Antoy Gawaen Nipaakar ed Pakakadismaya?

PANON a nalabanan na sakey a too so pakakadismaya? Nitetepet iya ed pigaran managbiahen manangasikaso, a regular ya ombibisita ed saray kongregasyon na Tastasi nen Jehova. Saray ebat da so makatulong ed sikatayon aralen iray pakadismayaan tan saray remedyo ed sayan kipapasen a mangapekta ed siopaman a Kristiano.

Mas ni so nakaukolan nen say panganalisa pian arapen so pakadismaya, balet ta saray sintoma so nayarin laktipen toy kakulangay interes a manpikasi odino personal a panagaral, iregular ed pipiaral, andian na ligsa, tan ibetel ni ingen ed saray kaulop a Kristiano. Balet, sakey ed mapatnag iran tanda et say ikapuy na seseg ed panag-ebanghelyo. Usisaen tayo pa iray sintoma tan konsideraen so pigaran remedyo.

Pakadismaya ed Panag-ebanghelyon Kimey Tayo

Sikakabat si Jesu-Kristo ed saray kairapan a nisiglaot ed ganggan a panggaway babangatan. (Mateo 28:19, 20) Imbaki to iray patumbok to a singa “karnero ed nanleleetan na saray lobos,” ya amta ton say panagpulong a kimey da so kapasegsegangan da. (Mateo 10:16-23) Ingen, aliwa iyan rason a pakadismayaan da. Diad tua, saray lingkor na Dios a masimoon a manmamatalek ed si Jehova so mabetbet a napapabiskeg lapud panamasegsegang.​—Gawa 4:29-31; 5:41, 42.

Anggano agmanasagmak na pirmin panamasegsegang iray babangatan nen Kristo, aliwan naynay a paborabli so pangaawat ed sikara. (Mateo 10:11-15) Ontan met, aliwan naynay a mainomay so kagagawa natan na panagpulong a kimey na Tastasi nen Jehova.a Parad dakel a totoo, say panisia ed Dios so personal a pamaakaran ya agda labay a pantongtongan. Aglabay na arum so misiglaotan ed relihyoson organisasyon a ditan et walaan iray panangidumaduma. Andi duaruwan say agpananginenen, kakulangan na resulta, odino nanduruman problema so nayarin pirmin pakadismayaan. Panon a natalonaan irayan babeng?

Gamoran so Magmaong Iran Resulta

Say gayagan nalilikna tayo manlapud ministeryo tayo et walay pisiglaotan to’d saray resultan nagagamoran tayo. Panon tayo sirin a nawalaan na lalon mabungan ministeryo? Bueno, sikatayo so “sumisigay na totoo.” (Marcos 1:16-18) Onlan mansigay ed labi iray sumisigay ed Israel nensaman a diad satan et dakel so nasiraw dan sira. Nepeg tayo met ya analisaen so teritorya tayo ta pian onla itayon “mansigay” sano maslak a totoo et walad abung tan lalon maawat ed mensahe tayo. Nayarin saya et diad labi, diad sampot simba, odino diad arum nin panaon. Unong ed sakey a managbiahen manangasikaso, praktikal itan ed saray lugar a saray totoo so mantratrabaho a sanagew. Inkuanton say panagpulong ed labi so mabetbet a mamapawala na alay abig iran resulta. Makatulong met ed sikatayo so panagpulong panamegley na telepono tan ed impormal a paraan pian dakel so nakatongtong tayon totoo.

Say inkaanos ed ministeryo so mamawala na maabig iran resulta. Diad Mamabukig a Europa tan diad pigaran bansa ed Aprika, onaaligwas a tuloy so kimey ed panagpulong nipaakar ed Panarian, tan nanresulta iya ed maabig iran indaak. Mipadpara, dakel a kongregasyon so napoporma la ed saray lugar ya abayag lan nipasen ya agmabunga odino anggan diad mabetbet ni ingen a natatayek a teritorya. Balet, panon to no andian na maabig iran resulta so kimey mo?

Pansiansiaey Maabig ya Awawey

No sankanonot tayon maong iray kalat ya inletneg nen Jesus, satan so ontulong ed sikatayon agnadismaya diad arap na agpananginenen ed ministeryo. Kaliktan nen Kristo a saray babangatan to so mananap ed saray makanepegan, aliwan pian manggaway inkalapagan a panangomberti. Diad aminpigan inkagawa et impabitar to a dakerakel a totoo so agmangawat ed maong a balita, a singa kaslakan ed saray Israelita et agtinmalineng ed saray propeta nensaman.​—Ezequiel 9:4; Mateo 10:11-15; Marcos 4:14-20.

Say “maong a balita na Panarian” so inawat tekep na pisasalamat na saray indibidual a “sinononot ed espiritual a pankaukolan da.” (Mateo 5:3; 24:14, NW) Kaliktan da so manlingkor ed Dios ed paraan ya indatak to. Kanian, saray resulta na kimey tayo so misiglaotan a nagkalalo ed kipapasen na puso na totoo nen say ed inkamaong tayon mangipresenta na mensahe. Siempre, nakaukolan tayon gawaey anggaay nayarian tayo pian makapainteres so maong a balita. Ingen, saray resulta so mandependi ed Dios ta inkuan nen Jesus: “Anggapo so too a makadago ed siak, likud no say Ama ya angibaki ed siak sikato so yasingger to.”​—Juan 6:44.

Nipapakabat so ngaran nen Jehova lapud panag-ebanghelyon kimey tayo. Ondengel man odino andi so totoo, ontulong so panagpulong tayo ed kapasantos na masanton ngaran nen Jehova. Niarum ni, diad panamegley na panag-ebanghelyon kimey tayo, napaneknekan tayo a sikatayoray babangatan nen Kristo, tan pribilihyo tayo so panginabang ed sankaimportantian a kimey a nagagawa ed panaon tayo.​—Mateo 6:9; Juan 15:8.

Pakadismaya tan Saray Siglaotan

Walaray siglaotan na too, balanglan diad pamilya odino diad loob na kongregasyon, a nayarin pakadismayaan. Singa bilang, walay liknaan a sikay agnatatalosan. Say ag-inkayadyari na saray kapananisiaan so nayarin manismaya met ed sikatayo. Makatulong lamet a baleg so Kasulatan ed sikatayo.

“Say intiron panlilimog na agagi” ed sankamundoan so tugyopen na baleg a maespiritual a pamilya. (1 Pedro 2:17) Balet say liknaan a kabiangay nankakasakey a totoo so naumas sano onlesa iray kairapan lapud agpantutunosan ed personalidad. Mapatnag, apektado met iray inmunan-siglon Kristiano ed ontan iran problema, lapud aminpigan pinanonotan ira nen apostol Pablo a manbilay a mankakasakey. Alimbawa, binilin to so duaran Kristianon bibii​—si Euodias tan Sintique​—a solbaren so problema ra.​—1 Corinto 1:10; Efeso 4:1-3; Filipos 4:2, 3.

No onia so problema, panon tayon napapetang lamet so masimoon a panangaro ed agagi tayo? Diad pannodnonot tayon si Kristo so inatey parad sikara tan sikara met, a singa sikatayo, so mangaagamil na pananisia ed dondon bagat to. Nodnonoten tayo met a dakel ed saray agagi tayo so akaparaan ya onalig ed si Jesu-Kristo diad pangirisga ray bilay da parad sikatayo.

Pigaran taon lay apalabas, diad Paris, Pransya, makpel ya inegnaan na sakey a kalangweran a Tasi so suitcase a mankargay bomba ya inggaton ed paway na Kingdom Hall. Binatik ton palasor so pigaran nantutumbokan a takayan sakbay ton imbuntok ed fountain, a diman sinmabog. Sikatoy tinepetan no antoy amakiwas ed sikaton irisgay bilay to ed ontan a dalan, inyebat to: “Amoriak a delikado so bilay mi. Kanian inisip kon magmaong no bukor ko labat lay ompatey nen say amin mi so ompatey.”b Agaylan bendision so pakawalaan na ontan iran kaulop a mabulos a manumbok a maapapit ed alimbawa nen Jesus!

Niarum ni, nadalepdep tayo so pantutulongan ed limog na Tastasi nen Jehova a walad saray panangipangawan a kampo legan na Guerra Mundial II.c Agano ni et pinansiansia na saray agagi tayo ed Malawi so integridad da bilang matoor a tuan Kristianos. Agta say kanonotan a saray agagi tayo ed lokal a kongregasyon so onkiwas met ed ontan a dalan diad silong na makapasinagem iran sirkumstansia et mamakiwas ed sikatayon ibaliwala odino nabawasan iray inagew-agew a pakadetdetan tan kairapan? No bayuboan tayo so nipaakar ed kanonotan nen Kristo, say agew-agew a relasyon tayo ed kaparan managdayew so lapuan na pakarepresko, aliwan pakadismaya.

Makapadismayan Personal Iran Liknaan

“Say ilalo a nitantan pabeblayen to so puso; balet sano say pilalek onsabi, sikato so kiew na bilay.” (Uliran 13:12) Diad panmoria na pigaran lingkor nen Jehova et say anggaan na sistema na bengabengatla so mabayag ni amon onsabi. Singa ed dakel ya agmananisia, mipara lay pakatalos na saray Kristiano nipaakar ed pambibilayan tayon panaon a ‘maatap tan mairap a pidenengan.’​—2 Timoteo 3:1-5.

Balet, bilang piduma ed saray agmananisia, kaukolan a manliket iray Kristiano ed pakanengneng ed sarayan makapasubok a kipapasen so say “tanda” na kiwawala nen Jesus, ya ipapatnag na satan a magano lan panganggaen na Panariay Dios iyan marelmeng a sistema na bengabengatla. (Mateo 24:3-14) Anggano onloor so kipapasen​—a seguradon nagawa legan na “baleg ya irap”​—sarayan ebento so lapuan na gayaga tayo lapud iyaabawag na saratan so onsabin balon mundo na Dios.​—Mateo 24:21; 2 Pedro 3:13.

No isipen nin mabayag so pibali na Panarian ed nagagawgawa natan, satan so pansengegan a mangusar ni dakel a panaon so sakey a Kristiano ed materyal iran gegemtan. No abuloyan to iratan a bengatla a singa say trabaho tan panagligliwaan a manamsam ed panaon tan biskeg to, sikatoy nairapan lan manumpal ed Makasulatan iran responsabilidad to diad dugan paraan. (Mateo 6:24, 33, 34) Say ontan ya awawey so makapatabang la tan lapud satan et pakadismayaan la itan. Inkuan na sakey a managbiahen manangasikaso: “Aliwan realistiko no getmaen ni pambilay a maluho ed sayan sistema na bengabengatla.”

Duara ed Sankaabigan Iran Remedyo

Diad bektan agawa lay impan-diagnose, panon a naamtaan na sakey so epektibon remedyo? Say personal a panagaral so sakey ed sankaabigan iran paraan. Akin? “Ipanonot na satan ed sikatayo no akin a gawaen tayoy kaukolan tayon gawaen,” so inkuan na sakey a managbiahen manangasikaso. Impaliwawa ni na sananey: “No ipasen labat ya obligasyon so panagpulong, nasabi panaon et magmaliw la itan a makapabelat.” Balet say epektibon personal a panagaral so ontulong ed sikatayon nagamoran lamet so nikabiig a panmoria ed betang tayo leleg a manasingger itayo ed anggaan. Mipadpara met, paulit-ulit itayon papanonotan na Kasulatan ed pankaukolay pangan a maong ed espiritual ta pian naliknay tuan liket ed panggaway linawa na Dios.​—Salmo 1:1-3; 19:7-10; 119:1, 2.

Saray mamatatken so makatulong ed arum pian natalonaan so pakadismaya diad makapaseseg a panagpastol ed saratan. Diad sarayan pribadon ibisita, nipanengneng na mamatatken a balang sakey ed sikatayo so naapresian tuloy tan walaay importantin betang ed limog na totoo nen Jehova. (1 Corinto 12:20-26) Diad impanukoy ed saray kaparan Kristiano, inkuan na sakey a matatken: “Pian nidanet so kablian da, ipapanonot ko ed sikara no antoy agawaan da ed apalabas. Ipabitar kon sikaray mabli ed imaton nen Jehova tan niiter ed biang da so dala na Anak to. Lawas dan labalabay iyan panagkatunongan. Bektan saya so malet a sinuportaan na Makasulatan iran reperensia, saramay adismaya so akaparaan a mangiletneg na balo iran kalat, singa say panpikasin kaibay pamilya tan panagaral tan panagbasa na Biblia.”​—Hebreos 6:10.

Legan na panpapastol, kaukolan a manalwar iray mamatatken ya agda ipapatnag ya imposiblin paliketen so Dios. Imbes, saray mamatatken so ontulong ed adismayan kaparan managdayew pian natalosan dan anlemew so awit na papatumbok nen Jesus. Unong ed satan, say serbisyo tayo bilang Kristiano et lapuan na gayaga.​—Mateo 11:28-30.

Daegen so Pakadismaya

Antokamay sengegan na satan, say pakadismaya so sakey a salot a nepeg a labanan. Balet, nodnonoten ya agtayo bukbukor ed sayan pilalaban. No adismaya itayo, awaten tayo so tulong na saray kalimog a Kristiano, nagkalalo la ed saray mamatatken. Diad panggawa’d satan, napakepa so liknaan na pakakadismaya.

Manuna ed amin, kaukolan tayoy patulongan ed Dios pian natalonaan so pakadismaya. No masimoon itayon manmatalek ed si Jehova, natulongan to itayo pian sigpot a nadaeg so pakadismaya. (Salmo 55:22; Filipos 4:6, 7) Diad dinanman a kipapasen, bilang totoo to et makapibiang itayo ed liknaan na salmista ya angikantan: “Mapalar so katooan ya amta to so mandayew ed sikan magaygayaga: manakar ira, O Jehova, ed liwawa na lupam. Dia ed ngaran mo so panggayagaan da ed saray amin ya agew; tan dia ed inkatunong mo so kitandoroan da. Ta sika so gloria na biskeg da: tan dia ed abig na linawam nitandoro so pangsil mi.”​—Salmo 89:15-17.

[Saray paimano ed leksab]

[Litrato ed pahina 31]

Say makapabiskeg a panagpastol na maaron mamatatken so makatulong ed saray Kristiano pian natalonaan so pakakadismaya