Pitutunosan ed Mananguley ya Ulop Natan
“Sikato so turoen ton mangasikaso ed amin a kayarian to.”—LUCAS 12:44.
1. Diad anton panarian so ginapoan nen Kristo ya uleyan nen 33 K.P., tan diad panamegley na anto?
DIAD Pentecostes 33 K.P., si Jesu-Kristo, say Ulo na kongregasyon, so ginmapon aktibon manuuley ed panarian na alanaan-na-espiritun ariripen to. Panon ya ontan? Diad panamegley na masanton espiritu, angheles, tan say nanengneng a mananguley ya ulop. A singa impanengneng nen apostol Pablo, say Dios so ‘angiliktar ed saray alanaan a manlapud pakauley na kabilungetan tan sikara so inyalis to ed panarian na Anak na aro to.’—Colosas 1:13-18; Gawa 2:33, 42; 15:2; Galacia 2:1, 2; Apocalipsis 22:16.
2. Diad anton babaleg a Panarian so inggapo nen Kristo ya uleyan nen 1914?
2 Diad sampot “na aturon panaon na nasyones,” pinabaleg nen Jehova so maarin pakauley nen Kristo, ya innatnat to ed labas na Kristianon kongregasyon. (Lucas 21:24) On, diad taon 1914, inter na Dios ed Anak to so maarin pakauley ed saray “nasyones,” “say panarian na mundo,” amin a katooan.—Salmo 2:6-8; Apocalipsis 11:15.
Aturon “Mangasikaso ed Amin a Kayarian To”
3, 4. (a) Diad ilustrasyon nen Jesus ed saray mina, siopa so inrepresenta na lakin magalang ed inkianak? (b) Antoran kurakurang ed Panarian so agawa nen 1918 tan 1919?
3 Makatantanda dia et say ilustrasyon nen Jesus ed sakey a toon magalang ed inkianak. (Lucas 19:11-27) Sakbay a manbiahe ed arawin pasen a mangiligen na maarin pakayari, inter na laki ed ariripen to so kuarta (mina) a kimeyan da. Diad ipawil to, sayan laki, a mangirerepresenta ed si Kristo, so anawag ed arap to “ed sarayan ariripen ya angiteran to na kuartan pilak, ta pian seguroen no anto so tinubo ra diad kurang na negosyo.” (Lucas 19:15) Panoy inkikurang na saya kayari na impangiligen nen Jesus na maarin pakayari?
4 Nen 1918 say nitronon Arin Jesu-Kristo so akaromog na melag ya ulop na saray Kristianos ya anaynan ed saray iglesia na Kakristianoan tan okupadon mangaasikaso ed saray mangaraldalin ya intereses na Katawan. Kayari na impangugol to ed sikara diad apuy, inter nen Jesus ed saray ariripen to so apabaleg a pakauley nen 1919. (Malaquias 3:1-4; Lucas 19:16-19) Sikara so tinuro ton “mangasikaso ed amin a kayarian to.”—Lucas 12:42-44.
“Abaston Tagano ed Manepeg a Panaon”
5, 6. (a) Anton apaawang a kimey so naawat na mayordumo nen Kristo? (b) Antoran propesiya so nigeter lan nasumpal kayari na 1914, tan panon so pibiang ya aktibo na mayordumon klase ed kasumpalan da?
5 Say manuuley ya Arin Jesu-Kristo so angiter na apalaknab a kimey ed mayordumo to, odino manedyer na abung, diad dalin. Saray alanaan a Kristianos so magmaliw ya “embahadores” na Dios a kasandi na abalangetan ya arin naikdan na pakayarin manguley ed amin a totoo ed dalin. (2 Corinto 5:20; Daniel 7:14) Say kolektibon responsabilidad da so aliwa lan dia lambengat ed pangiter ed ulop na alanaan iran katambayan nen Kristo na “sukat na abaston tagano ra ed manepeg a panaon.” (Lucas 12:42) Sikara natan so mangala na aktibon pibibiang diad kasumpalan na saray propesiyan nigeter lan nasumpal kayari inkiletneg na Panarian nen 1914.
6 Anto so kabaliksan na saya ed aktual a kimey? Kabaliksan to so panangilaknab ed panagpulong ed ‘sayan maong a balita na panarian ed amin a panaayaman a dalin.’ (Mateo 24:14) Nagkalalo ni, kabaliksan to so panangipalapag ed mabibiskeg iran mensahe na panangukom a sumpad marelmeng a sistema nen Satanas tan say managsuporta to. Saya so walaan na epekto na ‘panagyegyeg ed saray nasyones.’ Sirin, “saray kalikaliktan a bengatla,” “arum a karnero” nen Kristo, so ginmapon onloob. (Aggeo 2:7; Juan 10:16) Manlapud 1935 a manpatuloy, say “baleg ya ulop” so ginmapon linmoob ed muyongan nen Jehova ed sankamundoan. (Apocalipsis 7:9, 10) Saya so nankaukolan na progresibon inyaligwas ed muyongan. Simbolikon panagsalita, saray bato so nepeg a sandian na balatyang, kiew na gansa, balatyang na pilak, tan gansa na balitok. (Isaias 60:17) Amin na saya so agawa nanlapulad 1919 ed leksab na aktibo tan maapit a panangiwanwan nen Jesu-Kristo, ya angipudir ed amin a mangaraldalin ya intereses na Panarian to, odino kaykayarian, ed matoor ya aripen a klase tan say Mananguley ya Ulop to.
7. Anto so lalanoren na apadaak iran responsabilidad na mayordumo?
7 Mainomay tayon natalosan a say apadaak ya awit na responsabilidad ed aripen na Katawan, mayordumo, odino manedyer na abung so anaglawi ed magunaet a panagsulat tan saray editoryal a kimey. Saray abaston taganon espiritual so nepeg ya ipalapag a maparanay diad manepeg a panaon ed The Watchtower. Nen 1919 say The Golden Age (kaiban magasin a diad saginonor et nagmaliw a Consolation, tan insan Awake!) so ginmapon nipalapag a managyat ed interes na publiko, a niarum diad pamabiskeg ed “sankaabungan.” (Mateo 24:45) Saray delap na libro, pulyeto, tan tracts so apawala met ed inlabas na saray taon.
Mantultuloy a Kagugugolan
8. Diad anto so inmunan akabidbiran ed saray membro na Mananguley ya Ulop, tan anton balikas so ginawa na The Watchtower nen 1944?
8 Onlingaw ed sayan “panaon na anggaan,” ag-itayo asurprisa a saray membro na Mananguley ya Ulop so diad ununa ed maapit ya abidbir ed editorial staff na Watch Tower Society. (Daniel 12:4) Say artikulon “The Theocratic Alignment Today,” nipalapag ed The Watchtower na Nobyembre 1, 1944, so angikuan: “Marason, saramay angimatalkan ed kipalapag na niparungtal iran katuaan na Biblia so ninengneng a bilang pinilin mananguley ya ulop na Katawan a mangiwanwan ed amin na saraman so nampilalek a mandayew ed Dios ed espiritu tan diad katuaan tan manlingkor ed sikaton mankakasakey diad pangikayat ed sarayan niparungtal a katuaan ed amin iran nanaerasan tan napepegaan.”
9. Diad anto so asabin maapit ya akabidbiran ed Mananguley ya Ulop ed saginonor, tan akin?
9 Walaray legal a nakakaukolan ya alanor diad panangipalapag ed saray magasin tan arum iran katulongan ed panagaral na Biblia. Sirin, say Watcth Tower Bible and Tract Society so niletneg tan nirehistro ed estado na Pennsylvania, E.U.A. Diad saray taon, say nanengneng a Mananguley ya Ulop so abidbir ed pitoran-membron board of directors na sayan korporasyon a niletneg a mangipalapag ed saray nakakaukolan a katulongan ed panagaral na Biblia tan uusaren na saray totoo na Katawan ed sankadalinan.
10, 11. Anton panaggugol so agawa nen 1944, tan anton komento so agawa nipaakar ed saya ed The Watchtower?
10 Saray pitoran direktor na Sosyedad so matoor iran Kristianos. Ingen say betang da ed legal a korporasyon so nayarin nisuhirin saray posisyon da so utang da ed Mananguley ya Ulop diad inkapili ra ed panamegley na saray legal a membro na Watch Tower Society. Nagkalalo, diad ley et say ontan a pimemembro tan saray pribilehyo na panagboto so orihinal a nipabtang lambengat ed saray pigaran angiter na tulong ed Sosyedad. Sayan oksuyan so nankaukolan na panguman. Saya so ginawa ed tinaon a miting na Pennsylvania a korporasyon na Watch Tower Society nen Oktubre 2, 1944. Saray totontonen na Sosyedad so tinibukel ta pian say pimemembro so aliwa lan diad pinansyal a letnegan. Saray membro so pilien ed limog na saray matoor ya ariripen nen Jehova, tan saraya so sinmabin angisakup ed dakel iran manlilingkor a sigpot-panaon ed hedkuarter na Sosyedad ed Brooklyn, Nueva York, tan diad saray sanga to ed sankamundoan.
11 Nanreport ed sayan aligwas, inkuan na The Watchtower na Nobyembre 1, 1944: “Say kuarta, a singa nirepresenta ed pinansyal iran kontribusyon, so nepeg ya andian a mananiterminan boses, diad tua et nepeg ya andian na gawaen diad pamano ed mananguley ya ulop na saray Tasi nen Jehova ed dalin. . . . Say masanton espiritu, say aktibon puersan onleksab a manlapud si Jehova a Dios ed panamegley nen Kristo Jesus, so nepeg a manitermina tan mangigiya ed pamaakaran.”
Duma a Manlapud Sakey a Board of Directors
12. Antoy mangipanengneng a binendisyonan nen Jehova so inkagugolan diad leksab na panangiwanwan na Mananguley ya Ulop?
12 Say aligwas na kimey na panagpulong legan na ontumbok iran dekada so mamaneknek a binendisyonan nen Jehova so akaunan panaggugol diad pakatalos na Mananguley ya Ulop. (Uliran 10:22) Akin, say bilang na saray manangiyabawag na Panarian ed sankadalinan so linmukso a manlapud kulang a 130,000 nen 1944 ya anggad 1,483,430 nen 1970! Balet onsabi ni so nagkalalon iyaaligwas.
13. (a) Anggad 1971, anto so kipapasen no nipaakar ed Mananguley ya Ulop? (b) Anto so agawa ed tinaon a miting na Sosyedad nen 1971?
13 Anggad 1971 saray kabiangan na Mananguley ya Ulop so siansia nin abidbir a nisiglaot ed saray pitoran membro na board of directors na Watch Tower Bible and Tract Society of Pennsylvania. Say presidente na Sosyedad so angawit ed manunan awit na responsabilidad diad panaggawa ed saray desisyon a mangaapekta ed kurang na saray sanga na Sosyedad ed sankamundoan. Balet saray makatantandan paliwawa so nibalikas ed tinaon a miting ya agawa nen Oktubre 1, 1971. Say presidente na Sosyedad so nansalita ed teman “Bringing the Holy Place Into Right Condition,” tan say bise presidente ed teman “A Governing Body As Different From a Legal Corporation.” Anto so pandumaan ed baetan na Mananguley ya Ulop tan say legal a korporasyon?
14. Antoran pandumaan so wala ed baetan na sakey a legal a korporasyon tan say Mananguley ya Ulop?
14 A singa asalambit la, say Watch Tower Bible and Tract Society of Pennsylvania so walaan na sakey a board of directors a nigeter ed pitoran membro. Sarayan dedikadon Kristianon lalaki so pinili a para ed taloy-taon a termino na saray membro na korporasyon a mandagup na ag-onsulok ed 500, karaklan na saratan so aliwan alanaan a Kristianos. Nagkalalo ni, lapud say kiwawala na korporasyon so sigpot a legal, a walaan na pihon heograpikon hedkuarter, sikato so nayarin buyaken nen Caesar, salanti, say Estado. (Marcos 12:17) Anggaman kuan, say Mananguley ya Ulop so aliwan sakey a legal ya instrumento. Saray membro to so agpinili. Sikara so aturo ed panamegley na masanton espiritu ed leksab na panangiwanwan nen Jehova a Dios tan si Jesu-Kristo. (Ipareng so Gawa 20:28.) Nagkalalo ni, saramay manitibukel na Mananguley ya Ulop so tinuro-na-espiritun lalaki ya andian na anggan anton obligatoryon pihon heograpikon lokasyon odino hedkuarter.
15. Anton balikas nipaakar ed organisasyon so agawa ed The Watchtower na Disyembre 15, 1971, tan anto so nibaga ed modernon-agew a Mananguley ya Ulop?
15 No nipaakar ed ontan ya inkagugulan ed pakatalos, say The Watchtower na Disyembre 15, 1971, so angikuan: “Misalsalamat a saray Kristianon tastasi nen Jehova so mikabat tan mamekder a saya so aliwan sakey-a-toon relihyoson organisasyon, noagta walaan na sakey a mananguley ya ulop na saray alanaan-na-espiritun Kristianos.” Say Mananguley ya Ulop na alanaan ya aripen a klase tan ed saray nilaksalaksan kakaiba ed limog na arum a karnero so progresibon nakikinlongan a mangasikaso ed opisina na panangasikaso to.
16. Panoy indaak na saray mangaraldalin a kayarian nen Kristo nanlapulad 1971, tan anto so arum ed saraya ya impudir to ed panangasikaso na matoor tan makabat ya aripen, ya inrepresenta na Mananguley ya Ulop to?
16 Saray mangaraldalin a kayarian na Arin Jesu-Kristo so nantultuloy a binmulaslas. Nanlapud 1971 et say bilang na saray Tastasi so linmukso a manlapud kulang a 1,600,000 ya anggad pantok na masulok a 3,700,000 nen 1989. Agaylan prueba na panamendisyon na Dios! (Isaias 60:22) Sayan imbaleg so nankaukolan na panamalaknab ed saray pasilidad na hedkuarter na Sosyedad tan diad saray sanga to, tan ontan met ed panagmoderno ed metodo na produksion tan panangibunog. Nansumpal ed impaalagey ed dakel iran Kingdom Hall tan Assembly Hall ed sankadalinan. Kaleganan to, say Mananguley ya Ulop so nantultuloy met a manasakbat ed responsabilidad na panangasikaso ed kimey na panagpulong, panagpawala ed aaralen a materyal, tan pananuro ed saray manangasikaso ed saray sanga, distrito, sirkito, tan kongregasyon. Saraya so intereses na Panarian ya impudir nen Kristo ya asikasoen na matoor tan makabat ya aripen, ya inrepresenta na Mananguley ya Ulop to.
17. Antoran malaknab ya aligwas ed panangasikaso so agawa nen 1971, 1974, tan 1976?
17 Say inmunan-siglon mananguley ya ulop so apalaknab a mangisakup na mas nagkalalo nen saray apostoles nen Jesus. Sanen say isyu na panaggalsim so adesidi, saman ya ulop so mapatnag ya angisakup “ed saray apostoles tan mamatatken a lalaki ed Jerusalem.” (Gawa 15:1, 2) Mipara, say Mananguley ya Ulop so apalaknab nen 1971 tan lamet nen 1974. Pian napaandar so kimey na panangasikaso ra, say Mananguley ya Ulop so angiyuksoy na limaran komite ya onggapon onkurang nen Enero 1, 1976. Kada komite so tinibukel na manlapud talora ya anggad anemiran membro, amin da so walaan na manparan boses ed saray pamaakaran a salaysayen. Say tserman na kada komite so manserbi ed sakey taon, tan saray sinansakey a membro na Mananguley ya Ulop so manserbi ed sakey odino onsulok ed sarayan komite. Kada sakey ed sarayan limaran komite so mangiter na partikular ya imano ed sakey ya espesipikon aspekto na saray mangaraldalin a kayarian nen Kristo. Say komanem a komite—say Chairman’s Committee, a say membro to so ontelek ed kada taon, so mangiimaton ed saray mankaganatan a problema.
Aktibon Pitutunosan ed Mananguley ya Ulop
18. Panoy kikukurang na Mananguley ya Ulop, tan anto so sakey a dalan a pakapangipanengnengan tayo na pitutunosan ed satan?
18 Saray komite na Mananguley ya Ulop so manggagawa na sinimban miting diad panrepaso ed saray importantin bengatla, manggawa ed saray desisyon kayari na sipipikasin panangonsidera, tan manplano a para ed arapen a teokratikon kimey. A singa naimano lan akauna, ipapanengneng na Gawa kapitulo 15 a say ambelat a tepet a mankaukolan na resolusyon so nipaarap ed inmunan-siglon mananguley ya ulop ya imanoen. Miulibay natan, saray importantin tepet so nipaarap ed interon Mananguley ya Ulop, a manaabet a sinimba odino mas mabetbet sano nakaukolan. Saray membro na Mananguley ya Ulop, diad kaplesan et 12 ed bilang, so mangekerew ed panangiwanwan nen Jehova a Dios diad panamegley na Kasulatan tan diad panamegley na pikakasi. Sakey a dalan a pangipanengnengan tayo na pitutunosan ed Mananguley ya Ulop et say pannodnonot ed sarayan nagkalautlan aturon lalaki diad saray inagew-agew a pikakasi.—Roma 12:12.
19. Panoy pakasabi na saray instruksion na Mananguley ya Ulop ed saray kongregasyon?
19 Panoy pakasabi na saray instruksion tan desisyon na Mananguley ya Ulop ed saray kongregasyon? Kayarin asabi na saray membro na inmunan-siglon mananguley ya ulop so desisyon da diad tulong na espiritu na Dios, sikara so angipatulor na sulat ed saray kongregasyon. (Gawa 15:22-29) Anggaman ontan, say manunan dalan natan et diad panamegley na saray Kristianon palapagan.
20. (a) Anton malaknab ya inkagugolan na organisasyon so agawa nen 1976? (b) Panoy pikoopera na saray Branch Committees ed Mananguley ya Ulop?
20 Nanlapulad Pebrero 1, 1976, balang sakey ed saray sanga na Watch Tower Society so walaan na sakey a Branch Committee a tinibukel na saray makayarin lalaki a tinuro na Mananguley ya Ulop. Bilang manangilaman na Mananguley ya Ulop ed bansa odino saray bansa diad silong na superbisyon na sanga ra, sarayan agagin lalaki so nepeg a napanmatalkan, matoor a lalaki. Saya so mangipanonot ed sikatayo ed saray makayari, matakot-ed-Dios, napanmatalkan a lalakin tinmulong ed si Moises a manangukom ed totoo diad kadaanan ya Israel. (Exodo 18:17-26) Saray membro na sakey a Branch Committee so mangipakurang na saray instruksion a naawat diad panamegley na saray libro na Sosyedad tan saray magasin tan Ministeryo Tayo Ed Panarian, tan ontan met ed saray inheneral a sulat tan espesyal a sulat a manasaglawi ed lokal iran problema. Saray Branch Committee so mantultuloy a mangipakabat ed Mananguley ya Ulop ed progreso na kimey ed kada dalin tan ed saray problema a nayarin onlesa. Saray ontan a report a manlapud sankamundoan so ontulong ed Mananguley ya Ulop a mandesidi ed no antoran tema so nepeg a nipaliwawa ed saray palapagan na Sosyedad.
21. Panoy inkaturo na saray managbiahen manangasikaso, tan anto so isasakup na saray kimey da?
21 Diad leksab na panangiwanwan na masanton espiritu, saray Branch Committee so mangirekomenda ed saray matatken, espiritual a lalakin manserbi a bilang manangasikaso na sirkito tan distrito. Kayari na direktan panuro na Mananguley ya Ulop, sikara so manserbi a bilang managbiahen manangasikaso. Sarayan agagin lalaki so ondalaw ed saray sirkito tan kongregasyon ta pian sikara so pabiskegen ed espiritual tan tulongan da ran mangiyaplika ed saray instruksion a naawat a manlapud Mananguley ya Ulop. (Ipareng so Gawa 16:4; Roma 1:11, 12.) Saray managbiahen manangasikaso so mangisubmiti na report ed sangan opisina. Diad tulong na masanton espiritu tan say apuyanan a Kasulatan, sikara so mibiang ed saray lokal a mamatatken diad panangirekomenda ed saray kualipikadon agagin lalaki diad katuro a bilang ministeryal ya ariripen tan mamatatken na Mananguley ya Ulop odino diad panamegley na representante to.—Filipos 1:1; Tito 1:5; ipareng so 1 Timoteo 3:1-13; 4:14.
22. (a) Panoy pitunosan na saray mamatatken ed kongregasyon ed Mananguley ya Ulop? (b) Antoy mamaneknek a bebendisyonan nen Jehova iyan teokratikon oksuyan?
22 Ontan met, saramay manitibukel na saray ulop na mamatatken ‘so mangimano ed inkasikara tan ed amin a pulok, a sikara so tinuro na masanton espiritu a manangasikaso.’ (Gawa 20:28) Sarayan manangasikaso so sitotoor a mangiyaplika ed saray instruksion a nanaawat a manlapud si Jehova a Dios tan si Jesu-Kristo diad panamegley na matoor tan makabat ya aripen tan say Mananguley ya Ulop to. Si Jehova so mamibendisyon ed sarayan teokratikon oksuyan, lapud ‘saray kongregasyon so mantutultuloy a napapabiskeg ed pananisia tan ondadaak ed bilang ya inagew-agew.’—Gawa 16:5.
23. Nipaakar ed Mananguley ya Ulop, sikatayo so nepeg a desididon manggawa na anto?
23 Agaylan maabig a diad panamegley na Mananguley ya Ulop, si Jehova a Dios tan say Katawan, si Jesu-Kristo, so mangipapatnag na suporta ed totoo na Dios! (Salmo 94:14) Bilang kabiangan na organisasyon nen Jehova, sikatayon sinansakey so nagunggunaan ed ontan a suporta. (Salmo 145:14) Saya so nepeg a mamabiskeg na desisyon tayon mitunosan ed saray oksuyan na Dios. Peteg, komon ta sikatayon naynay so naromog a mitutunosan ed Mananguley ya Ulop na saray Tasi nen Jehova legan a sikatayo so onabante ed panaon sano “say dalin so peteg a napano na pikakabat ed si Jehova a singa saray danum et sakbungan da so mismon dayat.”—Isaias 11:9.
Saray Manunan Punto a Nodnonoten
◻ Antoran apadaak a responsabilidad so inawat na mayordumon klase nen 1919?
◻ Diad dakel iran taon, diad anto so akabidbiran ed nanengneng a Mananguley ya Ulop?
◻ Antoran progresibon inkagugolan so agawa diad inkaturo na saray membro na Mananguley ya Ulop?
◻ nto so arum ed saray mangaraldalin a kayarian nen Kristo ya impudir to ed aripen a klase tan say Mananguley ya Ulop to?
◻ Panon so pakapitunosan tayo ed Mananguley ya Ulop?
[Saray litrato ed pahina 14, 15]
Manlapud sankamundoan a hedkuarter to ed Brooklyn, Nueba York, say Mananguley ya Ulop so mangaasikaso ed panangipalapag tan panagpulong a kimey na saray Tasi nen Jehova ed 93 a sangasanga na Watch Tower Society
Alemanya
Hapon
Abalaten ya Aprika
Brazil