Say Agew na Panamales na Dios

SINGA anengneng tayo ed apalabas ya artikulo, walaray pigaran rason no akin a mauges so pananap tayo na panamales. Mauges lapud diad kaunoran et agmanresolbe na antokaman. Mauges ta mamaawet ed gulaan imbes a mamakasakey ed bedber na pikakaaro. Tan mauges lapud makapasakit a mismo ed sakey a maniisip ya ombales.

Anggaman ontan, say sankaimportantian a rason, no akin a mauges so panamales na too so anengneng ed saray salita nen Moises ed Israel: “Si Jehova a Dios yo so sakey a mapangasi a Dios.” (Deuteronomio 4:31) Lapud say Dios so mapangasi, nepeg tayo so magmaliw a mapangasi a singa sikato. Imbaga nen Jesus ed saray patumbok to: “Mapangasi kayo komon, unong a mapangasi so Ama yo.”​—Lucas 6:36.

Anggaman kuan, dedeskribien met na Biblia si Jehova a bilang sakey a “Dios ya akanbetang na panamales.” (Salmo 94:1) Sinalita nen propeta Isaias so nipaakar ed “taon na pamalangkap ed biang nen Jehova” tan ontan met “ed agew na panamales ed biang na Dios tayo.” (Isaias 61:2) Panon a say Dios et magmaliw a namparan mapangasi tan manamales? Tan no sikatayo so mangalig ed panangasi na Dios, akin a sikato so agtayo aligen ed panangibales?

Pian naebatan so ununan tepet, say Dios so mapangasi lapud inaro to so katooan, tan perdonaen to anggad sarag to tan anggad nayarian to pian ikdan iray totoo na pankanawnawan mamasimbalo ed saray dalan da. Dakel, so walan anganamot ed sayan panangasi, a singa si apostol Pablo. Balet say Dios so ombales met​—diad pantalos ed panggawa na hustisya​—lapud say ontan a panangasi so mantultuloy lambengat ed inggeter a panaon. Sano idemostra na arum a sikara so agbalot manguman ed saray dalan da, say Dios so mangukom legan na tatawagen ya agew na panamales to.

Diad pangebat ed komaduan tepet so, andi, agmakatunongan so pagmaliw tayo a manangibales lapud say Dios et ombales. Si Jehova so ayadyari ed inkahustisya. Saray totoo so andi. Nanengneng na Dios so amin a kabiangan na sakey a pamaakaran tan lawas manggawa na matunong a desisyon. Sikatayo so agnapanmatalkan a manggawa na pareho. Kanian insimbawa nen Pablo: “Aleg a sikayo a dili so ombales, inararo, noag ingen ikdan na pasen so sanok; ta walan nisulat: ‘Siak so akankien na panamales; siak so ontumang naani, kuan nen Jehova.’” (Roma 12:19) Parad pankaabigan tayo, nepeg ya ipalima tayo so panamales ed si Jehova.

Akin ya Agew na Panamales?

Anggaman kuan, diad Biblia et dakel iran pasen so mamidbir ed pankaukolan na pikuekuentaan ed agmanagbabawin managgaway mauges. Alimbawa, impasakbay nen apostol Pablo a say Dios, ed panamegley nen Jesus, so mangitarok na “panamales ed saramay agmakaamta ed Dios tan ed saramay ag-ontulok ed maong a balita nipaakar ed Katawan tayo a Jesus.” (2 Tesalonica 1:8) Walaan itayo na maabig iran katunongan a seryosoen irayan salita. Akin?

Lapud sakey a bengatla ed pigara, say karaklan natan so mantultuloy ya onsusumpa ed inkasoberano na Amalsa, ikakaindan da so matunong iran ganggan to. Balanglan ibabaga ran manisia ed Dios odino andi, malinlinew ya ipanengneng na kondukta ra ya agda liknaen so pikuekuentaan ed arap na Dios. Onaplika iray salita na salmista ed amin na saratan: “Akin a say bagel et modmoraen to so Dios? Inkuan to ed puso to: ‘Agmo nakakaukolan so pikuekuentaan.’ (Salmo 10:13) Maseguro, ya ag-abuloyan nen Jehova a sikato so maandon namodmora ed sayan dalan. Anggaman sikato so sakey a Dios na aro, sikato met so sakey a Dios na inkahustisya. Imanoen toray nangis na saramay tuan mapaga ed inkahustisya: “Alagey ka, O Jehova. O Dios, yayag mo so limam. Agmo lilingwanan iray apairap.”​—Salmo 10:12.

Nagkalalo ni, saray manangipulisay-ganggan a totoo so manederal ed mismon dalin a panbibilayan tayo. Sikaray manudutak ed dagem, say dalin, tan say danum; papanoen da so dalin na ag-inkahustisya tan karuksaan. Tan manisimpen ira na magenap a kemikal, nuklear, tan arum iran makapatey ya armas a manisigensigen ed kililiktar na sankatooan. Say madibinon pibabali so nakaukolan ta pian naseguro so maligen ya arapen parad matulok a katooan. (Apocalipsis 11:18) Sayan pibabali so tutukoyen nen Isaias ya agew na panamales.

Anto so Gawaen na Agew na Panamales na Dios?

Unong ed Vine’s Expository Dictionary of Old and New Testament Words, ed Griegon Kasulatan, say salita parad panamales, sano nausar a mikonektaan ed Dios, so literal a mankabaliksan a “‘saman so ompaway lapud inkahustisya,’ aliwan, singa mabetbet ed atooan a panamales, a manlapu lambengat ed kasakitan o lapud liknaan lambengat na inkasanok.” Sirin, say panamales na Dios a sumpad saray kakabusol to so aliwan panaon na agnakontrol a panamatedter na dala, a singa personal a kolkolan ed dala. Ibabaga na Biblia ed sikatayo: “Amta nen Jehova so pangiliktar ed totoo na maridios a debosyon manlapud tukso, bangta mangikana ed saray agmatunong a totoo na katawtaw ed agew na panangukom.”​—2 Pedro 2:9.

Maniilalo iray ariripen na Dios ed agew na panamales na Dios a bilang panaon sano say maptek a kondukta so nitandoro tan say matunong et niliktar manlapud panamairap na marelmeng. Agkabaliksan na saya a sikara so walaan na mauges a pilalek odino manangibales. Ipapasakbay na Biblia: “Siopaman a mangayaga ed kairapan na sananey so agbulos manlapud dusa.” (Uliran 17:5) Diad kasonian to, bayuboan da so panangasi tan panangabagey, ya ipapalima ed Dios so antokaman iran desisyon nipaakar ed panamales.

Tua, a mairap parad sinmanok iran sinansakey ya onkiwas ed sayan dalan. Balet posibli, tan dakel so akapanggawa ed satan. Alimbawa, si Pedro so walaan na agmaliket ya inpanugaw tan mabetbet a pepekpeken na kuya to. Kanian sikato so binmaleg a maruksa, maparanay a sikato so nidalem ed pulisya a sengegan na gulo tan ipapangget to ed asawa to tan ananak to so sanok to ed kuya to. Kaunoran, sikato so tinmalineng ed sakey ed saray Tasi nen Jehova tan diad saginonor et ginmapon nanaral na Biblia. Isalaysay to, “Tekep na tulong nen Jehova, apasimbalo ak, tan natan, imbes a mangitulot ed totoo, tutulongan kora bilang sakey a Kristianon matatken.” Tekep na tulong na Biblia tan masanton espiritu, agnabilang iran arum ni so walan mipadparan apasimbalo manlapud pagmaliw a maisasanok odino manamales a mamaarap ed pangipanengneng na aro tan anos ed saray arum.

Anto so Gawaen Yo?

Say pansiansian sinononot ed onsasabin agew na panamales na Dios so ontulong ed sikatayon manganamot ed anos nen Jehova. Balet say pankanawnawan manggawa ed satan so limitado. Diad asingger la et onsabi itan ya agew. Impanengneng nen apostol Pedro no akin ya agni sinmabi itan: “Si Jehova agto bayagen so sipan to, a singa ipasen na arum a totoo so inkatantan, noagta sikato so mananos ed sikayo lapud agto kaliktan so siopaman a naderal balet kaliktan ton amin et makagamor na panagbabawi.”​—2 Pedro 3:9.

Sirin, kapilitan so panparaan la natan ed agew na pikuekuentaan na Dios diad panamegley na panaral na Kasulatan tan pangiyaplika ed konseho ra. Saya so ontulong ed sikatayo ya ontumbok ed saray salita na salmista: “Tundaan mo so petang na ulo tan ikaindan mo so sanok; agmo gonigonen so inkasika ed antokaman a mananguyor ed panggawa na mauges. Ta saray manggawa na mauges napater ira, balet saramay maniilalo ed si Jehova mangayarian ed dalin.”​—Salmo 37:8, 9.

[Litrato ed pahina 7]

Kayari na agew na panamales na Dios, ‘saramay maniilalo ed si Jehova mangayarian ed dalin’