Agaylan Maliket Iray Mauyamo!

“Maliket iray mauyamo, lapud tawiren da so dalin.”​—MATEO 5:5.

1. Anto so mauyamon disposisyon a sinalita nen Jesus ed Sermon to ed Palandey?

DIAD Sermon to ed Palandey, inkuan nen Jesu-Kristo: “Maliket iray mauyamo, lapud tawiren da so dalin.” (Mateo 5:5) Sayan mauyamon disposisyon, odino inkaulimek, so aliwan mapalaway a pansimpisimpitan na inkamaamo, nisay natural ya ugalid personalidad. Imbes, satan so tuan akindalem a kauyamoan tan inkadeen a manunan naagamil diad ikiwas ed linawa tan panangiwanwan nen Jehova a Dios. Peteg a saray mauyamon totoo so walaan na makdem a panagmatalek ed Dios a nisindag ed mauyamon kondukta ed kaparan totoo.​—Roma 12:17-19; Tito 3:1, 2.

2. Akin ya inyabawag nen Jesus a maliket iray mauyamo?

² Inyabawag nen Jesus a maliket iray mauyamo lapud tawiren da so dalin. Bilang say ayadyarin tuloy a mauyamon Anak na Dios, si Jesus so Manunan Mananawir na dalin. (Salmo 2:8; Mateo 11:29; Hebreos 1:1, 2; 2:5-9) Balet bilang say Mesianikon “anak na too,” sikato so nawalaan na kaiba iran manuley ed mangatatawen a Panarian to. (Daniel 7:13, 14, 22, 27) Bilang “kaiban mananawir” nen Kristo, sarayan mauyamon alanaan so minabang ed tawir to a dalin. (Roma 8:17) Arum a mauyamon, malakarneron totoo so mangayaga ed magnayon a bilay ed Paraiso diad mangaraldalin a pasen na Panarian. (Mateo 25:33, 34, 46; Lucas 23:43) Satan ya ilalo so peteg ya akapanpaliket ed sikara.

3. Say Dios tan si Kristo so angiletneg na anton alimbawa nipaakar ed kauyamoan?

³ Inawat na mauyamon Manunan Mananawir so dalin manlapud Ama to, si Jehova, say manunan alimbawa na mauyamon disposisyon. Agaylan mabetbet a salitaen na Kasulatan a say Dios so “matantan a manpasnok tan daakan ed maaron-kaabigan”! (Exodo 34:6; Nehemias 9:17; Salmo 86:15) Sikato so walaan na baleg a pakayari balet ipapanengneng so ontan a kauyamoan kanian makaasingger iray managdayew to ed sikaton andi takot. (Hebreos 4:16; 10:19-22) Say Anak na Dios, a “mauyamo tan mapaabeba ed puso,” so angibangat ed babangatan to a magmaliw a mauyamo. (Mateo 11:29; Lucas 6:27-29) Kayari na satan, sarayan mauyamon ariripen na Dios tan Anak to so angalig tan angisulat nipaakar ed “kauyamoan tan kaabigan nen Kristo.”​—2 Corinto 10:1; Roma 1:1; Santiago 1:1, 2; 2 Pedro 1:1.

4. (a) Unong ed Colosas 3:12, anto so ginawa na saramay peteg a mauyamo? (b )Anton tepet so nepeg a kunsideraen tayo?

⁴ Natan, parehon saray alanaan a Kristianos tan mangaraldalin a kakaiba ra so nakaukolan a magmaliw a mauyamo. Diad impangikaindan ed antokaman a kaugsan, panagsaol, pansimpisimpitan, imon, tan panag-pauges, walan atulongan ira na masanton espiritu na Dios a napasimbalo ‘ed espiritu na kalakal da.’ (Efeso 4:22-24; 1 Pedro 2:1, 2) Sikaray apaseseg a mangisulong ed inkasikara na “matamoy ya arowan na panangabagey, kaabigan, kaabebaan na nonot, kauyamoan, tan panagtepel.” (Colosas 3:12) Balet anton peteg so sasakupen na kauyamoan? Akin a makagungguna so pagmaliw a mauyamo? Tan panon a sayan kalidad et ontulong ed liket tayo?

Say Mas Maapit a Pangimano ed Kauyamoan

5. Panon a naukeran so kauyamoan?

⁵ Say mauyamon indibidual so matamoy ed disposisyon tan awawey. Diad arum iran bersyon na Biblia, say adjetivon pra·ysʹ so nipatalos a “maulimek,” “mabinta,” “mauyamo,” tan “matamoy.” Diad klasikal a Griego, say adjetivo a pra·ysʹ so onaplika ed mapalnan palayupoy odino boses. Mangipatnag met ed sakey a magalang. Ikuan nen eskolar a W. E. Vine: “Say pangagamil na [noun a pra·yʹtes] so unaan tan manunan nipaarap ed Dios. Diad satan a kipapasen na espiritu ya awaten tayoray pidedeneng To ed sikatayo a bilang maabig, tan sirin andi suppiat odino andi sunggay; satan so maapit a tuloy a nisiglaot ed salitan tapeinophrosuné [kaumildian].”

6. Akin a nibagan say kauyamoan so aliwan kaleteyan?

⁶ Say kauyamoan so aliwan kaleteyan. “Wala so inkamatamoy ed praus,” insulat nen eskolar a William Barclay, “balet ed benegan na inkamatamoy wala so inkabiskeg.” Nakakaukolan so biskeg pian magmaliw a mauyamo. Alimbawa, nakaukolan so biskeg pian magmaliw a mapalna ed leksab na inkasanokan odino sano sikatayo so napasegsegang. Say mauyamon Anak na Dios, si Jesu-Kristo, so angiletneg na maabig ya alimbawa nipaakar ed saya. “Sanen sikato so naayew, agto binmales ya angayew. Sanen sikato so apairap, agto nangingongot; noagta inmatalek to so inkasikato ed samay [Jehova a Dios] mangukom a situtunong.” (1 Pedro 2:23) Singa si mauyamon Jesus, makapanmatalek tayo a say Dios so onarap ed saray manag-ayew tan managpasegsegang tayo. (1 Corinto 4:12, 13) Magmaliw tayon kalmado, a singa ed apasegsegang ya Esteban, a momoriaen a no sikatayo so matoor et tulongan itayo nen Jehova tan agmangiyabuloy ed antokaman a permanentin mamasakit ed sikatayo.​—Salmo 145:14; Gawa 6:15; Filipos 4:6, 7, 13.

7. Anto so ipanengneng na Uliran 25:28 nipaakar ed sakey ya indibidual a makulang ed kauyamoan?

⁷ Si Jesus so mauyamo, ingen angipatnag na biskeg diad intalindeg a mapekder ed no antoy maptek. (Mateo 21:5; 23:13-39) Siopaman a walaan na “kanonotan nen Kristo” so magmaliw a singa sikato ed sayan pamaakaran. (1 Corinto 2:16) No say sakey a too et aliwan mauyamo, sikato so aliwan singa-si-Kristo. Imbes, ontukoy ed sikato irayan salita: “Say toon andian na benben na linawa ed espiritu to so singa syudad a nagba ya andian na bakor.” (Uliran 25:28) Say ontan ya indibidual a makulang ed kauyamoan so mainomay a losoben na mauges iran kanonotan a sengegan na ikiwas to ed agmanepeg iran dalan. Bangta say mauyamon Kristiano so aliwan maletey, siansian kabat to a say “ebat, sano mabanayar, so mangipaliis ed sanok, balet say masagapsap a salita palesaen to so sanok.”​—Uliran 15:1.

8. Akin ya agmainomay so pagmaliw a mauyamo?

⁸ Agmainomay so pagmaliw a mauyamo, lapud atawir tayo so ag-inkayadyari tan kasalanan. (Roma 5:12) No sikatayoray ariripen nen Jehova, walaan itayo met na pibabakal sumpad mauges ya espiritun puersa a manubok ed kauyamoan tayo diad kapasegsegang. (Efeso 6:12) Tan kaslakan ed sikatayo so mankikimey ed limog na saramay walaan na maruksan espiritu na mundo a walad panamabanlong na Diablo. (1 Juan 5:19) Kanian panon tayon nabayuboan so kauyamoan?

Panon a Bayuboan so Kauyamoan

9. Anton punto de bista so ontulong ed sikatayon mamayubo ed kauyamoan?

⁹ Say nibased-Biblian kumbiksyon a nakakaukolan ed sikatayon mangipanengneng na kauyamoan so ontulong ed sikatayon mamayubo ed sayan kalidad. Inagew-agew tayon kimeyan so pamayubo na kauyamoan. Tano andi, magmaliw itayon singa totoon manmoria ed kauyamoan bilang kaleteyan tan manisip a say itatalona so mansumpal ed pagmaliw a mapangta, masubeg, tan maruksa ni ingen. Anggaman ontan, kondenaen na Salita na Dios so kinon, tan ikuan na makabat ya uliran: “Say toon maaro-ed-kaabigan so manumang ed dilin kamarerwa to, balet say maruksan too so mangitarok na gonigon ed dilin laman to.” (Uliran 11:17; 16:18) Onarawi iray totoo manlapud maruksa, agmapangasin too, a satan so manunan gawaen da lapu lambengat ed ipaliis diad pakasakitan na inkaruksa tan kakulangan na kauyamoan to.

10. No sikatayo so magmaliw a mauyamo, nepeg tayon manpasakup ed anto?

¹⁰ Pian magmaliw a mauyamo, nepeg tayo so manpasakup ed impluensya na masanton espiritu na Dios, odino aktibon puersa. Unong a ginawa nen Jehova a posibli ed dalin so pamawala na saray bunga, kanian ginawa toray ariripen ton mangipatnag na saray bunga na espiritu to, a pati kauyamoan. Insulat nen Pablo: “Say bunga na espiritu so aro, gayaga, deen, panagtepel, kaabigan, kamaungan, pananisia, kauyamoan, dangka. Sumpad saratan a bengatla anggapo so ganggan.” (Galacia 5:22, 23) On, say kauyamoan so sakey ed saray bunga na espiritu na Dios ya impanengneng na saramay mamapaliket ed sikato. (Salmo 51:9, 10) Tan agaylan panamasimbalo so pawalaen na kauyamoan! Diad pangiyilustra: Wala so sakey a maruksan too a manngaran na Tony, a nangulo, nantakew ed totoo, angipuslit na narkotiko, angipangulo na barkada na motorsiklo, tan nipisok. Ingen, diad impakagamor na pikakabat ed Biblia tan ed tulong na espiritu na Dios, sikato so apasimbalo bilang mauyamon aripen nen Jehova. Say salaysay nen Tony so tipiko. Sirin, anto so gawaen na sakey a too no say kakulangan na kauyamoan so manunan nengneng na personalidad to?

11. Diad pamayubo na kauyamoan, anto so betang na pikakasi?

¹¹ Say impapuson pikakasi parad espiritu na Dios tan parad bunga na kauyamoan so ontulong ed sikatayo a mamayubo ed sayan kalidad. Nayarin nakaukolan tayon “mantultuloy ya onkerew,” unong ya inkuan nen Jesus et ipagamor nen Jehova so kerew tayo. Kayari impangipanengneng a saray atooan ya atateng so mangiter ed ananak da na maabig a bengabengatla, inkuan nen Jesus: “No sikayo sirin, anta [makasalanan tan sirin mipadparan] mauges kayo et amta yo so mangiter na saray maong a panangaro ed saray anak yo, agta nagkalalo ni ed Ama a walad tawen a mangiter na masanton espiritu ed saramay onkerew ed sikato!” (Lucas 11:9-13) Say pikakasi so makatulong ed panggawa ed kauyamoan a permanentin nengneng na disposisyon tayo​—sakey a kalidad a mamawala na liket tayo tan ed saray kaulop tayo.

12. Akin a diad sinononot a saray totoo et ag-ayadyari so ontulong ed sikatayon magmaliw a mauyamo?

¹² Diad sinononot a saray totoo et ag-ayadyari so makatulong ed sikatayon magmaliw a mauyamo. (Salmo 51:5) Agtayo makapanisip o onkiwas a nasnaspot, a singa met ed arum a totoo, kanian maseguron tuloy a nepeg itayon walaan na empatya tan tratoen ira unong ed labay tayon pantrato ra ed sikatayo. (Mateo 7:12) Say pakaamtan amin tayo so nalilingo so nepeg a manggawa ed sikatayon manamerdona tan mauyamo ed pidedeneng tayo ed arum. (Mateo 6:12-15; 18:21, 22) Anggaman ontan, agta sikatayo so misalamat ya impanengneng na Dios so aro tan kauyamoan ed sikatayo?​—Salmo 103:10-14.

13. Panon a sikatayo so natulongan diad pamayubo na kauyamoan no bidbiren tayo a pinalsa na Dios iray totoon walaan na kawayangan a manpili?

¹³ Say pamidbir a pinalsa na Dios iray totoon walaan na kawayangan a manpili so makatulong met ed sikatayon mamayubo na kauyamoan. Agmangiyabuloy iya ed siopakaman a mangipulisay ed saray ganggan nen Jehova a bulos ed dusa, balet mangiyabuloy na panduruma ed pakataway, saray labay, tan saray aglabay ed limog na totoo to. Kanian bidbiren tayo ya anggapo so naobliga a mitukoy ed moldi ya ipapasen tayon sankaabigan. Sayan espiritu so ontulong ed sikatayon magmaliw a mauyamo.

14. Nipaakar ed kauyamoan, anto so nepeg a determinasyon tayo?

¹⁴ Say determinasyon ed agpangikaindan na kauyamoan so ontulong ed sikatayon mansiansian mamayubo ed sayan kalidad. Say panpasakup ed sayan impluensya na espiritu nen Jehova so amasimbalo ed kanonotan tayo. (Roma 12:2) Say mapalna, singa-Kriston espiritu so ontulong natan a mangiyarawi ed sikatayo manlapud “gawagawa na malukak a kondukta, lawan, panagbuanges, kasibaan, deneng tan makapabaing ya ananito.” Nepeg ya agtayon balot italirak so kauyamoan ed pinansyal, sosyal, tan arum iran rason odino lapud ansakit iran balikas na totoo ed inkamaridios tayo. (1 Pedro 4:3-5) Agtayo mangiyabuloy ed antokaman a manggawa ed sikatayon makapibiang ed “saray gawa na laman,” a nabalang tayo so kauyamoan tayo tan onsaew ed panawir na Panarian na Dios odino makapangayaga ed saray bendisyon to. (Galacia 5:19-21) Lawas tayon pablien so pribilehyo a bilang saray mauyamo na Dios, balanglan alanaan ed mangatatawen a bilay odino walaan na mangaraldalin ya ilalo. Kanian, kunsideraen tayoray pigaran gungguna na kauyamoan.

Saray Gungguna na Kauyamoan

15. Unong ed Uliran 14:30, akin a makabat so pagmaliw a mapalna?

¹⁵ Say mabintan too so walaan na deen ed puso, kanonotan, tan laman. Saya so lapud sikato so agmibibiang ed kolkolan, nagonigon ed saray kiwas na arum, odino pairapen so inkasikato ed maruksan kapagaan. Ontulong so kauyamoan ed sikaton manusisa ed saray liknaan to, tan saya so makagungguna ed mental tan pisikal. Ikuan na proverbio: “Say mareen a puso so bilay na laman.” (Uliran 14:30) Say kakulangan na kauyamoan so nayarin mangitonton ed sanok a mamaatagey na alta presyon o sengegan na problema ed panaggiling, asthma, sakit ed mata, tan arum iran problema. Say mauyamon Kristiano so mangayaga ed nanduruman gungguna, a mangilaktip ed “kareenan na Dios” a manbantay ed puso tan pakayari kanonotan to. (Filipos 4:6, 7) Agaylan makabat so pagmaliw a mauyamo!

16-18. Anto so epekto na kauyamoan diad siglaotan tayo ed saray arum?

¹⁶ Say kalidad na kauyamoan so mamaaligwas ed siglaotan tayo ed arum. Nayarin walaan itayo na datin ugalin ipilit iray bengatla ya anggad naala tayo so labay tayo. Nayarin onsanok iray totoo ed sikatayo lapud kulang itayo na kaumildian tan kauyamoan. Diad leksab na ontan iran sirkumstansya, agmanupresa iya ed sikatayo no sikatayo so nalanor ed sakey a sansangan kayari sananey. Anggaman ontan, ikuan na proverbio: “Lapu ed kakulangan na kiew say apuy naerep et iner a kaandian na talabutob say pankokolkol ontunda. Singa saray uring nipaakar ed petang na saray ngalab tan kiew ed apuy, ontan so makolkol a too a mamarlang ed kolkol.” (Uliran 26:20, 21) Imbes a ‘mangarum na kiew ed apuy’ tan pasanoken so arum, no sikatayo so mauyamo, nawalaan itayo na maabig a siglaotan ed sikara.

¹⁷ Say mauyamon too so maseguron nawalaan na maong a kakaaro. Magayaga iray totoon milimog ed sikato lapud sikato so walaan na positibon awawey, tan saray salita to so makarepresko tan masamit a singa dilo. (Uliran 16:24) Tua itan ed si Jesus, a makapangikuan: “Ala yo so pakok tan manaral kayo ed siak, ta siak so mauyamo tan mapaabeba ed puso, tan makaromog kayo na pakainawaan ed saray kamarerwa yo. Ta say pakok so mapangasi tan say awit ko anlemew.” (Mateo 11:29, 30) Si Jesus so aliwan maruksa, tan say pako to so aliwan manamairap. Saraman so onasingger ed sikato so atraton maong tan arepreskoan ed espiritual. Say kipapasen so mipadpara sano milimog itayo ed mauyamon Kristianon kaaro.

¹⁸ Mamaaro ed kapananisiaan so kauyamoan tayo. Agpanduaruwaan, maslak iran Kristiano ed Corinto so maasingger ed si Pablo lapud sikato so akikasi ed sikara “diad kauyamoan tan kaabigan nen Kristo.” (2 Corinto 10:1) Maseguron tuloy ya apakiwas iray taga-Tesalonica ed apostol, lapud sikato so mapalna, tan matamoy a managbangat. (1 Tesalonica 2:5-8) Andi suppiat a saray taga-Efeson mamatatken so walan akaaral a maong ed si Pablo tan inadaro ran maong. (Gawa 20:20, 21, 37, 38) Kasin ipapanengneng yo so kauyamoan a mamaaro ed sikayo ed saray arum?

19. Panon a say kauyamoan et ontulong ed totoo nen Jehova a mansiansia ra ed organisasyon to?

¹⁹ Say mauyamo so ontulong ed saray totoo nen Jehova a magmaliw a pasakup tan mansiansia ra ed organisasyon to. (Filipos 2:5-8, 12-14; Hebreos 13:17) Mangamper so kauyamoan ed sikatayo diad pananap na gloria, a nibased kinon a makapasakit ed Dios. (Uliran 16:5) Ag-ipasen na mabintan too so inkasikaton atagtagey ed kapananisiaan, tan agto panggunaetan so ontalona ed kadismaya ra. (Mateo 23:11, 12) Imbes, bidbiren to so dilin makasalanan a kipapasen to tan say pankaukolan to ed dondon a probisyon na Dios.

Mamawala na Liket so Kauyamoan

20. Anto so epekto na kauyamoan ed bilay na pamilya?

²⁰ Nepeg a tandaan na amin ya ariripen na Dios a say kauyamoan so sakey a bunga na espiritu to a mamawala na liket. Alimbawa, lapud ipapanengneng na totoo nen Jehova so ontan a kalidades a singa aro tan kauyamoan, walaan ira na daakan a liket ed ayaman da. Sano say asawan laki tan asawan bii so mideneng ed balang sakey ed mabintan dalan, saray anak da so napabaleg ed mareen a kaliberliber, aliwan pamilyan napno na maruksan salita tan aksyon. Unong a say ama et manimbawa ed ananak diad kauyamoan, walaan iya na maabig ya epekto ed malangwer iran kanonotan da, tan say mareen ya espiritu so maseguron magmaliw a kabiangan na personalidad da. (Efeso 6:1-4) Say kauyamoan so ontulong ed kaasawaan a lalakin mantultuloy a mangaro ed kaasawaan dan bibii. Ontulong itan ed saray asawan bibii a pauleyan ed kaasawaan a lalaki tan mamakiwas ed ananak ya ontulok ed atateng da. Say kauyamoan so mamalesa met na manamerdonan espiritu ed saray membro na pamilya a mangarum na liket.​—Colosas 3:13, 18-21.

21. Diad segek, anton simbawa so inter nen apostol Pablo ed Efeso 4:1-3?

²¹ Saray mauyamon pamilya tan sinansakey so mamalesa na liket ed saray kongregasyon a pililimogan da. Sirin, nepeg a panggunaetan na totoo nen Jehova so pagmaliw a mauyamo. Gagawaen yo ta? Kinerew nen Pablo ed kaparan alanaan a Kristianos a manakar a makanakana ed mangatatawen ya akatawagan da, a gagawaen “a tekep na sigpot a kaabebaan na nonot tan kauyamoan, a pati panagtepel, a manaarowan so sakey tan sakey, a siseseseg ya imatonan so pankakasakey na espiritu ed bedber na kareenan.” (Efeso 4:1-3) Saray Kristiano met a walaan na mangaraldalin ya ilalo so nepeg met a mangipanengneng na kauyamoan tan arum iran maridios a kalidad. Saya so kurang a mangitarok na tuan liket. Peteg a maliket iray mauyamo!

Panon so Iyebat Yo?

◻ Akin a maliket iray mauyamon totoo?

◻ Anto so kabaliksan na pagmaliw a mauyamo?

◻ Panon a nabayuboan so kauyamoan?

◻ Anto iray arum a gungguna na kauyamoan?