Panarian na Dios—Naaalam ta so Talos To?
“No nipaakar ed say nitanem ed mabunan dalin, sayan sakey so onderengel ed salita tan naaala toy talos to.”—MATEO 13:23.
1. Antoray pigaran kaslakan a sisiaen nipaakar ed ‘panarian ed katawenan’?
‘NALAM ta so talos’ no antoy Panarian na Dios? Malaknab a tuloy so pandurumay ideya nipaakar ed ‘say panarian na katawenan’ ed apalabas iran siglo. Sakey a kaslakan a sisiaen ed limog na saray membro na iglesia natan et say Panarian so bengatlan inyan na Dios ed kapusoan na too diad kakomberti. Liknaen na arum a satan so pasen a laen na maong a totoo kayari patey pian panggayagaan so anggapoy anggaan a liket. Balet ibabaga na arum ya impya la na Dios ed totoo so pangitarok na Panarian ed dalin diad saray pakurang da pian ipaslep so Kristianon bangabangat tan agagamil ed saray kurang a pansosyal tan pan-gobierno.
2. Panon so pangisasalaysay na Biblia ed Panarian na Dios, tan anto so sumpalen to?
2 Anggaman ontan, malinlinew ya ipapanengneng na Biblia a say Panarian na Dios et aliwan sakey ya institusyon diad dalin. Satan so aliwan kondisyon ed puso nisay maka-Kristianon sosyedad na too. Tua, say dugan pantalos ed no anto iyan Panarian so mangitotonton ed ankabaleg a pananguman ed bilay na saramay mangaagamil na pananisia ed satan. Balet say Panarian a mismo so madibinon niletneg a mangatatawen a gobiernon manumpal ed linawa na Dios, mangekal ed saray epekto na kasalanan tan patey tan mangipawil ed matunong iran kipapasen ed dalin. Wala la’d pakayari so Panarian diad katawenan, tan asingger la “et mekmeken to tan iyan to’d pangangga so amin irayan [atooan a] panarian, tan satan a mismo so ontalindeg ed ag-ageteran a panaon.”—Daniel 2:44; Apocalipsis 11:15; 12:10.
3. Sanen inggapo nen Jesus so ministeryo to, anto so alukasan parad totoo?
3 Oniay insulat nen manag-awaran a si H. G. Wells: “Sayan doktrina na Panarian ed Tawen, a manunan bangat nen Jesus, tan walaan na ontanlan melag a parti diad saray Kristianon kredo, so petepeteg a sakey ed sankadumaan ed saray doktrinan anagyat tan anguman ed kanonotan na too.” Diad gapo lambengat, say tema na ministeryo nen Jesus et: “Manbabawi, sikayon totoo, ta say panarian na katawenan so inmasingger la.” (Mateo 4:17) Sikato so walad dalin bilang alanaan ya Ari, tan sakey ed sankamagayagaan, say dalan so nilukas natan parad totoo aliwa lambengat pian minabang ed saray bendisyon na satan a Panarian noagta magmaliw met a manuley tan saserdoten kaiba nen Jesus diad satan a Panarian!—Lucas 22:28-30; Apocalipsis 1:6; 5:10.
4. Diad inmunan siglo, panon so inkiwas na karaklan ed “maong a balita na panarian,” ya angipaarap ed anton panangukom?
4 Legan a narerengelan na karaklan so makapasagyat a “maong a balita na say panarian,” dagdaiset labat so anisia. Diad melag a kabiangan et saya so lapud saray relihyoson pangulo so “angikapot ed panarian na katawenan ed arap na totoo.” Sikaray “angala ed tombok na pikakabat” diad panamegley na palson bangabangat da. Lapud maslak a totoo so angipulisay ed si Jesus bilang say Mesias tan say alanaan ya Ari na Panarian na Dios, inkuan nen Jesus ed sikara: “Say panarian na Dios so naala ed sikayo tan niiter ed sakey a nasyon a mamapawala na saray bunga to.”—Mateo 4:23; 21:43; 23:13; Lucas 11:52.
5. Panon a maslak ed saramay akadngel ed saray ilustrasyon nen Jesus so mangipapanengneng ya ag-ira dinmengel tekep na pakatalos?
5 Sanen aminsan a nambangat ed sakey a baleg ya ulop, si Jesus, unong ed kaugalian to la, so angusar na serye na saray ilustrasyon pian suboken so ulop tan ibiig iramay samet lambengat so interes da ed Panarian. Sasaglawien na unonan ilustrasyon so sakey a managsibwag ya angisibwag na bukel diad apatiran klase na dalin. Say inmonan taloran klase so agmatukoy a pantaneman, balet say utit so “mabunan dalin” ya amawala na maong iran bunga. Anampot so antikey ya ilustrasyon tekep na simbawan: “Abuloyan ya ontalineng iramay walaan na layag.” (Mateo 13:1-9) Maslak ed saramay presenti so akadngel ed sikato, balet sikaray ag “tinmalineng.” Anggapo so motibasyon da, anggapoy peteg ya interes ed pangamta no panon a say bukel ya insibwag ed silong na nanduruman kondisyon so singa say Panarian ed katawenan. Sinmempet ira pian pawilen so agew-agew a kabibilay da, nayarin iisipen iray ilustrasyon nen Jesus ya istorya labat a walaan na tema nipaakar ed moral. Agaylan mayamyaman a pakatalos tan agaylan engrande iran pribilihyo tan pankanawnawa so asaew da lapud agkinmiwas so kapusoan da!
6. Akin a say pakatalos ed “saray sagradon sekreto na say panarian” so nipagamor lambengat ed babangatan nen Jesus?
6 Imbaga nen Jesus ed saray babangatan to: “Diad sikayo et nipagamor so pakatalos na saray sagradon sekreto na say panarian na katawenan, balet agnipagamor ed saraman a totoo.” Diad impangaon ed si Isaias, inyarum to: “‘Ta say puso na sarayan totoo so nagmaliw ya agmangawat, tan tekep na kalayagan da sikaray dinmengel ya andian na kiwas, tan inlitdem day kamataan da; pian agmakanengneng so kamataan da tan ag-ira makadngel ed saray kalayagan da tan naala ray talos na saya ed kapusoan da tan ompawil, tan paabigen ko ira.’ Anggaman ontan, maliket iray mata yo lapud makanengneng, tan saray layag yo lapud makadngel ira.”—Mateo 13:10-16; Marcos 4:11-13.
‘Pakala ed Talos’ na Panarian
7. Akin ya importanti so ‘pakala ed talos’ na say Panarian?
7 Impaarap nen Jesus so problema. Satan so manasaglawi ed ‘pakala ed talos’ na mensahe Panarian. Diad saray babangatan to a personal ton imbagan: “Sikayo, sirin, talineng yo so ilustrasyon ed say toon nantanem. No iner a narerengelan na sakey so salita na say panarian balet agto naala so talos na satan, say marelmeng a sakey so onsabi tan samsamen to no anto so nitanem ed puso to.” Intuloy to nin insalaysay a saray apatiran klase na dalin so angipresenta ed nanduruman kondisyon na puso a ditan so kitaneman na “say salita na say panarian.”—Mateo 13:18-23; Lucas 8:9-15.
8. Anto so angamper ed “bukel” a nisibwag ed taloran klase na dalin manlapud pamawala na saray bunga?
8 Say “bukel” so maong ed balang kaso, balet say bunga so dependi ed kondisyon na dalin. No say dalin na puso so singa sakey a matoo, aseksek a dalan, a pinaawet na dakel ya agmaespiritual ya aktibidad, mainomay parad ondedengel nipaakar ed mensahe na Panarian so manbaraan, diad pangibagan anggapoy panaon to parad Panarian. Say ataynanan a bukel so magmainomay a tuloy a nasamsam sakbay a satan so onlamot. Balet anto no say bukel a nisibwag ed puso so aliling toy mabaton dalin? Nayarin say bukel so ontubo, balet ta nairapan iyan onlamot ya aralem pian natagano tan ombiskeg. Say pagmaliw a matulok ya aripen na Dios, nagkalautla diad panaon na pirmin panamasegsegang, so mangiparungtal na abalbaleg ya angat, tan say indibidual so nagapol. Tan lamet, no say dalin na puso so ontanlan napno na singa-sabsabitan iran kapagaan odino materyalistikon pilalek parad kayamanan, say maleletey a tanamay Panarian so natikel. Diad sarayan taloran tipikon situasyon ed bilay, agmakapawala na saray bunga na Panarian.
9. Akin a say bukel a nisibwag ed maong a dalin so akapawala na maong a bunga?
9 Balet, komustay bukel na Panarian a nisibwag ed maong a dalin? Oneebat si Jesus: “No nipaakar ed samay sakey a nisibwag ed mabunan dalin, saya iman so onderengel ed salita tan naaala toy talos, saya so talagan manbubunga tan mamapawala, sayan sakey so maminlasus, satan a sakey so anemaplo, say sananey talomplo.” (Mateo 13:23) Lapud “naaala so talos” na say Panarian, saraya so mamawala na maong iran bunga unong ed sirkumstansya na balang sakey.
Lalaktipen na Responsabilidad so Pakatalos
10. (a) Panon ya impanengneng nen Jesus a say “pakala ed talos” ed say Panarian so mangitatarok na saray bendisyon tan responsabilidad? (b) Kasin say inganggan nen Jesus ya onla tan manggawa na saray babangatan et onaaplika lambengat ed inmunan-siglon babangatan?
10 Kayari impangiter na anemira nin ilustrasyon pian mangisalaysay ed nanduruman aspeto na Panarian, tinepetan nen Jesus iray babangatan to: “Nala yo ta so talos na amin na sarayan bengatla?” Sanen inmebat ira na “on,” inkuanto: “No ontan, balang managbangat ed publiko, sano nabangatan nipaakar ed say panarian na katawenan, singa sakey a too, sakey ya unabong, so mangipapaway na kayamanan a nisimpen iran bengatlan balo tan daan.” Saray bangat tan panangipasal ya intarok nen Jesus so manggawa ed babangatan ton ontatken bilang Kristiano a makapawala na agnagetaran a suplay na mayaman ya espiritual a tagano manlapud ‘simpenan ya abung’ da. Maslak ed saya so nisisiglaot ed Panarian na Dios. Impalinew nen Jesus a say “pakala ed talos” na Panarian so aglambengat mangitarok na bendisyon noagta responsabilidad met. Inganggan to: “Onla kayo sirin tan manggawa kayo na babangatan ed totoo ed saray amin a nasyon, . . . bangatan yo iran mangunor ed amin a bengatlan inganggan ko ed sikayo. Tan, nia! wala ak ed sikayo ed amin ya agew anggad say konklusyon na say sistema na bengabengatla.”—Mateo 13:51, 52; 28:19, 20.
11. Sanen sinmabi 1914, antoran ebento so agawan nisiglaot ed Panarian?
11 Singa nisipan, si Jesus so nantultuloy a kaiba iray tuan babangatan to ed loob na saray siglo ya anggad natan. Diad sarayan kaunoran ya agew, sikato so siaaligwas ya angiter ed sikara na pakatalos, tan sikara met so ginawa ton responsabli parad panangusar na ondaraak a liwaway katuaan. (Lucas 19:11-15, 26) Nen 1914, ginmapon niparungtal iray ebento na Panarian a mapmaples tan bigbigla. Diad satan a taon et aglambengat “nianak” so abayag lan iilaloan a kagawa na Panarian noagta say “konklusyon na say sistema na bengabengetla” so ginmapo. (Apocalipsis 11:15; 12:5, 10; Daniel 7:13, 14, 27) Saray tuan Kristiano, diad impakatebek ed kabaliksan na saray peles ya ebento, so angipakurang na sankabalgan a panagpulong na Panarian tan panagbangat a kampanya diad awaran. Impasakbay nen Jesus iya, ya angikuan: “Sayan maong a balita na say panarian so nipulong ed amin a panaayaman a dalin ya onkanan pantasi parad amin a nasyones, tan insan onsabi so anggaan.”—Mateo 24:14.
12. (a) Anto so resulta na malaknab a modernon-agew a panagtasi Panarian? (b) Diad sayan manduaruwan mundo, anton kapeligroan so niiyan ed saray Kristiano?
12 Sayan malaknab a pantasi Panarian so makakasabi la natan ed masulok a 230 a daldalin. Walalay, masulok a limaran milyon a tuan babangatan a mibibiang ed sayan kimey, tan siansian wala niray natitipon. Balet no ikompara tayo so bilang na babangatan ed manaayam na dalin a 5.6 bilyon, mapatnag a singa ed agew nen Jesus, maslak ed katooan so ag ‘makakaalay talos’ na Panarian. Dakel, a singa nipasakbay, so manludlurey tan mankuan: “Iner so kwalaan na satan a nisipan a kiwawala to?” (2 Pedro 3:3, 4) Say kapeligroan parad sikatayon Kristiano et saray totoo ed sayan mundo so agmananginenen, manduaruwa, walaay materyalistikon awawey a nayarin kalkalnan mangapekta ed panmoria tayo ed saray pribilihyo ed Panarian. Lapud aliber na totoo na sayan mundo, sikatayo so mainomay a tuloy ya onggapon mangadapta ed pigaran awawey tan agagamil da. Agaylan makana sirin so “pakala ed talos” na Panarian na Dios tan benbenan a malet itan!
Panangusisa ed Inkasikatayo Nipaakar ed Panarian
13. No nipaakar ed ganggan a panpulong na maong a balita na Panarian, panon tayon nasubok no kasin sikatayo so mantultuloy ya ‘onderengel’ tekep na pakatebek?
13 Oniay inkuan nen Jesus nipaakar ed panaganin panaon a panbibilayan tayo: “Ibaki na say Anak na too iray anghel to, tan tiponen da ira ed say panarian to so amin a bengatlan pakagapolan tan saray totoon manggagawa na kaugsan . . . Diad satan a panaon saray matunong so onsinag a masmasnag a singa agew diad say panarian na Ama ra. Say walaan komon na layag so ontalineng.” (Mateo 13:41, 43) Kasin sika so mantultuloy ya ‘onderengel’ tekep na matulok ya ikikiwas ed ganggan ya ipulong so Panarian tan manggaway babangatan? Tandaan, “say nitanem ed mabunan dalin” so ‘dinmengel na salita tan nala to so kabaliksan na satan’ tan amawala na maong a bunga.—Mateo 13:23.
14. Sano niiter so instruksion, panon tayon nipanengneng a sikatayo so ‘makakaala ed talos’ na konsehon niiter?
14 Sano personal a manaaral tan onaatendi ed saray Kristianon miting, kaukolan tayon ‘ikiling so kapusoan tayo ed pakatebek.’ (Uliran 2:1-4) Sano niiiter so konseho nipaakar ed kondukta, panagkawes, musika, tan panligliwaan, nepeg tayon abuloyan itan ya ontanek ed kapusoan tayo tan mamakiwas ed sikatayon manggawa na antokaman iran nakakaukolan a pananguman. Agbalot ikakatunongan, manbabaraan, odino andi et onsaew ya onkiwas. No say Panarian so peteg ed bilay tayo, manbilay itayo unong ed saray estandarte to tan siseseseg ya iproklama itan ed arum. Inkuan nen Jesus: “Aliwan balang mangikuan ed siak, ‘Katawan, Katawan,’ so makaloob ed panarian na katawenan, noagta say manggagawa na linawa na Amak a wala ed katawenan.”—Mateo 7:21-23.
15. Akin ya importanti so ‘pananap nin unona ed panarian tan say inkatunong na Dios’?
15 Say tendensya na too et say pagmaliw a mapaga ed nakakaukolan a tagano, kawesen, tan siroman, balet inkuan nen Jesus: “Itultuloy yo, sirin, ya unonan anapen so panarian tan say inkatunong to [Dios], tan amin na sarayan arum a bengabengatla so niarum ed sikayo.” (Mateo 6:33, 34) Diad panangiyuna na prayoridad, iyunam so Panarian ed bilay mo. Pansiansiaen a simpli so panagbilay mo, a napepenek ed saray nesisita. Andi-kakanaan so pamenek ed bilay tayo na agnakakaukolan iran kimey tan panangamor, anganko mangikakatunongan a say panggawa ed saya et naabobonan, lapud sarayan bengatla so agkapilitan ed inkasikaran dili. Manwarin satan so tua, anto ta so gawaen na panangamor tan panangusar ed saratan ya agnakakaukolan a bengatla ed panangiyeskedyul tayo na personal a panagaral, iyaatendi ed saray Kristianon miting, tan pibibiang ed panagpulong? Inkuan nen Jesus a say Panarian so singa sakey a managtagilako ya akaromog na sakey a “perlas na atagey a balor [tan] tinmaynan tan tamtampol ton inlako so amin a bengabengatlan wala ed sikato tan sinaliw to itan.” (Mateo 13:45, 46) Onia so nepeg a liknaan tayo nipaakar ed Panarian na Dios. Kaukolan tayon aligen si Pablo aliwan si Demas, ya angikaindan ed ministeryo “lapud inad-aro to so peles a sistema na bengabengatla.”—2 Timoteo 4:10, 18; Mateo 19:23, 24; Filipos 3:7, 8, 13, 14; 1 Timoteo 6:9, 10, 17-19.
‘Agtawiren na Agmatunong a Totoo so Panarian na Dios’
16. Panon a say ‘pakala ed talos’ na Panarian na Dios so ontulong ed sikatayon paliisay mauges a kondukta?
16 Sanen papaulyanan na kongregasyon ed Corinto so imoralidad, diretsaan ya inkuan nen Pablo: “Anto! Agyo ta amta a say agmatunong a totoo so agmakatawir ed panarian na Dios? Agkayo papapalikdo. Anggan saray managlawan, nisay managtalintao, nisay managkalugoran, nisay lalakin mansiasiansia parad agkasiporan a gagala, nisay lalakin miaakdol ed kapara ran lalaki, nisay managtakew, nisay maagum iran totoo, nisay managbuanges, nisay managpabaing, nisay managketang so agmakatawir na panariay Dios.” (1 Corinto 6:9, 10) No “naala so talos na” Panarian na Dios, agtayo palikdoen so inkasikatayo diad panisip a paulyanan nen Jehova so sakey a pormay imoralidad basta nanenengneng to itayon okupado ed Kristianon serbisyo. Say inkarutak so agni ingen nepeg a salambiten ed limog tayo. (Efeso 5:3-5) Kasin naiimanom a pigara ed marutak a kanonotan na sayan mundo odino agagamil so onloloob ed bilay mo? Pakseten a tampol itan ed bilay mo! Say Panarian so mablin tuloy a nabalang lapu labat ed saratan a bengatla.—Marcos 9:47.
17. Diad antoran dalan a say apresasyon parad Panarian na Dios so mangiyalibansa na inkamapaabeba tan mangekal ed kagapolan?
17 Intepet na babangatan nen Jesus: “Siopa so talagan sankabalgan ed panarian na katawenan?” Inmebat si Jesus diad impangiyan na sakey ya ugaw ed leet da tan inkuan: “Matuan ibagak ed sikayo, Likud no say sakey so ompawil tan magmaliw a singa melag ya ugaw, agkayon balot makaloob ed panarian na katawenan. Sirin, siopaman a manpaabeba a singa sayan melag ya ugaw et satan so sankabalgan ed panarian na katawenan.” (Mateo 18:1-6) Saray malastog, manari-arian, agmaasikaso, tan mauges so agmakaloob ed Panarian na Dios, nisay sikaray magmaliw a sakop na say Panarian. Say panangarom ta ed agagim, say inkamapaabeba, say maridios a takot mo, so mamapakiwas ed sikan paliisay pakapangigapol ed arum lapud konduktam? Odino kasin ipilit mo “iray kanepegan” mo anggan mangapekta’d arum so awawey tan konduktam?—Roma 14:13, 17.
18. Anto so resulta na katutulok na katooan sano say Panarian na Dios so pansengegan na kagawa na linawa To “a singa diad tawen, ontan met diad dalin”?
18 Say mangatatawen ya Ama tayo, si Jehova, so asingger lan sigpot a mangebat ed masimoon a pikakasi tayo: “Onsabi pa komon so panarian mo. Nagawa komon so linawam, a singa diad tawen, ontan met diad dalin.” Asingger lan tuloy a say manguuley ya Ari, si Jesu-Kristo, so onsabi diad pantalos ya onyurong ed trono to parad panangukom, pian panbibiiganen ‘iray karnero’ manlapud “saray kanding.” Diad aturon panaon, “ikuan na say ari ed saramay walad nikawanan to, ‘Galidia, sikayoran benendisyonan nen Amak, tawiren yo so panarian a niparaan ed sikayo manlapu lad inkiletneg na mundo.’” Saray kanding so “mansumpal ed andi-anggaan a kapegpeg, balet saray matunong diad andi-anggaan a bilay.” (Mateo 6:10; 25:31-34, 36) “Say baleg a kairapan” so mangekal ed daan a sistema tan amin ya angipulisay a ‘makala ed talos na’ say Panarian. Balet say minilyon ya akaliktar ed “baleg a kairapan” tan say binilyon a napaoli so manawir ed saray bendisyon na Panarian ya anggapoy anggaan diad nipawil a mangaraldalin a Paraiso. (Apocalipsis 7:14) Say Panarian so balon gobierno ed dalin, manguuley manlapud katawenan. Satan so manumpal ed kakompleto ed gagala nen Jehova parad dalin tan say katooan, amin so diad kapasantos ed sankasantosan a ngaran to. Agta satan so sakey a tawir a makanan pansagpotan, pansakripisyoan, tan panalagaran? Oniay kaukolan a kabaliksan to ed sikatayo na “pakala ed talos” na Panarian!
Panon so Pangebat Yo?
◻ Anto so Panarian na Dios?
◻ Akin a maslak ed saray onderengel ed si Jesus so ag ‘akala ed talos’ na say Panarian?
◻ Panon a say ‘pakala ed talos’ na say Panarian so mangitarok na saray bendisyon tan responsabilidad?
◻ No nipaakar ed panagpulong, anto so mangipapanengneng no kasin ‘nala tayo so talos’ na Panarian?
◻ Panon tayon nipanengneng diad kondukta tayo a ‘nala tayo so talos’ na konsehon niiter?
[Saray litrato ed pahina 17]
Saray babangatan nen Jesus et ‘nala ra so talos’ na Panarian tan amawala na maong a bunga