Paliketen si Jehova Diad Pangipanengneng na Kaabigan
“Anto ta so anapen nen Jehova ed sika noag say mangagamil na inkahustisya tan mangaro ed kaabigan tan say panakar a mauy-oyamo ed arap na Dios?”—MIQUEAS 6:8.
1. Akin ya aliwan makapakelaw ed sikatayo a saray totoo nen Jehova so iilaloan ton mangipanengneng na kaabigan?
IILALOAN nen Jehova so saray totoo to a mangipanengneng na kaabigan. Saya so agmamakelaw ed sikatayo. Say Dios a mismo so maabig ed amin, anggan diad saray malamang a marelmeng a totoo. Nipaakar ed saya imbaga nen Jesu-Kristo ed saray babangatan to: “Itultuloy yon aroen so saray kakabusol yo tan manggawa kayo na maabig tan manpabayes kayo ya andian na tubo, ya agmanalagar na antokaman a bales; tan baleg naani tumang yo, tan sikayo so saray anak naani na Sankatagyan, ta sikato so maabig ed saray malamang tan mauges. Mapangasi kayo komon, unong a mapangasi so Ama yo.”—Lucas 6:35, 36.
2. Antoran tepet nipaakar ed kaabigan so nepeg tayon konsideraen?
2 A singa ibabaga na Miqueas 6:8, saramay manangunor ed Dios so nepeg a “mangaro ed kaabigan.” Mabitar, napaliket si Jehova no aroen na saray ariripen to so kaabigan tan satan so ipanengneng da ed impapuson dalan. Balet anto so kaabigan? Anton gungguna so manresulta diad pangipanengneng ed satan? Tan panon a sayan kalidad so nipanengneng?
Anto So Kaabigan
3. Panon so panguker yo ed kaabigan?
3 Say kaabigan so kalidad na pakawalaan na aktibon interes ed saray arum. Satan so nipanengneng ed panamegley na saray matulong a kiwas tan makonsideran salita. Say pagmaliw a maabig et kabaliksan toy panggawa na maong imbes a say antokaman a makapasakit. Say maabig a too so makaaro, matamoy, maabagey, tan masibeg. Sikatoy walaan na mabunlok, makonsideran awawey ed saray arum. Tan say kaabigan so kabiangan na abel ed piguratibon kawes na kada tuan Kristiano, lapud impaseseg nen Pablo: “Kawesan yo so inkasikayo na matamoy a panangabagey, kaabigan, kaabebaan na nonot, deen, tan sungdo.”—Colosas 3:12.
4. Panon nen Jehova ya impangulo so panangipanengneng na kaabigan ed katooan?
4 Impangulo nen Jehova so panangipanengneng na kaabigan. Unong ya imbaga nen apostol Pablo, sikato so “sanen say kaabigan tan say aro ed too ed biang na Manangilaban tayo, say Dios, so nipatnag” ya “unong ed panangasi to sikatayoy inlaban to diad panamegley na ames ya angitarok ed sikatayo ed bilay tan diad inpamasimbalo tod sikatayo diad panamegley na masanton espiritu.” (Tito 3:4, 5) Nilinisan, odino ‘inames’ na Dios iray alanaan a Kristianos ed dala nen Jesus, ya inyaplika to so merito na dondon bagat nen Kristo ed biang da. Sikara met so apasimbalo diad panamegley na masanton espiritu, a nagmaliw a “balon palsa” a bilang tinagibid-espiritun ananak na Dios. (2 Corinto 5:17) Siempre, say kaabigan tan aro na Dios ed too so ninanatnat ed saray internasyonal a “baleg ya ulop,” ya “inurasan daray kawes da tan pinaputi dara ed dala na Kordero.” (Apocalipsis 7:9, 14; 1 Juan 2:1, 2) Nagkalalo ni, saray alanaan tan say baleg ya ulop, dingan na mangaraldalin ya ilalo, so amin et nisilong ed “maabig” a pako.—Mateo 11:30.
5. Akin a nailaloan tayon saramay itotonton na espiritu na Dios so mangipanengneng na kaabigan ed saray arum?
5 Say kaabigan so kabiangan met na bunga na masanton espiritu na Dios, odino aktibon puersa to. Inkuan nen Pablo: “Say bunga na espiritu et say aro, liket, deen, sungdo, kaabigan, kamaongan, pananisia, kauyamoan, tayadno, dangka. Anggapo so ganggan ya onsumpa ed sarayan bengatla.” (Galacia 5:22, 23) Sirin, anto so nailaloan tayo ed saramay iwawanwan na espirituy Dios? Seguradon, ipanengneng da so kaabigan ed saray arum.
6. Say kaabigan so nepeg a mamakiwas ed saray mamatatken tan arum a Kristianos ya onkiwas ed anton dalan?
6 Say kaabigan so nipanengneng ed dakel iran dalan. Nipanengneng tayo so kaabigan no sikatayo so mapangasi. Alimbawa, saray Kristianon mamatatken so maabig no inatnat da so panangasi ed sakey a managbabawin managgaway-mauges tan anapen da so itulong ed sikato diad espiritual. Say inter-na-Dios a kalidad na kaabigan so manggawad saray manangasikaso a maanos, makonsidera, maabagey, tan matamoy. Sikaray pakiwasen to a “mantrato ed pulok na Dios tekep na inkatamoy.” (Gawa 20:28, 29) Diad tua, say bunga na espiritu a kaabigan so nepeg a manggawad amin a Kristianos a mapangasi, maanos, makonsidera, maabagey, makaaro, tan maparawes.
Paliisan so Lingon Kaabigan
7. Akin a nibaga yon say lingon kaabigan so kaleteyan?
7 Moriaen na arum a totoo so kaabigan a bilang kakapuyan. Liknaen dan say sakey a too so nepeg ya anawet, anggan magaspang, no maminsan, pian saray arum so nasagyat ed biskeg to. Balet nidanet a say “inkagaspang so sakey a kakapuyan na too diad panangalig ed biskeg.” Diad tua, kaukolan so peteg a biskeg namparan diad pagmaliw a tuan maabig tan diad ipaliis ed lingon kaabigan. Say kaabigan a sikatoy sakey ed saray bunga na espiritu na Dios so aliwan maletey, mikukumpromison kiwas ed makapuy a kondukta. Imbes, say lingon kaabigan so sakey a kakapuyan a manggawad sakey a mangiyabuloy ed gawan-mauges.
8. (a) No nipaakar ed saray ilalak to, panon nen Eli a pinaneknekan a sikatoy mapaulian? (b) Akin a nepeg a saray mamatatken so manalwar sumpad kapelag ed lingon kaabigan?
8 Say atagey a saserdote na Israel a si Eli so mapaulian ed panagdisiplina ed saray ilalak ton, si Hopni tan si Pinehas, ya angipangulo bilang saserdote ed tabernakulo. Ag-akontento ed kabiangan na bagat ya impabtang ed sikara na Ganggan na Dios, inganggan da so sakey ya aripen a mikerew na karne ed manangisaklang sakbay a say taba na bagat so onasewek ed panagbagatan. Saray ilalak nen Eli so walaan met na imoral a piaakdol ed saray bibiin manseserbi ed lolooban na tabernakulo. Imbes ya ekalen si Hopni tan Pinehas manlapud pasen da, anggaman kuan, si Eli so amaat lambengat ed sikaran anlemlemew, ya ingalang to so saray ilalak to a nagkalalo nen say Dios. (1 Samuel 2:12-29) Agpankelawan a “say salita a manlapud si Jehova so matalag ed saraman ya agew”! (1 Samuel 3:1) Kanian saray Kristianon mamatatken so nepeg ya agnapelag ed palson katunongan odino diad panangipatnag na lingon kaabigan a nayarin mandesyang ed espiritualidad na kongregasyon. Say tuan kaabigan so aliwan bulag ed saray mauges a salita tan gawa a manumlang ed saray estandarte na Dios.
9. (a) Anton kiwas so ontulong ed sikatayon ompaliis ed kapelag ed lingon kaabigan? (b) Panon nen Jesus ya impanengneng so biskeg diad impantrato to ed saray relihyoson apostata?
9 No paliisan tayo so pangipanengneng na lingon kaabigan, nepeg tayo so manpikasi ed tulong na Dios pian nawalaan na ontan a biskeg a mabitar ed saray salita na salmista: “Arawi kayo ed siak, sikayon managgaway-kaugsan, pian naunor ko so saray ganggan na Dios ko.” (Salmo 119:115) Nakaukolan tayo met a tumboken so ehemplo nen Jesu-Kristo ya agbalot nankasalanan diad impangipanengneng na lingon kaabigan. Diad tua, si Jesus so ehemplo a mismo na tuan kaabigan. Alimbawa, ‘naabagey to so saray totoo lapud sikaray maermen tan abuybuyak a singa karneron andian na pastol.’ Kanian, saray masimpit-impanpuson totoo so nanliknan bulos ya onasingger ed si Jesus, ya anggan saray anak da so intarok da ed sikato. Tan isipen pa so kaabigan tan panangabagey ya impanengneng to unong ya “ineba to ray ugugaw tan ginapoan toran bendisyonan”! (Mateo 9:36; Marcos 10:13-16) Anggaman si Jesus so maabig, sikato anggaman kuan so masekder ed no anto so duga ed pakanengneng na mangatatawen ya Ama to. Agbalot inabuloyan nen Jesus so mauges; sikato so walaan na inter-na-Dios a pakayarin mangondena ed saray mansimpisimpitan a relihyoson papangulo. Diad Mateo 23:13-26, pigaran danay ya inulit to so balikas: “Kasi kayo la, eskribas tan Pariseos, mansimpisimpitan!” Kada panaon, inter nen Jesus so rason ed madibinon panangukom.
Say Kaabigan So Nisiglaot Ed Aro
10. Panon a say panangasi tan aro so impanengneng na saray babangatan nen Jesus ed saray kaparan mananisia?
10 Nipaakar ed saray patumbok to, inkuan nen Jesus: “Lapud saya nabirbiran na amin a sikayoray babangatan ko, no wala so aro yod limog yon dili.” (Juan 13:35) Tan anto so sakey a kabiangan na aro a mangipabidbir ed saray tuan babangatan nen Jesus? Inkuan nen Pablo: “Say aro so manangitepel tan mapangasi.” (1 Corinto 13:4) Say pagmaliw a manangitepel tan mapangasi et kabaliksan ton itepel tayo so saray ag-inkayadyari tan kakulangan na arum, a satan so siaabig a ginawa nen Jehova. (Salmo 103:10-14; Roma 2:4; 2 Pedro 3:9, 15) Say Kristianon aro tan kaabigan so ompatnag met sano saray kapananisiaan tayo ed arum a pasen na dalin so atalos na saray kairapan. Onkikiwas a tekep na nagkalalon “atooan a kaabigan,” ipapanengneng na saray Kristianos ed arum a pasen so impanaagin aro diad panamegley na panangidona na saray materyal a bengatla ya ontulong ed saratan a managdayew ed si Jehova.—Gawa 28:2.
11. Diad Makasulatan a panagsalita, anto so maaron-panangasi?
11 Say kaabigan so nisiglaot ed aro diad salitan “maaron-kaabigan,” a mabetbet a nausar ed saray Kasulatan. Saya so kaabigan a nilamot ed matoor ya aro. Say Hebreon berbo a nausar ya “maaron-kaabigan” (cheʹsedh) so mangisakup ed mas nen say matamoy a panangibano. Sikatoy kaabigan a simamaaron ompeket a bukor ed sakey a bengatla anggad say gagala to nipaakar ed satan so nasumpal. Say maaron-kaabigan, odino matoor ya aro nen Jehova, so nipanengneng ed nanduruman dalan. Singa bilang, satan so nipanengneng ed saray gawa na panangiliktar tan pananalimbeng.—Salmo 6:4; 40:11; 143:12.
12. No saray ariripen nen Jehova so manpikasi parad tulong odino kililiktar, diad anto a sikaray makapanseguro?
12 Agpankelawan a say maaron-kaabigan nen Jehova so mangiyaasingger ed sikato ed saray totoo! (Jeremias 31:3) Sanen kinaukolan na saray matoor ya ariripen nen Jehova so kililiktar odino tulong, kabat da a say maaron-kaabigan to so peteg a matoor ya aro, ya agmamaulian ed sikara. Kanian, walaan ira na pananisian manpikasi, a singa ginawa na salmista a kuanto: “No nipaakar ed siak, nanmatalek ak ed maaron-kaabigan mo; manggayaga so pusok ed panangilaban mo.” (Salmo 13:5) Lapud say aro na Dios so matoor, saray ariripen to so agmanmamatalek ed maaron-kaabigan to diad andi-kakanaan. No manpikasi ran onkerew na tulong odino kililiktar, walaan ira na sayan paseguro: “Agkaindanan nen Jehova iray totoo to, nisay tainan to so dilin tawir to.”—Salmo 94:14.
Saray Gungguna na Kaabigan
13, 14. Akin a say maabig a too so walaan na matoor iran kakaaro?
13 Diad panangalig ed si Jehova, saray ariripen to so “manaayatan ed balang sakey diad maaron-kaabigan tan panangasi.” (Zacarias 7:9; Efeso 5:1) “Say kalikaliktan a bengatla ed mangaraldalin a too et say maaron-kaabigan to,” tan say sakey a toon mangipatnag ed sayan kalidad so manani na mayaman iran gungguna. (Uliran 19:22) Anto so arum ed saraya?
14 Say kaabigan so manggawa ed sikatayon mataktika tan sirin ontulong ed sikatayon manmintina na maabig a relasyon ed saray arum. Say mataktikan too so mansalita tan manggawa ed saray bengatla odino mamemben ed saray mairap iran situasyon ed makonsidera tan agmakapaopendi iran dalan. Bangta say “makolkol a too” so manlikna na panangipulisay, “say too na maaron-kaabigan so manggawa na maong ed dilin kamarerwa to.” (Uliran 11:17) Papaliisan na totoo so makolkol a too bangta maasingger ira ed samay mangipapanengneng na maaron-kaabigan. Kanian, say maabig ya indibidual so walaan na matoor iran kakaaro.—Uliran 18:24.
15. Anto so nayarin epekto na kaabigan ed sakey a relihyoson naapag-apag ya abung?
15 Say sakey a Kristianon asawan bii a walaan na agmananisian asawa so nayarin makapangitarok ed asawa to ed katuaan na Dios diad panamegley na ontan a kalidad na kaabigan. Sakbay na impakaaral to ed katuaan tan inpangisulong ed “balon inkatoo ya apalsa unong ed linawa na Dios diad tuan inkatunong tan katooran,” nayarin sikatoy aliwan maabig, makolkol. (Efeso 4:24) No walaray uliran a kabat na asawa ton laki, nayarin sikatoy mipaknan tuloy a “say inkakolkol na asawan bii so mipara ed sakey ya atep a manterter a mamaarawi ed sakey” tan “magmaong ni so panayam ed sakey a lawak nen say piamong ed makolkol tan maingongot a bii.” (Uliran 19:13; 21:19) Balet natan say masimpit a kondukta tan aralem a respeto na Kristianon asawan bii, tekep na ontan iran kalidad na kaabigan, so nayarin manangguyor ed asawa to diad tuan pananisia. (1 Pedro 3:1, 2) On, saya so nayarin sakey a gungguna ed kaabigan to.
16. Panon tayon nagungunaan manlapud panangasi a nipanengneng ed sikatayo?
16 Say kaabigan a nipanengneng ed sikatayo so nayarin makagungguna pian pagmaliwen to itayon lalon maabagey tan manamerdona. Alimbawa, no sikatayo so mankaukolan na espiritual a tulong tan atrato ed maabig tan mauyamon nengneng, agta satan so lalon mamakiwas ed sikatayo a mideneng ed saray arum ed parehon dalan? Bueno, say maabig tan mauyamon panagtrato so nailaloan manlapud saray espiritual a kualipikadon lalaki, lapud insulat nen Pablo: “Agagi, anggaman say sakey a too so akapankasalanan sakbay na impakabikabat to ed satan, sikayo a walaan na espiritual a kualipikasyon so mametek ed ontan a too diad espiritu na kauyamoan, legan a bantayan yo so inkasikayon dili, ompan lamang natukso kayo met.” (Galacia 6:1) Saray aturon mamatatken so mansalitan mabanayar tan maabig no sikaray ontulong ed saray kaparan mananisia a nankasalanan. Balanglan sikatayoy personal ya akaawat ed ontan a maabig a tulong odino andi, anggaman kuan, anto so ilaloan na Dios ed saray amin a manserbi ed sikato? Amin a Kristiano so nakaukolan a mangipanengneng na kaabigan ed saray arum tan nepeg dan imanoen so konseho nen Pablo: “Mapangasi kayo komon ed sakey tan sakey, maabagey, sibubulos a manpeperdonaan so sakey tan sakey a singa mabulos ya impamerdona met na Dios ed sikayo diad panamegley nen Kristo.” (Efeso 4:32) Siempre, no sikatayo so penerdona na sakey odino atulongan itayo diad maabig a dalan manlapud espiritual a kasulitan, saya so nepeg a mamadaak na dilin kapasidad tayo ed panamerdona, panangabagey, tan panangasi.
Apresyaen So Agkanepegan a Panangasi na Dios
17. Lapud nianak tayon makasalanan, nepeg a sikatayoy nagkalautlan misalsalamat ed anton panangasi?
17 Lapud amin tayo so nianak a makasalanan akondena ed patey, wala so panangasi a sikato so nagkalautlan kaukolan tayo a pisalamatan. Satan so agkanepegan a panangasi nen Jehova a Dios. Parad kibulos na saray makasalanan manlapud inkakondena ed patey pian niyabawag a matunong et panangasin sigpot ya agkanepegan. Si Pablo, ya amitla ed agkanepegan a panangasi na Dios ed 90 a danay diad saray 14 a madibinon apuyanan a sulat to, so angikuan ed saray Kristianos ed kadaanan a Roma: “Amin so nankasalanan tan makulang ed gloria na Dios, tan sikatoy sakey a langkap ya andi-bayar a sikaray niyabawag a matunong diad agkanepegan a panangasi to diad inkibulos ed panamegley na dondon ya imbayar nen Jesu-Kristo.” (Roma 3:23, 24) Agaylan apresyaen tayo so agkanepegan a panangasi ya impanengneng nen Jehova a Dios!
18, 19. Panon tayon napaliisan so pakasaew ed gagala na agkanepegan a panangasi na Dios?
18 Diad pagmaliw ya aliwan-maapresya, say gagala na agkanepegan a panangasi na Dios so nasaew tayo. Diad sayan pamaakaran, inkuan nen Pablo: “Sikami sirin so embahadores a kasandi nen Kristo, a singa say Dios so nanpirawat ed sikayo lapud sikami. Bilang kasandi ed Kristo kerewen mi: ‘Mipulangan kayo ed Dios.’ Say ag-akaamta na kasalanan ginawa to a nankasalanan lapud sikatayo, pian sikatayoy magmaliw a matunong diad panamegley to. Mankimey a mikasakey ed sikato, pasesegen mi kayo met ya agmangipulisay ed agkanepegan a kaabigan na Dios tan nasaew so gagala to. Ta inkuanto [diad Isaias 49:8, Septuagint]: ‘Diad makanan panaon tinalineng ta ka, tan diad agew na kilalaban tinulongan ta ka.’ Nia! Natan so nikadkaduman makana a panaon. Nia! Natan so panaon na kilalaban. Agkami mangiter na antokaman a sengegan na pakagapolan, pian ag nabalaw so ministeryo mi; balet diad amin a dalan ipasen mi so inkasikami a bilang ministros na Dios.” (2 Corinto 5:20–6:4) Antoy labay ya ibaga nen Pablo?
19 Saray alanaan a Kristianos so embahadores a kasandi parad Kristo, tan saray baleg ya ulop so mensahero to. Sikaray nankakasakey a mamapaseseg ed saray totoo a mipulangan ed Dios pian nagamoran da so kilalaban. Aglabay nen Pablo a say siopaman so mangawat ed agkanepegan a panangasi nen Jehova a Dios diad panamegley nen Jesu-Kristo tan onsaew ed gagala to. Satan so nagawa ed sikatayo no onsaew itayon manggawa ed kimey a ginawan manepeg ed sikatayo na agkanepegan a panangasi na Dios. Diad pakawalaan na maabig a siglaotan ed Dios a singa saramay akipulangan ed sikato, agtayo awaten so agkanepegan a panangasi ed andi-kana no sumpalen tayo so “ministeryo na pipupulangan, salanti, say Dios diad panamegley nen Kristo et impipulangan to so mundo ed inkasikaton-dili.” (2 Corinto 5:18, 19) Gawaen tayo met ed saray arum so sankabalgan a kaabigan diad itulong ed sikaran mipulangan ed Dios.
20. Anto so ontumbok ya usisaen tayo?
20 Uusaren na saray ariripen nen Jehova so panaon tan saray kayarian da ed saray gawa na kaabigan no sikaray ontulong ed saray totoo ed espiritual diad panamegley na Kristianon ministeryo. Balet anto so naaralan tayo manlapud saray Makasulatan ya ehemplo diad panangiyaplika na kaabigan? Ontumbok tayon usisaen so arum ed saraya tan konsideraen so arum iran dalan pian paliketen si Jehova diad panangipanengneng na kaabigan.
Panon So Pangebat Yo?
◻ Anto so kaabigan?
◻ Panon tayon paliisan so kapelag ed lingon kaabigan?
◻ Akin a makapanmatalek iray totoo nen Jehova ed maaron-panangasi to?
◻ Antoray arum a gunguna ed kaabigan?
◻ Anto so gawaen tayo pian agnasaew so gagala na agkanepegan a panangasi na Dios?
[Litrato ed pahina 23]
Say kaabigan na sakey a Kristianon asawan bii so ontulong ed sikaton manangguyor ed asawa to diad tuan pananisia