No Antoy Tua Nipaakar ed Panarian na Dios
Imbangat nen Jesus iray patumbok to ya manpikasi: “Ama mi a walad tawen, napasanto komon so ngaran mo. Onsabi la komon so Panarian mo. Nagawa komon so linawam, a singa ed tawen, ontan met diad dalin.” (Mateo 6:9, 10) Anto so Panarian na Dios? Antoy gawaen na satan? Tan akin ya kaukolan tayon ipikasi itan?
Si Jesus so Ari na Panarian na Dios.
Lucas 1:31-33: “Sikatoy ngaranan mo na Jesus. Sikatoy magmaliw ya importante tan natawag ya Anak na Sankatagyan, tan iter nen Jehova a Dios ed sikato so trono nen David ya ama to, tan sikatoy manuley ya andi-anggaan bilang Ari ed sankaabungan nen Jacob, tan agmangangga so Panarian to.”
Say Panarian so manunan tema ya impulong nen Jesus.
Mateo 9:35: “Tan niliber nen Jesus so amin a syudad tan baryo, a nambabangat ed saray sinagoga ra tan impupulong to so maong a balita na panarian tan pinapaabig to so amin a klase na sakit tan amin a klase na beblay.”
Inikdan nen Jesus iray disipulo to na tanda pian naamtaan da no kapigan so isabi na Panarian.
Mateo 24:7: “Ta manlalaban iray bansa ontan met ed saray panarian, tan wala ray eras tan yegyeg ed nanduruman pasen.”
Diad interon mundo, ipupulong na saray disipulo nen Jesus so nipaakar ed Panarian.
Mateo 24:14: “Tan sayan maong a balita na Panarian et nipulong ed interon dalin bilang pantasi ed amin a nasyon, insan onsabi so anggaan.”