Manliket ed Ilalo ed Panarian!

“Manliket ed ilalo. Mansungdo ed kairapan.”​—ROMA 12:12.

1. Akin a naromog tayo so gayaga ed pilimog ed si Jehova, tan anto so impaseseg nen apostol Pablo ed saray Kristianos a gawaen?

“SAY maliket a Dios.” (1 Timoteo 1:11) Agaylan deskribien na saya si Jehova! Akin? Lapud amin na saray gawa to et mangitarok na baleg a liket ed sikato. Lapud si Jehova so Subol na amin a maong tan makapaliket iran bengatla, amin na saray intelehentin palsa to so makaromog na liket ed pilimog da ed sikato. Matukotukoy, a pinaseseg nen apostol Pablo iray Kristianos a mangapresya ed magayagan pribilehyo ran akabatan si Jehova a Dios, a misalamat ed amin a makapakelaw iran regalo To ed inkapalsa, tan manliket ed maaron-kaabigan ya impanengneng To ed sikara. Insulat nen Pablo: “Lawas mangayaga kayo ed Katawan. Kuanko lamet, Mangayaga kayo!”​—Filipos 4:4; Salmo 104:31.

2. Anton ilalo so mangitarok na baleg a gayaga, tan anto so impaseseg ed saray Kristianos a gawaen nipaakar ed sayan ilalo?

² Kasin tutumboken na saray Kristianos iyan simbawa ya inyopresi nen Pablo? Peteg ya ontan! Saray espiritual ya agagi nen Jesu-Kristo so manliliket ed maglorian ilalo ya inlukas na Dios parad sikara. (Roma 8:19-21; Filipos 3:20, 21) On, kabat da a mibiang ira ed panumpal na baleg ya ilalo parad arapen na katooan, nampara ed mabilay tan inatey, diad panlingkor a kaiba si Kristo ed mangatatawen a gobiernon Panarian to. Isipen pa so agaylan panliket da ed saray pribilehyo ra bilang kaiban-mananawir, a manlingkor bilang arari tan saserdote! (Apocalipsis 20:6) Alay liket da legan a tulongan da so matoor a katooan a makagamor na inkayadyari tan ontulong a mangiwanwan ed kipawil na Paraiso ed dalin tayo! Peteg, amin ed saray ariripen na Dios so walaan na “basiyan na ilalo ed andi-anggaan a bilay a say Dios, ya agto nayari manburi, insipan ton akauna nen saray panaon na saray nilasus a taon.” (Tito 1:2) Nipaakar ed sayan engranden ilalo, papasesegen nen apostol Pablo so amin a Kristianos: “Mangayaga ed ilalo.”​—Roma 12:12.a

Tuan Gayaga​—Sakey a Kalidad na Puso

3, 4. (a) Anto so kabaliksan na terminon “manliket,” tan panon kabetbet so panliket na saray Kristianos? (b) Anto so tuan gayaga, tan anto so mandependi ed satan?

³ Say “panliket” et kabaliksan to so panlikna tan pangibalikas na gayaga; agto kabaliksan so apasakey a kipapasen na kabunigasan, odino agnapokpokan a gayaga. Saray berbon mipetekan ed Hebreo tan Griegon salitan nausar ed Biblia parad “gayaga,” “sayaksak,” tan “panliket” so mangibalikas na parehon akindalem a liknaan tan akinpaway a pangipatnag ed gayaga. Apaseseg iray Kristianos a “mantultuloy a manliket,” “lawas manliket.”​—2 Corinto 13:11; 1 Tesalonica 5:16.

⁴ Balet panon a lawas manliket so sakey? Posibli iya lapud say tuan gayaga so kalidad na puso, akindalem a kalidad, espiritual a sakey. (Deuteronomio 28:47; Uliran 15:13; 17:22) Satan so bunga na espiritu na Dios, ya indatak nen Pablo kayari na aro. (Galacia 5:22) Bilang paloob a kalidad, agmandependi itan ed mapalaway iran bengatla, nisay diad saray agagi tayo. Noagta mandependi itan ed masanton espiritu na Dios. Tan manlalapu itan ed akindalem ya inkapnek ed pakaamta a walaan kayo na katuaan, say ilalo ed Panarian, tan gagawaen yo so makapaliket ed si Jehova. Sirin, say gayaga so aliwan basta ugalin atawir tayo; kabiangan itan na “balon personalidad,” say atugyop a kalidades a mangibiig ed si Jesu-Kristo.​—Efeso 4:24; Colosas 3:10.

5. Kapigan tan panon a wala so mapalaway iran panangipatnag na gayaga?

⁵ Anggaman say gayaga et sakey a kalidad na puso, anggaman kuan satan so nipanengneng ed mapalaway no maminsan. Antorayan kipapasen, ya akinpaway iran pangipatnag ed gayaga? Nayarin saratan so antokaman a bengatlan manlapud inkabinta na lupa tan aktual a panlukso lapud gayaga. (1 Arari 1:40; Lucas 1:44; Gawa 3:8; 6:15) Sirin, kasin kabaliksan na saya a saray totoon agmatongtong odino lawas agmaimis et andian na gayaga? Andi! Say tuan gayaga so agnibalikas a mismo ed mabetbet a panlabir, iyelek, panimis, odino panngireyet. Saray sirkumstansya so sengegan a nipatnag so gayaga a mismo ed nanduruman dalan. Aliwan say gayaga lambengat so manggawa ed sikatayon maliket ed Kingdom Hall noag, ingen, say inaagin panangaro tan aro.

6. Akin a lawas maliket iray Kristianos anggaman nidunget ira ed agmarakep iran kipapasen?

⁶ Say mabetbet ya itsura na gayaga et say akindalem ya inkaligen to bilang impanpuson nengneng na Kristianon balon personalidad. Saya so manggawan posibli a lawas manliket. Siempre, no maminsan nayarin naaburido tayo nipaakar ed sakey a bengatla, odino nipaarap tayo ed agmarakep iran kipapasen. Balet siansian nawalaan tayo na gayaga ed puso tayo. Saray arum a Kristianos so ariripen, a walaan na kakatawan a mairap a paliketen. Kasin saratan a Kristianos so lawas a maliket? On, lapud ilalo da ed Panarian tan gayaga ed saray puso ra.​—Juan 15:11; 16:24; 17:13.

7. (a) Anto so imbaga nen Jesus nipaakar ed gayaga diad leksab na kairapan? (b) Anto so ontulong ed sikatayon mansungdo ed kairapan, tan siopa so angiletneg na sankaabigan ya ehemplo nipaakar ed saya?

⁷ Kayarin tuloy na impangikuan nen apostol Pablo: “Mangayaga ed ilalo,” intuloy to: “Mansungdo ed kairapan.” (Roma 12:12) Sinalita met nen Jesus so gayaga ed leksab na kairapan sanen inkuanto ed Mateo 5:11, 12: “Mapalar kayo sano balawen kayo na totoo tan pasegsegangen da kayo . . . Mangayaga tan manliket kayon mapalalo, ta baleg so tumang yo ed tawen.” Say panliket tan panlukso lapud gayaga so agnakaukolan a literal a mapalaway a panangipatnag; manunan satan so akindalem ya inkapnek a wala ed sakey diad pamaliket ed si Jehova tan Jesu-Kristo sano mansiansian mapekder ed leksab na subok. (Gawa 5:41) Diad tua, say niletneg a gayaga so ontulong ed sikatayon mansungdo legan a walad kairapan. (1 Tesalonica 1:6) Diad saya, ya inletneg nen Jesus so sankaabigan ya ehemplo. Ibaga ed sikatayo na Kasulatan: “Lapud gayaga a niiyan ed arap to sinungdoan to so panamairapan a kiew.”​—Hebreos 12:2.

Mangagayaga ed Ilalo Anggaman walaray Problema

8. Anto iran problema so nayarin kidungetan na saray Kristianos, balet akin a saray problema so agmangekal ed gayaga na Kristiano?

⁸ Say pagmaliw ya aripen nen Jehova et agmangibulos ed sakey manlapud saray problema. Nayarin walaray problema ed pamilya, kairapan ed ekonomya, maletey a kabunigasan, odino ipatey na inadaro. Anggaman saratan a bengatla so nayarin mamalesa na ermen, agda ekalen so letnegan na panliket tayo ed panilalo ed Panarian, say akindalem a gayaga a wala ed puso tayo.​—1 Tesalonica 4:13.

9. Anto iray walan problema nen Abraham, tan panon tayon amta a sikato so walaan na gayaga ed puso to?

⁹ Alimbawa, ipasen pa si Abraham. Say bilay so aglawas mainomay parad sikato. Sikato so walaan na saray problema ed pamilya. Say kalugoran ton Hagar, tan asawa ton, Sara, so walaan na balingaan. Wala so kolkolan. (Genesis 16:4, 5) Niludlurey nen Ismael si Isaac, a pinasegsegang to. (Genesis 21:8, 9; Galacia 4:29) Kaunoran, say inadaron asawa nen Abraham, si Sara, so inatey. (Genesis 23:2) Anggaman ed sarayan problema, sikato so nangayaga ed ilalo ed Bini na Panarian, say Bini nen Abraham, a diad panamegley to amin iran pamilya so napapalar ed inkasikara. (Genesis 22:15-18) Tekep na gayaga ed puso to, sikato so nansungdo ed serbisyo ed si Jehova ed loob na sanlasus a taon kayari intaynan to ed nianakan ton syudad na Ur. Kanian walan nisulat nipaakar ed sikato: “Ta aalagden to so syudad a nawalaan na peteg a letnegan, a say managpaalagey tan managgawa et say Dios.” Lapud pananisia nen Abraham ed onsasabin Mesianikon Panarian, say Katawan a Jesus, sanen tinuro la na Dios a magmaliw ya Ari, so makapangibagan: “Si Abraham . . . so nangayagan tuloy ya akanengneng ed agew ko et anengneng to tan nanliket.”​—Hebreos 11:10; Juan 8:56.

10, 11. (a) Anto so walan pipupuligesgesan tayo bilang Kristianos, tan panon a sikatayo so niliktar? (b) Anto so ontulong ed sikatayo ed kakulangan tayon mibakal a sumpad makasalanan a laman tayo?

¹⁰ Bilang ag-ayadyarin totoo, walaan itayo met na pibabakal ed makasalanan a laman, tan sayan pipupuligesgesan ed panggawa na maptek so makapagonigon a tuloy. Anggaman ontan, say pibakal tayo ed saray kakapuyan tayo et agto kabaliksan ya anggapoy ilalo tayo. Naermenan si Pablo ed sayan gutgutan, tan inkuanto: “Siopa so mangilaban ed siak ed laman a mamaarap ed patey? Misalamatak ed Dios, lapud Jesu-Kristo a Katawan tayo!” (Roma 7:24, 25) Diad panamegley nen Jesu-Kristo tan say dondon ya intarok to, nilaban itayo.​—Roma 5:19-21.

¹¹ Say dondon bagat nen Kristo so ontulong ed kakulangan tayon mibakal ya ayadyarin tuloy. Makapanliket tayo ed sayan dondon lapud gawaen ton posibli so alinisan a konsiensia tan kaperdona na saray kasalanan tayo. Diad Hebreos 9:14, sasalitaen nen Pablo so “dala nen Kristo” a walaan na pakayarin “linisan toray konsiensia tayo ed saray inatey a gawa.” Kanian, saray konsiensia na saray Kristianos so agnakaukolan a napabelat na panangondena tan liknaan na kasalanan. Saya, pati say walan ilalo tayo, so manugyop na mabiskeg a puersan parad magayagan liket. (Salmo 103:8-14; Roma 8:1, 2, 32) Diad pandalepdep ed ilalo tayo, amin tayo so napaseseg a mibakal a sitatalona.

Sinononot ed Ilalo Tayo

12. Anton ilalo so nonoten na alanaan iran Kristianos?

¹² Importante ed parehon alanaan-ed-espiritun nakdaan tan arum a karnero a sinononot ed “ilalo [ra] ed kilalaban,” ya isusulong itan bilang mananalimbeng a takuko. (1 Tesalonica 5:8) Saray alanaan a Kristianos so makapandalepdep ed makapakelaw a pribilehyon pakagamor na ag-ipapatey ed tawen, a niyasingger ed si Jehova a Dios, tan mangayaga ed personal a pililimog ed niglorian Jesu-Kristo tan saray apostoles tan arum niran 144,000, a nansiansia ed katooran da ed loob na saray siglo. Agaylan agnadeskriben kayamanan a pililimog!

13. Panon so liknaan na alanaan a siansian wala ed dalin nipaakar ed ilalo ra?

¹³ Anto so liknaan na pigara nin nakdaan a wala ni ed dalin nipaakar ed ilalo ra ed Panarian? Saya so nasegek ed saray salita nen F. W. Franz, presidente na Watch Tower Society, ya abautismoan nen 1913: “Say ilalo mi so seguradon bengatla, tan nagnap a nasumpal itan ed kaunoran ed sakey ed 144,000 iran membro na melag a pulok ed labas na sukat ya agmi naisip. Sikamin nakdaan a wala nen 1914, sanen amin mi so nanilalon ontawen, so ag-akabalang na pakatalos mi ed kablian na saman ya ilalo. Balet sikami so mabiskeg ed satan a singa nensaman, tan sikami so nagkalalon mangaapresya ed satan legan ed andukdukey a panaalagar ed satan. Satan so bengatlan makanan alagaren, anggan kakaukolanen na satan so nilaksan taon. Ikuentak so ilalo mi a lalon atagey no ipareng nensaman, tan agkon balot labay a nabalang so panamablik ed satan. Say ilalo na melag a pulok so mamaseguro met a say panilalo na baleg ya ulop na arum a karnero so onsabi, ya agbalot onsaew, nasumpal ed labas na sankaliwawaan ya imahinasyon tayo. Kanian sikatayo so mamebenben anggad sayan mismon oras, tan sikatayo so mansiansian mamenben ya anggad paneknekan na Dios a sikato so tua ed ‘sankablian tan engrande iran sipan’ to.”​—2 Pedro 1:4; Numeros 23:19; Roma 5:5.

Mangagayaga Natan ed Ilalo ed Paraiso

14. Anton ilalo so kaukolan a nononoten na baleg ya ulop?

¹⁴ Say ontan a balikas na maliket a pananisia so angikalbo ed saramay kabiangan na baleg ya ulop na arum a karnero na engrande iran rason parad pangayaga. (Apocalipsis 7:15, 16) Nepeg a sinononot iratan ed ilalo diad pakaliktar ed Armagedon. On, manilalo ed pakanengneng diad pangalangon ed Panarian na Dios ed sankatalbaan ya inkasoberano nen Jehova a Dios tan pamasanto ed maglorian ngaran to diad pangitarok na baleg a kairapan, a manlinis ed dalin ed saray marelmeng a say Dios da et say Diablo. Agaylan gayaga so pakaliktar ed satan a baleg a kairapan!​—Daniel 2:44; Apocalipsis 7:14.

15. (a) Anton kimey na panagtambal so ginawa nen Jesus sanen sikato so walad dalin, tan akin? (b) Anto iray pankaukolan ed kabunigasan na saray makaliktar ed Armagedon, tan akin a miduma ra ed saramay apaoli?

¹⁵ Nipaakar ed baleg ya ulop, ibabaga na Apocalipsis 7:17: “Ta say Kordero so . . . mamastol ed sikara, tan sikara so itonton to ed saray subol na danudanum na bilay. Tan say Dios punasen to so balang lua ed saray kamataan da.” Anggaman sayan propesiya so walaan na espiritual a kasumpalan natan, nanengneng na saray makaliktar ed Armagedon a literal a nasumpal. Panon ya ontan? Bueno, anto so ginawa nen Jesus sanen sikato so walad dalin? Tinambal to so emel, pinaakar to so piley, nilukasan toray layag na telek tan saray mata na saramay bulag, tan tinambal to so kating, paralitiko, tan ”amin a nengneng na sakit tan beblay.” (Mateo 9:35; 15:30, 31) Agta satan so kakaukolanen na saray Kristianos natan? Akbibiten na baleg ya ulop iray kaleteyan tan beblay ed balon mundo. Anto so ilaloan tayon gawaen na Kordero nipaakar ed satan? Saray nakaukolan na saramay makaliktar ed Armagedon so duman tuloy ed saray nakaukolan na saramay napaoli. Saray napaoli so nayarin napalsa a tekep na sigpot, maabig, mabunigas iran laman, anggaman andian ni na atooan ya inkayadyari. Lapud milagro na kioli, mabitar ya agdan tampol nakaukolan so pangiyapiger ed antokaman a datin kaleteyan diad milagro na panagtambal. Diad biek a dapag, lapud nikadkaduman eksperiensia ra ed pakaliktar ed Armagedon, say mamilagron pangiyapiger so nakaukolan na dakel ed baleg ya ulop tan naawat da. Mabitar, say baleg a getma na saray panagtambal nen Jesus et say pangipanengneng na panamaseseg ed baleg ya ulop na magayagan ilalo ya ag-ira lambengat niliktar noagta natambal kayari to.

16. (a) Kapigan a nayarin nagawa so mamilagron panagtambal ed saray makaliktar ed Armagedon, tan ed anton pansumpalan? (b) Diad anton ilalo a mantultuloy itayon manliket legan na Milenyo?

¹⁶ Say ontan a mamilagron panagtambal so lohikon nagawa ed limog na saray makaliktar ed Armagedon kayarin tampol na Armagedon tan nayarin sakbay ya igapo na kioli. (Isaias 33:24; 35:5, 6; Apocalipsis 21:4; ipareng so Marcos 5:25-29.) Insan ibantak na totoo iray salming, baston, saklay, wheelchair, posteso, katulong ed pandengel, tan mipadpara. Agaylan sengegan na pangayaga! Agaylan satan ya asakbay a manangipawil a kiwas nen Jesus so ontukoy ed betang na saray makaliktar ed Armagedon a bilang say letnegan na balon dalin! Saray makarisgon sakit so naandi ta pian sarayan makaliktar so makaabante tekep na seseg, a manpilalek a tuloy ed makapakelaw a kimey ed Milenyo ya onnatnat ed arapen da, ya agla naalipanesan ed saray kairapan a nayarin intarok ed sikara na daan a mundo. Tan amin legan na milenyo, et panggayagaan da so ilalo ed pakadampot na sigpot ya ayadyarin atooan a bilay diad sampot na saratan a sanlibon taon.

17. Anto iran gayaga so niwala legan a nagagawa so kipawil na Paraiso?

¹⁷ No satan so ilalo yo, nonoten met so gayagan pibiang ed pangipawil ed Paraiso diad dalin. (Lucas 23:42, 43) Andi-duaruwan saray makaliktar ed Armagedon so ontulong ed panlinis ed dalin tan sirin mangitarya na marakep a paspasen no iner a napaoli iray inatey. Nayarin nasalatan iray ponpon na panangabrasan sesyon parad saraman so apaoli, a pati saray inadaro tayo ya inatey. Tan isipen so makapaseseg ya ulopan dingan na matoor iran lalaki tan bibii ed apalabas iran siglo. Siopa so nagkalautlan labay yon pitongtongan? Kasin si Abel, Enoc, Noe, Job, Abraham, Sara, Isaac, Jacob, Jose, Moises, Josue, Rahab, Debora, Samson, David, Elias, Eliseo, Jeremias, Ezequiel, Daniel, odino si Juan a Managbautismo? Bueno, saya met a magayagan arapen so kabiangan met na ilalo yo. Makapitongtong kayo ed sikara, makaaral ed sikara, tan mikimey a kaiba ra diad panggawa ed interon dalin a paraiso.

18. Anton kaaruman iran gayaga so nadalepdep tayo?

¹⁸ Isipen, met, so masustansyan tagano, puron danum, tan malinis a dagem, tekep na kipawil na dalin tayo ed ayadyarin ekolihikal ya inkasimbang unong ed dalan ya impamalsa nen Jehova. Sirin say bilay so aliwan basta mandepende ed pangayaga ed inkayadyari, noagta sakey ya aktibo tan makabaliksan a pibibiang ed magayaga iran kimey. Isipen so sankamundoan a sosyedad na totoon bulos manlapud krimen, egotismo, imun, kolkolan​—sakey a sanaagin amayubo tan amawala na amin a bunga na espiritu. Agaylan makapasagyat!​—Galacia 5:22, 23.

Ilalon Manggawan Makabaliksan so Pambilay

19. (a) Kapigan naeksperiensia so pangayagan asaglawi ed Roma 12:12? (b) Akin a determinado tayon ag-abuloyan iray pakabelatan ed bilay a mangiyarawi ed ilalo tayo?

¹⁹ Say agamoran lan ilalo so aliwa lan ilalo, kanian say pangayagan impaseseg nen Pablo diad Roma 12:12 so naeksperiensia la natan. (Roma 8:24) Diad panisip lambengat ed saray bendisyon ed arapen ya itarok na Panarian na Dios so sengegan na pangayaga tayo natan ed satan ya ilalo. Kanian magmaliw a determinadon agmangiyabuloy ed saray pakabelatan ed bilay na abulok a mundo a mangiyarawi ed maglorian ilalo yo. Agnakekesawan tan ontayer, a nabalang so ilalo ed arapen. (Hebreos 12:3) Say pangikaindan ed Kristianon kurso so agmanresolbi ed saray problema yo. Nonoten, say sakey so ontundan manlingkor ed Dios lapud saray amin a pakabelatan ed bilay natan, sikaton siansia so nikutep ed saratan a pakabelatan, balet nabalang to so ilalo tan sirin nabalang so posibilad ed panliket ed makapakelaw iran ilalo ed arapen.

20. Anto so epekto na ilalo ed Panarian ed saramay manayakup ed satan, tan akin?

²⁰ Saray totoo nen Jehova so walaan na katunongan a nawalaan na maliket a kabibilay. Say maliwawa, makapasagyat ya ilalo so manggawan makabaliksan so pambilay. Tan agda pansiasiansiaen iyan magayagan ilalo ed inkasikara. Andi, maseseg iran manginabang ed arum. (2 Corinto 3:12) Sirin saraman so manayakup ed ilalo ed Panarian so matalek a totoo, tan anapen da so pamaseseg ed arum diad pangibaga na maong a balita na Dios ed sikara. Mamano iya ed saray bilay na saramay mangawat na mensahe a tekep na sankamakapakelawan ya ilalo ya agnin balot niiter ed katooan ed inheneral​—say ilalo ed Panarian a mangipawil na Paraiso ed dalin. No ag-awaten na totoo itan, siansian mantultuloy itayon mangayaga lapud walaan tayo na ilalo. Saraman so ag-ontalineg so natalo; sikatayo so aliwan ontan.​—2 Corinto 4:3, 4.

21. Anto so asingger la, tan panon so nepeg tayon panmoria ed ilalo tayo?

²¹ Say sipan na Dios so: “Nia! Gawaen kon balo so amin iran bengatla.” (Apocalipsis 21:5) Say balon mundo dingan na amin a makapaliket tan andi-geter iran bendisyon to so asingger la. Say ilalo tayo​—a bilay ed tawen o diad paraison dalin​—so mabli; mansiansia ed satan. Nagkalalo ni, diad sarayan maatap ya agew, moriaen itan “bilang pataga na kamarerwa, a namparan segurado tan masekder.” Tekep na ilalo tayon nikawing ed si Jehova, “say andi-anggaan a dampay​—say Dampay ed amin a panaon,” maseguron tuloy a walaan itayo na mabiskeg tan masayaksak a rason la natan a “mangayaga ed ilalo” a niiyan ed arap tayo.​—Hebreos 6:19; Isaias 26:4, The Amplified Bible.

[Paimano ed leksab]

Tepetepet parad Repaso

◻ Anto so baleg ya ilalo na katooan?

◻ Anto so tuan gayaga?

◻ Kapigan so nayarin kagawa na mamilagron panagtambal ed saray makaliktar ed Armagedon?

◻ Akin a nepeg tayon ag-abuloyan iray pakabelatan ed bilay a mangisuwawi ed ilalo tayo?

◻ Anto iran gayaga so iilaloan yo ed balon mundo?

[Litrato ed pahina 9]

Agta satan so mamano ed puso yo na gayaga pian mantasi ed nengneng na saray panagtambal a ginawa nen Jesus?

[Litrato ed pahina 10]

Saraman so mangayaga ed Panarian so mamaseseg ed arum diad panginabang ed ilalo ra