Mangayaga ed si Jehova!

“Lawas mangayaga ed Katawan. Maminsan nin ikuanko, Mangayaga!”​—FILIPOS 4:4, NW.

1. Akin a nayarin nikelawan itayo ed labay ya ibaga nen Pablo sanen inkuanton saray Kristiano so nepeg a lawas mangayaga?

NATAN, singano dagdaiset tan pigpigaran tuloy iray rason pian mangayaga. Saray totoon dabok, anggan saray tuan Kristianos so nipapaarap ed saray situasyon a sengegay panermen​—kaandiay trabaho, pansakit, ipapatey na saray inad-aro, saray problema nipaakar ed personalidad, odino isusumpa manlapud agmananisia iran membro na pamilya odino datin kakaaro. Kanian panon tayon talosan so simbawa nen Pablo, “Lawas mangayaga”? Nisesengeg ed agmarakep tan mairap iran sirkumstansya a nepeg tayon amin a pipuligesgesan, kasin saya so posibli? Say paningbat ed konteksto na sarayan salita so ontulong pian nalinewan itan a pamaakaran.

Mangayaga​—Akin tan Panon?

2, 3. Anto so kaimportantian na gayaga, a singa ed alimbawa nen Jesus tan saray kadaanan ya Israelita?

² “Lawas mangayaga ed Katawan. Maminsan nin ikuanko, Mangayaga!” Saya so nayarin mangipanonot ed sikatayo ed saray salitan nipaarap ed saray Israelita ed ngalngali 24 siglo lay linmabas: “Say liket nen Jehova sikato so biskeg yo,” odino unong ed patalos na Moffatt: “Say pangayaga ed Andi-anggaan so biskeg yo.” (Nehemias 8:10) Say gayaga so mangiiter na biskeg tan singa sakey ya ilang a batikan na sakey parad ligliwa tan salimbeng. Say gayaga so instrumenton akatulong anggan ed ayadyarin Jesus pian mansungdo. “A sikato lapud gayaga a niyan ed arap to sinongdoan to so cruz [panamairapan a kiew, NW], ya inbantak to so baing, et imyorong ed kawanan na trono na Dios.” (Hebreos 12:2) Malinew, say pagmaliw a magayaga ed arap na saray kairapan so importanti parad kilalaban.

³ Sakbay na inloob ed Insipan a Dalin, inganggan ed saray Israelita: “Manliket ka naani ed amin a kaabigan ya inter nen Jehova a Dios mo ed sika, tan say abung mo, sika tan say Levita, tan say sangkaili ya wala ed pegley mo.” Seryoso iray pansumpalan ed agmagayagan panlingkor ed si Jehova. “Amin iraya a dusadusa onsabi ra naani ed sika, et sinkaten da ka naani, tan taloen da ka naani, anga ed agmo kaderal . . . lapu ed agka nanlinkor ed Jehova a Dios mo ed liket, tan liga na puso, a nisengeg ed inkadaakan na saray amin a bengatla.”​—Deuteronomio 26:11; 28:45-47.

4. Akin a sikatayo so nayarin onsaew a mangayaga?

⁴ Kanian, importantin tuloy a saray alanaan a nakdaan natan tan say “arum a carnero” a kakaiba ra so mangagayaga! (Juan 10:16) Indanet nen Pablo so kaimportantian na pangayaga ed amin a kaabigan a ginawa nen Jehova parad sikatayo diad panamegley na impangulit ed simbawa to a, “maminsan nin ikuanko.” Ontan ta so gagawaen tayo? Odino sikatayo so okupado ed inagew-agew a kimkimey ed bilay a no maminsan et nalingwanan iray dakel a rason na pagmaliw a magayaga? Kasin pinalandey iray problema tayo a nasasaniban to lay pakanengneng tayo ed Panarian tan saray bendisyon to? Kasin aabuloyan tayoray arum a bengatla​—itutunganga ed saray ganggan na Dios, pangibaliwala ed saray madibinon prinsipyo, odino pamaulyan ed saray Kristianon obligasyon—​a manamsam ed gayaga tayo.

5. Akin a say agmakatunongan a too so nairapan a mangayaga?

⁵ “Paulyan yon nakabatan na amin a totoo so inkamakatunongan yo. Say Katawan so asingger la.” (Filipos 4:5, NW) Say agmakatunongan a too so kulang na inkasimbang. Nayarin sikatoy onsaew a mangasikaso ed bunigas to, ya aabuloyan toy laman ton managmak na naarawian iran tensyon odino kapagaan. Anganko et agto naawat iray limitasyon to tan manbilay unong ed satan. Nayarin ompatnag a tanton atagey iray kalat to tan panggunaetan ton dampoten iraya antokaman so nayarin kasalat da. Odino ompan uusaren toray limitasyon to bilang baraan ed pagmaliw ton matantan ya onkiwas odino makulang na seseg. Lapud kakulangay inkasimbang tan pagmamaliw ya agmakatunongan, naromog ton mairap so pangayaga.

6. (a) Anto so nepeg a naimano na kaparan Kristianos ed sikatayo, tan kapigan lambengat a magmaliw ya ontan? (b) Panon a saray salita nen Pablo diad 2 Corinto 1:24 tan Roma 14:4 so ontulong ed sikatayo a magmaliw a makatunongan?

⁶ Anggan saray sumusumpa et moriaen da itayo bilang panatiko, saray kaparan Kristiano so lawas nepeg a makanengneng ed inkamakatunongan tayo. Tan sikaray magmaliw ya asimbang no sikatayoy asimbang tan agmaniilalo na inkayadyari manlapud inkasikatayo odino manlapud arum. Manuna ed amin, sikatayo so kaukolan ya ontunda ed pagmaliw a pabelat ed arum a papalampasan toy kakaukolanen na Salita na Dios. Inkuan nen apostol Pablo: “Aliwan say uleyan mi pananisia yo, no ag ingen mananulong kami ed liket yo.” (2 Corinto 1:24) Bilang datin Pariseo, kabat a tuloy nen Pablo a saray mapeget a totontonen a nipakseb tan nipasakbat na saramay walad autoridad so mamokpok ed gayaga, balet ta saray makatulong a suhestion a niyopresi na kaiban komikimey so mamadaak ed satan. Say katuaan a “say Katawan so asingger la” so nepeg a mangipanonot ed makatunongan a too a sikatayoy ‘agmangokom ed aripen na sananey. Dia ed katawan ton dili manalalagey, o napelag.’​—Roma 14:4.

7, 8. Akin a nepeg ya ilaloan na saray Kristiano a sikaray nawalaan na saray problema, balet panon a posiblin sikaray mantultuloy a mangayaga?

⁷ “Ag kayo mapaga ed antokaman; noag dia ed ganagana lapu ed pikakasi tan pikekerew a tekep na pisasalamat nipakabat komon ed Dios so saray kerew yo.” (Filipos 4:6) Naeeksperiensia tayo natan so “mairap a panaon a pidenengan” unong ed insulat nen Pablo. (2 Timoteo 3:1-5, NW) Kanian nepeg ya ilaloan na Kristianos a nidunget ed saray problema. Saray salita nen Pablo a “lawas mangayaga” so agmangipuera ed posibilidad a say matoor a Kristiano so nayarin nawalaan na tunggal paminsan a pipuligesgesan ed inkaandiay-ilalo odino pakadismaya. Diad dilin kipapasen nen Pablo, sikato so realistikon amidbir: “Naeletan kami ed balang diking et ag kami nairapan; manduarua kami, et ag naekal so panilalo mi; Naosiosilan et ag akaindan; gineba et ag iti abagbag.” (2 Corinto 4:8, 9) Anggaman ontan, say gayaga na Kristiano so mamabawas tan diad kaunoran et manalona ed saray temporaryon peryodo na kapagaan tan kaermenan. Saya so mangiiter na nakakaukolan a biskeg ta pian onabanti, ya agbalot lilingwanan so dakel iran rason pian mangayaga.

⁸ Sano onlesa iray problema, antokaman so nengneng da, say magayagan Kristiano so sipapaabeban onkerew parad tulong nen Jehova diad panamegley na pikakasi. Sikato so agbalot onsuko ed alabas a kapagaan. Kayari pakagawa to na makatunongan a nagawaan to pian resolbien iray problema, ipalima to la ed si Jehova iray pansumpalan a mitunosan ed imbitasyon: “Paawit mo ed Jehova so awit mo.” Kaleganan to, mantultuloy so Kristianon misalamat ed si Jehova ed amin a kaabigan To.​—Salmo 55:22; nengnengen met so Mateo 6:25-34.

9. Panon a say pikakabat ed katuaan so makapawala na kareenan ed nonot, tan anto so maong ya epekto na saya ed sakey a Kristiano?

⁹ “Say deen na Dios, a talonaan to’n amin a pakatalos, bantayan to so kapusoan yo tan saray nonot yo ed Cristo Jesus.” (Filipos 4:7) Say kakabatan ed katuaan na Biblia so mangibulos ed kanonotan na Kristiano ed katilaan tan ontutulong ed sikaton mamayubo na mabunigas a panagnonot. (2 Timoteo 1:13) Kanian sikato so natutulongan ya onarawi ed aliwa odino agmakabat a walna a sengegan na kabuyak na saray mareen a siglaotan to ed arum. Imbes a mansaot lapud ag-inkahustisya tan karelmengan, sikato so manmamatalek ed si Jehova a manresolbi ed saray problema na too diad panamegley na Panarian. Say ontan a deen ed nonot so manalimbeng ed puso to, mamasiansia ed saray motibo ton puro, tan mangiwawanwan ed kanonotan to diad paraan na inkatunong. Saray puron motibo tan maptek a panagnonot, diad kunoran et satan so mangitarok na agnabilang iran katunongan pian mangayaga, anggaman walaray problema tan desdes ya itatarok na magulon mundo.

10. Say tuan gayaya so naeksperiensia lambengat diad pansalita odino pannonot nipaakar ed anto?

¹⁰ “Kaonoran agagi, ganagana ’ray bengatla’n matua, ganagana ’ray, bengatla’n gagalangen, ganagana ’ray bengatla’n matunong, ganagana ’ray bengatla’n malinew, ganagana ’ray bengatla’n nababalita a maong: no wala so antokaman a kasimpitan, no wala so antokaman a daydayewen, murekdek yo so saraya’n bengatla.” (Filipos 4:8) Agnaromog na Kristiano so gayaga diad pansalita odino pannonot nipaakar ed mauges a bengabengatla. Saya so automatikon mangipuera ed kaslakan a panligliwaan ya iiter na mundo. Anggapo so makapansiansia na Kristianon gayaga no papanoen toy kanonotan tan puso to na saray katilaan, makulangkulang a panludlurey, tan bengabengatlan agmatunong, imoral, andiay kaabigan, makapagula, tan makapadimla. Malinew a nibagan anggapo so makaromog na tuan gayaga diad pamano ed kanonotan tan puso to na karutakan. Diad abulok a mundo nen Satanas, agaylan makapaseseg so pakaamta a saray Kristiano so walaan na dakel a maong a bengatlan isipen tan singbaten!

Agnabilang Iran Katunongan Pian Mangayaga

11. (a) Anto so agbalot nepeg ya ibaliwala, tan akin? (b) Anto so epekto na inyatendi ed internasyonal a kumbension ed sakey a delegado tan say asawa ton bii?

¹¹ Sano sasaglawien iray rason pian mangayaga, agtayon balot lilingwanan so internasyonal ya impanaagi. (1 Pedro 2:17) Legan a say minumundon nasyonal tan etnik iran grupo so mangibabalikas na agaylan gula ra ed sinansakey, saray totoo na Dios so onaapit a mankakasakey diad aro. Say pankakasakey da so nagkalautlan naimano ed saray internasyonal a kumbension. Diad samay agawa nen 1993 diad Kiev, Ukraine, sakey a delegadon nanlapud Estados Unidos so nansulat: “Saray magayagan lua, saray masnag a mata, tan anggapoy tundan singa-pamilyan lakap, tan saray pabanon naawat a nanlapud kabangibang iran grupon mangipapayapay na makolor a payong tan saray panyo so mangipapatnag na teokratikon pankakasakey. Saray kapusoan mi so manlepwa na kinon ed mamilagron agew nen Jehova ed sankamundoan ya impanaagi. Saya so anenyeg a tuloy ed sikamin sanasawa tan agamoran so balon kabaliksan ed pananisia mi.”

12. Panon a nasusumpal so Isaias 60:22 ed mismon imaton tayo?

¹² Agaylan makapabiskeg na pananisia itan parad Kristianos natan so pakanengneng ed pakakasumpal na saray propesiya diad mismon imaton da! Alimbawa, kunsideraen pa iray salita na Isaias 60:22: “Say daiset magmaliw naani a sanlibo, et say melag magmaliw naani a mabiskeg a nacion: Siak, si Jehova, sikato naani gawaen ko a magano ed panaon to.” Sanen niyanak so Panarian nen 1914, walay 5,100 lambengat​—daiset lambengat—​so aktibon manpupulong. Balet legan na apalabas a limay taon, say karakel na sankamundoan ya impanaagi so ondarakel ed promedyon 5,628 a balo niran bautismadon Tasi ed kada simba! Nen 1993, say pantok a 4,709,889 ya aktibon ministro so adampot. Isipen pa! Kabaliksan na saya a “say daiset” nen 1914 so literal ya asingger la ed pagmaliw a “sanlibo”!

13. (a) Anto so nagagawa nanlapulad 1914? (b) Panon a tutumboken na saray Tasi nen Jehova so prinsipyo na saray salita nen Pablo ed 2 Corinto 9:7?

¹³ Nanlapulad 1914 say Mesianikon Panarian so ginmapon manguley ed leet na kakabusol to. Say uley to so susuportaan na mabulos iran atoaan a patumbok a mangiiter na panaon, biskeg, tan kuarta ra pian nasumpal so sankamundoan a kimey na panangipulong ontan met ed internasyonal a kampanya na panangipaalagey. (Salmo 110:2, 3) Pangagayagaan na Tastasi nen Jehova a say kontribusyon ed kuarta so wala pian nagawa irayan aktibidad ed kakumpleto, anggaman say kuarta so mataltalag a nasasaglawi ed saray miting da.a (Ipareng so 1 Awaran 29:9.) Saray tuan Kristiano so agkaukolan a dagdagen pian mangiter; ipapasen da itan a pribilihyo diad panuporta ed Ari ra diad laknab ya iyabuloy na saray sirkumstansya ra, balang sakey unong ed “ginetma na puso to; aliwa a dia ed kaermenan odino dia ed pasootan.”​—2 Corinto 9:7.

14. Anto so kipapasen ed limog na totoo na Dios so atasian nanlapulad 1919, a sengegay pangagayagaan da?

¹⁴ Say nipasakbay a panangipawil-lamet na tuan panagdayew ed limog na totoo na Dios so nansumpal ed inkapalsa na espiritual a paraiso. Nanlapulad 1919 satan so progresibon linmaknab ed saray ketegan to. (Salmo 14:7; Isaias 52:9, 10) Say resulta? Naeeksperiensia na saray tuan Kristiano so “liket tan gayaga.” (Isaias 51:11) Say nansumpalan a maong a bunga so mapatnag ya ebidensya no anto so nayarin gawaen na masanton espiritu na Dios diad panamegley na ag-ayadyarin totoo. Amin a kredito tan galang so nipaarap ed si Jehova, balet anton babaleg a pribilihyo so niwala nen say pagmaliw a kaiban komikimey na Dios? (1 Corinto 3:9) Si Jehova so mabiskeg a tuloy a gawaen iray bato, no nakakaukolan, a mangikelyaw ed mensahe na katuaan. Anggaman kuan, pinili ton aggawaen iyan metodo, balet, pian bayuboan so mabulos iran palsa a ginawa ed dabok a manumpal ed linawa to.​—Lucas 19:40.

15. (a) Antoran ebento natan so tutumboken tayo tekep na interes? (b) Diad anton ebento so tatalaranan tayo tekep na gayaga?

¹⁵ Napno na takot, saray aripen nen Jehova natan so manbabantay ed saray ebento na mundo legan a saraya so mitukoyan ed matalonggaring iran propesiya ed Biblia. Gagawaen na saray nasyon so anggaay nayarian da​—balet ta sinmaew—​a dampoten so mansiansian kareenan. Saray ebento so mamapaskar ed sikara pian kerewen so organisasyon ya Nasyones Unidas ya onakto ed saray magulon paspasen na mundo. (Apocalipsis 13:15-17) Kaleganan to, saray totoo na Dios so maniilalo tekep na baleg a panilalo ed samay sakey ed sankamagayagaan ya ebenton nagawa ed kapiganman, bengatlan manasingger lan manasingger ed kada agew. “Mangayaga itayo tan manliket itayo na mapalalo tan iter tayo ed sikato so panangigalang: ta sinmabi la so bansal na Cordero, et say asawa to nantadia la.”​—Apocalipsis 19:7.

Panagpulong​—Sakey a Pabelat odino Sakey a Gayaga?

16. Iyilustra no panon a say isaew a pangagamil ed naaaralan to so makapangekal na gayaga ed sakey a Kristiano?

¹⁶ “Saray bengabengatla’n inaral yo tan inawat yo tan nadngel yo tan anengneng yo ed siak, sikara so gawaen yo; et say Dios na kareenan miolopolop ed sikayo.” (Filipos 4:9) Diad pangiyaplika ed naaralan, nailaloan na saray Kristiano a naawat so bendisyon na Dios. Sakey ed sanka-importantian a bengatlan naaralan da et say pankaukolan na pangipulong na maong a balita ed arum. On, siopa so makapangayaga ed kareenan na nonot odino magmaliw a magayaga no isiblet to so impormasyon ed matuan impapuson totoo a saray mismon bilay da so mandependi ed pakadngel ed satan?​—Ezequiel 3:17-21; 1 Corinto 9:16; 1 Timoteo 4:16.

17. Akin a say panagpulong a kimey tayo so lawas magmaliw a lapuan na gayaga?

¹⁷ Agaylan gayaga so pakaromog ed kinmarneron totoo a mabulos a manaral nipaakar ed si Jehova! On, saramay manlilingkor tekep na suston motibo so lawas makaromog na serbisyo ed Panarian a magmaliw a lapuay gayaga. Saya so lapud say manunan rason ed pagmaliw a sakey a Tasi nen Jehova et say pangigalang ed ngaran To tan pangitandoro ed kipapasen To bilang say Soberanon Manuley. (1 Awaran 16:31) Say toon mamidbir ed sayan katuaan so mangayaga anggaman saray totoo so agsikakabat a mangipulisay ed maong a balitan itatarok to. Kabat to a say panpulong ed saray agmananisia et onsabi agew a mangangga; diad kidayewan na ngaran nen Jehova ed ando lan ando.

18. Anto so mamapakiwas ed sakey a Kristiano a manggawa ed linawa nen Jehova?

¹⁸ Papakiwasen na tuan relihyon iramay mangaagamil ed satan a gawaen iray bengatlan kakaukolanen nen Jehova, aliwan lapud kaukolan dan gawaen, balet lapud labay dan gawaen itan. (Salmo 40:8; Juan 4:34) Dakel a totoo so akaromog ed saya bilang mairap a talosan. Sakey a misis so aminsan et imbaga to ed sakey a Tasi ya ondadalaw ed sikato: “Amtam, makanepegan kayo na komendasyon. Seguradon agkon balot onlan mankabkaabungan a nipaakar ed relihyon ko a singa gagawaen yo.” Tekep na imis ya inmebat so Tasi: “Natalosan koy liknaan yo. Sakbay ak a nagmaliw a sakey ed Tastasi nen Jehova, agmoak nibakin onla’d arum a mangitongtong nipaakar ed relihyon. Balet natan et labay ko la.” Nannonot ya agano so bii tan sinampotan to: “Mapatnag a wala so bengatlan iyoopresi na relihyon yo ya anggapo ed siak. Seguro kaukolan kon imbestigaen itan.

19. Akin a natan la so panaon pian mangayaga ed kapiganman?

¹⁹ Say tinaon a teksto ed 1994, a mabitar a naimano ed saray Kingdom Hall, so maparanay a mangipapanot ed sikatayo: “Manmatale’ ka ed Jehova ed simoon a pusom.” (Uliran 3:5) Kasin wala so nagkalalon katunongan pian sikatayoy mangayaga nen say pakayarin panmatalek ed si Jehova, say mabiskeg ya ilang tayo a pakasalimbengan tayo? Isasalaysay na Salmo 64:10: “Dia ed Jehova so panliketan na matunong tan manilalo ed sikato; tan amin na saray maptek a puso mangloria ra.” Aliwan saya so panaon na itunda odino isuko. Kada onlalabas a bulan et mangitatarok ed sikatayo a mas maapit ed kapetegan na panpipirawatan na ariripen nen Jehova a nanengneng nanlapulad agew nen Abel. Natan la so panaon pian manmatalek ed si Jehova ed amin a puso tayo, ya amta a nagkalalon walaan itayo na dakel a tuloy rason pian mangayaga!

[Paimano ed leksab]

Panon Yon Ebatan?

◻ Akin, unong ed Nehemias 8:10, a nepeg tayon mangayaga?

◻ Panon ya ipapanengneng na Deuteronomio 26:11 tan 28:45-47 so kaimportantian na pangayaga?

◻ Panon tayon natulongan na Filipos 4:4-9 a lawas mangayaga?

◻ Anton rason pian mangayaga so iiter ed sikatayo na 1994 a tinaon a teksto?

[Litrato ed pahina 16]

Pangayagaan na saray Tasin Ruso tan Aleman so pagmaliw a kabiangan na sakey ya internasyonal ya impanaagi

[Litrato ed pahina 17]

Say panginabang na katuaan ed arum so sengegay pangayaga