Nakawesan na Kauyamoan!

“Bilang saray pinili na Dios, masanto tan inadaro, kawesan yo so inkasikayo na panangabagey, kaabigan, kaabebaan na nonot, kauyamoan, tan panagtepel.”​—COLOSAS 3:12.

1-3. Diad Colosas 3:12-14, anto so imbaga nen apostol Pablo nipaakar ed kauyamoan tan arum iran maridios a kalidad?

IITER nen Jehova ed totoo to so sankaabigan a piguratibon ikakawes. Diad tua, amin a mankaliktan ed panangabobon to so nepeg a mangisulong ed kawes a walaan na malet iran inaramey na kauyamoan. Sayan kalidad so makaligliwa lapud mamawas na tensyon ed makadetdet iran kipapasen. Makasalimbeng met, ta ipaliis to so kolkol.

² Pinaseseg nen apostol Pablo iray kaparan alanaan a Kristianos: “Bilang saray pinili na Dios, masanto tan inadaro, kawesan yo so inkasikayo na panangabagey, kaabigan, kaabebaan na nonot, kauyamoan, tan panagtepel.” (Colosas 3:12) Say tense na Griegon salitan nipatalos a “kawesan yo so inkasikayo” so mangipatnag na ikiwas a tekep na pantalos na pankaganatan. Saray alanaan, ya apili, masanto, tan inadaro na Dios, so agmantayamtayam a kawesan so inkasikara na ontan iran kalidad a singa say kauyamoan.

³ Intuloy nen Pablo: “Mantetepelan so sakey tan sakey tan manpeperdonaan so balang sakey no wala so pangidalman na siopaman a sumpad sananey. Unong ya impamerdona nen Jehova ed sikayo, ontan met so gawaen yo. Balet, nilikud ed amin na sarayan bengatla, kawesan yo so inkasikayo na aro, a sikato so ayadyarin bedber na pankakasakey.” (Colosas 3:13, 14) Say aro, kauyamoan, tan arum iran maridios a kalidad so manggawan posibli ed saray Tasi nen Jehova a “manayam ed inkasaksakey.”​—Salmo 133:1-3.

Nakakaukolan Iray Mauyamon Pastol

4. Isulong na saray tuan Kristiano so piguratibon kawes ya inabel ed anto iran kalidad?

⁴ Pambabanikelan na saray tuan Kristiano a ‘pateyen so kabiangan na laman da a singa say panaglawan, inkarutak, kaalakan, mauges a getma, tan agum,’ tan mankimey ira a lakseben so antokaman a daan a kawes a walaan na abel na ingongot, sanok, kaugsan, inkalabir, tan mabanday a salita. (Colosas 3:5-11) Nilakseb da so “daan ya inkatoo” (diad literal, “say daan a too”) tan inkawes so “balon inkatoo” (odino, “say balon too”), sakey a matukoy a kawes. (Efeso 4:22-24, Kingdom Interlinear) Say balon kawes da, ya inabel na panangabagey, kaabigan, kaabebaan na nonot, kauyamoan, tan panagtepel, so ontulong ed sikaran manresolbe ed saray problema tan manbilay na maridios a kabibilay.​—Mateo 5:9; 18:33; Lucas 6:36; Filipos 4:2, 3.

5. Anto so wala ed panangikurang na Kristianon kongregasyon a say pagmaliw a kabiangan na satan so ontanlan magayaga?

⁵ Saray totoon ipapasen a matalona ed sayan mundo so mabetbet a masebeg, maruksa ni ingen. (Uliran 29:22) Agaylan makarepreskon duma ed limog na totoo nen Jehova! Ag-onkukurang so Kristianon kongregasyon a kuanmono panangikurang na arum a totoo ed negosyo​—diad sakey a maabilidad balet makapasakit a paraan a mamaermen ed totoo. Imbes, sakey a liket so pagmaliw a kabiangan na kongregasyon. Sakey a rason et say kauyamoan so sakey a nengneng na kakabatan a nipapanengneng na saray Kristianos ed inheneral tan nagkalautla ed saray lalakin kualipikadon manbangat ed kapananisiaan. On, gayaga so resulta na bilin tan simbawan iter na aturon mamatatken a manbangat “tekep na kauyamoan na kakabatan.”​—Santiago 3:13.

6. Akin a nepeg a mauyamo iray Kristianon mamatatken?

⁶ Say espiritu, odino dominanten awawey, na totoo na Dios so mankakaukolan a saray lalakin apabtangan a mangasikaso ed kongregasyon so magmaliw a mauyamo, makatunongan, tan makatalos. (1 Timoteo 3:1-3) Saray ariripen nen Jehova so singa matamoy a karnero, aliwan bangar iran kanding, matungangan mula, odino mangasiban lobo. (Salmo 32:9; Lucas 10:3) Lapud malakarnero, nakakaukolan a tratoen ira a tekep na kauyamoan tan inkamatamoy. (Gawa 20:28, 29) On, iilaloan na Dios iray mamatatken a magmaliw a matamoy, mapangasi, maaro, tan maanos ed karnero to.​—Ezequiel 34:17-24.

7. Panon so pamilin na saray mamatatken ed arum odino itulong ed mansasakit ed espiritual?

⁷ Bilang “sakey ya aripen na Katawan,” say sakey a matatken so “nakaukolan a matamoy ed amin, maong a manbangat, a pansiansiaen to so inkasikaton kalmado ed leksab na kaugsan, a bilinen ton tekep na kauyamoan iramay masumpa; agla piga no say Dios iter to ed sikara so panagbabawi a mangipaarap ed suston pikakabat ed katuaan.” (2 Timoteo 2:24, 25) Nepeg ya ipanengneng na saray Kristianon pastol so matamoy a konsiderasyon sano manggugunaet a tulongan iray mansasakit ed espiritual, ta say karnero et kien na Dios. Agnepeg ya ipasen ira na mamatatken a singa sakey ya inabangan noagta kaukolan a magmaliw a mauyamo, a singa ed Maabig a Pastol, si Jesu-Kristo.​—Juan 10:11-13.

8. Anto so agawa ed mauyamon Moises, tan akin?

⁸ No maminsan et naromog na sakey a matatken a mairap a pansiansiaen so maamon espiritu. “Si Moises so sankamauyamoan ed saray amin a lalaki a wala ed tapew na dalin.” (Numeros 12:3) Ingen, sanen nidunget iray Israelita ed kakulangan na danum ed Kades, sikaray akisangsangan ed si Moises tan sikato so tinetel da lapud impangitonton to ed sikara a manlapud Ehipto ed sakey ya amagan kalawakan. Anggaman ed satan ya amin a si Moises so siuuyamon nansungdo, sikato so nansalitan mapasang tan siruruksa. Sikato tan si Aaron so inmalagey ed arap na totoo tan angipaarap na imano ed inkasikara, diad impansalita nen Moises: “Dengel yo, natan, sikayo ya atagey a linawa! Kasin yakaran mi kayo na danum a manlapud sayan dampay?” Kayari to pinaspas nen Moises so dampay ya amiddua, tan pinapaway na Dios so “dakel a danum” parad totoo tan ed ayayep da. Naermenan si Jehova lapud Sikato so ag-inalangon nen Moises tan Aaron, kanian si Moises so ag-apribilehyoan a mangipangulo ed saray Israelitas ed Nisipan a Dalin.​—Numeros 20:1-13; Deuteronomio 32:50-52; Salmo 106:32, 33.

9. Panon a nasubok so kauyamoan na sakey a matatken?

⁹ Say kauyamoan na Kristianon matatken so nasubok met ed nanduruman dalan. Alimbawa, pinasakbayan nen Pablo si Timoteo a nayarin wala so sakey ya onlesan “mapangta” tan “kinmalog so ulo to nisengeg ed saray panduaruwa tan pisangsang ed saray salita.” Intuloy nen Pablo: “Manlapud saraya so panlapuan na siblet, kolkol, panamabaing, saray mauges ya inap, siblangan na saray totoon mauges so kalakal da tan agda amta so tua.” Say manangasikason Timoteo so ag-onkiwas a siruruksa noag ingen “taynanan irayan bengatla,” tan sikato so “mangegemtan ed kaptekan, maridios a debosyon, pananisia, aro, sungdo, kauyamoan.”​—1 Timoteo 6:4, 5, 11.

10. Anto so impanonot nen Tito ed saray kongregasyon?

¹⁰ Anggaman saray mamatatken so nakaukolan a magmaliw a mauyamo, nepeg a magmaliw ira a mapekder ed maptek. Ontan si Tito, ya angipanonot ed saramay mililimog ed saray kongregasyon na Creta ya “ag-ira mansalita na makapasakit ed siopaman, ag-ira makolkol, magmaliw a makatunongan, ya ipanengneng da so amin a kauyamoan ed amin a totoo.” (Tito 3:1, 2) Ipapanengneng no akin a saray Kristianos so nepeg a magmaliw a mauyamo ed amin et indanet nen Tito so panangasi tan panangaro nen Jehova. Ag-inliktar na Dios iray mananisia lapud antokaman a matunong iran gawan agawaan da noag ingen lapud panangasi to ed panamegley nen Jesu-Kristo. Say kauyamoan tan anos nen Jehova so mankabaliksan met na kilalaban ed sikatayo. Sirin, singa si Tito, saray peles-ya-agew a mamatatken so nepeg a mangipanonot ed saray kongregasyon a pauleyan ed Dios, a Sikato so aligen diad pantrato ed saray arum ed mauyamon dalan.​—Tito 3:3-7; 2 Pedro 3:9, 15.

Iwanwan na Kauyamoan so Makabat a Managsimbawa

11. Unong ed Galacia 6:1, 2, panon so nepeg a pangiter na konseho?

¹¹ Anto no say piguratibon karnero so nankasalanan? Inkuan nen Pablo: “Agagi, no wala so nasagmakan ed anton pankasalananan, sikayon walaan na espiritual a kualipikasyon so mangipawil ed ontan a too ed espiritu na tayadno, a motekteken mo so inkasikan dili, ta ompan lamang natukso ka met. Mantatarokan kayo na awit na sinansakey, tan sirin sumpalen so ganggan nen Kristo.” (Galacia 6:1, 2) Say konseho so nagkalalon epektibo no niiter itan ed espiritu na kauyamoan. Anggan sisimbawaen na mamatatken so toon walaan na sanok, nepeg dan ipatnag so dangka, a kabat dan say “malambot a dila et buyaken to so pukel.” (Uliran 25:15) Siopaman ya anawet a singa pukel so napalambot na maamon balikas, tan say inkaawet to so onkepa.

12. Panon a say mapalnan espiritu so ontulong ed managsimbawa?

¹² Si Jehova so sakey a mauyamon Instruktor, tan say maamon dalan na panagbangat to so epektibo ed kongregasyon. Nagkalautla iya sano naromog na mamatatken a nakaukolan so panimbawa ed saramay mankakaukolan na espiritual a tulong. Insulat nen babangatan a Santiago: “Siopa so makabat tan makatalos ed sikayo? Ipatnag to komon so maabig a kondukta to saray gawa to a tekep na kauyamoan na kakabatan.” Manlalapu so kauyamoan ed respeto tan pisasalamat ed “kakabatan ed tagey,” a tekep na sipapaabeban pamidbir ed dilin limitasyon na sakey. Say maamo tan mapaabeban espiritu so manalimbeng ed managsimbawa ed makapasakit iran balikas tan lingolingo tan manggawa ed konseho ton mainomay ya awaten.​—Santiago 3:13, 17.

13. Panon a say “kauyamoan na kakabatan” so mangapekta ed dalan na pangiter ed konseho?

¹³ “Say kauyamoan na kakabatan” so mangamper ed managsimbawa ed pagmaliw ya agmanonot o maruksa. Ingen, say kapagaan ed pikakaaro odino ed pangabobon na siopaman so nepeg ya agmamakiwas ed matatken a mangibaga ed saray bengatlan adisenyon mamaliket imbes nen siuuyamon mangiparungtal na prangkan konsehon nibased Salita na Dios. (Uliran 24:24-26; 28:23) Say konsehon naawat nen Amnon ed kapinsan to so amenek ed pilalek to, balet sengegan na impakabalang na bilay to. (2 Samuel 13:1-19, 28, 29) Sirin, nepeg a saray peles a mamatatken so agmamakapuy ed saray prinsipyo na Biblia diad pamakepa ed konsiensia na sakey, ta say panggawa ed satan so mandesyang ed bilay to. Singa si Pablo, agnepeg a pokpokan na saray mamatatken so pangibaga ed saray arum na “amin a simbawa na Dios.” (Gawa 20:26, 27; 2 Timoteo 4:1-4) Say matatken a Kristianon managsimbawa so mangipanengneng na maridios a takot tan mangiter na matunong a konseho a tekep na kauyamoan na kakabatan.

14. Akin a nepeg a maalwar so sakey a matatken ya ag-idesisyonan so arum a nepeg a gawaen da ed inkasikara?

¹⁴ Say kauyamoan ya atekepan na mangatatawen a kakabatan so mangamper ed matatken a manggawa na maruksan ikekerew. Nepeg to met a bidbiren ya agmakabat tan agmatukoy ya idesisyonan to so sakey a nepeg a gawaen na sananey. Say matatken so responsabli ed saray pansumpalan no sikato so mandesisyon parad saray arum, tan sikato so minabang ed pakatetelan ed antokaman a mauges a pansumpalan. Nayarin ipaimano na matatken so ibabaga na Biblia, balet no anggapo so Makasulatan a ganggan ed sakey a pamaakaran, say mismon inkaalas na indibidual tan konsiensia so nepeg a manetermina ed gawaen to odino andi. Unong ya inkuan nen Pablo: “Ta balang sakey manakbat ed awit ton dili.” (Galacia 6:5; Roma 14:12) Anggaman ontan, say sakey a mantepet so natulongan ed panaggawa na dugan desisyon diad panamegley na pantepet na matatken ya ontulong ed toon mankatunongan ed saray kasulatan a nisiglaot ed agkapilitan iran kurang a nilukas ed sikato.

15. Anto so nepeg a gawaen no ag-amta na sakey a matatken so ebat ed sakey a tepet?

¹⁵ No ag-amta na matatken so ebat ed sakey a tepet, agto nepeg ya ebatan pian agnabaingan. Say kauyamoan na kakabatan so mangiyarawi ed sikato a manpalbeng tan nayarin mangiter na aliwan ebat a diad saginonor et sengegan na gonigon. Wala so “panaon ya ag-iyesel tan panaon a pansalita.” (Eclesiastes 3:7; ipareng so Uliran 21:23.) Nepeg a “mansalita” so sakey a matatken lambengat sano kabat to so ebat ed tepet odino kayari magenap ya impanusisa pian mangiter na suston ebat. Makabat so pangitilak ed mapalbeng iran tepet ya agnaebatan.​—Uliran 12:8; 17:27; 1 Timoteo 1:3-7; 2 Timoteo 2:14.

Kablian na Dakel Iran Managsimbawa

16, 17. Akin a matukoy parad saray mamatatken a mangonsulta ed balang sakey?

¹⁶ Say pikakasi tan panagaral so ontulong ed mamatatken ya onebat ed tepetepet tan mamenben ed mairap iran problema, balet nepeg a tandaan a “dia ed karaklan na managsimbawa wala so nagawaan.” (Uliran 15:22) Say pankonsulta ed arum a mamatatken so mansumpal ed makanan pankakasakey na kakabatan. (Uliran 13:20) Aliwan amin a mamatatken so walaan na namparan eksperiensia odino pikakabat ed Biblia. Sirin, say kauyamoan na kakabatan so nepeg a mamakiwas ed agtanton-eksperiensiadon matatken a mangonsulta ed mamatatken a walaan na babaleg a pikakabat tan lalon eksperiensiado, nagkalautla sano say sakey a seryoson bengatla so nepeg a benbenan.

¹⁷ Sano apili iray mamatatken a mangasikaso ed sakey a seryoson bengatla, siansian sikaray siaamot ya onkerew na tulong. Pian sikato so natulongan ed panhusga ed saray Israelita, nampili si Moises na “walaan na pakayari, matakot ed Dios, napanmatalkan a lalaki, a gugulaen da so agum.” Anggaman sikaray mamatatken, andian ira na ontanlan pikakabat tan eksperiensia a singa si Moises. Sirin, “say mairap a kaso so itarok da ed si Moises, balet balang melag a kaso so benbenan da ed inkasikara a bilang ukoukom.” (Exodo 18:13-27) Sirin, no nakakaukolan saray mamatatken a mangasikaso ed mairap a kaso so matukoy a manaanap iratan na tulong ed eksperiensiadon manangasikaso, anggaman sikaray manggawa na pinal a desisyon ed inkasikara.

18. Diad pamenben na hudisyal iran bengatla, anto so mapekder iran bengatla ed pamaseguro na duga iran desisyon?

¹⁸ Say Judion Mishnah kuanto a diad Israel saraman so manugyop na saray korte na baryo so nanduruma ed bilang unong ed kabelat na kaso. Wala so tuan kablian na dakel iran managsimbawa, anggaman say bilang so agmangarantiya ed inkaptek, ta say kinarakel so nayarin lingo. (Exodo 23:2) Saray maseguron bengatla a mamaseguron maptek iray desisyon a nagawa so say Kasulatan tan espiritu na Dios. Say kakabatan tan kauyamoan so mamakiwas ed saray Kristianos a manpasakup ed saraya.

Mantasi a Tekep na Kauyamoan

19. Panon a say kauyamoan so ontulong ed totoo nen Jehova a mantasi ed saray arum?

¹⁹ Ontulong met so kauyamoan ed ariripen nen Jehova a mantasi ed totoo na nanduruman disposisyon. (1 Corinto 9:22, 23) Lapud si Jesus so nambangat a tekep na kauyamoan, saray mapaabeba so agtinmakot ed sikato, a singa ed saray maruksan relihyoson papangulo. (Mateo 9:36) Siempre, saray maamon dalan to so anagyat ed “karnero,” aliwan mauges “iran kanding.” (Mateo 25:31-46; Juan 3:16-21) Anggaman angusar si Jesus na mabiskeg iran termino diad impideneng to ed singa-kanding a mansimpisimpitan, nepeg a mauyamo iray Tasi nen Jehova sano mangiyabawag na panangukom iran mensahe na Dios lapud andian ira na parehon pakatebek tan autoridad a wala ed si Jesus. (Mateo 23:13-36) Legan a denglen da so mensahe na Panarian a nipulong a tekep na kauyamoan, ‘saramay nigana ed andi-anggaan a bilay so nagmaliw a mananisia,’ a singa ed saramay malakarneron dinmengel ed si Jesus.​—Gawa 13:48.

20. Panon a nagunggunaan so estudyante na Biblia sano sikato so nabangatan a tekep na kauyamoan?

²⁰ Maabig iran pansumpalan so nagamoran diad pantasi tan panagbangat ed arum a tekep na kauyamoan tan diad iyapela ed sikara ed basiyan na lohiko, saray prinsipyo ed Biblia, tan katuaan. “Alangonen si Kristo a bilang Katawan ed kapusoan yo,” insulat nen Pedro, “lawas akaparaan ya onebat ed siopakaman a mankaukolan na katunongan ed ilalo a wala ed sikayo, ingen tekep na kauyamoan tan aralem a respeto.” (1 Pedro 3:15) Say estudyanten nibabangat ed mauyamon dalan so mangiyapasakey ed materyal imbes a nadisturbo o posibli ni ingen a natiror na maruksa, misasangsang a pamaakaran. Singa si Pablo, saray ministron mamibilin a tekep na kauyamoan so mangikuan: “Agkami mangiter na bengatlan kagapolan pian agnabalaw so ministeryo mi.” (2 Corinto 6:3) Anggan saray sumusumpa so no maminsan et onkiwas a paborablen tuloy ed saramay mamibilin a tekep na kauyamoan.

Nakakaukolan so Kauyamoan ed Amin

21, 22. Panon a say kauyamoan so makagungguna ed amin a totoo nen Jehova?

²¹ Agnepeg ya isulong so Kristianon kauyamoan lapud lambengat ed panagyat ed saramay walad paway na organisasyon nen Jehova. Sayan kalidad so makana ed pisiglaotan ed limog na totoo na Dios. (Colosas 3:12-14; 1 Pedro 4:8) Napabiskeg iray kongregasyon ed espiritual sano saray mauyamon mamatatken tan ministeryal ya ariripen so mankimey a mantutunosan. Say pangipanengneng na kauyamoan tan arum a maridios a kalidades so importante ed balang sakey ed totoo nen Jehova lapud wala so “sakey a ganggan” parad amin.​—Exodo 12:49; Levitico 24:22.

²² Say kauyamoan so mangitarok na kareenan tan liket ed totoo na Dios. Sirin, nepeg a satan so kabiangan na abel na kalidades a manibukel ed kawes ya isulong na amin a Kristianos ed ayaman, ed kongregasyon, tan inerman. On, amin ya ariripen nen Jehova so nakaukolan a nakawesan na kauyamoan.

Panon so Pangebat Yo?

◻ Akin a nepeg a saray Kristianon mamatatken so magmaliw a mauyamo?

◻ Panon a say kauyamoan so mangiwanwan ed makabat a managsimbawa?

◻ Anto so kablian na dakel iran managsimbawa?

◻ Akin a makagungguna so pantasin tekep na kauyamoan?

[Litrato ed pahina 15]

Saray totoo nen Jehova so malakarnero tan nakaukolan a natraton tekep na kauyamoan

[Credit Line]

Garo Nalbandian

[Litrato ed pahina 17]

Say kauyamoan so manggawa ed totoo nen Jehova a mantasi ed totoon walaan na nanduruman disposisyon