan Abalaten ya Ireland. Say inka-ignorante, panagparles, tan takot so nepeg met a nilista a kabiangan na bayar a bayaran na too ed pandayew na dakel a dirios to.

Akin a Nepeg a Manlinkor ed si Jehova a Dios?

Diad biek a dapag, say pandayew ed si Jehova so mangitarok lambengat na saray gungguna. Diad sakey ed pigara, sikatoy “Sakey a manbilay ed ando lan ando, ya amalsa ed tawen tan bengabengatla ed satan tan say dalin tan bengabengatla ed satan tan say dayat tan bengabengatla ed satan.” (Apocalipsis 10:6) Sirin, nepeg tayo so mandayew ed sikato lapud sikato so Manamalsa tayo.

Niarum ni, nepeg tayo so mandayew ed si Jehova a Dios lapud saray kalidades to so mangimbita ed sikatayon mandayew ed sikato. Inkuan nen apostol Juan a “say Dios so aro.” (1 Juan 4:8) Say matoor a lakin si Job angikuan “[Say Dios] so makabat ed puso tan mabiskeg ed pakayari.” (Job 9:4) Nankanta si Moises ed sikato: “Say Dampay, ayadyari so kimey to, ta amin iray dalan to so hustisya. Sakey a Dios a napanmatalkan, ya anggapo so kaugsan ed sikato; sikatoy matunong tan maptek.” (Deuteronomio 32:4) Siopa so manduwaruwan manlikor ed ontan a Dios?

Nagkalalo ni, ibabaga na Biblia: “Say maridios a debosyon so makagungguna ed amin a bengabengatla, unong a mamenben na sipan na bilay natan tan ed saman so onsabi.” (1 Timoteo 4:8) Agaylan tua iya! Labay nen Jehova no antoy maabig parad katooan. Intarok to so dalin bilang marakep a panayaman parad palsa to, tan angitarya na daakan a probisyon pian maliket so panagbilay. Anggaman ed isumlang na too, intultuloy na Dios a walan sinustine so bilay dia ed dalin, ya itatarok ya amin a materyal a kakaukolanen na katooan unong a “pabutayen to so banwa ed saray mauges tan maong tan papelagen to so uran ed matunong a totoo tan agmatunong.”​—Mateo 5:45.

Balet say “sipan na bilay natan” so manpatuloy. Say panaglingkor ed Dios so makapenek tan makasumpal. Satan so akadesinyoan tayon gawaen. Tan tulongan na Dios iramay sitotoor a manlikor ed sikato ya ontalona ed bilay. Diad panamegley na Biblia, sikatoy angiter na giya parad walad kasuloan, sanasawa, ananak​—totoo ed amin a nengneng na bilay. Sikatoy angiter na makapanisia, praktikal a kakabatan pian ontulong ed amin a situasyon pian naresolbe tayoray problema ed panagbilay bilang ag-ayadyarin katooan ed sakey a mundo a walad silong na impluensya nen Satanas. No dayewen tayo so Dios ed dalan a mamaliket ed sikato, makapangayaga tayo ed “deen na Dios a manalona ed amin a pakatalos.”​—Filipos 4:7.

Makanakana, met, so say “sipan na bilay . . . ya onsabi.” Imbaga nen Jesus ed si Pariseon Nicodemus: “Ta onta la so panangaro na Dios ed mundo ya imbaki to so bogbogtong ya Anak to, pian amin a manaagamil na pananisia ed sikato so agnatawtaw noag ingen nawalaan na andi-anggaan a bilay.” (Juan 3:16) Andi-anggaan a bilay! Anton dirios a nilikud ed si Jehova so makapangisipan na ontan a bengatla tan insan sumpalen so sipan to? Say kaunoran a kipapasen na saramay makawat na satan ya engraden regalo so adeskribe ed Apocalipsis: “[Say Dios] punasen to so amin a lua ed kamataan da, tan anggapo la so patey, nisay pannangis nisay pandageyem nisay ot-ot. Saray gendat a bengatla so naandi la.” (Apocalipsis 21:4, 5) Peteg, saray ilalo ed bilay ya onsabi so nepeg a manggawa ed sikatayon manlabay a manlinkor ed si Jehova!

Siopan Dios, sirin, so nepeg a dayewen tayo? Si Jehova lambengat, say Manamalsa. Diad amin a dirios, diad sikato lambengat ya onaplika iray salitan: “Baleg tan makapakelaw iray kimey mo, Jehova a Dios, say Makapanyarin-amin. Matunong tan tua iray dalan mo, Arin andi-geter. Siopan peteg so ag-ontakot ed sika, Jehova, tan mamagloria na ngaran mo, ta sika a bokbokor so matoor? Ta amin a nasyones so onsabi tan mandayew ed arap mo, lapud saray matunong a ganggan mo so walan agawan nipatnag.” (Apocalipsis 15:3, 4) Agaylan makabat iramay onebat ed simbawa na salmista”: “O gali dia, mandayew tayo tan ontuek; a mantalimokor ed arap na Manamalsa tayo si Jehova”!​—Salmo 95:6.

[Litrato ed pahina 6]

Pigara ed saray dirios nen Satanas so walan anagyat ed katooan a mandayew

[Litrato ed pahina 7]

Saray ilalo ed bilay ya onsabi so nepeg a manggawa ed sikatayon manlabay a manlinkor ed si Jehova