Nengneng Yoray Matoor!

“Siopa so petag ya ag-ontakot ed sika, Jehova, tan mangigloria ed ngaran mo, lapud sika lambengat so matoor?”​—APOCALIPSIS 15:4.

1. Anton testimonya so inter nen J. F. Rutherford nipaakar ed katooran na sinublayan to, si C. T. Russell?

GINAPOAN nen Joseph F. Rutherford, a sinmublay ed si C. T. Russell bilang presidenti na Watch Tower Society nen 1917, so paliwawa to ed ponpon nen Russell diad impangibagan: “Si Charles Taze Russell so matoor ed Dios, matoor ed Kristo Jesus, matoor ed gagala na panarian na Mesias. Sikato so sigpot a matoor​—on, matoor anggad ipapatey.” Tua, saman so sakey a maabig a panamagalang parad sakey a matoor ya aripen nen Jehova a Dios. Anggapo lay babaleg a panamagalang a niiter tayo ed sakey a too nen say pangibagan nipasa to so subok na katooran, a sikato so matoor​—sigpot a matoor.

2, 3. (a) Akin a say katooran so mangipaparungtal na angat? (b) Siopa so nakakawesan met sumpad saray tuan Kristiano diad pansasagpot dan manmatoor?

² Mangiprepresenta na sakey ya angat so katooran. Akin? Lapud say katooran so misumlangan ed dilin pankaabigan. Saray manunaan ya agmatoor ed Dios et saray klero na Kakristianoan. Insan, ontan met ya anggapon balot so ontan a kakasmak na agkatooran ed saray relasyon na sanasawa natan. Say pikakalugoran so kaslakan. Kasmak met so agkatooran ed mundo na negosyo. Nipaakar ed saya, nibaga ed sikatayon: “Dakel a manedyer tan propesyonal . . . so manisia a saray makulangkulang tan mainomay a naluko lambengat so matoor ed saray kompanya ra natan.” Saray totoon “masyadon matoor” so ag-ikabkabilangan. “Kaukolan a magmaliw kan manuna tan mogmon matoor ed inkasikan dili” so imbaga dia na presidenti na sakey a kompanyan mangiiter na konseho nipaakar ed panangipakurang tan manaanap na saray manangipakurang. Balet, say panaglawi ed katooran ed inkasikan dili so maneral labat ed kabaliksan na salita. Papanonotan to itayo no antoy nibaga ed Miqueas 7:2: “Say sakey a matoor so natawtaw manlapud dalin.”

³ Diad mas malaknab a sukat, si Satanas tan saray demonyo to so akawesan sumpad sikatayo, a determinadon mangipabeneg ed sikatayo ed Dios. Satan so rason no akin a nibaga ed Kristianos diad Efeso 6:12: “Walaan itayo na pitutulot, aliwan sumpad dala tan laman, noagta sumpad saray gobierno, sumpad saray autoridad, sumpad saray manuley ed sayan mundo na kabilungetan, sumpad marelmeng iran espiritun puersa diad mangatatawen iran pasen.” On, kaukolan tayon talinengen so pasakbay: “Manlikas kayo, manbantay. Say kabusol yo, say Diablo, so manaakarakar a singa unmuang a leon, a manaanap na buagen to.”​—1 Pedro 5:8.

4. Antoran tendensya so manggagawan ontanlan mairap so pagmaliw a matoor?

⁴ Say mamapairap met ed panmatoor et say sinisiblet iran tendensyan atawir tayo ed atateng tayo, a singa asalambit ed Genesis 8:21: “Say kiling na say puso na too so mauges”​—tan masiblet​—“manlapud inkatobonbalo to.” Amin tayo so walaan na problema a singa ed impatua nen apostol Pablo a walad sikato: “Say maong a kaliktan ko so agko gagawaen, ingen say mauges ya agko kaliktan so naaagamil ko.”​—Roma 7:19.

Say Katooran So Bengatlan Espisyal

5, 6. Anto so nibaga no nipaakar ed no anto so katooran, tan panon itan ya inukeran?

⁵ Say “katooran” so sakey a nikadkaduman salita. Oniay kuan na Insight on the Scriptures: “Ompapaway ya anggaporay salitan Ingles ya eksakton mangibabalikas ed sigpot a kabaliksan na Hebreo tan Griego iran salita, balet say ‘katooran,’ a laktip na, a singa kaslakan dia et kanonotan na debosyon tan inkamatoor, sano inusar a misiglaotan ed Dios tan serbisyo to, so ngalngali misimbangan a kabaliksan.”a Nipaakar ed “katooran” onia so aminsan ya imbalikas na The Watchtower: “Say inkamatoor, kimey, aro, obligasyon, pangiyalagey. Anto so panparaan na sarayan salita? Saratan so nanduruman nengneng na katooran.” On, dakel a kaabigan a talagan nanduruman nengneng na katooran. Talagan sankapatnag no kaunongan kabetbet a pansiglaotan so katooran tan inkatunong diad Kasulatan.

⁶ Makatulong met iray onggendan a depinasyon: ‘Nayarin ipatnag na katooran so mantultuloy, napanmatalkan ya inkamatoor tan panuporta, maligen sumpad kibangkibang odino katukso.’ ‘Ipapatnag na katooran so inkamatoor ed sipan na sakey odino mantultuloy a suportaan so institusyon odino saray prinsipyon liknaen ya intalaga na sakey parad inkasikato; aglambengat isusuheri na termino so katutulok noagta say panresisti ed katukso tan katangguyor manlapud satan a katutulok.’ Kanian, saray totoon mantultuloy a matoor anggaman ed saray subok, isusumpa, tan panamasegsegang so makanepegan a tawagen a “matoor.”

7. Anton pandumaan ed baetan na katooran tan inkamatoor?

⁷ Anggaman ontan, nipaakar ed saya, marakep ya iyilustra so pandumaan na katooran tan inkamatoor. Diad mamabukig ya Estados Unidos, wala ditan so sakey a geyser a ngalngali inoras-oras a mangibubuga na danum tan sengaw. Ontanlan regular a tinawag na Daan a Matoor. Sasaglawien na Biblia iratan ya andiay-bilay a bengatla a singa say bulan bilang matoor, ta satan so napandependian. Sasaglawien na Salmo 89:37 so bulan bilang “sakey a matoor a tasi diad katawenan.” Nibabagan saray salita na Dios et matoor. Oniay kuan na Apocalipsis 21:5: “Say Sakey ya akayurong ed trono kuanto: ‘Nia! Gawaen kon amin a bengatlan balo.’ Ontan met, kuanto: ‘Isulat mo, lapud sarayan salita so matoor tan matua.’” Amin na sarayan alimbawa so matoor, napandependian balet saraya so andian na pakayarin makaasingger odino nawalaan na moral iran kualidad, a singa say katooran.

Si Jehova, say Manunaan a Matoor a Sakey

8. Anton Makasulatan a paneknek so mangipapaamta ed sankaabigan ya uliran na katooran?

⁸ Anggapoy panduaruwa, si Jehova a Dios so sankaabigan ya uliran na katooran. Si Jehova so matoor ed rasa na too, ya intarok to ni ingen so Anak to ta pian saray totoo so makaawat na andi-anggaan a bilay. (Juan 3:16) Diad Jeremias 3:12, nabasa tayo: “‘Ompawil kayo, O binmeneg ya Israel,’ so imbesngaw nen Jehova. ‘Agko onnengneng a sipapasnok ed sikayon totoo, ta siak so matoor.’” Say sakey nin mamapaneknek ed katooran nen Jehova et saray salitan nirekord ed Apocalipsis 16:5: “Sika, say Sakey a wala natan tan nen saman, say matoor a Sakey, matunong ka.” Insan diad Salmo 145:17, nibaga lamet ed sikatayo: “Si Jehova so matunong ed amin a dalan to tan matoor ed amin a gawa to.” Diad tua, si Jehova so ontanlan matalonggaring ed katooran to a sasaglawien na Apocalipsis 15:4: “Siopa so peteg ya ag-ontakot ed sika, Jehova, tan mangigloria ed ngaran mo, lapud sika lambengat so matoor?” Si Jehova a Dios so matoor ed superlatibon sukat.

9, 10. Anton rekord na katooran so ginawa nen Jehova no nipaakar ed pidedeneng to ed nasyon ya Israel?

⁹ Say awaran na nasyon na Israel so partikular a walaan na daakan a testimonya ed katooran nen Jehova ed totoo to. Diad saray agew na Uko-ukom, aminpigan binmeneg so Israel manlapud tuan panagdayew, balet paulit-ulit a naermenan si Jehova tan insalba tora. (Uko-ukom 2:15-22) Diad loob na limaran siglon walaay arari so Israel, impanengneng nen Jehova so katooran to ed satan a nasyon.

¹⁰ Say katooran nen Jehova so nanggawa ed sikaton anosan so totoo to, a singa say nibaga ed 2 Awaran 36:15, 16: “Si Jehova say Dios na kaatengan da so nantultuloy ya angibaki sumpad sikara na saray mensahero, ya aminpigan angibaki, lapud akaliknay panangabagey ed totoo to tan ed ayaman to. Balet sikaray nantultuloy a nanludlurey ed saray mensahero na tuan Dios tan minodmora da iray salita to tan binabalaw da iray propeta to, anggad say sanok nen Jehova so sinmabi sumpad totoo to, anggad anggapo lay pakatambal.”

11. Anton panamaseguro odino ligliwa so iiter nen Jehova ed sikatayo?

¹¹ Lapud si Jehova so supremon tuloy a matoor, nayarin isulat nen apostol Pablo, a singa nirekord ed Roma 8:38, 39: “Kombinsido ak ya anggan say ipapatey nisay bilay nisay saray anghel nisay saray gobierno nisay saray bengatlan wadia natan nisay saray bengatlan onsabi anggan saray pakayari nisay kaatagey nisay kaaralem nisay antokaman a pinalsa so agmakapangisian ed sikatayo manlapud aro na Dios a wala ed si Kristo Jesus a Katawan tayo.” On, ipapaseguro nen Jehova ed sikatayo: “Agtakan balot taynan nisay ikaindan taka.” (Hebreos 13:5) Tua, ligliwa so pakaamtan si Jehova a Dios so lawas matoor!

Si Jesu-Kristo, say Matoor ya Anak

12, 13. Anton testimonya so walad sikatayo nipaakar ed katooran ed Anak na Dios?

¹² Say nasnaspot a mangaalig ed si Jehova diad panangabet ed angat na katooran nen saman tan natan et si Jesu-Kristo. Manepeg labat ya aonen nen apostol Pedro so Salmo 16:10 tan iyaplika itan ed si Jesu-Kristo ed Gawa 2:27: “Agmo taynan so kamarerwak ed Hades, anggan abuloyan mo so matoor a sakey mon nanengneng toy kabulok.” Si Jesu-Kristo so makanepegan ya ipakabat bilang say “matoor a sakey.” Diad amin a paraan, sikato so matoor ed Ama to tan ed insipan a Panarian na Dios. Inmunan sinubok nen Satanas a buyaken so integridad nen Jesus diad impanukso, pangingganyo ed dilin pankaabigan to. Lapud sinmaew ed saya, binmaling so Diablo ed panamasegsegang, a diad kaunoran et impapatey to si Jesus diad panamairapan a kiew. Agbalot sinmuawi si Jesus no nipaakar ed katooran to ed mangatatawen ya Ama to, si Jehova a Dios.​—Mateo 4:1-11.

¹³ Si Jesu-Kristo so matoor ed papatumbok to diad impanumpal ed sipan ton nirekord ed Mateo 28:20: “Nia! Walaak ed sikayo ed amin ya agew anggad say konklusyon na sistema na bengabengatla.” Bilang kasumpalan na satan a sipan, sikato so matoor ya angipangulo ed kongregasyon to manlapud Pentecostes 33 K.P. ya anggad kaplesan.

Ag-ayadyarin Totoo a Matoor

14. Anton alimbawa na katooran so inletneg nen Job?

¹⁴ Natan, komusta met iray ag-ayadyarin totoo? Kasin nayarian da so manmatoor ed Dios? Walaan itayo na matalonggaring ya alimbawa ed si Job. Pinalinew nen Satanas so isyu ed kaso to. Kasin si Job so matoor ed si Jehova a Dios, odino sikato so manlilingkor labat ed sikato lapud dilin pankaabigan? Intangsit nen Satanas a sarag ton ipabeneg si Job ed si Jehova diad impangitarok na problema ed si Job. Sanen abalang nen Job ya amin so kayarian to, amin ya anak to, tan anggan say bunigas to, sikato so pinaseseg na asawa to: “Ayew moy Dios tan ompatey kala!” Balet matoor si Job, lapud inkuanto ed sikato: “‘Singa ed panasalita na sakey ed saray andiay isip a bibii, ontan ka met a mansalita. Kasin awaten tayo lambengat no antoy maong manlapud tuan Dios tan ag-awaten met no anto so mauges?’ Diad sayan amin et agnankasalanan si Job ed saray bibil to.” (Job 2:9, 10) Diad tua, diad saray mankuan a managligliwa to, inkuan nen Job: “Anggaman pateyen to [Dios] ak, ingen manilaloak ed sikato.” (Job 13:15, New International Version) Agpankelawan a naawat nen Job so abobon nen Jehova! Kanian, imbaga nen Jehova ed si Elifaz a Temanita: “Say pasnok ko so pinmetang sumpad sika tan ed duaran kakaibam, ta sikayo so agnansalita na katuaan nipaakar ed siak aliwan singa say aripen kon Job.”​—Job 42:7, 10-16; Santiago 5:11.

15. Anton Makasulatan a testimonya so wala ed sikatayo nipaakar ed katooran na dakel ya aripen nen Jehova a Dios?

¹⁵ Amin a lalaki tan bibiin walaay pananisia ya adeskribe ed Hebreos kapitulo 11 so nibagan matoor. Ag-ira lambengat matoor noagta matoor ed arap na saray pakadesdesan. Kanian, nabasa tayo met nipaakar ed sikara “a diad panamegley na pananisia . . . inkupit iray sangi na leon, sinebseban da so puersa na apoy, apaliisan da so tarem na kampilan . . . On, arum so akaawat na saray pakasalsali diad panamegley na panludlurey tan sinisiplatan, peteg, lalo ni nen say satan, diad inkabalor tan inkipriso. Sikaray tinutupak, sikaray sinubsubok, sikaray nililigari, sikaray inatey ed panamegley na inkasigbat, nanakarakar iran akakawes na katat na karnero, diad katat na kanding, legan a wala ra’d inkakapusan, diad kairapan, diad silong na panamairap.”​—Hebreos 11:33-37.

16. Anton alimbawa na katooran so intarok nen apostol Pablo?

¹⁶ Itatarok met na Kristianon Griegon Kasulatan so mabitar ya alimbawa nen apostol Pablo. Manepeg lambengat a nibaga to ed saray Kristianon taga Tesalonica so nipaakar ed ministeryo to: “Sikayo so tastasi, ontan met ed Dios, no panon kamin napaneknekan a matoor tan matunong tan anggapoy pakabalawan ed sikayo iran mananisia.” (1 Tesalonica 2:10) Walaan tayo ni na kaaruman a prueba ed katooran nen Pablo diad saray salita ton nirekord ed 2 Corinto 6:4, 5, a ditan nabasa tayo: “Diad kada paraan irekomenda mi so inkasikami a bilang ministro na Dios, diad dakel ya impansungdo, diad saray kairapan, diad kipapasen na pankaukolan, diad impanirap, diad inkapekpek, diad inkipriso, diad kaguloan, diad inkakesaw, diad saray labin anggapoy pakaugip, diad saray panaon ya anggapoy nakan.” Amin na saya so mamaneknek ed pakawalaan nen apostol Pablo na respeto’d-sarili lapud sikato so matoor.

Saray Matoor diad Modernon Panaon

17. Antoran salita nen J. F. Rutherford so angipanengneng na determinasyon to a magmaliw a matoor?

¹⁷ Diad modernon panaon tayo, walaan itayo na maabig ya alimbawan kinonsidera tayo la ed introduksion tayo. Imanoen no anto so isasalaysay ed libron Wordwide Security Under the “Prince of Peace,” ed pahina 146 ed silong na sub-titulon “Loyalty During Time of Imprisonment.” Ditan et nikuan: “Bilang panangipatnag na katooran ed organisasyon nen Jehova legan na panaon na inkipriso to, say presidenti na Watch Tower Society, si Joseph F. Rutherford, nen Disyembre 25, 1918, so angisulat ed onggendan: ‘Lapud agak akikompromiso ed Babilonia, noagta sitotoor a nanggunaet a nanlingkor ed Katawan ko, siak so nipriso, a pisalamatan ko. . . . Mas pilien ko so imis na panangabobon To tan nipriso, nen say ikompromiso odino isuko ed Ayep tan nibulos tan nawalaan na saray entusiastikon panangabobon na interon mundo.’”b

18, 19. Anton marakep iran alimbawa na katooran ed modernon panaon so walad sikatayo?

¹⁸ Walaan itayo na saray ekselentin alimbawa na katooran ed dakel niran Kristiano a nansungdo ed panamasegsegang. Kabiangan na saratan a matoor iran indibidual et saray Aleman a Tastasi nen Jehova legan na uley na Nazi, a singa inlitrato na video a Purple Triangles, a malaknab a nibunog ed lenguahe ya Ingles. Makatantanda met ed saray dakel a Tastasi nen Jehova a taga Aprika, a singa saramay walad Malawi. Diman et sakey a guardiya na prisoan so nantasi ed katooran na Tastasi, diad impangikuan: “Ag-iran balot mikompromiso. Basta ondaraak labat ira.”

¹⁹ Agnayarin basaen na sakey a too ed agano ni iray Yearbook of Jehovah’s Witnesses ya agnaingganyo ed katooran ya impatnag na tuan Kristianos, a singa saramay walad Gresya, Mozambique, tan Polandya. Dakel ed sikara so akasagmak na pirmin panamairap; say arum so pinapatey. Ipapanengneng na pahina 177 na say 1992 Yearbook so siameran Kristianon lalaki diad Etiopa ya akaabet na angat na katooran ed punton kipateyan da. Bilang Tastasi nen Jehova, agta maliket itayo a walaan itayo na ontanlan kinarakel na alimbawan managyat ed sikatayon naabet so angat na katooran?

20. Anto so resulta sano sikatayo so mansiansian matoor?

²⁰ Diad sitotoor a panresisti ed saray pakatuksoan tan desdes, napabaleg tayo so respeto’d-sarili. Insan diad siopan dapag na isyu na katooran a labay tayon pakaromogan? Diad panangabet ed angat na katooran, ondapag tayo ed si Jehova a Dios ed isyu tan paneknekan a si Satanas a Diablo so mauges, alay uges a matila! Nagamoran tayo ed satan so abobon na Managgawa tayo, si Jehova a Dios, tan say tumang na andi-anggaan a bilay diad liket. (Salmo 37:29; 144:15b) No anto so kakaukolanen pian naabet so angat na katooran et nakonsidera ed ontumbok.

[Saray paimano ed leksab]

Panon Yon Ebatan?

◻ Akin a mangipaparungtal na angat so pagmaliw a matoor?

◻ Akin a nibaga a say “katooran” so sakey ya espisyal a tuloy a salita?

◻ Antoran Makasulatan ya alimbawa so wala ed sikatayo nipaakar ed ag-ayadyarin totoo a matoor?

◻ Antoran maabig ya alimbawa ed modernon-agew na katooran so wala ed sikatayo?

[Litrato ed pahina 11]

Si Charles Taze Russell

[Litrato ed pahina 12]

Si Jesus so talagan “matoor a sakey” nen Jehova

[Litrato ed pahina 13]

Si Job, anggaman ag-ayadyari, so apaneknekan a matoor ed Dios

[Litrato ed pahina 14]

Si Pablo so angipanengneng na maabig ya alimbawa na katooran ed si Jehova