Say Bendisyon nen Jehova so Makapayaman

“Say bendicion nen Jehova makapayaman; tan ag mangarum na ermen.”​—ULIRAN 10:22.

1-3. Anggaman sinononot iray dakel nipaakar ed materyal a bengabengatla, anton katuaan so nepeg a bidbiren na amin nipaakar ed materyal a kayamanan?

ARUM a totoo so agbalot ontundan mantongtong nipaakar ed kuarta​—odino nipaakar ed kakulangan day kuarta. Makapaermen ed sikara, diad agano niran taon et dakel so kaukolan dan singbaten. Nen 1992 anggan say mayaman a Mamabukig a mundo so akaeksperiensia na inkaplag na ekonomya (recession), tan saray manedyer ontan met ed ordinaryon kumikimey so naandian na saray trabaho. Dakel so nanumameng no kasin nanengneng da ni so panaon na pirmin aligwas.

² Kasin mauges so pagmaliw a sinononot nipaakar ed materyal a pankaabiganan? Andi, diad sakey a laknab et natural lambengat itan. Ontan met, wala so letnegan a katuaan a nepeg tayon bidbiren nipaakar ed kayamanan. Peteg ya amin a materyal a bengatla so nanlapud Manamalsa. Sikato so “[tuan, NW] Dios a Jehova, . . . sikato ya angilaknab na dalin tan say ompaway ed sikato; sikato a mangiter na panlinawa na saray totoo ed tapew to, tan say espiritu ed saray manakar ed sikato.”​—Isaias 42:5.

³ Anggaman talagan ag-igagana nen Jehova no siopa so magmaliw a mayaman tan no siopa so magmaliw a duka, amin tayo so oneebat diad panguusar tayo ed antokaman a betang tayo ed “say dalin tan say ompaway ed sikato.” No sikatayo so mangusar ed kayamanan tayon mangaripen ed arum, si Jehova so mikuentaan ed sikatayo. Tan siopaman a paaripen ed kaykayamanan imbes ed si Jehova et naromog ton “say manmatalek ed saray kayamanan to napelag.” (Uliran 11:28; Mateo 6:24; 1 Timoteo 6:9) Say materyal ya aligwas ya ag-atekepan na puson pasakup ed si Jehova so peteg ya andian na balor.​—Eclesiastes 2:3-11, 18, 19; Lucas 16:9.

Say Sankaimportantian ya Aligwas

4. Akin a say espiritual ya aligwas so magmaong nen say inkadaakan ed materyal?

⁴ Niarum ni ed materyal ya aligwas et sasalitaen na Biblia so espiritual ya aligwas. Malinew a saya so magmaong a klase. (Mateo 6:19-21) Lalanoren na espiritual ya aligwas so sakey a makapenek a siglaotan ed si Jehova a mansiansian maando. (Eclesiastes 7:12) Niarum ni, saray aripen na Dios a mayaman ed espiritual so ag-onsaew ed mabunigas a materyal iran bendisyon. Diad balon mundo, say espiritual a kayamanan so nisiglaot ed materyal ya aligwas. Pangayagaan na saray matoor so materyal a sekuridad ya agnagamoran diad ampait a laslasan odino ed panangisakripisyo na bunigas tan liket, unong a mabetbet a kipapasen natan. (Salmo 72:16; Uliran 10:28; Isaias 25:6-8) Naromog da a diad amin a dalan et “say bendicion nen Jehova makapayaman; tan ag mangarum na ermen.”​—Uliran 10:22.

5. Anton sipan so inter nen Jesus nipaakar ed materyal a bengabengatla?

⁵ Anggan natan et nalilikna na saramay mamapabli ed espiritual a bengabengatla so inkaligen no nipaakar ed materyal a bengabengatla. Tua, sikaray mantatrabaho pian bayaran daray obligasyon tan napakan daray pamilya ra. Odino arum so makabalang ni ingen ed saray anapan da diad panaon na inkaplag na ekonomya. Balet sikaray agnatalonaan na saratan a kapagaan. Imbes, sisiaen da so sipan nen Jesus sanen inkuanton: “Ag kayo sirin mapaga, ya ikuanyo, Anto kasi kanen mi? ono, Anto kasi inumen mi? ono, Anto kasi pankawes mi? . . . say Ama yo’n mangatatawen amta to ya nakaokolan yo so saraya ya amin a bengatla. Ingen anapen yo ni’n onona so panarian, tan say inkatonong to; et amin iraya a bengatla niarum ira ed sikayo.”​—Mateo 6:31-33.

Espiritual a Kayamanan Natan

6, 7. (a) Deskribien iray arum a nengneng na espiritual ya aligwas ed totoo na Dios. (b) Anton propesiya so nasusumpal natan, tan antoran tepet so palesaen na saya?

⁶ Kanian, pipilien na totoo nen Jehova ya iyuna so Panarian ed saray bilay da, tan agaylan sikara so abendisyonan! Pangagayagaan da so mayaman ya itatalona ed kimey dan panaggaway babangatan. (Isaias 60:22) Sikaray ibabangat nen Jehova, a mangagayaga ed mantultuloy a daloy na maabig ya espiritual a bengabengatlan nitarok diad panamegley na “matoor tan makabat ya aripen.” (Mateo 24:45-47; Isaias 54:13) Niarum ni, say espiritu nen Jehova so walad sikara, a titibukelen ira ed sakey a magayagan internasyonal ya impanaagi.​—Salmo 133:1; Marcos 10:29, 30.

⁷ Saya so peteg ya espiritual ya aligwas, bengatlan agnasaliw na kuarta. Satan so mabitar a kasumpalan na sipan nen Jehova: “Yakar yo dia so amin a kakaplo ed kamalir, pian wala komon so tagano ed abung ko, tan salien yo ak natan ed saya, kuan nen Jehova na saray ejercito, no siak agko naani lukasan ed sikayo so saray pinto na tawen, et ikalbok naani ed sikayo so sakey a bendicion, ya angapo naani so pasen a makasarag a mangawat ed sikato.” (Malaquias 3:10) Nanenengneng tayo natan so kasumpalan na sayan sipan. Anggaman ontan, akin a si Jehova, say Subol na amin a kayamanan et mangekerew ed saray aripen ton itarok da so kakaplo? Siopa so agunggunaan ed kakaplo? Pian naebatan irayan tepet, kunsideraen no akin a sinalita nen Jehova irayan salita diad panamegley nen Malaquias diad komaliman siglo K.K.P.

Saray Kakaplo tan Yaapay

8. Unong ed Ganggan a sipanan, iner so pandependian na materyal ya aligwas na Israel?

⁸ Diad panaon nen Malaquias saray totoo na Dios so agimmaaligwas. Akin ya andi? Diad kabiangan et nisesengeg ed saray yaapay tan kakaplo. Nensaman, say Israel so nisilong ed Mosaikon Ganggan a sipanan. Sanen ginawa nen Jehova iman a sipanan, insipan to a no sumpalen na Israel so betang to ed satan, sikato so mamendisyon ed sikara diad espiritual tan materyal. Diad pansumpalan, say aligwas na Israel so mandependi ed katooran da.​—Deuteronomio 28:1-19.

9. Diad saray agew na kadaanan ya Israel, akin a kinaukolan nen Jehova so Israel a manbayar na saray kakaplo tan mangitarok na saray yaapay?

⁹ Sakey a kabiangan ed obligasyon na Israel ed silong na Ganggan et say pangitarok na yaapay ed templo tan panbayar na saray kakaplo. Arum ed yaapay so nagnap a pinoolan ed altar nen Jehova, bangta arum so inapag ed baetan na saray saserdote tan ed saramay mangisaklang na bagat, tekep na saray espesyal a kabiangan bilang yaapay parad si Jehova. (Levitico 1:3-9; 7:1-15) Nipaakar ed saray kakaplo, imbaga nen Moises ed saray Israelita: “Amin a kakaplo na dalin balang la dia ed bukebukel na dalin, odino dia ed saray bungabunga na kiew, kien nen Jehova: sikato so masantos ed kinen Jehova.” (Levitico 27:30) Say kakaplo so inter ed saray Levitan kumikimey ed tabernakulo tan ed saginonor diad templo. Insan, saray aliwan saserdoten Levita so mangiter na kakaplo ed naawat da ed saray Aaronikon saserdote. (Numeros 18:21-29) Akin a kinaukolan nen Jehova so Israel a manbayar na saray kakaplo? Ununa, ta pian nipatnag da diad nanengneng a dalan so panamabli ra ed kamaongan nen Jehova. Tan komadua, ta pian sikaray makasuporta na saray Levita, a diad ontan et niyapasakey da ed saray obligasyon da, pati ed panagbangat ed Ganggan. (2 Awaran 17:7-9) Diad sayan dalan, say puron panagdayew so asuportaan met, tan amin so agunggunaan.

10. Anto so agawa sanen say Israel so sinmaew a mangitarok na saray kakaplo tan yaapay?

¹⁰ Anggaman saray kakaplo tan yaapay so diad saginonor et inusar na saray Levita, sikaray peteg a regalo parad si Jehova tan sirin nepeg a sikaray maong ed kalidad, manepeg parad sikato. (Levitico 22:21-25) Anto so agawa sanen saray Israelita so sinmaew a mangitarok na saray kakaplo ra odino sanen intarok day abebbeban klase na yaapay? Anggapo so dusan nisulat ed Ganggan, balet walaray nansumpalan. Inekal nen Jehova so panamendisyon to, tan lapud saray Levita et naandian na materyal a suporta so anaynan ed saray kimey da ed templo ta pian suportaan day inkasikara. Kanian, amin ya Israel so nanirap.

“Iyapasakey So Puso Yo ed Saray Dalan Yo,” NW

11, 12. (a) Anto so nansumpal sanen pinaulian na Israel a tumboken so Ganggan? (b) Anton ganggan so inter nen Jehova ed Israel sanen iyan tora manlapud Babilonia?

¹¹ Legan na kursoy awaran na Israel, uliran iray arum ed impanggunaet a tumboken so Ganggan, a pati say panagbayar na saray kakaplo. (2 Awaran 31:2-16) Anggaman ontan, gendagendat a say nasyon so mapaulian. Naolit-olit a dineral day impisipanan ed si Jehova, ya anggad diad kunoran et inabuloyan toran naderal tan, nen 607 K.K.P., pian nibantak ed Babilonia.​—2 Awaran 36:15-21.

¹² Saman so mairap a disiplina, balet kayari 70 taon impawil nen Jehova so totoo to ed dilin dalin da. Dakel ed saray propesiya na Paraiso diad Isaias so walaan na inmunan kasumpalan kayari na saman ya impawil. (Isaias 35:1, 2; 52:1-9; 65:17-19) Ingen, say manunan rason ed impangipawil nen Jehova ed totoo to so aliwan say pangipaalagey na mangaraldalin a paraiso, noagta pian ipaalagey lamet so templo tan pangipawil na tuan panagdayew. (Esdras 1:2, 3) No tinmulok so Israel ed si Jehova, ontumbok iray materyal a gungguna, tan say bendisyon nen Jehova so manpayaman ed sikara diad espiritual tan materyal. Kanian, kayarin tuloy na insabi da ed dilin dalin da nen 537 K.K.P., angipaalagey iray Judio na sakey ya altar ed Jerusalem tan ginapoan [dan] gawaen so templo. Anggaman ontan, nabet da so mabiskeg ya isusumpa tan tinmunda ra. (Esdras 4:1-4, 23) Bilang nansumpalan, ag-akapangayaga so Israel ed bendisyon nen Jehova.

13, 14. (a) Anto so sinmublay sanen say Israel so sinmaew a mangipaalagey lamet ed templo? (b) Panon a say templo so diad kaunoran et nipaalagey lamet, balet antoray saginonor ya inkaplag ed biang na Israel so nireport?

¹³ Diad taon 520 K.K.P., pinatalindeg nen Jehova iray propetan Aggeo tan Zacarias pian pasesegen so Israel ya ompawil ed kimey na panangipaalagey ed templo. Impanengneng nen Aggeo a say nasyon so nanirap ed materyal tan insiglaot iya lapud kakulangan na seseg da parad abung nen Jehova. Inkuanto: “Kanian onia so kuan nen Jehova na saray ejercito: Isipen yo so saray dalan yo. Sikayo nantanem kayo na dakel, et daiset so niloob yo; mangan kayo, balet agkayo napesel; oninum kayo, balet agkayo napenek na inumen; mankawes kayo, balet angapo so salimoot; et saman so makagamor na up-upa gamoran to so up-upa, pian sikato so yan to ed supot a butbut. Onia so kuan nen Jehova na saray ejercito: Isipen [iyapasakey yo so puso, NW] yo so saray dalan yo. Ontatdang kayo ed palandey, tan mangala kayo na kiew, tan ipaalagey yo so abung; et napaliketak naani ed sikato, tan napagloriaak naani.”​—Aggeo 1:5-8.

¹⁴ Apaseseg nen Aggeo tan Zacarias, saray Israelita so angiyapasakey ed kapusoan da ed saray dalan da, tan say templo so nipaalagey. Anggaman ontan, ngalngalin 60 taon ed saginonor, binisita nen Nehemias so Jerusalem tan aromog ton nagmaliw lamet a mapaulian so Israel ed Ganggan nen Jehova. Kinorehi to iya. Balet diad komaduan imbisita, aromog ton saray bengatla so inmuges. Irereport to: “Et alikas ko a saray betang na saray Levita ag niiter ed sikara; dia ed ontan saray Levita tan saray managcanta, a nangawa ed kimey, binmatik so balang sakey ed uma to.” (Nehemias 13:10) Sayan problema so akorihe, tan “inyakar na amin a Juda so kakaplo na bukel tan say balo ya alak tan say larak ed saray panagsimpenan na kayamanan.”​—Nehemias 13:12.

Tatakewan si Jehova

15, 16. Diad antoran insaew a binaat nen Jehova so Israel diad panamegley nen Malaquias?

¹⁵ Nayarin say impangipropesiya nen Malaquias so pareho ed sayan peryodoy panaon, tan ibabaga ed sikatayo na propeta so dakel ni nipaakar ed agkatooran na Israel. Insulat toray salita nen Jehova ed Israel: “No siak sirin so ama, iner so kawalaan na kigalang ko? et no siak so manonaan iner so kawalaan na itakot ed siak? kuan nen Jehova na saray ejercito ed sikayo, O sacerdote, a manmodmora ed ngaran ko.” Anto so aliwa? Isasalaysay nen Jehova: “Et no mangibagat kayo na bulag a nipaakar a bagat, sikato so aliwan mauges! et no mangibagat kayo na piley tan mabeblay, sikato so aliwan mauges!”​—Malaquias 1:6-8.

¹⁶ Diad sayan malinew a dalan, ipapanengneng nen Malaquias ya anggaman saray Israelita so mangitatarok na saray yaapay, say makapuy a kalidad na saraya so angiwalwal ed baleg ya agpanamagalang. Insulat met nen Malaquias: “Nanlapu ed saray agew na saray atateng yo sinmipa kayo ed saray pangoksoyan ko, tan agyora inonor. Ompawil kayo ed siak, et siak ompawilak naani ed sikayo, kuan nen Jehova na saray ejercito.” Nanumameng iray Israelita no anton talaga so nepeg dan gawaen, kanian intepet da: “Ed anto so pawilan mi naani?” Inmebat si Jehova: “Say sakey a too takewan to ta so Dios? angan ontan sikayo takewan yo ak.” Panon na Israel a natakewan si Jehova, say Subol na amin a kayamanan? Inmebat si Jehova: “Ed saray kakaplo tan bagbagat.” (Malaquias 3:7, 8) On, diad isaew a pangitarok na saray kakaplo tan yaapay da, a tinakewan na Israel si Jehova!

17. Anton gagala so kanaan na saray kakaplo tan yaapay diad Israel, tan anto so insipan nen Jehova nipaakar ed saray kakaplo?

¹⁷ Ipapanengneng na maawaran ya abenegan so kaimportantian na saray kakaplo tan yaapay ed Israel. Saratan so pakapatnagan na panamabli ed biang na manangiter. Tan sinuportaan da so tuan panagdayew diad materyal a dalan. Kanian, intuloy a pinaseseg nen Jehova so Israel: “Yakar yo dia so amin a kakaplo na kamalir.” Diad pangipanengneng no anto so ontumbok no gawaen da itan, insipan nen Jehova: “Et ikalbok naani ed sikayo so sakey a bendicion, ya angapo naani so pasen a makasarag a mangawat ed sikato.” (Malaquias 3:10) Say bendisyon nen Jehova so manpayaman ed sikara.

Ukomen na “say Tuan Katawan”

18. (a) Siopa isasabi so ipapasakbay nen Jehova? (b) Kapigan a wala so isasabi ed templo, siopa so alanor, tan anto so nansumpalan parad Israel?

¹⁸ Si Jehova diad panamegley nen Malaquias so amasakbay met a sikato so onsabin mangukom ed totoo to. “Nia, ibakik so igagangan ko, et sikato iparaan to naani so dalan ed arap ko: et say Katawan ya anapen yo, onsabi naani a bigla ed templo to; et say igagangan na sipan, a sikato so pilalek yo, nia, onsabi.” (Malaquias 3:1) Kapigan a say nisipan ya isasabi ed templo so nagawa? Diad Mateo 11:10, inaon nen Jesus so propesiya nen Malaquias nipaakar ed sakey a mensaheron mangitarya ed dalan tan insiglaot to itan ed si Juan a Managbautismo. (Malaquias 4:5; Mateo 11:14) Kanian nen 29 K.P., sinmabi so panaon parad panangukom! Siopa imay komaduan mensahero, say mensahero na sipanan a mangulop ed si Jehova, “say tuan Katawan,” ed templo? Si Jesus a mismo, tan diad duaran okasyon sikato so linma ed templo diad Jerusalem tan siseseseg ton nilinisan iman, a pinataynan iray masaol a managsalat na pilak. (Marcos 11:15-17; Juan 2:14-17) Nipaakar ed sayan inmunan-siglon panaon na panangukom, mapropetikon intepet nen Jehova: “Siopa so makayari a mangitepel ed agew ya isabi to? tan siopa naani so makaalagey sano ompatnag?” (Malaquias 3:2) Diad tua, say Israel so ag-akaalagey. Sikaray inusisa, aromog a malabay, tan nen 33 K.P., sikaray inkaindan bilang pinilin nasyon nen Jehova.​—Mateo 23:37-39.

19. Diad anton dalan a sakey a nakdaan so pinmawil ed si Jehova nen inmunan siglo, tan anton bendisyon so inawat da?

¹⁹ Anggaman ontan, insulat met nen Malaquias: “Et sikato [Jehova] onyorong naani a singa say manlinis tan mangogol na pilak, et gogolan to naani so saray anak nen Levi, et linisan to ra naani a singa say balitok tan say pilak; et sikara manbagat ira naani ed Jehova na saray bagat ed inkatunong.” (Malaquias 3:3) Mitunosan ed saya, anggaman maslak ed saramay mangibabagan manlingkor ed si Jehova nen inmunan siglo so nikaindan, arum so alinisan tan linma ed si Jehova, a mangisasaklang na naabobonan iran bagat. Siopa? Saramay kinmiwas ed si Jesus, say mensahero na sipanan. Nen Pentecostes 33 K.P., 120 ed sarayan kinmiwas so nantitipon ed sakey a kuarto ed tagey diad Jerusalem. Pinabiskeg na masanton espiritu, ginapoan dan iparungtal so regalon yaapay diad inkatunong, tan tampol a dinmaak so bilang da. Ag-abayag, sikaray linmaknab ed interon Romanon Imperyo. (Gawa 2:41; 4:4; 5:14) Kanian, sakey a nakdaan so pinmawil ed si Jehova.​—Malaquias 3:7.

20. Sanen say Jerusalem tan templo to so dineral, anto so agawa ed balon Israel na Dios?

²⁰ Sayan nakdaan na Israel, ya asabin angilaktip ed sinmimit iran Hentil, a singa panangibaga, ed loob na singeg na Israel, so sakey a balon “Israel na Dios,” sakey a nasyon a tinugyop na alanaan-ed-espiritun Kristianos. (Galacia 6:16; Roma 11:17) Nen 70 K.P., sakey ya “agew . . . a mamool a singa apuy na palbaan” so sinmabi ed silalaman ya Israel sanen say Jerusalem tan say templo to so dineral na saray Romanon armada. (Malaquias 4:1; Lucas 19:41-44) Anto so agawa ed espiritual ya Israel na Dios? Impanengneng nen Jehova so “imasakit kora naani [panangabagey ed sikara, NW], singa sakey a too imasakit to so dili ya anak to a laki a manlinkor ed sikato.” (Malaquias 3:17) Say alanaan a Kristianon kongregasyon so tinmulok ed mapropetikon pasakbay nen Jesus. (Mateo 24:15, 16) Akaliktar ira, tan say bendisyon nen Jehova so nantultuloy a manpayaman ed sikara diad espiritual.

21. Antoray natitilak a tepet nipaakar ed Malaquias 3:1 tan 10?

²¹ Agaylan inkialangon nen Jehova! Anggaman ontan, panon a say Malaquias 3:1 so nasusumpal natan? Tan panon so nepeg ya ikiwas na sakey a Kristiano ed panamaseseg na Malaquias 3:10 pian itarok so amin a kakaplo ed kamalir? Saya so singbaten ed ontumbok ya artikulo.

Kasin Nisalaysay Yo?

◻ Diad kaunoran, siopa so Subol na amin a kayamanan?

◻ Akin a say espiritual ya aligwas so magmaong nen say materyal a kayamanan?

◻ Anton gagala so kanaan na saray kakaplo tan yaapay diad Israel?

◻ Kapigan a si Jehova, “say tuan Katawan,” so sinmabi ed templo pian ukomen so Israel, tan diad anton nansumpalan?

◻ Siopa so pinmawil ed si Jehova kayari insabi to ed templo to nen inmunan siglo K.P.?

[Litrato ed pahina 16]

Say mensahero na sipanan, si Jesus a mangilalaman ed si Jehova, so sinmabi ed templo pian mangukom nen inmunan siglo K.P.