Tepetepet Manlapud Managbasa

◼ Kasin ibaga tayo a manlapud Mateo 7:13, 14 tan Lucas 13:24 ya anggan diad kioli, maslak a totoo so mangipulisay ed tuan panagdayew?

Andi, sarayan bersikulo so agmanusuporta ed ontan a konklusyon. Imbes, ipaliwawa ran nagkalautla so pakagamor na bilay ed mangatatawen a Panarian.

Saray salita nen Jesus ed Mateo 7:13, 14 so kabiangan na Sermon ed Palandey. Inkuanto: “Onloob ed mainget a pinto; lapud maawang tan malapar so dalan a mamaarap ed kaderalan, tan dakel so ondalan ditan; bangta mainget so pinto tan makisir so dalan a mamaarap ed bilay, tan pigpigara so makaromog ed satan.”

Malaem ed imbaga nen Jesus ed sayan inkagawa so nisiglaot a nagkalautla ed mangatatawen a Panarian. Alimbawa, inggapo to ed saray salita: “Maliket iraman so manonot ed espiritual a nakakaukolan da, lapud kayarian da so panarian na katawenan.” Inkuanto a say dalisay ed puso so “makanengneng ed Dios” tan “say panarian na katawenan” so kayarian na saraman so “napapasegsegang nisesengeg ed inkatunong.” (Mateo 5:3, 8, 10) Saginonor ed parehon diskurso, sinalita nen Jesus so maawang a dalan a mamaarap ed kaderalan tan say mainget a dalan a mamaarap ed bilay. Diad kabiangan, inyarum to: “Aliwan balang sakey a mangikuan ed siak, ‘Katawan, Katawan,’ so onloob ed panarian na katawenan, noagta say sakey a manggagawa ed linawa nen Amak a wala ed katawenan.”​—Mateo 7:13, 14, 21.

Say kabaliksan na Lucas 13:​24 so miulibay, a singa nipanengneng ed konteksto. Inter nen Jesus so duaran ilustrasyon nipaakar “ed panarian na Dios.” Saginonor, sikato so tinepetan: “Katawan, kasin saramay nilaban so daiset?” Inmebat si Jesus: “Isekar yo so inkasikayon mabiskeg ya onloob ed mainget a pinto, lapud dakel, ikuan ko ed sikayo, so mananap ya onloob ta agmakayari.” Say “dakel” et tutukoyen to so totoon mikasin palooben kayarin say puerta so nikaput tan atalakan. Saraya so “managgawa na ag-inkatunong” ya agkinmapet a mikaiba ed “si Abraham tan Isaac tan Jacob tan amin a propetas ed panarian na Dios.” Say “dakel” so nanisip a sikara so ununa “ed panarian na Dios,” balet diad tua et sikara so utit, mapatnag a kabaliksan ton sikara so agmakaloob a balot.​—Lucas 13:18-30.

Ipanengneng na konteksto a si Jesus so manasalaysay na iloob ed mangatatawen a Panarian na Dios. Saray Judion relihyoson papangulo ed saman so abayaglan nanggayaga ed apribilehyoan a posisyon, diad impakarateng ed Salita na Dios. Nilikna ran sikara so mayaman ed espiritual tan matunong ed pakanengneng na Dios, a miduma ed saray kabanyakan a totoo, a minudmora ra. (Juan 9:24-34) Ingen, inkuan nen Jesus a saray managsingil na buis tan balangkantis ya angawat ed mensahe to tan nagbabawi so nawalaan na panangabobon na Dios.​—Ipareng so Mateo 21:23-32; Lucas 16:14-31.

Say kabanyakan a totoon nagmaliw a babangatan nen Jesus so nidasig a naawat bilang espiritual ya ananak sanen say mangatatawen a tawag so alukasan nen Pentecostes 33 K.P. (Hebreos 10:19, 20) Anggaman baleg a karaklan so akadngel ed si Jesus, saramay angawat ed sikato tan saginonor et akagamor ed mangatatawen ya ilalo so pigpigara. Balet say melag a pulok na nailalak-ed-espiritun totoo a mangawat ed satan a tumang so nayarin nikumpara ed indaeg nen Jacob ed sakey a lamisaan diad tawen ed si Jehova (say Babaleg ya Abraham) tan say Anak to (inretrato nen Isaac). Peteg a satan so makanan pangisekaran na sakey a mabiskeg, balet maslak ya akadngel ed si Jesus so agnanggawa na ontan.

Sirin, nanengneng tayo a manlapud konteksto ed namparan inkagawa a saray komento nen Jesus (nipaakar ed pigpigara a wala ed mainget a dalan a mamaarap ed bilay tan nilaban) so nisiglaot a manuna ed pakawalaan na panangabobon na Dios ed saman a panaon sanen itatandoro To so ilalo ed mangatatawen a bilay. Relatibon daiset so akadngel ed mensahe na katuaan tan akaaral ed kinaukolan so kinmiwas tan apaneknekan a matoor.​—Mateo 22:14; 24:13; Juan 6:60-66.

Makapainteres ya anggan natan, sano say interon Biblia so wala tan wala so daakan a kasusumpalan na saray madibinon propesiya nipaakar ed kaunoran iran agew, daiset so onkikiwas ed Kristianon mensahe tan mantutultuloy diad panaglingkor ed si Jehova. Saya so mitukoyan ed ilustrasyon nen Jesus nipaakar ed nanduruman dalin. Inkuanto ya arum so makadngel “ed salita na panarian,” balet simpayuten nen Satanas iman so intanem. Arum so mangawat ed salita a tekep na gayaga balet kabekta et onsaew lapud kairapan odino panamasegsegang. Ingen arum so mansumpal ya andi-bunga lapud “kapagaan na sayan sistema na bengabengatla tan say manamalikdon pakayari na kayamanan.”​—Mateo 13:18-23.

Makapanseguro itayo a miduman tuloy sano minilmilyon so napaoli legan na Agew na Panangukom. Diad satan et si Satanas so aliwa lan bulos a manimpayut ed saray bukel na katuaan a nitanem ed kapusoan da. Agla nakaukolan so kiyarap da ed panamasegsegang odino kapagaan na peles a marelmeng a sistema. Sikara so nabangatan ed matunong a kaliberliber, aliktub na mamilagron gawa na Dios, a pati say kioli na inaatey tan say katambal na nasyones. Ipasen, arum so ag-onkiwas ya anggan diad satan. (Ipareng so Juan 11:45-53.) Balet wala so maabig a rason ed panisip a say kaslakan so makatebek ed salita, onkiwas ed satan, tan nilaban.