No Antoy Imbangat nen Jesus Nipaakar ed Panarian na Dios

“Sikatoy linma ed saray syudad tan ed saray baryo, ya impupulong . . . to so maong a balita na panarian na Dios.”​—LUCAS 8:1.

LABALABAY tayon itongtong ed arum iray importante ed sikatayo, salanti, saray bengatlan papablien tayo. Singa inkuan nen Jesus a mismo: “No anto so daakan a walad puso, satan so ibabalikas na sangi.” (Mateo 12:34) No imanoen tayoy intongtong nen Jesus legan na ministeryo to, nibaga tayon papablien toy Panarian na Dios.

Anto so Panarian na Dios? Say panarian et sakey a gobierno ya uuleyan na ari. Kanian say Panarian na Dios et sakey a gobierno ya inletneg na Dios. Lanang ya itotongtong nen Jesus so nipaakar ed Panarian na Dios kanian saya so tema na mensahe to. Sayan Panarian et tinukoy ed apatiran Ebanghelyo diad masulok a 110 a beses. Balet ag-angangga labat ed salita so impanbangat nen Jesus. Diad saray ginawa to et dakel so naaralan tayo nipaakar ed Panarian na Dios tan no antoy gawaen na satan diad arapen.

Siopay magmaliw ya Ari? Say nampili ed magmaliw ya Ari ed Panarian na Dios et aliwan saray totoo noagta say Dios a mismo. Tan sanen manbabangat si Jesus, impaamta to a sikato imay pinili na Dios pian magmaliw ya Ari.

Amta nen Jesus a nipropesiya’d Biblia a say insipan a Mesias et manuley ed Panarian ya agmangangga. (2 Samuel 7:12-14; Daniel 7:13, 14; Mateo 26:63, 64) Tandaan ya imbaga nen Jesus ed totoo a sikato imay nipasakbay a Mesias. Kanian bibidbiren to a sikato so Arin pinili na Dios. (Juan 4:25, 26) Duga labat sirin so aminpigapigan impangusar nen Jesus ed salitan “panarian ko.”​—Juan 18:36.

Imbangat met nen Jesus a walaray nakaiba ton manuley ed Panarian. (Lucas 22:28-30) Tinawag to ra a “melag a pulok” ta limitado labat so bilang da. Inkuan to ed sikara: “Inabobonan la na Ama yo so pangiter ed sikayo na panarian.” (Lucas 12:32) Ipapanengneng na unor a libro na Biblia a walay 144,000 ya apribilehyoan a manuley a kaiba nen Kristo.​—Apocalipsis 5:9, 10; 14:1.

Iner so kawalaan na Panarian? “Say panarian ko et agkabiangan na sayan mundo,” so inkuan nen Jesus ed Romanon manuley a si Poncio Pilato. (Juan 18:36) Say Panarian na Dios ya uleyan nen Kristo et ag-irepresenta na totoo diad dalin. Aminpigan tinukoy nen Jesus so Panarian na Dios bilang “panarian na katawenan.”a (Mateo 4:17; 5:3, 10, 19, 20) Sirin, say Panarian na Dios et sakey a gobiernon walad tawen.

Iilaloan nen Jesus a sikatoy ompawil ed tawen kayari na pambilay to diad dalin. Inkuan to a sikatoy “mangiparaan na sakey a pasen,” pian makaonla met diman iramay kaiba ton manuley.​—Juan 14:2, 3.

Anto so sumpalen na Panarian? Imbangat nen Jesus iray totoo ya oniay ipikasi ra ed Dios: “Onsabi komon so panarian mo. Nagawa komon so linawam, a singa ed tawen, ontan met diad dalin.” (Mateo 6:9, 10) Say linaway Dios et nagagawa la’d tawen. Tan say gagala to diad dalin et nagawa met diad panamegley na Panarian. Pian nasumpal itan, walaray baleg a pananguman a gawaen na Panarian diad dalin.

Anto so gawaen na Panarian diad dalin? Imbangat nen Jesus ya ekalen na Panarian na Dios so kaugsan diad paneral to’d saramay manggagawa na mauges. (Mateo 25:31-34, 46) Labay ton ibaga sirin a mangangga lan amin so klase na kaugsan. Imbangat nen Jesus a say dalin et panayaman na saray totoon “mauyamo,” matunong, mapangasi, “malinis so puso ra,” tan mareen.​—Mateo 5:5-9.

Kasin say planetan panayaman na saray matoor et napnoy polusyon? Siempre andi! Insipan nen Jesus a diad uley na Panarian na Dios et nagawa iray alay-abig a pananguman diad dalin. Oniay inkuan na samay lakin akapasak a kaiba nen Jesus: “Jesus, nonot mo ak sano onsabi ka ed panarian mo.” Inkuan nen Jesus ed sikato: “Tua ibagak ed sika natan, Nakaiba ta ka ed Paraiso.” (Lucas 23:42, 43) On, diad panamegley na Panarian na Dios, say interon dalin et magmaliw a paraiso​—a mipadpara ed samay hardin na Eden.

Anto ni gawaen na Panarian parad katooan? Aglabat insipan nen Jesus no antoy gawaen na Panarian na Dios noagta impanengneng to met itan. Sikatoy mamilagron amaabig na dakel a sakit, a diad saman et impatnag toy mas malaknab a gawaen to ed arapen legan na panuuley to ed Panarian. Oniay inkuan na pinuyanan ya Ebanghelyo nipaakar ed si Jesus: “Niliber to so interon Galilea, a nambabangat ed saray sinagoga ra tan impupulong to so maong a balita na panarian tan pinapaabig to so amin a klase na sakit tan amin a klase na beblay na totoo.”​—Mateo 4:23.

Nanduruman sakit so pinaabig nen Jesus. “Nilukasan toy mata na sakey a nianak a bulag.” (Juan 9:1-7, 32, 33) Inmabig so sakey a lakin walaay makapadimlan sakit a kating sanen diniwit nen Jesus. (Marcos 1:40-42) Nen inyakar da ed sikato so “sakey a lakin telek tan naiirapan a mansalita,” impanengneng nen Jesus a sarag ton paabigen iray telek tan emel.​—Marcos 7:31-37.

Say Arin pinili na Dios et walaay pakapanyarin mamaandi ed ipapatey. Nabasa tayoy taloran inkagawa a binilay nen Jesus iray inatey. Pinaoli to so saksakey ya anak a laki na balon bii, tan samay 12 años a bii, ontan met ed maapit a kaaro ton si Lazaro.​—Lucas 7:11-15; 8:41-55; Juan 11:38-44.

Diad impaneskribe to ed alay-abig ya ilalo na saray uleyan na Panarian na Dios, oniay inkuan nen Jesus diad panamegley nen apostol Juan: “Nia! Say tolda na Dios et walad katooan, tan sikatoy miayam ed sikara, tan magmaliw iran totoo to. Tan say Dios a mismo et niwala ed sikara. Tan punasen to so amin a lua ed kamataan da, tan anggapo lay ipapatey, tan anggapo met lay panermen tan pannangis tan ot-ot. Saray datin bengatla et linmabas la.” (Apocalipsis 1:1; 21:3, 4) Isipen pa​—sakey a mundon anggapo lay lua lapud ermen, anggapo met lay ot-ot, pati ipapatey! Insan say pikakasi a nagawa la komon diad dalin so linaway Dios a singa met ed tawen et sigpot lan nagawa.

Kapigan so isabi na Panarian na Dios? Imbangat nen Jesus a say panuley to bilang ari et onggapo ed sakey a makatantandan peryodo na panaon a tinawag a ‘kiwawala’ to. Detalyadon impropesiya nen Jesus no kapigan so igapoy kiwawala to sano manuley la bilang ari. Diad sayan peryodo na panaon et mapatpatnag iray problema’d sankamundoan, a singa saray guerra, eras, yegyeg, salot, tan onloloor a kaugsan. (Mateo 24:3, 7-12; Lucas 21:10, 11) Saraya tan arum ni ran nagagawa ya impropesiya nen Jesus et nagkalalon sankaimano manlapu la nen 1914, say taon ya agawa so unaan a Sankamundoan a Guerra. Sirin, si Jesus et manuuley la natan bilang Ari. Agmanbayag et onsabi lay Panarian tan nagawa la diad dalin so linaway Dios.b

Panon kan nagunggonaan a mismo ed isabi na Panarian na Dios? Akadepende itan no panon kan onkiwas ed mensahe nen Jesus.

[Saray paimano ed leksab]