‘Say Matoor ya Aripen’ tan Say Mananguley ya Ulop To
“Siopa a peteg so matoor tan makabat ya aripen a tinuro na katawan ton mangasikaso ed sankaabungan to, pian iter to ed sikara so tagano ra ed manepeg a panaon?”—MATEO 24:45.
1. Akin a si Jehova so mabulos a mangipulin ed autoridad, tan diad siopa so manunan nanggawaan to na ontan?
SI Jehova so sakey a Dios na oksuy. Sikato met so Sengegan na amin a lehitimon autoridad. Matalek ed katooran to ed saray matoor a pinalsa to, si Jehova so mabulos a mangipulin ed autoridad. Say sakey ya angipulinan to ed baleg ya autoridad et say Anak to, si Jesu-Kristo. Peteg, “impauleyan [na Dios] so amin a bengatla ed leksab na sali to, tan sikato so ginawa ton ulo na amin a bengatla ed kongregasyon.”—Efeso 1:22.
2. Anto so impanawag nen Pablo ed Kristianon kongregasyon, tan diad siopa so angipulinan nen Kristo na autoridad?
2 Tinawag nen apostol Pablo so Kristianon kongregasyon a “sankaabungan na Dios” tan inkuanton say matoor ya Anak nen Jehova, si Jesu-Kristo, so impasen ya ulo ed sayan sankaabungan. (1 Timoteo 3:15; Hebreos 3:6) Insan, si Kristo so angipulin na autoridad ed saray membro na sankaabungan na Dios. Saya so nanengneng tayo diad saray salita nen Jesus a nikurit ed Mateo 24:45-47. Inkuanto: “Siopa a peteg so matoor tan makabat ya aripen a tinuro na katawan ton mangasikaso ed sankaabungan to, pian iter ed sikara so tagano ra ed manepeg a panaon? Maliket itan ya aripen a diad isabi to et naromog ton sikato so manggagawa na ontan. Tua kuan ko ed sikayo, Sikato so turoen ton mangasikaso ed amin na saray kayarian to.”
Say Inmunan-Siglon Manedyer na Abung
3. Siopa so manibukel “na matoor tan makabat ya aripen,” tan anton termino so niyaplika ed sikara bilang sinansakey?
3 Manlapud maalwar a panagaral ed Kasulatan, amta tayo a saray nilanaan-na-espiritun membro na sankaabungan na Dios ed anggan anton niiter a panaon et kolektibon manibukel “na matoor tan makabat ya aripen,” “mayordumo,” odino “manedyer na abung.” Sinansakey, sarayan membro na sankaabungan nen Jehova so nibagan “sankaabungan” odino “ulop na saray katambayan.”—Mateo 24:45; Lucas 12:42; Reference Bible, paimanod-leksab.
4. Agnambayag kayari na impatey to, anton tepet so pinalesa nen Jesus, tan diad siopa so angiparengan to ed inkasikato?
4 Pigaran bulan ed sakbay na impatey to, sayan tepet so pinalesa nen Jesus, nikurit ed Lucas 12:42: “Siopa a peteg so matoor a mayordumo, say sakey a makabat, a turoen na katawan ton mangasikaso ed ulop na saray katambayan to a mantultuloy ya ikdan ira na sukat ya abaston tagano ra ed manepeg a panaon?” Insan, pigaran agew ed sakbay ya impatey to, impara nen Jesus so inkasikato ed sakey a lakin manbiahe ed arawi, a tinawag toray ariripen to tan impudir to ed sikara so kaykayarian to.—Mateo 25:14.
5. (a) Kapigan so impangipabtang nen Jesus ed arum a mangasikaso ed saray kayarian to? (b) Anton ninatnat a kimey so inter nen Kristo ed saraman so magmaliw a kabiangan na atugyop a manedyer na abung?
5 Kapigan so impangipabtang nen Jesus ed arum a mangasikaso ed saray kayarian to? Saya so agawa ed kayari na inkioli to. Diad saray kabisadon salita to a naromog ed Mateo 28:19, 20, inmunan inikdan nen Kristo iraman so magmaliw a kabiangan na manugyop na manedyer to ed abung na ninatnat a kimey na panagbangat tan panaggawa na babangatan. Diad sinansakey a panagtasi “ed sankaarawian a pasen na dalin,” saray katambayan so mangilaknab ed misioneron lawak ya inggapo nen Jesus a bayuboan legan na mangaraldalin a ministeryo to. (Gawa 1:8) Saya so anaglawi ed inkiwas da a bilang “embahadores a kasandi nen Kristo.” Bilang “mayordumo na saray sagradon sekreto na Dios,” sikara so manggawa na babangatan tan iparungo ra so espiritual a tagano ed sikara.—2 Corinto 5:20; 1 Corinto 4:1, 2.
Say Mananguley ya Ulop na Sankaabungan
6. Anto so madibinon akapuyanan na inmunan-siglon mayordumon klase ya itarya?
6 Atugyop, saray nilanaan-na-espiritun Kristianos so magmaliw a mayordumo na katawan, odino manedyer na abung, a niganggan a mangiparungo na nipanpanaon a taganon espiritual ed saray sinansakey a membro na sankaabungan na Dios. Diad baetan na saray taon 41 K.P. tan 98 K.P., saray membro na inmunan-siglon mayordumon klase so madibinon apuyanan a mangisulat na 5 maawaran a salaysay, 21 sulat, tan say libro na Apocalipsis diad pakagunggunaan na agagi ra. Sarayan apuyanan a sulsulat so nankarga na maabig a taganon espiritual a para ed sankaabungan, salanti, saray sinansakey ya alanaan ed sankaabungan na Dios.
7. Nipaakar ed anton gagala a pinili nen Kristo so melag a bilang na lalaki a nanlapud aripen a klase?
7 Manwarin amin na saray alanaan a Kristianos so kolektibon manibukel na sankaabungan na Dios, wala so daakan ya ebidensyan si Kristo so amili na melag a bilang na lalaki a nanlapud aripen a klase pian manlingkor a bilang nanengneng a mananguley ya ulop. Say asakbay ya awaran na kongregasyon so mangipanengneng a saray 12 apostoles, a pati si Matias, so pundasyon na inmunan-siglon mananguley ya ulop. Iter ed sikatayo na Gawa 1:20-26 so pamidbiran ed saya. Misiglaotan ed inkasandian nen Judas Iscariote, agawa so impanukoy ed “inkabetang to a panangasikaso” tan diad “sayan ministeryo tan inkaapostol.”
8. Anto so isakup na saray responsabilidad na inmunan-siglon mananguley ya ulop?
8 Say ontan ya inkabetang na panangasikaso so angisakup ed responsabilidad na saray apostol a manuro ed saray makanepegan a lalaki diad saray posisyon na serbisyo tan mangorganisa ed ministeryo. Balet ta nankabaliksan ni na malaem. Sinaglawi to met so panagbangat tan panamalinew ed saray punto na doktrina. Asumpal so sipan nen Jesus a nikurit ed Juan 16:13, “say espiritu na katuaan” so mangiwanwan ed Kristianon kongregasyon a progresibo ed amin a katuaan. Nanlapud mismon gapo, saramay angabrasa ed salita tan abautismoan, alanaan a Kristianos so nantultuloy a mangidedeboto na inkasikara “diad bangat na saray apostoles.” Diad tua, say rason no akin a pitoran nirekomendan lalaki so aturo ed saray nakakaukolan a kimey diad panangibunog ed materyal a tagano et ta pian “say labindua” so makapansiansian bulos a ‘mangideboto na inkasikara ed pikakasi tan diad ministeryo na salita.’—Gawa 2:42; 6:1-6.
9. Panon inkakesayan na inmunan mananguley ya ulop ed 11 a membro, balet akin a mapatnag a say bilang so agtampol ya apapawil ed 12?
9 Ompatnag a diad gapo et say mananguley ya ulop so tinibukel a sigpot na saray apostoles nen Jesus. Balet kasin mansiansian ontan? Diad ngalngalin taon 44 K.P., si apostol Santiago, ya agi nen Juan, so impapatey nen Herodes Agrippa I. (Gawa 12:1, 2) Mapatnag ya anggapoy sagpot a ginawa diad impanalat ed sikato bilang apostol, a singa ginawa ed kipapasen nen Judas. Akin ya andi? Anggapoy duaruwan saya so lapud si Santiago so inatey a matoor, say inmuna ed saray 12 apostoles ya inatey. Diad biek a dapag, si Judas so marelmeng a sinmuawi tan nepeg a sandian ta pian ompawil a 12 so bilang na pundasyon a bato na espiritual ya Israel.—Efeso 2:20; Apocalipsis 21:14.
10. Kapigan tan panon so inkilaknab na inmunan-siglon mananguley ya ulop, tan panon so impangusar nen Kristo ed satan a mangiwanwan ed sankaabungan na Dios?
10 Say orihinal a membro na inmunan-siglon mananguley ya ulop so apostoles, lalakin akipanakar ed si Jesus tan tastasi na impatey tan inkioli to. (Gawa 1:21, 22) Balet sayan kipapasen so manguman. Diad inlabas na saray taon, arum a Kristianon lalaki so akagamor na espiritual a talindeg tan aturo a bilang mamatatken ed kongregasyon diad Jerusalem. Diad taon 49 K.P. ed sankaganoan, say mananguley ya ulop so ninatnat a mangisakup ya aliwa lambengat ed saray nakekeraan ya apostoles noagta ontan met ed sakey a bilang na arum a mamatatken ed Jerusalem. (Gawa 15:2) Sirin say inkatibukel na mananguley ya ulop so aliwan mapeget a nipiho, noagta mapatnag a say Dios so angigiya ed saray bengatlan ta pian anguman ya onnepeg ed saray sirkumstansya na totoo to. Si Kristo, say aktibon Ulo na kongregasyon, so angusar ed sayan apalaknab a mananguley ya ulop diad panguksoy ed importantin pamaakaran na doktrina ed kagalsiman na saray aliwan-Judion Kristianos tan onsuko ed Ganggan nen Moises. Say mananguley ya ulop so nansulat a mangipapaliwawa ed desisyon to tan angipaakseb na saray geter na pananumpal.—Gawa 15:23-29.
Sakey a Panaon na Pipapalinewan ed Manedyer na Abung
11. Kasin say mapekder a panangipangulon inletneg na mananguley ya ulop so inapresya na agagi, tan anto so mangipanengneng a sayan oksuyan so binendisyonan nen Jehova?
11 Sinansakey tan bilang saray kongregasyon, saray inmunan Kristianos so angapresya ed sayan mabiskeg a panangipangulon inter na mananguley ya ulop. Kayari impamasa na kongregasyon ed Sirianon Antikia ed sulat a nanlapud mananguley ya ulop, sikara so nanliket ed panamaseseg. Legan ya arum iran kongregasyon so akaawat ed impormasyon tan anumpal ed saray geter, sikara so “nantultuloy ya apabiskeg ed pananisia tan dinmaak ed bilang ya inagew-agew.” (Gawa 16:5) Mapatnag, sayan oksuyan so binendisyonan na Dios.—Gawa 15:30, 31.
12, 13. Antoran agawgawa so impasakbay nen Jesus ed saray parabolo to ed mina tan saray talento?
12 Balet sikatayo pa so onnengneng ed sananey ya aspekto na sayan makatantandan pamaakaran. Diad ilustrasyon to ed saray mina, impareng nen Jesus so inkasikato ed sakey a lakin magalang ed inkianak a nambiahe ed arawin dalin pian mangiligen na maarin pakayari ed inkasikato tan insan ompawil. (Lucas 19:11, 12) Bilang nansumpalan na inkioli to nen 33 K.P., si Jesu-Kristo so nitandoro ed nikawanan na Dios, a ditan et sikato so onyurong ya anggad saray kakabusol to so nipasen a gagatinan na saray sali to.—Gawa 2:33-35.
13 Diad miparan ilustrasyon, say parabolo na saray talento, imbaga nen Jesus a kayari na andukey a panaon, say katawan so sinmabin mikuentaan ed saray ariripen to. Diad saray ariripen a nansumpal a matoor, inkuan na katawan: “Sikayo so matoor ed saray pigaran bengatla. Ipabtang ko ed sikayo so dakel iran bengatla. Onloob ed gayaga na katawan yo.” Balet nipaakar ed agmatoor ya aripen, inkuanto: “Anggan say wala ed sikato so naekal a manlapud sikato. Tan ibantak so andi-kakanaan ya aripen ed kabilungetan diad paway.”—Mateo 25:21-23, 29, 30.
14. Anto so inilaloan nen Jesus ed saray alanaan-na-espiritun ariripen to?
14 Kayari na andukey a panaon—ngalngalin 19 siglos—nipabtang ed si Kristo so maarin pakayari nen 1914, diad impanampot “na aturon panaon na nasyones.” (Lucas 21:24) Agnambayag kayari to, sikato so “sinmabi tan akikuentaan” ed saray ariripen to, saray alanaan-na-espiritun Kristianos. (Mateo 25:19) Anto so inilaloan nen Jesus ed sikara a sinansakey tan kolektibo? Say kimey na mayordumo so nantultuloy a singa kipapasen to nanlapulad inmunan siglo. Inmatalek nen Kristo iray talento ed saray sinansakey—“ed balang sakey unong ed dilin pakayari to.” Sirin, inilaloan nen Jesus so makanepegan iran resulta. (Mateo 25:15) Onaplika dia et say totontonen ed 1 Corinto 4:2, a kuanto: “Say inilaloan ed saray mayordumo et sakey a lakin naromog a matoor.” Say pamakiwas ed saray talento et kabaliksan to so sitotoor ya ikiwas a bilang embahadores na Dios, a manggawa na saray babangatan tan mangiparungo na espiritual a katuaan ed sikara.—2 Corinto 5:20.
Say “Aripen” tan Say Mananguley ya Ulop to legan a Manasingger So Panaon na Anggaan
15. (a) Anto so inilaloen nen Kristo ed atugyop a manedyer na abung? (b) Antoy mangipanengneng ya inilaloan nen Kristo so aripen a klasen manggagawa ed saya sakbay na insabi ton mangusisa ed sankaabungan to?
15 Inilaloan nen Jesus so alanaan ya ulop na Kristianos ya onkikiwas a bilang sakey a matoor a mayordumo, ya iter to ed ulop na saray katambayan to so “sukat na abasto ran tagano ed manepeg a panaon.” (Lucas 12:42) Unong ed Lucas 12:43, inkuan nen Kristo: “Maliket itan ya aripen, no diad isabi na katawan to et sikato so naromog ton manggagawa na ontan!” Ipanengneng na saya a diad arum a panaon ed sakbay na insabi nen Kristo a mikuentaan ed saray alanaan-na-espiritun ariripen to, sikara so mangipaparungo na espiritual a tagano ed saray membro na Kristianon kongregasyon, say sankaabungan na Dios. Siopa so aromog nen Kristo a manggagawa na ontan sanen sikato so pinmawil ed maarin pakayari nen 1914 tan tinmuloy a mangusisa ed abung na Dios nen 1918?—Malaquias 3:1-4; Lucas 19:12; 1 Pedro 4:17.
16. Sanen si Kristo so sinmabin mangusisa ed abung na Dios nen 1918, akin ya agto aromog iray iglesia na Kakristianoan a mangitatarya na taganon espiritual ed manepeg a panaon?
16 Legan a say andukey a panaon ya impanalagar nen Jesus ed nikawanan nen Jehova so inmasingger, nankalkalnan nagmaliw a mapatnag no siopa so mangiiter na abaston taganon espiritual ed sankaabungan nen Kristo anggan diad panaon sakbay na 1914. Isipen yo kasin saray iglesia na Kakristianoan? Peteg ya andi, lapud sikara so nikutep ya alanlanor ed saray pulitika. Sikara so nagmaliw a mabulos a kagawaan na panamalaknab na kolonya tan sinali ran palabsanan so balang sinansakey diad pamaneknek na patriotismo ra, sirin ipapaseseg da so nasyonalismo. Agnambayag a saya so angitarok na ambelat a kasalanan-ed-dala ed sikara, salanti, sanen inter da so aktibon suporta ra ed saray mapulitikan gobierno ya alanlanor ed inmunan guerra mundial. Diad espiritual, say pananisia ra so pinakapuy na Modernismo. Nitarok so krisis ed espiritual lapud dakel ed saray klero ra so nagmaliw a mainomay a biktima na atagtagey a kritisismo tan ebolusyon. Anggapo so espiritual a kapesel a nailaloan ed klero na Kakristianoan!
17. Akin ya impulisay nen Kristo so arum ed saray alanaan a Kristianos, tan diad anton nansumpalan ed sikara?
17 Miulibay, anggapo so makapesel a taganon espiritual ya ompaway a manlapud saraman so alanaan a Kristianos a lalon mapaga ed personal a kilalaban da nen say pangikurang da ed talento na Katawan. Nagmaliw iran “mangiras,” agmanepeg a mangasikaso ed saray kayarian na Katawan. Sirin, sikara so nibantak “ed kabilungetan diad paway,” a kawalaan ni na saray iglesia na Kakristianoan.—Mateo 25:24-30.
18. Siopa so aromog na Katawan a mangitatarya ed ulop na saray katambayan na taganon espiritual ed manepeg a panaon, tan anto so mamaneknek ed saya?
18 Diad insabi ton mangusisa ed saray ariripen to nen 1918, sirin, siopa so aromog na Katawan, si Jesu-Kristo, a mangiiter ed ulop na katambayan to na sukat na abasto ran tagano ed manepeg a panaon? Bueno, diad saman, siopa so angiter ed saray masimoon a manag-anap-na-katuaan na suston pakatalos ed dondon bagat, say madibinon ngaran, say agpakanengneng ed kiwawala nen Kristo, tan say kabaliksan na 1914? Siopa so angiwalwal ed katilaan na Trinidad, ag-ipapatey na toon kamarerwa, tan impiernon-apuy? Tan siopa so amasakbay ed kaatapan na ebolusyon tan espiritismo? Ipanengneng na saray katuaan a saman so grupo na saray alanaan a Kristianos a nisiglaot ed saray manangipalapag ed magasin a Zion’s Watch Tower and Herald of Christ’s Presence, a tinawag natan na The Watchtower Announcing Jehovah’s Kingdom.
19. Panoy inkipatnag na matoor ya aripen a klase sakbay na 1918, diad anton paraan a sikato so angibunog na abaston taganon espiritual, tan nanlapulad kapigan?
19 Diad paway ton Nobyembre 1, 1944, imbaga na The Watchtower: “Nen 1878, apataplon taon sakbay na insabi na Katawan ed templo nen 1918, wala so sakey a klase na masimoon iran konsagradon Kristianos a sinmian ed hierarkia tan organisasyon na klero tan inanap dan agamilen so Inkakristiano . . . Diad ontumbok a taon, salanti, nen Hulyo, 1879, a saray katuaan ya intarya na Dios ed panamegley nen Kristo a bilang ‘tagano ed manepeg a panaon’ so maparanay komon a nibunog ed amin a sankaabungan na saray konsagradon ananak, sayan magasin, The Watchtower, so ginmapon nipalapag.”
20. (a) Panoy impatnag na modernon-agew a Mananguley ya Ulop ed eksena? (b) Anto so gagawaen na saray membro na Mananguley ya Ulop, tan diad leksab na siopa panangiwanwan?
20 Diad pangiter na impormasyon ed katibukel na modernon-agew a Mananguley ya Uley, say Disyembre 15, 1971, a paway na The Watchtower so angipaliwawa: “Limaran taon ed saginonor [nen 1884] say Zion’s Watch Tower Tract Society so nainkorpora tan nanserbin bilang sakey ya ‘ahensya’ a mangiparungo na taganon espiritual ed saray nilibulibon masimoon a totoon manaanap a mangamta ed Dios tan mantalos ed Salita to . . . Saray dedikado, bautismado, alanaan a Kristianos so nisiglaot ed satan a Sosyedad diad hedkuarter to ed Pennsylvania. Balanglan wala ed Board of Directors odino andi, sikara so angisaklang ed inkasikara ed nikadkaduman kimey na ‘matoor tan makabat ya aripen’ a klase. Sikara so tinmulong diad panamakan tan panangiwanwan ed aripen a klase, tan sirin pinmatnag so sakey a mananguley ya ulop. Mapatnag a saya so walad leksab na panangiwanwan na agnanengneg ya aktibon puersa odino masanton espiritu. Ontan met, ed leksab na panangiwanwan na Ulo na Kristianon kongregasyon, si Jesu-Kristo.”
21. (a) Siopa so aromog nen Kristo a mangibubunog na taganon espiritual, tan panon so panumang to ed sikara? (b) Anto so nanalagar ed matoor ya aripen tan say Mananguley ya Ulop to?
21 Nen 1918, sanen inusisa nen Jesu-Kristo iraman so mangibabagan ariripen to, aromog to so internasyonal a grupo na saray Kristianos a mangipapalapag ed saray katuaan na Biblia ya usaren ed loob na kongregasyon tan diad paway ed kimey na panagpulong. Nen 1919 et tuan nagmaliw a singa impasakbay nen Kristo: “Maliket itan ya aripen no sikato so nasabian na katawan ton ontan so gagawaen to. Tua kuan ko ed sikayo, sikato so turoen Ton mangasikaso ed amin na saray kayarian to.” (Mateo 24:46, 47) Sarayan tuan Kristianos so linmoob ed gayaga na Katawan da. Diad impangipanengneng da na inkasikaran “matoor ed saray pigaran bengatla,” sikara so tinuro na Katawan da a mangasikaso ed “dakel a bengatla.” (Mateo 25:21) Say matoor ya aripen tan say Mananguley ya Ulop to so wala ed pasen, akaparaan a para ed apalaknab a kimey. Agaylan sikatayo so maliket a saya so ontan, lapud saray matoor a Kristianos so siyayaman a nagugunggunaan a manlapud debotadon kimey na matoor ya aripen tan say Mananguley ya Ulop to!
Saray Manunan Punton Tandaan
◻ Siopa so Ulo na sankaabungan na Dios, tan diad siopa so angipulinan na sayan Sakey na autoridad?
◻ Anton kolektibon kimey so inter nen Kristo ed aripen a klase?
◻ Anto nin arum a kolektibon ulop so wala ed dalem na aripen a klase, tan antoray partikular a kimey to?
◻ Sanen si Kristo so sinmabin mangusisa ed sankaabungan na Dios, siopa so mangitatarya na taganon espiritual ed saray membro to?
◻ Panoy impatnag na modernon-agew a Mananguley ya Ulop?
[Litrato ed pahina 8]
Say inmunan-siglon “aripen” so walaan na mananguley ya ulop a tinibukel na saray apostoles tan saray mamatatken ed kongregasyon diad Jerusalem