Talonaan na Ilalo so Inkadismaya!

DIAD Webster’s Ninth New Collegiate Dictionary, say inkadismaya so adepina bilang say “sigpot ya inkabalang na ilalo.” Malinew, sirin, ta pian natalonaan so inkadismaya, nakaukolan tayo so ilalo!

Say pakaskasin indibidual a dinagdag na pankaukolan a manbilay ed gilig na kalsada so agnadismayan sigpot no sikato so walaan na ilalo. Say ilalo so makapangiter ni ingen na tepel tan biskeg ed saramay aromogan a nagogonigon pian mansungdo. Balet say ilalo so nepeg a napanmatalkan! Anto so kabaliksan na saya?

Say Letnegan na Ilalo

Kunsideraen so agawa ed si Sara, say asawa nen patriarkan Abraham. Ngalngalin manedad la na 90, sikato so siansian lepes tan abayag lan dismayado diad pananak. Balet, sanen manedad na 99 so asawa ton laki, inolit nen Jehova so sipan a ginawa to ed apalabas laran taon​—si Abraham so peteg a nawalaan na sakey a “bini,” odino mananawir. Kabat nen Abraham a napanmatalkan iyan sipan. Isipen pa so agaylan liket nen Sara sanen, mamilagron agawa so maliket ya ebento, tan inyanak to si Isaac! (Genesis 12:2, 3; 17:1-4, 19; 21:2) Say talek nen Abraham ed Dios so ag-abalang, unong ya impaliwawa nen apostol Pablo: “Lapud sipan na Dios [si Abraham] so agnanduaruwa ed kakulangan na pananisia, noagta apabiskeg ed panamegley na pananisia to, a mangiter na gloria ed Dios.”​—Roma 4:20.

Diad impansulat ed saray Judion nagmaliw a Kristianos ed agew to, inkatunongan nen Pablo a makapanmatalek ira ed sipan na Dios a kilalaban ed panamegley nen Jesus diad duaran mabiskeg a rason. Diad impangituro ed sipan na Dios ed si Abraham tan ed madibinon samba To, insalaysay na apostol: “Nansamba so totoo ed panamegley na samay babaleg, tan say samba ra so kasumpalan na amin a suppiatan, lapud legal itan a kaletan ed sikara. Diad onian nengneng say Dios, sanen ingagala ton idemostra ed lalon daakan diad saray mananawir na sipan so agkauman na simbawa to, insalet to so samba to, ta pian, diad panamegley na duaran agnauman a bengabengatlan agnayarin pantilaan na Dios, sikami a binmatik ed salimbengan so nawalaan na mabiskeg a panamaseseg pian gamoran so ilalon niiyan ed arap mi.” (Hebreos 6:16-18) On, saray sipan na Dios so tua tan napanmatalkan. Si Jehova so makapanyarin-amin tan mogmon makapangipaseguro ed kasumpalan na dilin salita to.

Ilalo​—“Namparan Segurado tan Malet”

Insulat nen Pablo a say Kristianon ilalo so “namparan segurado tan malet.” (Hebreos 6:19) Kabat nen Pablo no iner so nilamotan na ilalo to. Ipaliwawa to: “Atan [ya ilalo] so onloob angga ed kortina.” Anto so kabaliksan na saya? Mabitar a tutukoyen nen Pablo so kadaanan a templo ed Jerusalem. Wadia so Sankasantosan a silir, a nibiig ed amin a silir diad panamegley na kortina. (Exodo 26:31, 33; Mateo 27:51) Siempre, say literal a templo ed Jerusalem so abayag lan aderal. Kanian, diad anto natan so kapetekan na sayan Sankasantosan?

Diad tawen a mismo, a nitronoan na Dios! Saya so impaliwawa nen Pablo sanen inkuanto a si Jesus kayari intokotok to so “linmoob, aliwan ed masanton pasen a ginawa na limalima [diad templo ed Jerusalem], ya aninag na kapetegan, noagta diad tawen a mismo, pian ompatnag natan ed arap na persona na Dios a parad sikatayo.” (Hebreos 9:24) Kanian say Kristianon ilalo, ya ontulong ed sikatayon mipuligesgesan sumpad inkadismaya, so agmandependi ed saray pulitiko noagta diad sakey a mangatatawen ya oksuyan. Mandependi itan ed samay Sakey a tinuro na Dios, si Jesu-Kristo, ya inter to so bilay to a bilang dondon parad saray kasalanan tayo tan onapireng la natan ed arap na Dios ed biang tayo. (1 Juan 2:1, 2) Niarum ni, unong a mabetbet a nipanengneng ed saray egpang na sayan magasin, saya met a Jesus so samay madibinon aturo a manuley bilang Ari ed mangatatawen a Panarian na Dios tan manuuley la nanlapulad 1914. Sayan mangatatawen a Panarian so maganggano lan mangekal ed saray bengatlan manadagdag ed dakel diad pakadismayaan.

Ilalo​—“Sakey a Pataga na Kamarerwa”

Pian kumbinsien iray managbasa to a say ilalo ra ed kilalaban diad panamegley nen Jesus so nilamot-a-maong, angusar si Pablo na panangiyaliling. “Sayan ilalo,” impaliwawa to, “so walad sikatayo bilang sakey a pataga na kamarerwa.”​—Hebreos 6:19.

Saray pataga so kabkabisado na saray managbaroy a singa si Pablo. Saray kadaanan a pataga so mipadparan tuloy ed saray moderno, mabetbet ya agawa ed balatyang a walaan na duaran singa-ngipen iran nguro pian ompanek ed dalem na dayat. Mamapaarap ed Roma ed ngalngalin taon 58 K.P., say barkon akaluganan nen Pablo so walad kapeligroan na isadsar. Balet unong a manasingger so barko ed ataptapew, saray managsakay so “angipelag na apatiran pataga manlapud ebet na barko.” Salamat ed saraman a pataga, say barko so aliktar ed bagyo.​—Gawa 27:29, 39, 40, 44.

Kanian, anto so nepeg yon gawaen pian napaligen so ilalo yo a singa sakey a pataga ta pian naliktaran yo so ekonomikon kairapan, pisikal o emosyonal a sakit, odino antokaman “niran bagyo” a nasagmak yo? Ununa, paseguroan so inkasikayo a saray sipan na Biblia so napanmatalkan. “Seguroen so amin a bengatla.” (1 Tesalonica 5:21) Alimbawa, sano saray Tasi nen Jehova so mitongtong ed sikayo diad ontumbok, talinengen so ibaga ra. No matalag iran ondalaw ed panaayaman yo, anapen yora ed sankaasinggeran a Kingdom Hall. Agkayo napasoot a mibiang ed sikara, balet sikayo so naimbitaan a mangawat na sakey a libren kurso ed panagaral na Biblia, a niyuksoy a gawaen ed inerman tan kapiganman a kumbiniente ed sikayo.

Say ontan a panagaral so mangipaseguro ed sikayo a say Dios so “mananumang ed saramay maseet a mananap ed sikato.” (Hebreos 11:6) Naaralan yo a say Panarian na Dios ed silong na Ari, si Kristo Jesus, so magano lan mangekal ed inkabulok tan pandurumaan a manidismaya ed dakerakel natan. Diad silong na atan a Panarian, sayan dalin so nipawil ed sakey a paraiso, tan iter na Dios so maandon bilay ed saramay mangaro ed sikato. (Salmo 37:29; Apocalipsis 21:4) Agaylan maglorian ilalo!

Basaen a maalwar so Biblia pian nengnengen a sayan ilalo so tua. Insan mankimey diad pamayubo na maapit a personal a siglaotan ed Dios, magmaliw a kaaro to a singa si Abraham. (Santiago 2:23) Lapud si Jehova et “Dumerengel na pikakasi,” ibaga ed sikato iray kapagaan yo. Sano masimoon so iyasingger yo, say pikakasi yo so ontulong a mamalemew ed saray awit yo tan manalona ed inkadismaya yo. Lukasan ni ingen na espiritu na Dios so dalan a manguman ed kipapasen a mangugonigon ed sikayo.​—Salmo 55:22; 65:2; 1 Juan 5:14, 15.

“Bembenan a Malet”!

Kayari impangirekomenda ed kapara toran patumbok a “seguroen so amin a bengatla,” inyarum nen Pablo: “Bembenan a malet so maabig.” (1 Tesalonica 5:21) Sakey a paraan diad panggawa na saya et say pilimog ed totoon mamebemben met a malet ed Kristianon ilalo. Impasakbay nen makabat ya arin Solomon: “Say miulop ed makabat a totoo so magmaliw a makabat, balet say miulop ed saray maatiw so manlikna na segsegang.” (Uliran 13:20) Agyo aabuloyan so panangiduma odino agpaborable iran liknaan a mangamper ed sikayo diad pananap na maong a pililimog. Alimbawa, diad limog na saray Tasi nen Jehova et totoon andian nensaman na ilalo. Balet say impanaral da na Biblia, tekep na maliket a pililimog ed saray kapananisiaan, so amabiskeg na siglaotan da’d si Jehova tan angiter ed sikara na napanmatalkan, singa-patagan ilalo. Peteg kasin talonaan na saya so inkadismaya? Peteg ya ontan.

Kunsideraen so kipapasen nen Annmarie, ya atalonaan na inkadismaya lapud panasagmak na maruksan tratamento ed asawa ton laki. Isalaysay to: “Denisidik a panganggaen so bilay ko, balet lapud arum a rason denisidik nin ununa so manpikasi ed Dios. Nanonotan ko so impangikuan, ‘Akin ya agmo ak natulongan? Abayag ak lan maniilalo ed sika, balet kaapaan.’ Sinampotan ko so pikakasik a sisiaen kon anggapo so gagala ed bilay, kanian magmaong no ompatey ak la. Kabekta wala so tinmoktok ed puerta. Agko inimano itan, ya ilaloan kon siopaman so wadtan et ontaynan lamlamang.

“Nantultuloy so pantoktok, tan siak so asanokan. Pinunasan koray luak tan ninengneng ko no siopa so walad puerta, ya ilaloan kon ontaynan a tampol pian nagawaan ko so ginetmak. Ingen,” inkuan nen Annmarie, “salamat ed si Jehova, aliwan ontan so agawa, lapud sanen inlukas ko so puerta, duaran bibii so wadtan ya akaalagey. Tua, nagugotgot ak a tuloy, tan agkon peteg natatalosan so ibabaga ra. Balet inopresian da ak na libron mangipaliwawa a say bilay so walaan na gagala. Atan so kaukolan kon tuloy pian parangaten lamet so interes ko ed bilay.” Inyuksoy na saray bisita to so maparanay a pangiyaral na Biblia ed sikato. Naaralan nen Annmarie so magmaliw a kaaro na Dios. Ag-abayag, saya so angiter ed sikato na gagala ed bilay. Natan et tutulongan toray arum a mamayubo na talek ed Dios.

Angangko ta inilaloan yo so pangangga na inkadismaya ya agminoria so amin a nalalanor. Balet no impikasi yo la: “Onsabi komon so panarian mo. Nagawa komon so linawam, unong diad tawen, ontan met ed dalin,” sirin impikasi yo so isabi na Panarian na Dios diad silong nen Jesu-Kristo, a mangekal na saratan a bengatlan manadagdag ed maptek-impanpuson totoo ed inkadismaya. (Mateo 6:10) Say personal a panaral yo na Biblia tan maparanay a pilimog ed saray arum a walaan met na ontan a talek so mamabiskeg ed panamemben yo na ilalo diad isabi na Panarian nen Jehova tan pangitarok na Paraiso ed dalin. (1 Timoteo 6:12, 19) Saya so maglorian ilalo ya iyaabawag na sayan magasin ed kada paway. Impapuson sayakupen so ilalo pian labanan so inkadismaya. On, say ilalo so “agmangitonton ed kadismaya.”​—Roma 5:5.

[Litrato ed pahina 7]

Say panaral na Biblia so mangiter ed sikatayo na ilalo ya onkiwas bilang “sakey a pataga na kamarerwa”