Sitotoor a Manlingkor ed si Jehova
“Dia ed matoor onkiwas ka [Jehova] a matoor.”—2 SAMUEL 22:26.
1. Panon so ikikiwas nen Jehova ed saramay matoor ed sikato?
AGNABAYARAN si Jehova ed amin a gagawaen to parad totoo to. (Salmo 116:12) Agaylan makapakelaw iray espiritual tan materyal a regalo to tan matamoy a panangasi! Amta nen Arin David na kadaanan ya Israel a say Dios so onkikiwas met a matoor ed saramay matoor ed sikato. Inkuan itan nen David diad sakey a kantan tinugyop to “ed agew ya inpangilaban ed sikato nen Jehova ed lima na saray amin a kabusol to, tan ed lima nen [Arin] Saul.”—2 Samuel 22:1.
2. Antoray arum iran punton niparungtal ed kanta nen David a nirekord ed 2 Samuel kapitulo 22?
2 Inggapo nen David so kanta to (mipadpara ed Salmo 18) diad panangidayew ed si Jehova bilang “say Manangilegias” diad ebat ed pikakasi. (2 Samuel 22:2-7) Manlapud mangatatawen a templo to, kinmiwas so Dios pian iliktar so matoor ya aripen to manlapud mabiskeg iran kalaban. (2Sa 22 Bersikulo 8-19) Kanian si David so apalangkapan diad impangegemtan na maptek a kurang tan impanumbok ed saray dalan nen Jehova. (2Sa 22 Bersikulo 20-27) Saray abitla ed saginonor so saray ginawan tekep na inter-Dios a biskeg. (2Sa 22 Bersikulo 28-43) Kaunoran, insitas nen David so kililiktar manlapud pankokolkol ed baley tan manlapud saray kabusol ed arum a nasyones tan inter so pisasalamat ed si Jehova bilang say “baleg a panangilegias so initer to ed ari to, tan ipatnag to so abig na linawa ed nilanaan to.” (2Sa 22 Bersikulo 44-51) Makapangiliktar met si Jehova ed sikatayo no gegemtanen tayo so maptek a kurso tan onsaral ed sikato parad biskeg.
No Anto so Kabaliksan na Pagmaliw a Matoor
3. Manlapud Makasulatan a punto-de-bista, anto so kabaliksan na pagmaliw a matoor?
3 Say kanta nen David ed kililiktar so mangiter ed sikatayo na sayan makaligliwan panamaseguro: “Dia ed matoor onkiwas ka [Jehova] a matoor.” (2 Samuel 22:26) Saman so say Hebreon adjetivo (adjective) cha·sidhʹ a mangipanengneng ed “sakey a matoor,” odino “sakey a walaan na maaron-kaabigan.” (Salmo 18:25, paimanod leksab, NW) Say nombre (noun) cheʹsedh et isasakup to so kanonotan na kaabigan a simamaaron ompeket a bukor ed sakey a bengatla anggad say gagala to nipaakar ed satan so nasumpal. Ibabalikas nen Jehova itan a nengneng na kaabigan parad ariripen to, unong ya ibabalikas da itan parad sikato. Sayan matunong, masanton katooran so ipapatalos a “maaron-kaabigan” tan “matoor ya aro.” (Genesis 20:13; 21:23, NW) Diad Griegon Kasulatan, ipaparungtal na “katooran” so ideya na kasantosan tan kagalangan, a nibalikas ed say nombren ho·si·oʹtes tan say adjetivon hoʹsi·os. Say ontan a katooran et isasakup to so inkamatoor tan debosyon tan kabaliksan to so pagmaliw a debotado tan siaalwar a manggagawa ed amin a kimey ed Dios. Say pagmaliw a matoor ed si Jehova et kabaliksan to so pansiansia ed sikato tekep na mabiskeg a tuloy a debosyon ya onkana itan a singa mabiskeg a kula.
4. Panon a nipapanengneng so katooran nen Jehova?
4 Say mismon katooran nen Jehova so nipapanengneng ed dakel iran paraan. Alimbawa, sikato so mangidadapo na panangukom sumpad mauges lapud matoor ya aro parad totoo to tan katooran ed inkahustisya tan inkatunong. (Apocalipsis 15:3, 4; 16:5) Say katooran to ed sipanan to ed si Abraham so amakiwas ed sikaton mantepel ed saray Israelita. (2 Arari 13:23) Saraman so matoor ed Dios so makapanilalo ed tulong to diad sampot na matoor a kurso ra tan makapanseguro a sikaray nonoten to. (Salmo 37:27, 28; 97:10) Si Jesus so apabiskeg diad pikakabat a bilang “matoor” a hepe na Dios, say kamarerwa to so agnapaulian ed Sheol.—Salmo 16:10; Gawa 2:25, 27.
5. Lapud si Jehova so matoor, anto so kakaukolanen to ed ariripen to, tan antoran tepet so nepeg a kunsideraen?
5 Lapud si Jehova a Dios so matoor, kakaukolanen to so katooran na ariripen to. (Efeso 4:24) Alimbawa, nepeg a magmaliw a matoor iray lalaki pian onkualipika parad katuro bilang mamatatken ed kongregasyon. (Tito 1:8) Antoran bengatla so nepeg a mamakiwas ed totoo nen Jehova a sitotoor a manlingkor ed sikato?
Panamabli ed Saray Bengatlan Naaralan
6. Panon so nepeg a liknaan tayo nipaakar ed Makasulatan a bengabengatlan naaralan tayo, tan anto so nepeg komon a tandaan tayo nipaakar ed ontan a pikakabat?
6 Say pisasalamat parad Makasulatan iran bengatlan naaaralan tayo so nepeg a mamakiwas ed sikatayon sitotoor a manlingkor ed si Jehova. Sinimbawa nen apostol Pablo si Timoteo: “Mansiansia ka ed saray bengatla ya inaral mo tan sinisiam, ya amtam no siopa so nanaralan mo ed sikara; Tan nanlapu ed inkaugaw mo akabatan mo so saray masanto a Sulsulat, a makayari a mangawa ed sika a makabat ed kilalaban, lapu ed panamegley na pananisia ya wala ed Cristo-Jesus.” (2 Timoteo 3:14, 15) Tandaan a say ontan a pikakabat so nanlapud Dios diad panamegley na “matoor tan makabat ya aripen.”—Mateo 24:45-47.
7. Panon so nepeg a liknaan na saray mamatatken nipaakar ed espiritual a taganon intarok na Dios diad panamegley na matoor ya aripen?
7 Nagkalautlan nepeg a pablien na saray aturon mamatatken so katatagano ed espiritual ya intarok na Dios diad panamegley na matoor ya aripen. Diad apalabas iran taon, pigara ed mamatatken so kinmulang ed ontan a panamabli. Insulat na sakey a manag-imaton a “binalaw na [sarayan lalaki] iray artikulo diad Say Panag-Bantayan, ya ag-aawaten itan a bilang . . . say pangiparalanan ed katuaan na Dios, a lawas panggugunaetan ya impluensyaay arum ed panagnonot da.” Anggaman ontan, saray matoor a mamatatken so agbalot manggunaet a mangimpluensya ed arum a sumpaen so antokaman ed espiritual a taganon intarok na Dios diad panamegley na matoor ya aripen.
8. Anto no agtayo sigpot a papablien so pigaran Makasulatan a punton inparungtal na matoor tan makabat ya aripen?
8 Bilang dedikadon Tastasi nen Jehova, amin tayo so nepeg a manmatoor ed sikato tan ed organisasyon to. Agtayon balot komon sasalien so onkasipa ed makapakelaw a liwawa na Dios, manumbok ed apostatan kurang a mangitonton ed espiritual ya ipapatey natan tan diad kaunoran et kadederal. (Jeremias 17:13) Balet anto no mairap parad sikatayon awaten odino sigpot a pablien so pigaran Makasulatan a punton inparungtal na matoor ya aripen? Sirin nepeg a mapaabeban bidbiren tayo no iner so akaaralan tayo na katuaan tan ipikasin nawalaan na kakabatan pian mideneng ed sayan subok ya anggad naresolbi itan diad isabi na arum iran palapagan a mamalinew ed saray pamaakaran.—Santiago 1:5-8.
Pablien so Kristianon Impanaagi
9. Panon ya ipapanengneng na 1 Juan 1:3-6 a saray Kristiano so nepeg a walaan na espiritu na panuulop?
9 Say impapuson panamabli parad espiritu na pililimog a wala ed limog na Kristianon impanaagi tayo so mangiter na sananey a rason a sitotoor a manlingkor ed si Jehova. Diad tua, say siglaotan tayo ed Dios tan ed Kristo so agmagmaliw a mabunigas ed espiritual no andian na sayan espiritu. Imbaga nen apostol Juan ed alanaan a Kristianos: “Say anengneng mi tan nadngel mi sikato tan so ipakabat mi met ed sikayo, pian wala met so pikakasakey [“ulopan,” Diaglott] yo ed sikami; on, et say pikakasakey tayo peteg a dia ed Ama tan say Anak to a Jesu-Cristo. . . . No kuan tayo ya wala so pikakasakey tayo ed sikato insan manakar itayo ed kabilungetan mantila itayo tan ag tayo gawaen so tua.” (1 Juan 1:3-6) Onaplika iyan prinsipyo ed amin a Kristianos, balangan say ilalo ra et mangatatawen odino mangaraldalin.
10. Anggaman si Euodia tan Sintike so mabitar ya awalaan na kairapan a manresolbi ed personal a problema, panon so impanmoria nen Pablo ed sarayan bibii?
10 Nakakaukolan so sagpot pian pansiansiaen so espiritu na ulopan. Alimbawa, mabitar ya aromog na saray Kristianon bibiin Euodia tan Sintike a mairap [dan] resolbien so problema ed baetan da. Kanian sinimbawa ira nen Pablo a “wala ra komon ed parehon kanonotan diad Katawan, NW.” Inyarum to: “Kerewen ko ed sika met matoor ya iba ed panaglinkor, ta tulongan mo so saraya komon a bibii, lapu ed akisagsagpot ira ed siak ed evangelio [maong a balita, NW], pati Clemente met, tan saray arum ni ya ibak a katulongan, a saray kangaranan da walara ed libro na bilay.” (Filipos 4:2, 3) Saraman a maridios a bibii so akibakal a kaibay Pablo tan arum “ed maong a balita,” tan sikato so segurado a sikaray kabiangan na “saray kangaranan da walara ed libro na bilay.”
11. No naabet na sakey a matoor a Kristiano so sakey ya espiritual a problema, anto so nepeg a matukoy a nonoten to?
11 Saray Kristiano so agmangisulong na badge a dayew bilang sakey a tanda no antoy akapribilihyoan dan gawaen ed organisasyon nen Jehova tan no panon a sikaray manlilingkor a sitotoor ed sikato. Sano walaan ira na problema ed espiritual, agaylan agsiaaron ikaindan iray taon na matoor a serbisyo ra ed si Jehova! Mipadpara, samay tinawag a “matoor ya iba ed panaglingkor” so sakey a matoor ya agin magunaet ya ontulong ed arum. No sika so sakey a matatken, kasin sika so sakey a “matoor ya iba ed panaglingkor,” ya akaparaan ya ontulong diad maabagey a paraan? Komon ta amin tayo so mangunsidera ed maabig a ginawa na saray kapananisiaan, unong a gagawaen na Dios, tan simamaaron tulongan ira a manakbat ed saray awit da.—Galacia 6:2; Hebreos 6:10.
Anggapo lay Laen
12. Sanen saray balikas nen Jesus so sengegan ya ‘amayamay ed babangatan so sinmoner,’ anton talindeg so inala nen Pedro?
12 Sikatayo so napilitan a sitotoor a manlingkor ed si Jehova dingan na organisasyon to no tandaan tayon anggapo lay laen parad andi-geter a bilay. Sanen saray balikas nen Jesus so sengegan ya ‘amayamay ed saray babangatan to so sinmoner,’ tinepetan toray apostol to: “Laba’yo met so ontainan?” Inmebat si Pedro: “Katawan, siopa so laen mi? wala ed sika so saray salita na maando a bilay. Et anisia kami tan amta mi ya sika so Santo na Dios.”—Juan 6:66-69.
13, 14. (a) Akin a say inmunan-siglon Judaismo so kinmulang na madibinon pabor? (b) Anto so inkuan na abayaglan Tasi nen Jehova nipaakar ed nanengneng ya organisasyon na Dios?
13 “Saray salita na maando a bilay” so ag-aromog ed Judaismo na inmunan siglo K.P. Say manunan kasalanan to et say impangipulisay ed si Jesus bilang say Mesias. Anggapo ed antokaman iran nengneng to, a say Judaismo so eksklusibon imbase ed Hebreon Kasulatan. Imburi na saray Saduceo so kiwawala na angheles tan ag-anisia ed kioli. Anggaman saray Pariseo so agmikasakey ed sikara ed sarayan pamaakaran, sikakasalanan a ginawa ran andi-kana so Salita na Dios lapud agmakasulatan iran tradisyon da. (Mateo 15:1-11; Gawa 23:6-9) Sarayan tradisyon so angaripen ed saray Judio tan nanggawan mairap parad dakel ya awaten si Jesu-Kristo. (Colosas 2:8) Say seseg parad ‘saray ugali na religion na saray atateng to’ so nanggawa ed si Saulo (Pablo) diad kakulangay pikakabat to a magmaliw a sakey a masubeg a manamasegsegang ed saray patumbok nen Kristo.—Galacia 1:13, 14, 23.
14 Kinmulang so Judaismo na pabor na Dios, balet benendisyonan nen Jehova so organisasyon a tinugyop na papatumbok na Anak to—‘totoon maseseg parad saray maabig a kimey.’ (Tito 2:14, NW) Satan ya organisasyon so siansian wala, tan nipaakar ed satan sakey ya abayaglan Tasi nen Jehova so nankuan: “No wala so sakey a bengatlan sanka-importantian ed siak, satan et say pamaakaran a pansiansian maapit ed nanengneng ya organisasyon nen Jehova. Saray asakbay ya eksperiensiak so angibangat ed siak ya agaylan agmaabig so isaral ed kanonotan na too. Bektan say kanonotan ko so nandesidi ed satan a punto, deneterminak a mansiansia ed matoor ya organisasyon. Panon ni so pakala na sakey ed pabor tan bendisyon nen Jehova?” Anggapo lay laen parad madibinon pabor tan andi-geter a bilay.
15. Akin a mikoopera ed nanengneng ya organisasyon nen Jehova tan ed saramay manasakbat na responsabilidad ditan?
15 Nepeg a mamilit so kapusoan tayon mikoopera ed organisasyon nen Jehova lapud amta tayo a satan lambengat so iwawanwan na espiritu to tan mangipapakabat ed ngaran tan saray gagala to. Siempre, saraman so manasakbat na responsabilidad ed satan so ag-ayadyari. (Roma 5:12) Balet “say pasnok nen Jehova dinmalang” sumpad Aaron tan Miriam sanen nananap ira na kasalanan nen Moises tan nilingwanan dan sikato, aliwan sikara so angimatalkan na inter-Dios a responsabilidad. (Numeros 12:7-9) Natan, saray matoor a Kristianos so mikokoopera ed “saramay mangidadaulo” lapud satan so kakaukolanen nen Jehova. (Hebreos 13:7, 17, NW) Say ebidensya na katooran tayo et lalaktipen to so iyaatendin regular ed saray Kristianon miting tan mankomento a ‘manayat [ed arum] diad aro tan diad saray maabig a gawa.’—Hebreos 10:24, 25.
Magmaliw a Makapaseseg
16. Anton pilalek ed panggawa parad arum so nepeg met a mamakiwas ed sikatayon sitotoor a manlingkor ed si Jehova?
16 Say pilalek a magmaliw a makapaseseg ed arum so nepeg met a mamayubo ed sikatayon sitotoor a manlingkor ed si Jehova. Insulat nen Pablo: “Say pikakabat patageyen to so linawa, balet say panangaro so mamaabig.” (1 Corinto 8:1) Lapud wala so nengneng na pikakabat a mamaatagey ed linawa na walaan na satan, nayarin labay ya ibaga nen Pablo a say aro so mamaseseg met ed saramay mangipapanengneng ed satan a kalidad. Kuan na libro nen Propesor Weiss tan English: “Say toon walaan na kapasidad a mangaro so gendagendat ya aroen met. Say kapasidad ya ilaknab so abig a linawa tan kunsiderasyon ed amin a nengneng na kabibilay . . . so walaan na makatantandan maabig ya epekto ed toon mangilalaknab na ontan iran liknaan tan ontan met ed toon mangaawat ed saratan tan sirin mamapaliket ed sikaran dua.” Diad pangipanengneng na aro, napaseseg tayo so arum tan inkasikatayo, unong ya ipaparungtal na saray salita nen Jesus: “Mapalar so mangiter nen say mangawat.”—Gawa 20:35.
17. Panon a say aro so mamaseseg, tan anto so mamatunda ed sikatayon manggawa ed satan?
17 Diad 1 Corinto 8:1, inusar nen Pablo so Griegon salitan a·gaʹpe, ya ipapatnag so aprinsipyoan ya aro. Mamaseseg itan, ta satan so manangitepel tan mauyamo, amin a bengatla so itepel tan sungdoan to, tan agbalot mangangga. Sayan aro so mangekal ed makaderal iran emosyon, a singa say kinon tan imon. (1 Corinto 13:4-8) Satan ya aro so mamaarawi ed sikatayo ed panagreklamo nipaakar ed saray agagi tayo, ya ag-ayadyarin singa sikatayo. Mamokpok itan ed sikatayo diad pagmaliw a singa “totoon aliwan maridios” a “manakarakar” ed limog na tuan Kristianos ed inmunan siglo. Sarayan totoo et “ipasen dan andikana so pakauley tan pagpaugsen da so saray atagey ya inkabtang,” mapatnag a mamapauges ed saratan a sinansakey a singa ed alanaan iran Kristianon manangasikason naikdan na gloria. (Judas 3, 4, 8) Diad katooran ed si Jehova, agtayon balot onsusuko ed tukso a manggaway antokaman a mipadpara.
Sumpaen so Diablo!
18. Anto so labay nen Satanas a gawaen ed totoo nen Jehova, balet akin ya agto nagawaan so ontan?
18 Say pikakabat a labay nen Satanas a deralen so pankakasakey tayo bilang totoo na Dios so nepeg a mamadaak ed determinasyon tayon sitotoor a manlingkor ed si Jehova. Labay ni ingen nen Satanas a pagiten ya amin so totoo na Dios, tan no maminsan et saray mangaraldalin ya ariripen na Diablo so mamatey ed tua iran managdayew. Balet ag-abuloyan na Dios si Satanas a mamatey ed amin da. Inatey si Jesus pian “bagbagen to so kawalaan na pakayari na ipapatey, salanti, say diablo.” (Hebreos 2:14) Nagkalautlan ageteran so pasen a pangaagamilan nen Satanas na pakayari nanlapulad impangekal ed sikato ed tawen kayarin nagmaliw ya Ari si Kristo nen 1914. Tan diad niganan panaon nen Jehova et deralen nen Jesus si Satanas tan say organisasyon to.
19. (a) Anton pasakbay nipaakar ed saray sagpot nen Satanas so inter na sayan dyurnal ed imbeneg a taotaon? (b) Pian paliisan iray patit nen Satanas, anton panangasikaso so nepeg ya agamilen tayo diad pidedeneng ed saray kapananisiaan?
19 Aminsan et amasakbay iyan dyurnal: “No si Satanas, a diablo, so makapanggawa na gutgutan ed limog na totoo na Dios, pankokolkolen tan paniirangan tora, odino mangipatnag tan mamayubo na masiblet a disposisyon a mangitonton ed kadederal na aro parad agagi, sirin matalonan buagen tora.” (The Watch Tower, Mayo 1, 1921, pahina 134) Agtayo aabuloyan so Diablon maneral ed pankakasakey tayo, angangko diad panagyat [to] ed sikatayon manpapaugesan, odino mankokolkol. (Levitico 19:16) Agtayon balot komon talonaan nen Satanas diad paraan a sikatayo so personal a mamapasakit ed saramay manlilingkor a sitotoor ed si Jehova odino lalon pairapen so panagbilay da. (Ipareng so 2 Corinto 2:10, 11.) Imbes, iyaplika tayo iray salita nen Pedro: “Mandangka kayo, manbantay kayo; ta say kabusol yo, say diablo, wala ed kaliberliber yo ya singa omoang a leon a manaanap na buagen to: A sikato so sumpaen yo na mabiskeg a pananisia yo.” (1 Pedro 5:8, 9) Diad italindeg a malet sumpad si Satanas, napansiansia tayo so abenditon pankakasakey tayo bilang totoo nen Jehova.—Salmo 133:1-3.
Sipipikasin Manmatalek ed Dios
20, 21. Panon a say sipipikasin panagmatalek ed si Jehova so mitukoyan ed panlingkor ed sikaton sitotoor?
20 Say sipipikasin panmatalek ed Dios so ontulong ed sikatayon mantultuloy a sitotoor a manlingkor ed si Jehova. Sano nanengneng tayon eebatan toray pikakasi tayo, sikatayo so lalon napapaasingger ed sikato. Say sipipikasin panmatalek ed si Jehova a Dios so insimbawa sanen insulat nen apostol Pablo: “Pirawat ko sirin a saray totoo mikasi’ra komon dia ed ganagana ya pasen, ya itagey da so malinis [matoor, NW] a kalimaan da, ya angapo so sanok tan siblangan.” (1 Timoteo 2:8) Alimbawa, agaylan importanti a saray mamatatken so sipipikasin manilalo ed Dios! Say ontan ya ebidensya na katooran ed si Jehova sano mantitipon a maningbat na saray pamaakaran ed kongregasyon so ontulong pian napaliisan so andian-na-kasampotan iran sangsangan tan posiblin iterak na sanok.
21 Say sipipikasin panmatalek ed si Jehova a Dios so ontutulong ed sikatayon asikasoen iray pribilihyo ed serbisyo to. Sakey a lakin nanlingkor a sitotoor ed si Jehova ed loob na saray dekada, kuanto: “Say mabulos a panangawat tayo ed antokaman ya asainmin a niiter ed sikatayo diad sankamundoan ya organisasyon na Dios, tan say pansiansia tayo ed asainmin tayon agnagiing, so mangitarok na imis na abobon na Dios ed maseseg iran sagpot tayo. Anggamano say kimey a niasain et nengneng toy melag, mabetbet a no anggapoy ankelag iran kimey say matoor a panggawa ed dakel ya arum nin makana iran serbisyo so agnagawaan. Kanian no sikatayo so mapaabeba tan direktan interesado ed pamasantos ed ngaran nen Jehova imbes ed inkasikatayo, sirin makapanseguro itayo a sikatayo so lawas magmaliw a ‘malet, agnagiing, a lawas padaaken so kimey ed Katawan [si Jehova, NW].”—1 Corinto 15:58.
22. Panon a saray dakel a bendisyon nen Jehova so nepeg a mangapekta ed katooran tayo?
22 Siempre, antokaman so gawaen tayo diad serbisyo nen Jehova, sikato so agtayo nabayaran diad gagawaen to parad sikatayo. Agaylan maligen itayo ed organisasyon na Dios, ya apaliberan na saray kaaro to! (Santiago 2:23) Bebendisyonan itayo nen Jehova na pankakasakey a manlalapu ed inaagin panangaro ya ontanlan nilamot ya agnayarian nen Satanas a bagoten. Kanian sikatayo sirin so mansiansia ed matoor a mangatatawen ya Ama tayo tan mankimey a nankakasakey bilang totoo to. Natan tan diad andi-anggaan, manlingkor tayon sitotoor ed si Jehova.
Panon so Pangebat Yo?
◻ Anto so kabaliksan na pagmaliw a matoor?
◻ Antoray arum a bengatlan nepeg a mamakiwas ed sikatayon sitotoor a manlingkor ed si Jehova?
◻ Akin a nepeg tayon sumpaen so Diablo?
◻ Panon a tulongan itayo na pikakasin magmaliw a matoor ya ariripen nen Jehova?
[Litrato ed pahina 12]
Saray matoor ya ariripen nen Jehova so agmangiyabuloy ed singa-leon a Kabusol dan Diablo, a maneral ed pankakasakey da