Say Salita na Dios so Katuaan
“Pasantos mo ra ed panamegley na katuaan; say salitam so katuaan.”—JUAN 17:17.
1. Panoy impanmoria na Hebreon salmista ed Biblia, balet panon so panmoria na dakel ed satan natan?
“SAY salitam so sakey a silewan na salik, tan sakey a liwawa na basbas ko.” (Salmo 119:105) Ontan so imbaga na Hebreon salmista. Melag lambengat a grupo natan so walaan na respeton singa ontan ed Salita na Dios. Diad sayan koma-20 siglo, say Salita na Dios so wala ed insulat a porma a singa say Masanton Biblia. Sikato so nipatalos ed dakel iran lenguahe tan nibunog a lalon malaknab nen say anggan dinan a libro ed awaran. Ingen, kaslakan so agmangawat ed satan a bilang silewan ed sali ra. Anggan saraman so mangibabagan Kristiano so manlabay, diad maslak a kabiangan, a manumbok ed saray dilin ideyas da imbes ya abuloyan da so Biblia a manliwawa ed basbas da.—2 Timoteo 3:5.
2, 3. Panon so panmoria na saray Tasi nen Jehova ed Biblia, tan antoran gungguna so intarok na saya ed sikara?
2 Diad piduman tuloy, sikatayo a Tasi nen Jehova so mipakna ed salmista. Para ed sikatayo, say Biblia so inter-na-Dios a giya. Amta tayo ya “amin a Sulat so impuyan na Dios tan makagungguna ed panagbangat, ed panamaat, ed panametek ed saray bengatla, ed panagdisiplina ed inkatunong.” (2 Timoteo 3:16) Aliwan singa saray dakel natan, agtayo labay so maneksperimento ed saray pamaakaran na moralidad tan kondukta. Amta tayo no anto so maptek lapud ibabaga na Biblia ed sikatayo.
3 Saya so angitarok ed sikatayo na baleg iran gungguna. Naamtaan tayo si Jehova, tan naaralan tayoray sankarakpan a gagala to ed dalin tan katooan, sirin sikatayo so matalek a say masnag ya arapen so posibli ed sikatayo tan ed pamilya tayo. Mipakna itayon sigpot-puso ed salmista sanen inkuanto: “Agaylan inarok so ganggan mo! Ed amin ya agew et sikato so imanoen ko. Makabat nen saray kakabusol ko so gawaen na ganggan mo ed siak, lapud diad panaon ya andi-geter et kayarian ko.”—Salmo 119:97, 98.
Panagtasi ed Panamegley na Kondukta
4. Diad pamidbir ed Biblia a bilang Salita na Dios so mangipasakbat na anton obligasyon ed sikatayo?
4 Sikatayo, sirin, so walaan na kada rason diad pipakna ed saray salita nen Jesus a nipaarap ed si Ama to: “Say salitam so katuaan.” (Juan 17:17) Balet say pamidbir ed sayan katuaan so mangipasakbat ed sikatayo na obligasyon. Nepeg tayon tulongan so arum a mamidbir a say Salita na Dios so katuaan. Diad onia et sikara met so makayarin manggayaga ed saray bendisyon a nagagamoran tayo. Panon so pakatulongan tayo ed sikara ed ontan a dalan? Diad sakey a bengatla, nepeg a gawaen tayo so impasyan sagpot a mangiyaplika ed saray prinsipyo na Biblia ed inagew-agew a panagbilay tayo. Diad ontan, saray maptek-impanpuson totoo so makanengneng a say dalan na Biblia so peteg a sankaabigan.
5. Anton simbawa so inter nen Pedro nipaakar ed panagtasi na kondukta tayo?
5 Saya so belas na simbawa nen apostol Pedro ed saray Kristianon bibii a saray kaasawaan da so agmananisia. Inkuanto ed sikara: “Sikayoran kaasawaan a bibii, pauleyan kayo ed saray dilin kaasawaan yo, ta pian, no wala so aliwan matulok ed salita, sikara so nayarin nagamoran ya anggapo so salita diad panamegley na ugali na saray kaasawaan dan bibii.” (1 Pedro 3:1) Satan met so prinsipyo ed benegan na simbawa to ed amin na saray Kristianos—lalaki, bibii, tan ananak—sanen inkuanto: “Pansiansiaen yo so maabig ya ugali yo ed limog na nasyones, pian, diad bengatlan pansasalitaan da na sumpa ed sikayo a singa managgaway-mauges, sikara so nayarin bilang pansumpalan na maabig a gawa yo ya anengneng da et igloria ra so Dios ed agew na idalaw to.”—1 Pedro 2:12; 3:16.
Say Superyor a Kakabatan na Biblia
6. Panoy panulong nen Pedro ed sikatayo a makanengneng a nepeg tayon tulongan so arum a mangapresya ed Biblia?
6 Nagkalalo ni, saray Kristianos so makatulong ed arum a mangapresya ed Biblia no gawaen da so singa insimbawa met nen Pedro: “Pasantosen si Kristo a bilang Katawan ed kapusoan yo, naynay ya akaparaan a mangipaliwawa ed arap na siopaman a mankaukolan ed sikayo na katunongan ed ilalon wala ed sikayo, balet gawaen a tekep na kauyamoan tan galang.” (1 Pedro 3:15) Saray Kristianon ministros so nepeg a makayarin mangiyagel ed Biblia tan ipaliwawa ed arum a satan so Salita na Dios. Panon so pakapanggawa ra ed ontan?
7. Anton katuaan nipaakar ed Biblia so mangidemostra a satan so Salita na Dios?
7 Sakey a makatangguyor a panagkatunongan so naromog ed libro na Uliran. Ditan et nabasa tayo: “Anako, no awaten moray balikas ko tan pablien moray dilin ganggan ko, ta pian manimano ed kakabatan . . . , naromog mo so mismon pikakabat ed Dios. Ta si Jehova a mismo so mangiter na kakabatan; manlapud sangi to et wala so pikakabat tan pakatebek.” (Uliran 2:1-6) Say dilin kakabatan na Dios so naromog ed saray pahina na Biblia. Sano nanengneng na sakey a toon masimoon itan a daakan a kakabatan, andi-saew a namoria ton say Biblia so nagkalalo nen say basta salita na too.
8, 9. Panon a say simbawa na Biblia nipaakar ed panamemben na asimbang a panmoria ed panangamor na kayamanan so nipanengneng a duga?
8 Imanoen so pigaran ehemplo. Natan, say aligwas ed bilay so gendagendat a sinukat ed pinansyal a termino. Kapiganman a baleg so naromog na sakey a too, say maaligwas so isipen ton kipapasen to. Say Biblia, anggaman kuan, so mamapasakbay a sumpad alablabas a pangipasen na dakel ed materyal iran bengatla. Insulat nen apostol Pablo: “Saramay determinadon magmaliw a mayaman so napelag ed tukso tan kalot tan dakel iran kakulangkulangan tan makapasakit iran pilalek, ya angipelag ed totoo diad kadederal tan desyang. Ta say aro ed kuarta so sakey a lamut na amin a nengneng na makapasakit iran bengatla, tan diad pangawat ed sayan aro et arum so nisuawi ed pananisia tan sigpot ya atalos ed dakel iran ot-ot.”—1 Timoteo 6:9, 10; ipareng so Mateo 6:24.
9 Impanengneng na eksperiensia no panon a matukoy iyan pasakbay. Imbaga na sakey a klinikon sikolohista: “Say pagmaliw a Numero 1 tan mayaman so agmanggawa ed sikan manlikna a napno, napnek, autentikon respetoen odino aroen.” On, saramay mangusar ed amin a biskeg da diad panangusil ed kayamanan so mabetbet a mansumpal ed panlikna na ampait tan inkadismaya. Say Kasulatan, manwarin bibidbiren to so kablian na kuarta, so mangituturo ed bengatlan nagkalalon importante: “Say kakabatan so onkanan salimbeng a singa say kuarta ya onkanan salimbeng; balet say pankaabigan na pikakabat et say kakabatan a mismo so mangilaban a mabilay ed saray akankayarian ed sikato.”—Eclesiastes 7:12.
10. Akin a nepeg tayon imanoen so simbawa na Biblia a bantayan tayoray pililimog tayo?
10 Say Biblia so walaan na ontan iran bilin. Sananey a sakey so: “Siopaman a mikurang ed saray makabat a totoo so magmaliw a makabat; balet siopaman a walaan na pililimog ed saray makulangkulang so mansumpal a mauges. (Uliran 13:20) Saya met so apaneknekan a tua ed eksperiensia. Say panangidesdes na saray kaedaran so angitonton ed saray walad kalangweran a totoo ed panagbuanges, panag-abuso ed druga, tan imoralidad. Anggan siopan milaok ed saray manag-usar na marutak a lenguahe so diad kaunoran et naromog da so inkasikaran manguusar na miulibay a panagsalitan makapadimla. Dakel so mantatakew ed saray amo ra lapud ‘amin so manggagawa ed satan.’ Tua, a singa ibabaga met na Biblia: “Saray mauges a pililimog so maneral na maabig iran ugali.”—1 Corinto 15:33.
11. Panoy impangipanengneng na sakey a sikolohikon impanaral ed kakabatan na pananumbok ed Binmalitok a Ganggan?
11 Sakey ed saray sankabantogan a simbawa ed Biblia et say tatawagen na Binmalitok a Ganggan: “Amin a bengatla, sirin, a labay yon gawaen na totoo ed sikayo, ontan met so gawaen yo ed sikara.” (Mateo 7:12) No tumboken na katooan iyan totontonen, say mundo so malinlinew a magmaliw a sakey a maong a pasen. Balet anggano saray totoo ed inkalapagan so agmanumbok ed totontonen, maabig ed sika a sinansakey so panggawa na ontan. Akin? Lapud sikatayo so agawan mangaro ed arum tan mapaga ed sikara. (Gawa 20:35) Sakey a sikolohikon impanaral a ginawa ed Estados Unidos pian anapen no panon so inkiwas na totoo sanen tinulongan da so arum so akasabi ed sayan konklusyon: “Ompatnag, sirin, say panangaro ed arum so malaem a kabiangan na inkapalsa na too a singa say panangaro tayo ed inkasikatayon dili.”—Mateo 22:39.
Say Simbawa na Biblia—Nikadkaduman Makabat
12. Anto so sakey a bengatlan manggawa ed Biblia a nikadkaduma?
12 Natan, siempre, walaray dakel a sengegan na simbawa ed paway na Biblia. Saray peryodiko so nankarga na saray egpang na simbawa, tan saray lakowan-na-libro so napno na panulong-ed-inkasikan liblibro. Niarum ni, walaray sikolohistas, propesyonal iran managkonseho, tan arum a mangiyopresi na simbawa ed nanduruman lawak. Balet say Biblia so nikadkaduma ed nayarin taloran aspekto. Ununa, say simbawa to so naynay a makagungguna. Sikato so andin balot a basta teorya, tan agbalot mankimey ed dili tayon kasakitan. Siopaman a manumbok ed simbawa na Biblia so mipakna ed salmista sanen inkuanto ed Dios diad pikakasi: “Saray dilin panonot mo so nansumpal a napanmatalkan.”—Salmo 93:5.
13. Anto so mangipanengneng a say Biblia so superyor a tuloy ed saray sengegan na kakabatan na too?
13 Komadua, say Biblia so tinmalindeg diad subok na panaon. (1 Pedro 1:25; Isaias 40:8) Say simbawa a manlapud too so mangumanuman a tuloy, tan say uso ed sakey a taon so mabetbet a balawen ed ontumbok. Anggaman kuan, anggaman say Biblia so asumpal ed ngalngalin 2,000 taon lan apalabas, siansia nin nankarga na sankakabatan a simbawan akatarya, tan saray salita to so sankatalbaan ya onaplika. Sikara so onaplika ed parehon epekto balanglan sikatayo so manaayam ed Africa, ed Asia, ed Abalaten odino Baybay ya America, ed Europa, ed saray pulpulo na dayat.
14. Diad anton dalan a say Salita na Dios so matalona?
14 Kaunoran, say maawang a kalaknab na simbawa na Biblia so agnaparaan. Kuan na sakey ya uliran na Biblia: “Si Jehova a mismo so mangiter na kakabatan,” tan anggan anto lan problema odino desisyon so arapen tayo, wala so kakabatan ed Biblia ya ontulong ed sikatayon manresolbe ed satan. (Uliran 2:6) Saray ugugaw, katayatdang, atateng, matatatken, impleado, manangimpleyo, totoo ed autoridad, so amin makaromog a say kakabatan ed Biblia so onaplika ed sikara. (Uliran 4:11) Anggan sano arapen tayoray kipapasen ya agkabkabat ed panaon nen Jesus tan saray apostoles, say Biblia so mangiter ed sikatayo na simbawan epektibo. Alimbawa, nen inmunan siglo, say panagtabako so agkabat ed Pegley Bukig. Natan, sikato la so laganap. Anggaman kuan, siopaman a mangimano ed simbawa na Biblia ya ompaliis ed pagmaliw a “nitarok ed leksab na pakauley [odino panangontrol] na antokaman” tan say pansiansian malinis a manlapud “amin a dutak na laman tan espiritu” so ompaliis ed sayan ugali, a namparan makaadik tan makadesyang ed bunigas.—1 Corinto 6:12; 2 Corinto 7:1.
Para ed Mabayag a Kaabigan Tayo
15. Akin a dakel so mangibabagan say Biblia so lampas-la-ed-panaon?
15 Tua, dakel so mangikuan a say Biblia so lampas-la-ed-panaon tan aliwan lan matukoy ed sayan koma-20 siglo. Anggaman kuan, say rason so nayarin say Biblia so agmangibaga na labay dan dengelen. Say panumbok ed Makasulatan a simbawa so mankimey a para ed mabayag a pankaabiganan tayo, balet ta mabetbet a nakaukolan to so anos, disiplina, tan sakripisyo—ugugalin aliwan popular ed sakey a mundon mangipapaseseg ed sikatayo a mananap ed tampol a kagletan.—Uliran 1:1-3.
16, 17. Antoran atagey ya estandarte na seksual a moralidad so inletneg na Biblia, tan panon a saratan so impulisay ed modernon panaon?
16 Alaen so pamaakaran na seksual a moralidad. Saray Makasulatan ya estandarte so mapeget a tuloy. Say mogmon pasen a para ed seksual ya inkaapit et diad dalem na panamaley, tan amin na ontan ya inkaapit ed paway na panamaley so insebel. Nabasa tayo: “Nisay saray managlawan, nisaray managtalintao, nisaray managkalugoran, nisaray lalakin binabai, nisaray lalakin miakdol ed lalaki . . . so agmakatawir ed panarian na Dios.” (1 Corinto 6:9, 10) Nagkalalo ni, para ed saray Kristianos et nakakaukolan na Biblia so monogamya, sakey ya asawan laki a para ed sakey ya asawan bii. (1 Timoteo 3:2) Tan manwarin walaray alablabas a kason say diborsyo odino pansian so nayarin naabuloyan, ibabaga na Biblia a diad inkalapagan et say bedber na panamaley so legay bilay. Imbaga nen Jesus a mismo: “Saman so amalsa ed sikara ed gapo so nanggawa ed sikara a laki tan bii tan kuanto, ‘Nisengeg ed saya et taynanan na sakey a laki so ama to tan ina to tan mikasakey ed asawa to, tan say duara so magmaliw a sakey a laman’ . . . Ta pian sikara so aliwa lan duara, noagta sakey a laman. Sirin, say impankasakey na Dios so agkomon pansianen na too.”—Mateo 19:4-6, 9; 1 Corinto 7:12-16.
17 Natan, sarayan estandarte so malaknab ya impulisay. Inabuloyan so malukak iran ugali ed sekso. Say seksual a relasyon ed baetan na saray mamapasyar a katayatdang so impasen a normal. Say panamong ya anggapo so gungguna na panangasawa so inawat. Diad limog na saray sanaasawa, say marutak a kurang na sekso ed anggan siopan kapareha so kaslakan. Tan say diborsyo so kasmak ed sayan modernon mundo. Sarayan malukak ya estandarte, anggaman kuan, so ag-angitarok na liket. Saray mauges a nansumpalan so amaneknek a say Biblia so duga lamlamang diad panangipaskar to ed saray mapeget ya estandarte ed moral.
18, 19. Anto so nansumpalan na kasmak a panangipulisay ed saray estandarte nen Jehova ed moralidad?
18 Inkuan na Ladies’ Home Journal: “Say danet ed sekso ya angitipo ed sisientas tan sitentas so angitarok na aliwan magnayon a liket na too noagta bengatlan seryoson kasinageman ed too.” Say “seryoson kasinageman ed too” ya atukoy dia so mangisakup ed inkagonigon na saray anak diad impandiborsyo na atateng tan saray matatatken ya anagmak na ot-ot ed emosyon. Isasakup to met so ondarakel iran sakey-ateng a pamilya tan epidemya na saray katayatdang a walad kasuloan a bibiin walaan na saray anak sanen sikara so mairap a walad inkaugaw a mismo. Nagkalalo ni, inabrasa to so inkasmak na makaalis a sakit ed sekso, a singa say genital herpes, gonorya, sipilis, klamidya, tan AIDS.
19 Nisengeg ed amin na saraya, imbaga na sakey a propesor na sosyologo: “Anganko ta sikatayo so ankabaleg lan mangimano ed no kasin agmanserbi ed sikatayon magmaong so pangiyalibansa ed iyaarawi ed sakbay-na-panasawa bilang sakey a totontonen a sankakiwasan ed nakaukolan na mibabaley tayo tan say kanepegan da ed kawayangan: kawayagan ed sakit, kawayangan ed agkinaliktan a panaglukon.” Mabitar ya imbaga na Biblia: “Maliket so makayarin too ya angiteen na talek to ed si Jehova tan agto inyarap so lupa to ed mapangayan totoo, nisay diad saraman so naplag ed katilaan.” (Salmo 40:4) Saramay nanmatalek ed kakabatan na Biblia so agpinalikdo na katilaan na saraman so mangidedepak ed Biblia tan mangibabagan say maluklukak a kodego na moral so mangitarok na liket. Say makabat, no mapeget, iran estandarte na Biblia so sankaabigan.
Mairap Iran Problema ed Bilay
20. Antoran prinsipyo na Biblia so apaneknekan a makatulong ed saraman so nidudunget ed ansakit ya inkaid-irap ed bilay da?
20 Say kakabatan na Biblia so ontulong met ed sikatayon mangarap ed saray mairap a probleman arapen tayo ed bilay. Alimbawa, diad pigaran daldalin, walaray Kristianos a manaayam ed pirmi, pakaskasin kairapan. Ingen ta natatalonaan da so kairapan da tan siansian makakaromog na liket. Panon? Diad panutumbok ed apuyanan a Salita na Dios. Liknaen dan seryoso so makaligliwan salita ed Salmo 55:22: “Ipasakbat mo ed si Jehova so awit, tan sikato so mangampupo ed sika.” Sikara so manmatalek ed Dios diad biskeg a mansungdo. Insan iyaplika ra so prinsipyo na Biblia tan paliisan daray makapasakit, managpirdin bisyo, a singa say panagsigarilyo tan panagbuanges. Sikara so makuli, a singa irerekomenda na Biblia, tan sirin mabetbet a naromog dan nayarian a pakanen so pamilya ra sano saray mangiras a totoo odino saraman so onsuko ed kaandian na ilalo so onsaew. (Uliran 6:6-11; 10:26) Nagkalalo ni, imanoen da so pasakbay na Biblia: “Ag-oniibeg ed saraman so manggagawa na ag-inkatunong.” (Salmo 37:1) Sikara so ag nidudunget ed panagsugal odino ed kriminal iran gawa, a singa say panaglako na druga. Sarayan bengatla so nayarin mangiyopresi na aliston “solusyon” ed saray problema ra, balet say magnayon a bunga so ampait.
21, 22. (a) Panoy impangagwat na sakey a Kristianon bii na tulong tan ligliwa a manlapud Biblia? (b) Anton kaaruman a katuaan nipaakar ed Biblia so ontulong ed sikatayon manmoria a satan so Salita na Dios?
21 Kasin say panumbok ed Biblia so peteg a manulong ed saraman so pobren tuloy? On, a singa paneknekan na dakerakel ya eksperiensia. Insulat na sakey a Kristianon balo ed Asia: “Anggaman siak so manbibilay ed gulis na inkaid-irap, siak so aliwan maingongot odino magonigon. Say katuaan na Biblia so mamano ed siak na positibon indengan.” Inreport to a say makatantandan sipan ya inter nen Jesus so asumpal ed kipapasen to. Imbaga nen Jesus: “Itultuloy, sirin, ya anapen ya ununa so panarian tan say inkatunong to, tan amin na sarayan arum a bengatla so niyarum ed sikayo.” (Mateo 6:33) Pekderan to a say panangiyuna to ed serbisyo na Dios ed bilay to, sikato so naynay a makakaawat, ed sakey a nengneng odino diad sananey, ed saray materyal a nakakaukolan ed bilay. Tan say Kristianon serbisyo to so mangiter ed sikato na kagalangan tan kalat ed bilay a manggawa ed inkaid-irap to a nasungdoan.
22 Tua, say kaaralman na kakabatan to so mangipanengneng a say Biblia so peteg a Salita na Dios. Anggapo so libron apawalan nagnap na totoo a makasalaysay ed ontanlan kinarakel na nanduruman aspekto ed bilay tan ontanlan makatebek a tuloy tan ontanlan dugan tuloy. Balet ta wala so sananey a katuaan nipaakar ed Biblia a mangidemostra ed madibinon gapowan to. Walaan na pakayarin mamasimbalo ed totoo a para ed magmaong. Saya so salaysayen tayo ed ontumbok ya artikulo.
Kasin Nipaliwawa Yo?
◻ Diad anton dalan a saray Tasi nen Jehova so apapalar diad panangawat da ed Biblia a bilang Salita na Dios?
◻ Bilang mananisia ed Salita na Dios, anton obligasyon so wala ed sikatayo, tan panoy panulong na kondukta tayo ed sikatayo a manumpal ed sayan obligasyon?
◻ Anto so manggawa ed makabat a simbawa na Biblia a superyor ed basta simbawa na too?
◻ Anto so arum ya ehemplon mangipanengneng ed kaaralman na kakabatan na Biblia?