Pasesegen so Sinansakey Unong a Manasingger so Agew
“Manpasesegan so sinansakey, unong a manasingger so agew.”—HEBREOS 10:25.
1, 2. Anto so manasingger ya agew, tan anto so nepeg ya awawey na totoo nen Jehova?
SARAMAY mibibiang natan a mangikuan, “Gala tan inumen so danum na bilay,’ so ag-mangibibiig ed inkasikara. Unong a manasingger so baleg ya agew a pananalo nen Jehova, iyaplika da so Biblikan konsehon: “Maniimanowan itayo ed balang sinansakey manaayatan ed aro tan maabig iran kimey, ya agtayo paulian iray panmomoyong tayo, a singa ugali na saray arum, noag ingen manpapasesegan, ta nagkalalo la lapud nanengneng yo a manasingger so agew.”—Hebreos 10:24, 25.
2 Angipropesiyay Kasulatan nipaakar ed satan ya “agew” a bilang “agew nen Jehova.” (2 Pedro 3:10) Unong ta si Jehova so Sankatageyan, say makapanyarin-amin, anggapoy posiblen agew ya ontalinggaring ed agew to. (Gawa 2:20) Kabaliksan to so kialangon na inkasoberano to a bilang Dios ed sankatalbaan. Satan ya agew na agnaparaan a kaimportansya so manasingger la.
3. Panon a say agew nen Jehova so manasingger parad saray Kristiano ed inmunan siglo, tan anto met ed sikatayo natan?
3 Imbaga nen apostol Pablo ed saray Kristiano ed inmunan siglo na Komon a Panaon tayo a say agew nen Jehova so manasingger la. Sikaray onnenengneng ed isabi na satan ya agew, balet ed abenegan, satan ya agew so sobra nen 1,900 taon. (2 Tesalonica 2:1-3) Anggaman ed saman a katuaan, sikaray napaseseg lapud satan ya agew so peteg ya onsabi, tan no saray Kristiano so mansiansian onpeket ed saman a pananisia, sikaray onloob ed satan ya abenditon agew. (2 Timoteo 4:8) Nen saman, satan ya agew so anengneng a manasingger la. No nipaakar ed sikatayo natan, say agew nen Jehova so peteg ya inmasingger la. Amin na makapelaw iran kasumpalan na propesiya na Biblia so mitunusan ed sayan maligsan-gayagan katuaan. Saginonor, say ngaran na Dios tayo, si Jehova, so nialangon ed andi-geter.—Lucas 11:2.
Apaseseg na say Madibinon Ngaran
4. Unong ed Apocalipsis 19:6, siopa so magmaliw ya Ari, tan panon a natalosan so ngaran to?
4 Say madibinon ngaran so nepeg a magmaliw a bengatlan paninteresan na entiron atooan a pamilya. Ibaga na Today’s English Version: “Dayewen so Dios! Ta say Katawan, a Makapayarin-amin a Dios tayo, so Ari!” (Apocalipsis 19:6) Unong ed koma-20 siglo a patalos na Biblia, sikato so Katawan, say makapanyarin-amin a Dios. Satan a bersyon, tan ontan met ed dakel nin arum a modernon bersyon, so agmangiter ed ngaran na madibinon Sakey a ginmapon nanuley a bilang Ari. Anggaman ontan, say madibinon ngaran so mangilaktip ed paneyag a “Halellujah!” (“Idayew si Jah” odino, “Idayew si Jehova”) ya aromog ed Revised Standard Version, say New International Version, tan patalos na Moffat ed Apocalipsis 19:6. Kaslakan ed Komon a Panaon tayo, say madibinon ngaran so manuna ed amin a niyamot ed saray patalos na Biblia. Unong a nanengneng tayo, anggaman ontan, satan a ngaran so walan baleg a panamaseseg ed totoo na Dios, ed namparan kadaanan tan modernon panaon.
5, 6. (a) Akin a nakaukolan ya amtaen nen Moises so ngaran na Dios ya ilalaman to? (b) Anto so nayarin epekto ed saray Israelitas sanen indanet nen Moises so madibinon ngaran?
5 Nanonotan tayo a sanen imbaki na Sankatageyan a Dios si Moises ed totoo na Israel ya inaripen ed dalin na Ehipto, say tepet a no siopa so angibaki ed sikato so linmesan mismo ed kaisipan na totoon angibakian ed si Moises. Inilaloan nen Moises a saray Judio a maniirap so malabay a mangamta ed ngaran na Dios ya ilalaman to. Diad sayan bengatla nabasa tayo ed Exodo 3:15: “Aminsan lamet ya imbaga na Dios ed si Moises: ‘Onya so ikuan mo ed ananak na Isarel, “Si Jehova say Dios na atateng yo, say Dios nen Abraham, say Dios nen Isaac tan say Dios nen Jacob, so angibaki ed siak ed sikayo.”’ Saya so ngaran ko ed ag-ageteran a panaon, tan saya so pakanodnonotan ed siak ed saray amin a kailalakan.”
6 Sanen nidanet iyan inpormasyon ed sikara, nayarin alikna na saray Israelita ya apaseseg a maong. Say kililiktar da so apaseguro na tua lambengat a Dios, si Jehova. Tan agaylan walan makapaseseg a nawalaan na ilalon mikabat dingan ed Dios sano idemostra to so kabaliksan na personal a ngaran to—ya agmaapaatagey ya iyaarawiy inkasikato!—Exodo 3:13; 4:29-31.
7. (a) Panon tayon kabat a saray babangatan nen Jesus so makabat dingan na madibinon ngaran? (b) Panon a nipulisay so ngaran na Dios?
7 Saray babangatan met na Katawan a Jesu-Kristo so abalbaleg met ya apaseseg na say madibinon ngaran, Jehova, tan kitatalindegan to. (Juan 17:6, 26) Legan na mangaraldalin a ministeryo nen Jesus, peteg ya agto inpulisay so madibinon ngaran, tan agto gagalan iyunay dilin ngaran to, Jesus. Dia lambengat ed kayari na inggapo na nipasakbay ya apostasya a say madibinon ngaran a niarawi a manlapud tuan Kristianon pananisia, on, ngalgalin naekal a manlapud Kristianon pantotongtong. (Gawa 20:29, 30) Kapigan man a say ngaran na Anak na Dios so ginmapon naitdan na babaleg ya importansya, a magmaong nen Ama, saray mankuan a Kristiano so makaromog a say dayew da ed Ama so lalon andian na tutukoyen, mankulang na inkamaapit na pamilya, tan sirin agmakapaseseg.
8. Anto so mantultuloy ya epekto ed totoo na Dios diad impangiadapta ed ngaran a Tastasi nen Jehova?
8 Sirin, satan so rason ed agniretraton gayaga sanen say International Bible Students a nilaktip ed Watch Tower Society so angadapta na ngaran a Saray Tasi nen Jehova nen 1931. Aliwa lambengat itan a maligsan-gayaga noagta nagkalalon makapaseseg. Diad sayan bengatla, say balobalo ni ya angaranan iran estudyante na Biblia so makapanpasesegan ed sinansakey.—Ipareng so Isaias 43:12.
9. Anto so liknaan na tua iran Kristiano nipaakar ed samay Sakey a sikaray Tastasi?
9 Lapud saya, aromog a matukoy na tua iran Kristiano natan ya iparungtal so Sakey a nipasakbayan dan Tastasi, unong a ginawa nen Jesu-Kristo a Pangulo da sanen wadia ed dalin. (Apocalipsis 1:1, 2) On, sikatoy bibidbiren da lambengat a bilang sakey a manggaran a Jehova.—Salmo 83:18.
Napnoan na Gayaga tan Masanton Espiritu
10-12. (a) Anto so nayarin epekto na aktibon puersa ed saray patumbok nen Jesus? (b) Panon so labay a pangitrato ed sinansakey na say gayaga-apuyanan iran Tasi nen Jehova?
10 Imbaga nen Jesu-Kristo ed saray mamapatanir iran salita to ed saray apostoles to: “Onla kayo sirin a manggawa na babangatan ed amin a nasyones, a bautismoan yora ed ngaran na Ama tan Anak tan ed masanton espiritu, ya ibabangat ira a mangunor ed amin a bengabengatlan inganggan ko ed sikayo. Tan, nia! Wala ak ed sikayo ed amin na saray agew ya anggad anggaan na sistema na bengabengatla.”—Mateo 28:19, 20.
11 Imanoen a say balobalo iran Kristiano so bautismoan ed ngaran na masanton espiritu. Sayan masanton espiritu so aliwan sakey a persona noagta aktibon puersa nen Jehova a Dios, ya uusaren To ed panamegley nen Jesu-Kristo. Diad Pentecostes, si Jehova a Dios, ed panamegley nen Jesus, et nikalbo iyan aktibon puersa ed dedikado iran patumbok nen Jesu-Kristo. (Gawa 2:33) Sikaray napnoan na sayan masanton espiritu, tan sakey ed saray balikas, odino bunga, na masanton espiritu et gayaga. (Galacia 5:22, 23; Efeso 5:18-20) Say gayaga so sakey a makapasagyat a kalidad. Saray babangatan so napno na gayaga na masanton espiritu. Say pikakasin sinalita nen apostol Pablo so sankamatukoyan: “Komon say Dios a mangiiter na ilalo so mamano ed sikayo a tekep ed amin a gayaga tan deen diad pananisia yo, pian ondaak kayo ed ilalo a tekep na pakayari na masanton espiritu.”—Roma 15:13.
12 Napnoan na maligsan-gayagan espiritu, iray Tasi nen Jehova natan, a pati say “baleg ya ulop,” so malabay, on, a napakiwas, a pasesegen so sinansakey ed leet na sayan agmakaaron sistema na bengabengatla. Mitukoyan, sinalita nen apostol Pablo “so panpapasesegan.”—Apocalipsis 7:9, 10; Roma 1:12; 14:17.
Walaan na Katunongan a Napaseseg
13. Anto iray rason a sikatayoy napaseseg tan mamaseseg ed sinansakey?
13 Naromog so inkasikaran walad leet na sayan sistema na bengabengatla, a say sumusumpa na amin a bengatla ed matunong so manuley tan dios ni ingen, labay na saray Kristiano a pasesegen so sinansakey ed limog na sankamundoan a Kristianon kongregasyon, a pakikiwasen na masanton espiritu nen Jehova a Dios. (Hebreos 10:24, 25; Gawa 20:28) Walaan tayo na katunongan a napaseseg. On, agaylan misalamat tayo a walaan na suston pikakabat ed si Jehova tan ed Anak To tan ed aktibon puersan uusaren da, salanti, say masanton espiritu! Agaylan misalamat tayo ed ilalon iiter da! Say panagdayew tayo sirin so napnoan na gayaga. Imbaga na apostol Pablo ed saray Kristiano ya angisulatan to ed sulat a sikaray manpapasesegan ed sinansakey tan mampabaleg ed sinansakey ed sankaabigan a pananisia ra. Gawaen da iya ‘nagkalo ta mapiguratibon nenenengneng da a manasingger la so agew.’ Niarum ni, sano saray politikon pakayari na sayan mundo so mangekal ed amin ya Inkakristiano, a pati amin a palso iran relihyon, say kipapasen so mankaukolan na nagkalalon panamaseseg tayo ed sinansakey.
14. Siopa so nepeg a manpapasesegan ed sinansakey, tan panon?
14 Legan a mangitotonton iray mamatatken ed panamaseseg ed pulok ed sinansakey iran kongregayson da, amin iray Kristiano et mankaukolan a pasesegen so sinansakey, unong ya isimbawa na Hebreos 10:25. Diad tua, saya so sakey a Kristianon kakaukolanen. No sikayo so sakey a membro na kongregasyon, kasin mangiiter kayo na onyan panamaseseg? Nayarin ontepet kayo, ‘Panon kon gawaen? Anto so nagawaan ko?’ Ununa, dia lambengat ed kiwala yo ed saray pantitipon tan diad panuporta yo ed Kristianon areglo, agta napaseseg iray arum ya agagin lalaki tan bibii, unong a sikayon mismo so mipadparan napaseseg sano nanengneng iray arum a sitotoor ya onaatendi ed saray miting ed kongregasyon? Napaseseg met ira ed alimbawa yo na matoor a panagsungdo. Diad pantutuloy yo ed Kristianon kurso anggaman ed saray problema tan kairapan ed bilay, ya ag-untunda, sikayo so makapangiletneg na sakey a makaimpluensyan alimbawa.
Sumpaen so Kadismaya a Manlapud Diablo
15. Akin a say Diablo so walaan na “baleg a sanok,” tan sumpa ed siopa?
15 Aliwan sikatayo lambengat so makaamta ed satan ya agew nen Jehova ya asingger la. Si Satanas a Diablo amta to met. Ibabaga na Apocalipsis 12:12 ed sikatayo a wala natan so irap ed dalin “lapud say Diablo so inmakseb ed sikayo, a walaan na baleg a sanok, ta amta ton antiktikey la so panaon to.” Unong ya ipanengneng na Apocalipsis 12:17, say baleg a sanok to so niderektan sumpa ed saramay “ontutulok ed saray ganggan na Dios tan walaan na kimey a panagtasi ed si Jesus.” Anggapoy panduwaruwa—labay na Diablo a dismayaen tayo! Tan kabat to no panon a gawaen itan. Amta toray kakapuyan tan problema tayo, tan sikatoy angimpluensya ed saraya.
16. Akin ya usaren nen Satanas so kadismaya a bilang ayura?
16 Akin ya usaren na Diablo so pakadismaya bilang ayura? Lapud lawas ontalona itan. Anggan say toon nansungdo ed mabiskeg ya isusumpa tan panamasegsegang so nayarin napelag ed kadismayaan. Labay nen Satanas ya angaten si Jehova a Dios tan manalin paneknekan a sarag ton iyarawiy totoo a manlapud panlinkor ed Sikato. (Uliran 27:11; ipareng so Job 2:4, 5; Apocalipsis 12:10.) No nadismaya to itayo, nayarin mamatayamtayam ed sikayo diad serbisyo ed Dios; nayarin patundaen to kayo ingen, a magmaliw ya inaktibo ed panagpulong na maong a balita na Panarian.—2 Corinto 2:10, 11; Efeso 6:11; 1 Pedro 5:8.
17. Panon a saray negatibo iran epekto na kadismaya so mapatnag ed agew nen Moises?
17 Saray negatibon epekto na kadismayaan so naimano ed kipapasen na saray Israelita ed kadaanan ya Ehipto. Kayarin nansalita si Moises ed si Paraon, saman a masibeg so baleg a tuloy ton inaruman iray pabelat ed sikara tan panamairap to ed sikara. Imbaga na Dios ed si Moises a paseguroen iray Israelita a Sikatoy peteg a mangiliktar ed sikara, a gawen iran totoo To, mangitarok na kibulos da, tan itarok ira ed dalin ya insipan. Nansalita si Moises ed sayan resulta ed ananak na Israel. Balet ireport na Exodo 6:9: “Ag-ira tinmalineng ed si Moises lapud inkadismaya tan ed mairap ya inkaaripen.” Ya anggad kinumbensi nen Jehova si Moises tan pinaseseg to, sayan reaksion so anismaya ni ed si Moises ed panlabay a mitongtong ed si Paraon unong a niganggan ed sikato.—Exodo 6:10-13.
18. Akin a wala so pankaukolan a baleg ed totoo na Dios a sumpaen so kasdimayan pawawalaen na Diablo?
18 Kabat a maong nen Satanas a Diablo so negatibon epekto na kadismaya ed aripen na Dios. Unong a kuan na Uliran 24:10: “Kasin nipanengneng yo so inkasikayon adismaya ed panaon na kairapan? Say pakayari yo so nabawasan.” Lapud sikatayo so manbibilay ed ontanlan asingger a panaon na anggaan, nakaukolan tayon magmaliw a makpel tan mabiskeg ed espiritual. Mauges a sikatayoy walan mankontento ed ag-inkayadyari tayo, kakapuyan, tan saray lingo a nayarin mangamper ed sikatayo; balet diad panalin usaren irayan lingo, kaukolan tayo so tulong.
Mabiskeg ya Onsaral ed Bagat nen Kristo
19. Anto so ontulong ed sikatayon onsumpa ed kadismaya, tan akin?
19 Sakey a baleg a tulong nipaakar ed saya so dondon ya intarok nen Jehova diad panamegley nen Jesu-Kristo. Magmaliw tayon manalo diad isasaral a mabiskeg ed dondon. Mapeligro a bawasan iyan probisyon. On, sikatayon siansia so nalingo, odino mankasalanan, basta sikatayoy ag-ayadyari. Balet agnakaukolan a nadismaya tayo tan ontunda, a liliknaen ya anggapo so ilalo, tan sirin napelag ed patit nen Satanas. Kabat tayo a walaan tayo na nagnap a bagat parad kasalanan. Say dondon so makapangekal na saray kasalanan. No sikatayoy kabiangan na “baleg ya ulop,” nepeg a nawalaan tayo na nagnap a pananisia tan talek a naurasan tayoray kawes tayo tan napaputi ira ed dala na Kordero.—Apocalipsis 7:9, 14.
20. Panon ya ipanengneng na Apocalipsis 12:11 a say baleg a manag-dismaya, say Diablo, so natalonaan?
20 Diad Apocalipsis 12:10 si Satanas so adeskribe a bilang “say manangidalem na agagi tayo . . . a mangidadalem ed sikara ed agew tan labi ed arap na Dios tayo.” Panon tayon natalonaan so ontan a mauges a manangidalem tan balbaleg a manag-dismaya? Say bersikulo 11 na satan a kapitulo so mangiparungtal na ebat: “Tinalo ra lapud dala na Kordero tan lapud salita na inpantasi ra, tan agda inaro so saray kamarerwa ra anggan ed arap na ipapatey.” Kanian saray totoo nen Jehova so nepeg a manpatuloy a nagnap ed talek ed dondon a bagat, say dala na Kordero. Manpabiskeg ed panamaseseg a manlapud panagtasi, maparanay a mibiang a manginabang ed maong a balita na Panarian na Dios ed balang sakey a nayarian yo.
21. Panon ya agnamamamtaan a mibiang tayo ed kimey na Diablo ed pakadismaya ed agagi tayo?
21 No maminsan, agnamamantaan, a sikatayoy nayarin mibiang ed kimey na Diablo diad panismaya ed agagi tayo. Panon? Diad pagmamaliw a masyadon mabalaw, pagmaliw a makaukolan, odino pagmaliw a masyadon matunotunong. (Eclesiastes 7:16) Amin tayo so walaan na kakulangan tan kakapuyan. Agtayo onkiwas ed sikara a singa gagawaen na Diablo. Imbes, sikatayoy mitongtong a makapaseseg ed saray agagi tayo tan totoo nen Jehova bilang sakey ya organisadon grupo. Labay tayo so mantultuloy a manpabiskeg ed sinansakey tan sirin onarawi ed pakakapuy ed sinansakey.
Manpaseseg unong ya Asingger so Agew
22, 23. (a) Akin ya agtayo labat basta isaral ed saray mamatatken a magmaliw a lapuan na panamaseseg? (b) Panon a saray manangasikaso ed Kristianon kongregasyon et napaseseg?
22 Gawaen tayon mapekder a desisyon a lawas manpapasesegan ed sinansakey unong ya asingger la so agew. Pasesegen iray arum diad panamegley na matoor ya alimbawa tan makapabiskeg iran salita yo. Aligen si Jehova tan say Katawan a Jesu-Kristo ed sarayan bengatla. Agyo labat ipasakbat ed saray mamatatken ed kongregasyon a magmaliw a lapuan na panamaseseg. Akin, anggan saray mamatatken a mismo so mankaukolan na panamaseseg. Walaan ira na kakapuyan tan kalilingo a singa ed arum na pulok, tan sikara so onarap ed pareho iran problema ed pangipaparaan ed saray pamilya da ed sakey a nabubulok a mundo. Niarum ni ed satan, walaan ira na kapagaan parad saray kongregasyon unong ya impaneskribe nen Pablo. (2 Corinto 11:28, 29) Wala so mairap a kimey—kaukolan da so panamaseseg.
23 Nayarin balbaleg a tuloy yon napaseseg iramay walad kipapasen na panasikaso ed Kristianon kongregasyon diad pikoopera ed sikara. Sirin totomboken yo so simbawa ed Hebreos 13:17: “Ontulok ed saramay mangitonton ed limog yo tan pasakup, ta sikaray manbabantay ed kakamarerwa yo a singano mikuentaan; a gawaen da iya a tekep na gayaga tan aliwan kadismaya, ta saya so makaderal ed sikayo.”
24. Diad sayan agew na kadismaya, anto so nepeg tayon gagawaen, tan akin?
24 Manbibilay tayo ed agew a kadismaya. Saray puso na totoo so peteg a walaan na takot tan ilalo ed saray bengatlan onsabi ed atooan a dalin, unong ya impasakbay nen Jesus. (Lucas 21:25, 26) Tekep na dakel iran problema na panaburido tan dismaya, magmaliw a “makapaseseeg ed sinansakey, tan nagkalalo lapud nanengneng a manasingger so agew.” Tomboken so maabig ya alimbawa nen apostol Pablo ed 1 Tesalonica 5:11: “Manbibilinan ed sinansakey tan manpapaalageyan ed sinansakey, unong a tuan gagawaen yo la.”
Panon so Pangebat Yo?
◻ Akin a nepeg a saray Kristiano so manpapasesegan ed sinansakey, a nagkalalo nen gendagendat?
◻ Panon a say pikakabat ed madibinon ngaran et makapaseseg ed totoo nen Jehova?
◻ Diad anto iran dalan ya indibidual tayon napaseseg so sinansakey?
◻ Akin ya onarawi tayo ed pibiang ed kimey na Diablo ed panismaya ed agagi tayo?
[Litrato ed pahina 6]
Saray mamatatken so mangipapangulo ed panamaseseg ed pulok ed saray kongregasyon da