Say Inkamatua So Sankaabigan a Totontonen

SAY inkamatua so nirekomendan tuloy ed Biblia tan nakakaukolan a para ed saray tuan Kristianos. (Mateo 22:39; 2 Corinto 8:21) Nagkalalo ni, say inkamatua so peteg a sankaabigan a totontonen, a singa nidemostra ed bilay na dakel natan a saray kanonotan tan puso ra so pinasimbalo na suston pikakabat ed Biblia. Sakey ya ehemplo so nanlapud Liberia.

Kayari na malaem a sipipikasin panangonsidera, sakey a Kristianon matatken tan say asawa to so angisara ed paraitan da. Akin? Lapud uupoten to so dakel a panaon da tan sesebelan to ra ed saray ministeryal ya aktibidades da tan personal a panagaral. Sikara so nampaknan magmaliw a kontento ed kabkaabigan a naroromog da diad panaglako ed panagkulor na abel. Tampol kayari na impanggawa ra ed saya, anggaman kuan, say presyo na panagkulor so inmabeba ed lokal a lakowan. Say naroromog da natan so agla makasustine ed pamilya. Anto so gawaen da?

Kinerew da ed kompanyan manririndi na panagkulor ya iyabeba ra so presyo ra, sirin ipalugar to so magmaong a tubo. Saya so ag-inawat. Anggaman kuan, say kompanya so angiyopresin mangipawit na duaran invoices, sakey so mangipapanengneng ed aktual a presyo tan say sananey so abeban presyo a nayarian ipresenta ed Aduana ta pian daiset so bayaran a buis. Saya so mangipalugar ed matatken na $2,000 a tubon ilegal ed kada pautang.

Agnilabay na agi so pagmaliw a kabiangan na pakurang a sititila tan saulen so gobierno. Nikelawan iray opisyales na kompanya. Insulat da: “Respetoen mi so konsiensia yo,” tan tinuro ra so matatken a solamentin ahente na produkta ra ed Liberia. Natan ta saray nakakaukolan na pamilya ed materyal so magenap la, say matatken tan say asawa to so makayarin man-auxiliary payunir, mankimey a maapit ed saray agagi diad pamabiskeg ed kongregasyon. Tua, say inkamatua ra so nansumpal a bendisyon ed sikara.

Si Alfonso, ed Espanya, so akaromog met a say inkamatua so sankaabigan a totontonen. Sayan walad kalangweran so tinmaynan ed abung diad edad a 12, tan agnambayag et sikato so manlalako na druga, tan ontan met a tatakewan toray kotse, kaabungan, tan lakowan. No maminsan et mantakew ya anggad karakel na samploran tiendaan ed sakey ya agew. Diad edad a 21, apatira ed saray kakaiba to so ansakit ya amekpek ed sikato, tinakew da so interon suplay ton druga, tan binegya ran pateyen no sikara so ireport to ed pulisya. Lapud sikato so kabkabat na pulis, sikato ni ingen so antakot ya onla ed ospital a manpatambal.

Legan a nankalkalnan manpapaabig ed saray sugat to, si Alfonso so nanumameng a seryoso ed dalan na bilay to. Anonotan toray bengatla nipaakar ed Biblia tan saray Kristianon prinsipyo ya imbaga nen ina to ed sikato sanen sikato ni so melag ya ugaw. Diad saman, imbaliwala toray salita nen ina to, balet natan et sikato so kinmerew na sakey a panangiyaral ed Biblia diad saray Tasi nen Jehova. Diad anem bulan et sikato so sigpot ya anguman ed kondukta tan personalidad tan kinmapet ed bautismo.

Anggaman ontan, diad samay agew ed sakbay na bautismo to, sikato so akaawat na subpuena ya onapireng ed korte a mangarap ed demanda na armadon panagtakew. Sakey a krimen a ginawa to nensaman. Anggaman ontan, silulukas ya impatua nen Alfonso so gawan-mauges tan sikato so apriso diad panalagar na bista. Say abogado depensa to so manedesdes ed sikaton mangibaga ya anggapo so tinakew to tan sikato so agnanawit na paltog. Balet ta impilit nen Alfonso so pangibaga na katuaan. Lapud kasalanan tan say mauges a rekord to ed pulisya, kinerew na huis so sentensyan 13 taon. Balet ta lapud maabig a kondukta to tan matuan awawey to, sikato so naikdan na anem bulan, a satan a panaon et aserbian to la legan a manaalagar na bista.

Natan si Alfonso tan say asawa to so manlilingkor ed si Jehova a sitotoor, maliket ya akaromog ed peteg a gagala ed bilay tan diad impamaneknek ed dilin eksperiensia ra a say inkamatua so sankaabigan a totontonen.