Pakabat
Tulong parad Saray Komite na Mananguley ya Ulop
Saray membro na Mananguley ya Ulop na Tastasi nen Jehova, a diad kaplesan et manbilang na 12, so mantultuloy a sitotoor a manlingkor ed saray asainmin da. Sikara so lawas misasalamat ed saray matoor a membro na ondaraak a “baleg ya ulop” ed maseet a suporta ra. (Apocalipsis 7:9, 15) Nisesengeg ed baleg ya indaak ed sankamundoan, mapatnag a matukoy ed sayan panaon a tarokan so Mananguley ya Ulop na kaaruman a tulong. Kanian adeside so pangimbita na pigaran katulongan, a manunan manlalapud limog na baleg ya ulop, pian mibiang ed saray miting na kada Komite na Mananguley ya Ulop, salanti, say Personnel, Publishing, Service, Teaching, tan Writing iran Komite. Kanian, say bilang na onatendi ed saray miting ed sarayan komite so magmaliw a pitora odino walora. Diad silong na panangiwanwan na saray membro na komite na Mananguley ya Ulop, sarayan katulongan so mibiang ed saray diskusyon tan gawaen so nambabangil iran asainmin a niiter ed sikara na komite. Sayan balon oksuyan so onepekto ed Mayo 1, 1992.
Diad dakel laran taon natan, say bilang na nakdaan ya alanaan a Tastasi so ondadaiset, bangta say bilang na baleg ya ulop so dinmaak ed labas na sankabalgan iran iilaloan tayo. (Isaias 60:22) Agayla so pisalamat tayo ed si Jehova parad sayan makapakelaw ya inlaknab! Sanen say balon ngaran, a Tastasi nen Jehova, so sililiket ya inawat nen 1931, say pantok a bilang na saray manangipalapag na Panarian so 39,372, kaslakan ed sikara so alanaan ya agagi nen Kristo. (Isaias 43:10-12; Hebreos 2:11) Anemaplon taon ed saginonor, diad 1991, say sankamundoan a pantok na saray manangipalapag so 4,278,820, a 8,850 lambengat so alanaan a nakdaan. Unong ya inilaloan ed liwawa na Kasulatan, say “baleg ya ulop” et pinalumbasan to la natan so nakdaan a “melag a pulok” diad masulok a 1 ed 480. (Lucas 12:32; Apocalipsis 7:4-9) Diad pangaasikaso ed onlalaknab ya intereses na Panarian, say nakdaan so maseguron mankaukolan tan mangapresya na pikokoopera tan suporta na baleg ya ulop.
Unong a nisalaysay ed sayan paway na Say Panag-Bantayan, wala so sakey a grupo a manlilingkor a kaiba na espiritual ya Israel natan a nikumpara ed say Netinim tan saray ilalak na ariripen nen Solomon a pinmawil manlapud inkakautibo ed Babilonia a kaiba na nakdaan iran Judio; saraman ya aliwan Israelita so mas dakel ni ingen nen saray pinmawil iran Levita. (Ezra 2:40-58; 8:15-20) “Saray naitdan” manlapud limog na baleg ya ulop natan so matatken a Kristianon lalaki a walaan na malaknab ya eksperiensia a bilang nasumpalan na impanasikaso ed saray sanga, diad panagbiahen kimey, tan ed limog na 66,000 iran kongregasyon a niletneg natan ed interon dalin.
Agano ni, Saray Eskuelaan ed Ministeryo na Panarian so agawa ed sankamundoan parad kibangat na saray manangasikaso tan ed katulongan dan ministeryal ya ariripen. Diad Estados Unidos lambengat, 59,420 manangasikaso so inmatendi. Sirin sarayan “mamasiken” so akinlongan a manumpal ed saray responsabilidad dan nagkalalon epektibo.—1 Pedro 5:1-3; ipareng so Efeso 4:8, 11.
Diad saray hedkuarter na Tastasi nen Jehova ed Brooklyn, pigara ed “saray naitdan” so nanserbi ed dakerakel lan taon. Isakup na saraya so matatken iran manangasikaso a manlalapud baleg ya ulop ya akagamor na sakey a kayamanan ed abilidad tan eksperiensia. Kanian, say Mananguley ya Ulop so nanpili na pigara ed saratan a manangasikaso ya ontulong ed saray miting na saray Komite na Mananguley ya Ulop. Agnakaukolan a saraya so lalakin walaan na sankadukeyan a rekord ed serbisyo. Imbes, sikara so matatken, eksperiensiadon lalaki a walaan na saray kualipikasyon a makanepegan ira a mangiter na tulong ed partikular iran lawak. Say inkapabtangan da a mikimey ed sakey a komite et agto kabaliksan a walaan ira na nikaduman estado. Unong ta inkuan nen Jesus nipaakar ed saray babangatan to, “amin yo et sanaagi.” (Mateo 23:8) Anggaman ontan, dakel so nimatalek ed sarayan lalaki, tan ontan met a “dakel so nailaloan” ed sikara.—Lucas 12:48.
Pangagayagaan tayo so iyaabante na organisasyon nen Jehova natan. Diad apalabas lan samploran taon, wala so ngalngali 100 porsienton indaak ed bilang na saraman so manlilingkor ed lawak, a mitunosan ed propesiya nipaakar ed Babaleg a David, si Jesu-Kristo: “Diad ibaleg na pananguley to tan kareenan anggapo naani anggaan.” (Isaias 9:7, King James Version) Diad parehon dalan a saray Nitinim so mikikimey ed saray saserdote diad impangapiger ed saray bakor na Jerusalem, ontan met natan say propesiya nipaakar ed organisasyon nen Jehova so nasusumpal: “Tan saray sankaili so mangipaalagey na saray bakor yo.” (Isaias 60:10; Nehemias 3:22, 26) Say modernon-agew iran Nitinim so nakomendaan ed seseg ya impanengneng da diad impangipaalagey na tuan panagdayew, a tutulongan “iray saserdote nen Jehova” diad antokaman a kimey o lingkor a nipabtang ed sankamundoan ya organisasyon nen Jehova.—Isaias 61:5, 6.