Igalang si Jehova​—Akin tan Panon?

“Saramay mangigalang ed siak igalang ko, tan saramay manmodmora ed siak so nibilang a namodmora.”​—​ SAMUEL 2:30.

1. Sioparay napalangkapan na bantog-ed-mundon Nobel iran regalo, tan anto so pangipasenan na dakel ed sarayan langkap?

KADA taon apatiran institusyon na Eskandanibia so mangiiter na Nobel iran regalo ed saramay ‘akapangiter na sankabalgan a gungguna ed katooan legan na apalabas a taon.’ Saray regalo so niiter parad saray agawaan ed anemiran nanduruman lawak na kimey. Say Nobel a regalo so ipasen na dakel a sankabalgan a galang a niiter ed siopaman a too.

2. Siopa so nalilingwanan na saray manangiter na regalon Nobel, tan akin a nagkalautlan Sikato so makanepegan na galang?

² Anggaman anggapoy mauges ed pangiter na galang ed makanepegan iran totoo, kasin saraman so mangiiter na sarayan galang et mannonot ed pamagalang ed sankabalgan a Manamalangkap na katooan? Satan a Manamalangkap so angiter na agnabilang iran gungguna ed katooan nanlapulad impamalsa to ed inmunan laki tan bii ed apalabas lan 6,000 taon. Say maparanay ya isaew ed pamagalang ed sikato so mangipanonot ed sikatayo ed saray salita nen Elihu, say kaaro na kadaanan a si Job, ya akaimano: “Balet anggapo so mankuan, ‘Iner so kawalaan na Dios ya Engranden Gumagawa ed siak, say Sakey a mangiter na kankanta ed labi?’” (Job 35:10) Say baleg a Manamalangkap tayo so mantultuloy a manggawa na ‘maabig, a mangiiter na uran a manlapud tawen tan mabunga iran panaon, a mamapano na kapusoan tayo ed nagnap dingan na tagano tan maabig a ligliwa.’ (Gawa 14:16, 17; Mateo 5:45) Si Jehova so petepeteg a Manangiter na “amin a maabig a palangkap tan amin ya ayadyarin regalo.”​—Santiago 1:17.

Anto so Kabaliksan na Pangiter na Galang

3. Anto iray prinsipal a Hebreo tan Griego iran salita a nausar a “galang,” tan anto iray kabaliksan da?

³ Say prinsipal a Hebreon salitan galang, ka·vohdhʹ, ed literal et kabaliksan toy “inkabelat.” Kanian say sakey a toon apagalangan so nikuentan ambelat, makapasagyat odino nikuentan sakey a bengatla. Makanakana, sayan Hebreon salitan, ka·vodhdʹ, so maparanay a nipatalos met ed Kasulatan a bilang “gloria,” mangyarum a mangipanengneng no panon makapasagyat tan kaimportanti so kipasenan na sakey a nagalang. Sananey a salitan Hebreo, yeqarʹ, a nipatalos a “galang” ed Kasulatan, so nausar met a “mabli” tan “mabli iran bengatla.” Kanian diad Hebreo a Kasulatan, say salita a galang so mitukoyan ed gloria tan inkamabli. Say Griego a salitan nipatalos a “galang” ed Biblia so ti·meʹ, tan satan met so mangipatnag ed sentido na balor, kana, inkamabli.

4, 5. (a) Anto so kabaliksan na pangiter na galang ed sakey ya indibidual? (b) Anton kipapasen a nisalaysay ed Ester 6:1-9 so mangiyulustra no antoy nalalanor ed panangiter na galang?

⁴ Sirin galangen na sakey so sananey diad pangipanengneng ed satan a persona na aralem a respeto tan balor. Bilang sakey ya ilustrasyon, ikonsidera so kipapasen a nisalaysay ed Biblia nipaakar ed matoor a Judion Mardokeo. Diad sakey ya okasyon walan inwalwal nen Mardokeo so sakey a plano a sumpad bilay nen Arin Ahasueros na kadaanan a Persia. Saginonor, legan na sakey a labi sanen agmakaugip so ari, say kiwas nen Mardokeo so anawag na imano na ari. Kanian tinepetan toray ayudante to: “Anton galang tan baleg a bengatla so ginawak ed si Mardokeo lapud saya?” Inyebat da: “Anggapo so ginawa ni ed sikato.” Agaylan makapaermen! Si Mardokeo so akapangiliktar ed bilay na ari, tan ingen walan sinmaew so ari a mangipanengneng na panamabli.​—Ester 6:1-3.

⁵ Sirin, diad dugan panaon, kinerew nen Ahasueros ed manunan ministro to, si Haman, ed no panon a sankaabigan a nagalang so sakey a walan aromogan na ari na liket. Tamtampol ya akikatunongan si Haman ed puso to: “Siopa so kaliktan na ari a pagalangan a lalo nen say siak lanlamang?” Et si Haman inkuanto a say too so nepeg a nakawesan na “maarin kawes“ tan onlugan ed “kabayo a luluganan na ari.” Sinampotan to: “Nakaukolan a sikatoy paluganan da ed kabayo ed lansangan na syudad tan iyabawag da ed arap to, ‘Onia no panon so kagawa ed too a kaliktan na ari a pagalangan a mismon aromog na arin walaan na kaliktan.’” (Ester 6:4-9) Say sakey a nagalang so atagtagey a respetoen na amin a totoo.

Akin a Kanepegan nen Jehova so Nagalang

6. (a) Siopa ed tagey na amin ma arum so makanepegan na galang tayo? (b) Akin a say salitan “engrande” et matukotukoy a maneskribe ed si Jehova?

⁶ Diad interon awaran saray katooan so walan naitdan na galang, naynay ya ontanlan agmakanepegan. (Gawa 12:21-23) Ingen diad siopa ed tagey na amin na arum so mankanepegan na galang? Akin, si Jehova a Dios, siempre! Sikato so mankanepegan na galang tayo lapud sikatoy positibon tuloy ya engrande. Maparanay say terminon “engrande” so niyaplika ed sikato. Sikato so Engranden Sakey, say Engranden Gumagawa, say Engranden Manamalsa, say Engranden Ari, say Engranden Managbangat, say Engranden Katawan. (Salmo 48:2; Eclesiastes 12:1; Isaias 30:20; 42:5; 54:5; Oseas 12:14) Saman so engrande so makapakelaw, nipaatagey, nitandoro, nidumaduma, marlang, tan makapakebbiew. Agnaparaan si Jehova, anggapoy kapara to, sikato so labas ed amin. Sikato a mismo so mantasi ed satan a katuaan, a mangikuan: “Siopa so pangiparaan yo ed siak odino pangiparengan yo ed siak odino pangyalilingan yo ed siak pian nayarian tayo so manpara ed sinansakey?”​—Isaias 46:5.

7. Diad pigaran nanduruman dalan a nikuan a si Jehova a Dios et nikadkaduma, tan akin a nikuan a sikatoy agnaparaan ed pakauley?

⁷ Si Jehova a Dios so agnaparaan ed ag-onkulang a pitoran dalan, ya amawala na espisipiko iran rason a pamagalang ed sikato, Ununa ed amin, si Jehova a Dios so mankanepegan na sankabalgan a galang lapud sikato so agnaparaan ed pakauley. Say Katawan a Jehova so Sankatalbaan a Soberano​—sikato so supremo. Sikato so Ukom tayo, Manangiter-na-ganggan, tan Ari. Amin a totoo ed tawen tan dalin so akautang ed Sikato; ingen andian na pikuentaan ed siopakaman. Bueno agta sikatoy adeskribe a bilang, “baleg, mabiskeg, tan makapataktakot.”​—Deuternomio 10:17; Isaias 33:22; Daniel 4:35.

8. Akin a nikuan a si Jehova so agnaparaan (a) no diad posisyon to? (b) no diad andi-geter a kiwawala to?

⁸ Komadua, makanepegan si Jehova a Dios na sankabalgan a galang lapud sikato so agnaparaan no diad posisyon to. Sikato so “say Atagey tan Baleg a Sakey,” say Sankatageyan. Sikato so atagey a tuloy ed tagey na amin a mangaraldalin iran palsa to! (Isaias 40:15; 57:15; Salmo 83:18) Komatlo, si Jehova so napagalang na amin ya arum lapud sikato so agnaparaan no nipaakar ed andi-geter a kiwawala to. Sikato lambengat so andian na lapuan, a manlapud andi-anggaan ya anggad andi-angaaan.​—Salmo 90:2; 1 Timoteo 1:17.

9. Diad anton dalan a si Jehova so agnaparaan ed (a) no diad gloria to? (b) no diad manunan atributos to?

⁹ Komapat, si Jehova a Dios so makanepegan na sankabalgan a galang lapud inkagrande na personal a gloria to. Sikato so “Ama na mangatatawen a liwawa.” Say inkapersona to ontan a masinag ya anggapo so toon makanengneng ed sikato tan ingen manbilay. Sikaton peteg so makapakebbiew. (Santiago 1:17; Exodo 33:22; Salmo 24:10) Komalima, utang tayo ed si Jehova a Dios so sankabalgan a galang lapud makapakelaw iran atributos to. Sikato so makapanyarin-amin, andi-geter ed pakayari; sikato so makabat ed amin, andi-geter ed kakabatan; sikato so absoluton ayadyari ed hustisya; tan sikato so mogmong inkalaman na aro.​—Job 37:23; Uliran 3:19; Daniel 4:37; 1 Juan 4:8.

10. Diad anton dalan a si Jehova so agnaparaan (a) no diad saray kimey na inkapalsa tan saray kayaryan? (b) no diad ngaran tan inkabantog to?

¹⁰ Komanem, makanepegan si Jehova a Dios na sankabalgan a posiblen galang lapud baleg iran kimey ed impamalsa to. Bilang say Amalsa ed amin a bengatla ed tawen tan ed dalin, sikato met so Baleg ya Akankayaryan ed amin a bengatla. Nabasa tayo ed Salmo 89:11: “Kien mo so tawen, ontan met kien mo so dalin.” Komapito, si Jehova a Dios tayo so makanepegan na galang ed tagey na amin nin arum lapud sikato so agnaparaan, agnaparaan nipaakar ed ngaran tan inkabantog. Sikato lambengat so manggaran na Jehova, kabaliksan to so “Sikatoy gawaen to a Magmaliw.”​—Nengnengen so Genesis 2:4, paimanod-leksab.

Panon a Galangen si Jehova

11. (a) Anto iray arum a dalan a nagalang tayo si Jehova? (b) Panon tayon nipanengneng a peteg a gagalangen tayo si Jehova diad panamegley na panmatalek ed sikato?

¹¹ Nisengeg ed amin iran kalidad nen Jehova, panon a sikatoy galangen tayo? Unong a nanengneng tayo, sikatoy nagalang tayo diad panamegley na pangipanengneng na takot tan pamagalang ed sikato, diad itulok ed sikato, diad pamidbir ed sikato ed amin na saray dalan tayo, diad pangiter na saray regalo, diad pangalig ed sikato, tan diad ikerew ed sikato. Sikatoy napagalangan tayo met diad pangitalaga na pananisia ed sikato, diad panmatalek ed sikato antokaman so nagawa. Sikatayoy apaseseg a, “Manmatalek ed si Jehova ed amin a pusom.” Kanian galangen tayo si Jehova a Dios diad pananisia ed salita to. Alimbawa, inkuanto: “Agkayo ontakot, ta wala ak ed sikayo. Agkayo onnengneng [ed takot], ta siak so Dios yo. Pabiskegen ta kayo. Petepeteg a tulongan ko kayo.” (Uliran 3:5; Isaias 41:10) Say isaew a manmatalek ed sikato a kompleto so agpamagalang ed sikato.

12. Anto so betang na katutulok tan takot ed panamaglang ed si Jehova?

¹² Sakey a maapit a dalan a napagalangan tayo si Jehova a Dios so diad katutulok ed sikato. Tan makana ed katutulok so maridios a takot, on, takot ed agpamaliket ed Dios. Nipanengneng so relasyon ed baetan na takot tan katutulok ed saray salita nen Jehova ed si Abraham kayarin tinmulok si Abraham ed sinalin impangibagat ed si Isaac, ya anak to. “Natan kabat ko a sika so matakot-ed-Dios,” inkuan nen Jehova. (Genesis 22:12) Sanen sisingbaten no antoy utang na ananak ed atateng da, impanengneng nen apostol Pablo a say katutulok tan galang so mantambayan. (Efeso 6:1-3) Kanian diad katutulok ed saray ganggan na Dios, ya ag-ira ambelat, galangen tayo si Jehova. Agpanduwaruwaan, a say itutunganga ed si Jehova a Dios so agpamagalang ed sikato.​—1 Juan 5:3.

13. Say panamagalang ed Dios so sengegan ed sikatayo na nawalaan na anton mental ya awawey nipaakar ed saray kimey tan plano tayo?

¹³ Onarum ni, makapangitarok tayo na galang ed si Jehova a Dios diad panamegley na itulok ed say simbawa ed Uliran 3:6: “Diad amin a dalin yo onnengneng ed sikato [on, sikatoy bidbiren], tan sikato a mismo gawaen to so dalan yo a maptek.” Say babangatan a si Santiago so angiter na maong a simbawa ed sayan miparan linya. Imbes a mantultuloy a walaan na talek ed inkasikatayon dili ed agew-agew, a manmatalek ed abilidad tayon dili, nepeg ya ibaga: “No linawa nen Jehova, sikami so manbilay tan gawaen so saya o saman.” (Santiago 4:15) Pigaran taon lay linmabas sikato so ugali na say International Bible Students ya iyarum ed anggan anton balikas nipaakar ed arapen so pinatikey a D.V., ya ontalindeg parad Deo volente, kabaliksan to so “No linaway Dios.”

14. (a) Antoy awawey a mitunosan ed saray gunaet tayo so laen no labay tayon igalang so Dios? (b) Antoy awawey so nipatnag a mikonekta ed panangipalapag na literatura na Watch Tower Society?

¹⁴ Napagalang tayo met si Jehova a Dios diad pangipatnag na maapabeban awawey, ya iter tayoy kredito ed Dios na antokaman iran aligwas a nayarin panliliketan tayo. Manepenepeg a naimano nen apostol Pablo so nipaakar ed ministeryo to: “Siak so angitanem, si Apolos so analog, balet say Dios so amabaleg ed satan; no ontan sirin aliwan say mantanem tan manalog, noag say Dios a sikato so mamabaleg.” (1 Corinto 3:6, 7) Peteg, mapaga si Pablo diad pangitarok na dugan galang ed Dios, aliwan ed sikaton mismo odino siopaman ya arum a too. Kanian, natan, saray palapagan na Watch Tower Society so agmangitanduro ed saramay mansulat ed saratan, tan saray managsulat so onarawi ed pakakabat na arum no antoy walan insulat da. Diad sayan dalan, say imano so nipuntirya ed inpormasyon, ya adesinyon mamagalang ed si Jehova, tan aliwan ed siopaman a too.

15. Anton eksperiensa so mangiyulustra ed irap na arum a totoon mantalos ed inkasimpit na saray Tasi nen Jehova?

¹⁵ Sayan totontonen ed pangipaarap na imano ed si Jehova, sirin sikatoy gagalangen, so manurpresa ed arum. Pigaran taon ed apalabas, sanen mangitatarya na sakey a sistema na trumpa parad publikon paliwawa ed New York City Central Park, saray Tasi so manpapatugtog na Kingdom Melodies tapes bilang panali ed sistema. Sakey ya akakawes a maong a sanasawa so tinmepet ed sakey ed saray Tasi no anto iman a musiko. Isisipen a say sanasawa et Tasi, inyebat to: “Satan so Kingdom Melodies Nu. 4.” “On, balet siopa so nanugyop ed satan a musiko?” intepet da. Inmebat so Tasi: “Oh, say mananugyop so agamta.” Say sanasawa so inmebat: “Saray toton manugyop na ontan a klasen musiko so agmanggawa ed ontan ya agkabkabat.” Inmebat so Tasi: “Balet ontan ed saray Tasi nen Jehova.” On, gawaen da ya onya pian amin a galang so nipaarap ed si Jehova a Dios!

16. Diad anto iran nanduruman dalan a nausar tayoray boses ed pangitarok na galang ed si Jehova a Dios?

¹⁶ Sananey a dalan a napagalangan si Jehova so diad panamegley na pangusar na saray bibil tayo ed pantasi nipaakar ed sikato. No peteg a manpaga tayo ed pangitarok na galang ed sikato, sirin sikatayoy manggunaet ed pangiwakawak na maong a balita na Panarian. Nagawaan tayo itan diad pankabkaabungan a kimey tan diad antokaman ya arum a metodo a wala ed sikatayo, ya aglilingwanan iray pankanawnawa a mantasin inpormal. (Juan 4:6-26; Gawa 5:42; 20:20) Niarum ni, walaan tayo na saray pankanawnawa a mamagalang ed Dios tayo dingan na saray boses tayo ed saray pantitipon ed kongregasyon, nampara ed pankomento tan diad piulop ed impapuson pankanta tayo ed say kansion ed Panarian. (Hebreos 2:12; 10:24, 25) Diad inagew-agew a pitongtong tayo, narayew tayo met si Jehova a Dios ed saray bibil tayo. Dingan na daiset a sagpot, naimaneobra tayo so tongtongan ed makapaalagey iran espiritual a dalan, tan saya so mansumpal ed pangitarok na galang ed si Jehova a Dios.​—Salmo 145:2.

17. (a) Anton so dugan kondukta so wala ed pamagalang tayo ed si Jehova? (b) Anto so walan epekto na mauges a kondukta?

¹⁷ Unong a maabig so pamagalang ed si Jehova a Dios ed saray bibil tayo, manepeg met a sikatoy igalang ed saray kondukta tayo. Kinondena nen Jesus iraman, anggaman mamagalang ed Dios ed sary bibil da et walaan na puso ya arawin tuloy ed Sikato. (Marcos 7:6) Say mauges a kondukta so mangitarok na agpamagalang ed si Jehova Dios. Alimbawa, diad Roma 2:23, 24, nabasa tayo: “Sikayo, a walaan na kinon ed ganggan, kasin sikayo diad panumlang yo ed say Ganggan et agyo napagalangan so Dios? Ta ‘say ngaran na Dios so nababaliwala nisesengeg ed sikayon totoo ed limog na nasyones.’” Diad agano niran taon nilibo so walan adispelosip a manlapud saray kongregasyon na totoo nen Jehova. Manwarin, wala ni babaleg iran bilang so manggagawa na makapabaing a kondukta ya ag-adispelosip lapud angipatnag ira na peteg a panagbabawin awawey. Amin na sarayan totoo so nayarin amagalang ed si Jehova ed saray bibil da, balet sikaray sinmaew a manggawa na ontan diad kondukta ra.

18. (a) Anton paga so nepeg a maseguron wala ed saray apalaboan no sikaray mangipanengneng na galang ed si Jehova? (b) Panon ya iyilustra na say situasyon na arum a saserdote ed agew nen Malaquias ed pankaukolan na paga?

¹⁸ Saramay okupado ed nanduruman nengneng na sigpot panaon a panaglinkor​—balangla ed Bethel, diad panagbaroy ed misioneron kimey, odino bilang payunir​—so apalaboan a maong no nipaakar ed saray pankanawnawa ra a mangiter na galang ed si Jehova. Diad sikara so say obligasyon a mamasyan maong ed antokaman a kimey a nipabtang ed sikara, magmaliw a ‘sitotoor ed satan tan ontan met ed dakel.’ (Lucas 16:10) Diad pigaran dalan say nagalgalang a posisyon da so niyilustra, anggaman ag-iretrato, na saray saserdote tan Lebitas ed kadaanan ya Israel. Anggaman ontan, lapud say ag inkaalwar na pigaran saserdote ed agew nen Malaquias, inkuan nen Jehova ed sikara: “No siak so ama, iner so galang parad siak? Tan no siak so engranden katawan, iner so takot ed siak?” (Malaquias 1:6) Saraman a saserdote so manmomodmora ed ngaran na Dios diad panamegley na pangisaklang na bulag, piley, tan mansasakit iran ayep bilang iyapay. Anggad no saramay walaan na nikabiig a pribilehyo ed linkor natan et manggunaet a mamasyan gawaen so sankaabigan da, sikaray nagkalautlan makanepegan ed panamaat ya inter nen Jehova a Dios ed saramay saserdote. Sikaray magmaliw ya onkulang ed pamagalang ed Dios.

19. (a) Unong a naimano ed Uliran 3:9, anto so kaaruman a dalan ed pamaglang ed si Jehova? (b) Anto so sananey a makanan dalan a galangen si Jehova?

¹⁹ Sananey a dalan a napagalangan tayo si Jehova a Dios et diad pangiter na kuartan kontribusyon para ed sankamundoan a panagpulong a kimey a walan inautorisaan to. Sikatayoy apaseseg, “Galangen si Jehova ed saray mablin kayaryan yo tan ed saray ununan bunga na maong a bunga yo.” (Uliran 3:9) Say pribilehyo ed panggawa na ontan iran kontribusyon so sakey a pankanawnawan pamagalang ed si Jehova a Dios ya anggapo so nepeg a mangilingwan. Napagalang tayo met si Jehova a Dios ed saray pikakasi tayo, pangirayew, tan pasasalamat ed sikato. (1 Awaran 29:10-13) Diad tua, lapud onasingger tayo ed sikato ed kapaabebaan tan tekep na aralem a respeto, say mismon iyasingger tayo ed Dios ed pikakasi so panamagalang ed sikato.

20. (a) Siopa iray kaslakan a totoo a gagalangen na totoo ed mundo, tan panon? (b) Diad panumbok na anton ganggan a lalon napagalangan si Jheova?

²⁰ Dakel a totoo natan, nagkalautla ed saray tobonbalo, so mamagalang ed saramay papablien da diad panamegley na pangalig ed sikara​—diad pantongtong a singa sikara tan diad ikiwas a singa sikara. Maparanay saray totoon aaligen da et saray bayani ed esport odino saray estar ed panligliwaan. Miduma, bilang Kristianos, nepeg tayon igalang si Jehova a Dios diad panggunaet a sikatoy aligen. Si apostol Pablo ed inpaseseg to a gawaen tayo, diad impansulat: “Aligen yo sirin so Dios, bilang anak to kayon inadaro tan manakar unong ed aro.” (Efeso 5:1, 2) On, diad panggunaet ya aligen si Jehova, sikatoy nagalang tayo.

21. (a) Antoy manginlong ed sikatayon mangiter na gloria tan galang ed si Jehova? (b) Anto iray palangkap ya iiter nen Jehova ed saramay mamagalang ed sikato?

²¹ Peteg, walara so dakel a dalan a nayarian tayo tan nepeg a mangiter na gloria tan galang ed Dios. Agtayon balot lilingwanan a diad maparanay a pangan ed Salita to tan pagmaliw a magmaong a sikatoy naamtaan, makapangigalang tayo nagkalalo ed sikato. Anto iray tumang ed panggawa ed satan? “Saramay mangigalang ed siak,” ikuan nen Jehova, “Igalang ko.” (1 Samuel 2:30) Si Jehova so petepeteg a mamagalang ed saray managdayew ed sikato diad pangiter ed sikara na andi-anggaan a bilay ed liket, balangla ed tawen bilang kaiban manuley na Anak to, si Jesu-Kristo, odino ed Paraison dalin.

Nanonotan Yo?

◻ Siopa so kaslakan a gagalangen na katooan, tan siopa so kaslakan a tuloy dan ikakaindan a gagalangen?

◻ Anto so kabaliksan na pamagalang ed sakey, tan anto iray dalan a nagawaan?

◻ Anto iray arum ed manuna iran rason no akin a makanepegan na galang si Jehova a Dios?

◻ Anto iray pigaran dalan a nagalang tayo si Jehova?

◻ Diad anto iran dalan a palankapen nen Jehova iramay mamagalang ed sikato?