Sitotoor a Panaglingkor a Kaibay Organisasyon nen Jehova

“Dia ed mapangasi [matoor, NW] ompatnag ka a mapangasi [matoor].”​—2 SAMUEL 22:26.

1, 2. Antoray pigaran alimbawa na katooran a nayarin naimano tayon amin diad loob na kongregasyon?

AMINSAN a lablabi lan maong et ipaparaan na sakey a matatken so paliwawa to parad Kristianon miting. Labay to komoy ontunda tan manrelaks ni; imbes, intuloy toy panpaparaan, ya aanapen iray Makasulatan ya alimbawa tan ilustrasyon a mamakiwas tan mamaseseg ed pulok. Diad labi na miting, say naknaksawan a sankaparis ya atateng ed parihon kongregasyon so mansiansia la komon ed abung pian manpainawa; imbes, siaanos dan impanparaan iray anak da pian miaral ira. Kayari na miting, pantotongtongan na sakey a grupo na Kristianos so paliwawa na matatken. Salambiten lawari na sakey ya agin bii so impakasakitan na liknaan to ed saman met ya agi; imbes, maligsan sinalita toray punton indanet to. Naiimanom ta so pariparihon manitibkel ed sarayan senaryo?

² Satan a manitibkel et say katooran. Sitotoor so matatken a namparaan pian lingkoran so pulok na Dios; sitotoor ya aatendian na atateng iray miting ed kongregasyon; sitotoor a susuportaan na agin bii iray mamatatken. (Hebreos 10:24, 25; 13:17; 1 Pedro 5:2) On, diad amin ya aspekto na bilay, naiimano tayoray totoo na Dios a determinadon manlingkor a sitotoor a kaibay organisasyon nen Jehova.

3. Akin ya importantin tuloy a mansiansia tayon matoor ed mangaraldalin ya organisasyon nen Jehova?

³ Sano onnenengneng si Jehova ed sayan mauges a mundo, samsamet so naiimano ton katooran. (Miqueas 7:2) Agaylan seguradon maliket so puso to sano naimatonan toy katooran na totoo to! On, say mismon katooran mo so mamapaliket ed sikato. Balet, satan so mamapasanok ed si Satanas, say orihinal a rebelde, tan mamapaneknek itan a sikatoy matila. (Uliran 27:11; Juan 8:44) Ilaloan mon salien nen Satanas a pakapuyen so katooran mo’d si Jehova tan ed mangaraldalin ya organisasyon To. Konsideraen tayo paray pigaran dalan a gagawaen iya nen Satanas. Diad ontan et mas nanengneng tayo no panon itayon makapansiansian matoor anggad anggaan.​—2 Corinto 2:11.

Say Inengneng ed Ag-inkayadyari so Maneral ed Katooran

4. (a) Akin a mainomay a moriaen iramay walad autoridad tekep na balaw? (b) Panon a pinaneknekan nen Kore ya agmatoor ed organisasyon nen Jehova?

⁴ Sano say agin laki so walad posisyon na responsabilidad, lalon ombitar iray lingo to. Agaylay inomay so pamalaw ‘ed taep ed mata na agim anta wala’d matam a dili so pagsen’! (Mateo 7:1-5) Balet say pangimano ed saray lingo so mamawalay agkatooran. Pian iyilustra, isipen pay pandumaan di Kore tan David. Sinakbat nen Kore so dakel a responsabilidad, tan anganko et nanmatoor ed loob na dakel a taon, balet sikatoy nagmaliw a maambisyon. Nansyodotan toy autoridad di Moises tan Aaron, a kakapinsan to. Anggaman si Moises so sankauyamoan ed totoo, mapatpatnag a ninmengneng si Kore ed sikato tekep na balaw. Seguradon naimano toray lingo nen Moises. Bangbalet, saraman a lingo so ag-amatunong ed ag-inkamatoor nen Kore ed organisasyon nen Jehova. Sikatoy pinatey ed leet na nandaragup.​—Numeros 12:3; 16:11, 31-33.

5. Akin a nayari komon a liknaen nen David a natukson manrebelde’d Saul?

⁵ Diad biek a dapag, si David so nanlingkor ed silong nen Arin Saul. Datin maong ya ari, si Saul so talagan inmuges. Nakaukolan nen David so pananisia, panagsungdo, tan anggan inkamaparaan ta pian nalikiran iray maimon a panangataki nen Saul. Ingen, sanen awalaay tsansan makabawi si David, inkuanton saman so ‘insebel [agnaisip, NW], manlapud [punto de bista nen] Jehova,’ ya onkiwas ya agmatoor ed samay nilanaan nen Jehova.​—1 Samuel 26:11.

6. Anggano nanenengneng tayoray kakapuyan tan lingo na mamatatken, antoy agtayon balot gagawaen?

⁶ Sano ompatnag ya arum ed saramay mangidadaulo ed sikatayo et alingo ed impanhusga, makapasakit a mansalita, odino singa walay lalabien da, kasin manreklamo tayo nipaakar ed sikara, anganko ta minonong ed mabalaw ya awawey diad loob na kongregasyon? Kasin agtayo la onatendi ed saray Kristianon miting bilang panangipatnag na panagprotesta? Maseguron andi! Singa si David, agtayon balot pangirarasonay lingo na arum ed pagmaliw tayon agla manmatoor ed si Jehova tan ed organisasyon to!​—Salmo 119:165.

7. Antoray pigaran makapuy ya agagamil a linmesan misiglaotan ed templo diad Jerusalem, tan antoy liknaan nen Jesus nipaakar ed saya?

⁷ Say sankabalgan a napanuliranan a too et si Jesu-Kristo, a mapropetikon adeskribe bilang say ‘sakey a masanto [matoor, NW]’ nen Jehova. (Salmo 16:10) Say makapuy a panguusaran ed templo diad Jerusalem et pinagmaliw ton mairap so panmatoor. Amta nen Jesus a say trabaho na atagey a saserdote tan saray bagat et mangililitrato’d dilin ministeryo tan masakripisyon ipapatey to, tan amta to no panon kaimportanti parad totoo a naamtaan iraya. Kanian sikato so napno na matunong a sanok sanen anengneng ton say templo et nagmaliw a “sakey ya ungib na saray matakew.” Tekep na inter-Dios ya autoridad, amiduan kinmiwas pian linisan itan.a​—Mateo 21:12, 13; Juan 2:15-17.

8. (a) Panon ya impanengneng nen Jesus so katooran ed uksoyan na templo? (b) Panon tayon ipanengneng so panangapresia tayo ed panagdayew ed Jehova a kaibay malinis ya organisasyon to?

⁸ Siansia, sitotoor si Jesus ya anuporta ed uksoyan na templo. Nanlapulad kaugawan to, inatendian toray piesta ed templo tan mabetbet a nambabangat diman. Sikato ni ingey nambayar na buis parad templo​—anggaman sikatoy agtalagan obligadon manbayar. (Mateo 17:24-27) Kinomendaan nen Jesus so pobren balo diad impangipelag to na “amin a pambilay to” ed simpenan na kayamanan ed templo. Kayari ton tuloy, permanenti lan impulisay nen Jehova iman a templo. Balet ambegya, si Jesus so matoor ed satan. (Marcos 12:41-44; Mateo 23:38) Say mangaraldalin ya organisasyon na Dios natan so mas superyor nen say Judion sistema pati say templo to. Tua, satan so agnaspot; kanian pana-panaon et walaray pananguman. Balet ag-atatek itan na inkabulok, nisay ngalngali la salatan itan nen Jehova a Dios. Agtayo komon aabuloyan so antokaman a nalikas tayon ag-inkayadyari ed loob to a manismaya odino mamakiwas ed sikatayon magmaliw a mabalaw, mareklamo. Imbes, aligen tayo komon so katooran nen Jesu-Kristo.​—1 Pedro 2:21.

Say Dili Tayon Ag-inkayadyari

9, 10. (a) Panon ya aanamoten na sistemay bengabengatla nen Satanas iray agtayo inkayadyari ta pian nasagyat itayon agmanmatoor ed kondukta tayo? (b) Antoy nepeg a gawaen na samay seryoson akapankasalanan?

⁹ Sasalien met nen Satanas ya iyalibansay agkatooran diad pangaanamot ed agtayo inkayadyari. Say sistemay bengabengatla to so manguusar ed kakapuyan tayo, a manutukso ed sikatayon manggaway mauges ed imaton nen Jehova. Makapaermen, nilibo ed kada taon so onsusuko ed imoralidad. Palolooren na arum iyan agkatooran diad pambibilay a doble, ya ilululot so gawan-mauges bangta mankukunwarin matoor nin Kristiano. Bilang kiwas ed saray artikulo ed sayan tema diad “Young People Ask . . .” a serye ed Awake! a magasin, sakey a marikit so nansulat: “Saray artikulo so manideskribe’d bilay ko.” Diad pangiyaamot et sikatoy akikaaro ed saray tobonbalon agmangaaro ed si Jehova. Say nansumpalan? Insulat to: “Say bilay ko so linmereg, tan siak so akapan-imoralidad tan kaukolan a nabaat. Aderal so relasyon ko ed si Jehova, tan naandi so panagmatalek na atateng ko tan say mamatatken ed siak.”b

¹⁰ Akagamor na tulong iyan marikit ed mamatatken tan akapawil ed matoor a panaglingkor ed si Jehova. Balet, makapaermen ta dakel so manasagmak na lalon mauges a nansumpalan, tan arum so agni ingen akapawil ed pulok. Agaylan magmaong a tuloy so pagmaliw a matoor tan resistian iray tukso na sayan marelmeng a mundo! Talinengen iray pasakbay manlapud saray magasin a Panag-Bantayan tan Awake! ed saray pamaakaran a singa say minumundon pililimog tan mabanday a panagligliwaan. Komon ta anggapoy panaon a napelag kayo ed agmatoor a kondukta. Balet no agawa itan bilang, agbalot mankuankuanan ed sakey ya agkayo met onman. (Salmo 26:4) Imbes, patulongan. Satan so rason no akin a wadtan iray Kristianon atateng tan mamatatken.​—Santiago 5:14.

11. Akin a mauges a moriaen so inkasikatayon andiay-ilalon mauges, tan antoy agawa la ed Biblian makatulong ed sikatayo pian nakorehi so panmoria tayo?

¹¹ Saray agtayo inkayadyari so manigensigen ed sikatayo ed sananey nin paraan. Arum a makapanggawa na agkatooran so ontunda’d pamaliket ed si Jehova. Nonoten, si David so graben nankasalanan. Ingen, abayag kayari impatey nen David, sikatoy ninonot nen Jehova bilang sakey a matoor ya aripen. (Hebreos 11:32; 12:1) Akin? Lapud agton balot intundan nanggunaetan a paliketen si Jehova. Oniay ibabaga na Uliran 24:16: “Say maptek a too nipasag a maminpito, tan ombangon lamet.” Maseguro, no alingo tayon mankasalanan na angkelag​—on paulit-ulit​—lapud kaleteyan a pibabakalan tayo, siansian matunong tayo ni ed imaton nen Jehova no mantultuloy tayon “ombangon lamet”​—salanti, sisisimoon a magbabawi tan ituloy so kurson matoor a serbisyo.​—Ikompara so 2 Corinto 2:7.

Manalwar ed Masilib Iran Pormay Agkatooran!

12. Diad kaso na saray Fariseo, panon a say mapeget, legalistikon punto-de-bista so angipaarap ed agkatooran?

¹² Walara met iray mas masilib a pormay agkatooran. Satan so mankuankuanan ni ingen a katooran! Alimbawa, anganko ta inisip na saray Fariseo ed agew nen Jesus a sikaray bantog a matoor.c Balet ta agda anengneng so pandumaan na pagmaliw a matoor tan ed pagmaliw a mapekder a pananuporta ed ginaway-too iran totontonen, ta sikaray mapeget tan maukom a mapasakit. (Ikompara so Eclesiastes 7:16.) Diad saya et sikaray talagan agmatoor​—ed totoon nepeg komon a lingkoran da, ed mismon gagala na Ganggan ya ibabaga ran ibabangat da tan ed si Jehova a mismo. Diad kasunian, si Jesus so matoor ed espiritu na say Ganggan, a nibase’d aro. Kanian pinabiskeg tan pinaseseg to so totoo, a singa impasakbay na Mesianiko iran propesiya.​—Isaias 42:3; 50:4; 61:1, 2.

13. (a) Panon a makapagmaliw ya agmatoor iray Kristianon atateng? (b) Akin a kaukolan a paliisan na atateng so alabas a maruksa, mabalaw, odino negatibo diad panagdisiplinay ananak da?

¹³ Saray Kristianon walaan na autoridad so nagunggunaan a maong ed modelo nen Jesus ed sayan pamaakaran. Alimbawa, amta na matoor ya atateng a nepeg dan disiplinaey ananak da. (Uliran 13:24) Balet seseguradoen dan agpasyosyodoten iray kalangweran da ed maruksan panagdisplina lapud sanok odino lawas bigla-biglan panamalaw. Saray anak ya isipen dan agdan balot napaliket so atateng da odino isipen dan say relihyon na atateng da et mamapagmaliw ed sikaran negatibo tan mabalaw so sengegay iletey tan, bilang resulta et ikasipa na ananak ed tuan pananisia.​—Colosas 3:21.

14. Panon a napaneknekan na Kristianon pumapastol a matoor ed pulok a seserbian da?

¹⁴ Mipadpara, aasikasoen na Kristianon mamatatken tan managbiahen manangasikaso iray problema tan kapeligroan a kidudungetan na say pulok. Bilang matoor a pastol, mangokonseho ra sano nakakaukolan, a seseguradoen a walaan ira na amin a katuaan ya unona tan siaalwar a say ibabaga ra et unong ed Biblia tan ed saray palapagan na Sosyedad. (Salmo 119:105; Uliran 18:13) Amta da met a saray karnero so onsasaral ed sikara parad kapabiskegan tan pakatagano ed espiritual. Kanian panggugunaetan dan aligen si Jesu-Kristo, say Maabig a Pastol. Sitotoor dan lilingkoran iray karnero a sinimba diad saray Kristianon miting​—ya agda ira pabebelatan, balet imbes, paeeleten tan pabibiskegen da so pananisia ra.​—Mateo 20:28; Efeso 4:11, 12; Hebreos 13:20, 21.

15. Panon ya impanengneng na arum ed inmunan siglo a sikaray walaan na nisuawin katooran?

¹⁵ Say sakey nin masilib a pormay agkatooran et say nisuawin katooran. Say tuan katooran unong ed Biblia so agpangiyuuna ed antokaman a debosyon nen say katooran tayo ed si Jehova a Dios. Dakel a Judio ed inmunan siglo et ingetget da so inkaawet da ed Mosaikon Ganggan tan say Judion sistema na bengabengatla. Ingen sinmabi panaon a si Jehova et impaarap toy panamendisyon to ed nasyon na espiritual ya Israel imbes ed satan a rebelyoson nasyon. Dagdaiset labat so nanmatoor ed si Jehova tan angadapta ed sayan importantin impanguman. Anggan diad limog na saray tuan Kristiano, arum ed saray Judaismo et ipipilit day ipawil ed saramay “mabeng tan duka a bangat” na say Mosaikon Ganggan, ya asumpal la’d Kristo.​—Galacia 4:9; 5:6-12; Filipos 3:2, 3.

16. Panon so ikikiwas na matoor ya ariripen nen Jehova ed saray pananguman?

¹⁶ Diad pidumaan, saray totoo nen Jehova ed modernon panaon so napapaneknekan a matoor diad saray panaon na pananguman. Legan a mantultuloy ya onsisinag so liwawa na niparungtal a katuaan, walaray pananguman. (Uliran 4:18) Diad agano ni, natutulongan itayo na “say matoor tan makabat ya aripen” pian napaaligwas so pakatalos tayo ed terminon “kailalakan” ya inusar ed Mateo 24:34 tan ed panaon na kaukom na “saray karnero” tan “saray kanding” ya asalambit ed Mateo 25:31-46, ontan met ed panmoria tayo ed pigaran nengneng na serbisyo sibil. (Mateo 24:45) Anggapoy panduaruwan panliketan komon na arum ed saray apostata no dakel ed Tastasi nen Jehova et igetget day inkapekder da’d dati lan pakatalos ed satan a tema tan agda labay so onaligwas. Anggapoy ontan a nagagawan kiwas. Akin? Lapud matoor iray totoo nen Jehova.

17. Panon a niiyan ed subok na saray inad-aro tayo so katooran tayo no maminsan?

¹⁷ Balet, say pamaakaran a nisuawin katooran so personal a mangapekta ed sikatayo. Sano sakey a pinablin kaaro odino anggan kapamilyaan ni ingen et pilien toy kurson sumlang ed prinsipyos na Biblia, nayarin liknaen tayo a naaapag itayo ed baetan na saray panmatooran. Natural, kaukolan tayoy manmatoor ed saray kapamilyaan tayo. Balet agtayon balot iyuuna so debosyon tayo ed sikara nen say katooran tayo ed si Jehova! (Ikompara so 1 Samuel 23:16-18.) Agtayo anggan tulongan iray managgaway-mauges ya iyamot so graben kasalanan nisay pilaan ira sumpad mamatatken a manggugunaet a ‘mangipawil ed sikara diad espiritu na tayadno.’ (Galacia 6:1) Say panggawa na ontan so agkatooran ed si Jehova, say organisasyon to, tan ed inad-aron sakey. Say pangamper ed pakaawat na managkasalanan ed nakakaukolan a disiplina, diad pansumpalan et pakaamper ed idateng na panangaro nen Jehova ed managkasalanan. (Hebreos 12:5-7) Tandaan met, a “matoor so saray sugat na kaaro.” (Uliran 27:6) Direktaan et say maaron konsehon nibase’d Salitay Dios so nayarin manugat ed kinon na mankakasalanan ya inad-aro, balet agmanbayag et napaneknekan itan a makasalba ed bilay!

Mantultuloy so Katooran Anggaman ed Panamasegsegang

18, 19. (a) Antoy labay nen Acab ed si Nabot, tan akin ya aglabay nen Nabot? (b) Kasin say katooran nen Nabot so makatunongan labat base’d saray nansumpalan? Isalaysay.

¹⁸ No maminsan et direktan aatakien nen Satanas so katooran tayo. Nonoten pay kaso nen Nabot. Sanen sikatoy dinesdes nen Arin Acab ya ilakoy kaubasan to, inyebat to: “Si Jehova insebel to ed siak, ya iter ko ed sika so tawir na saray ateng ko.” (1 Arari 21:3) Ag-anawet tenten pay Nabot; sikato labat so matoor. Ta igaganggan na Mosaikon Ganggan ya anggapoy Israelitan mangilako ed tawir ton kayarian a dalin ed ando lan ando. (Levitico 25:23-28) Maseguron amta nen Nabot a sarag na sayan maruksan ari a sikatoy napapatey, ta pinaulyan la nen Acab so asawa to, si Jezabel a mamatey ed dakel a propeta nen Jehova! Ingen tinmalindeg a malet si Nabot.​—1 Arari 18:4.

¹⁹ No maminsan et say katooran so mankakaukolan na kasalat. Si Jezabel, diad tulong na pigaran “abeba a totoo” et inmaneobra ton natetel si Nabot ed krimen ya agton balot ginawa. Bilang resulta, sikato tan saray ananak to so pinapatey. (1 Arari 21:7-16; 2 Arari 9:26) Kasin labay ton ibaga a say katooran nen Nabot et aliwa? Andi! Si Nabot so sakey ed dakel a matoor a lalaki tan bibiin ‘mabilay’ ed memorya nen Jehova natan, aliktar a nauugip ed lubok ya anggad panaoy kikioli.​—Lucas 20:38; Gawa 24:15.

20. Panon itayon natulongan na ilalo pian namantini so katooran tayo?

²⁰ Parihon sipan so mamapaseguro ed saray matoor a sinansakey nen Jehova natan. Kabat tayon baleg so isakripisyo tayo ed sayan mundo lapud katooran tayo. Insaklang nen Jesu-Kristo so bilay to lapud nisesengeg ed katooran to, tan imbaga to ed saray papatumbok to ya ontan met so pakatrato ra. (Juan 15:20) No panon a say ilalo to ed arapen et anustini ed sikato, ontan met a susustinien itayo na ilalo tayo. (Hebreos 12:2) Kanian makapansiansia tayon matoor diad arap na amin a klasen panamasegsegang.

21. Antoran panamaseguro so iyoopresi nen Jehova ed saray matoor to?

²¹ Tua, dagdaiset ed sikatayo natan so manasagmak na direktan panangataki ed katooran tayo. Balet nayari palagin dakel a panamasegsegang so kidungetan na totoo na Dios sakbay na isabi anggaan. Panon tayon naseguron napansiansia so katooran tayo? Diad pantultuloy tayon manmatoor natan. Inikdan itayo nen Jehova na baleg a kimey​—pampulong tan pambangat nipaakar ed Panarian to. Komon ta sitotoor tayon ituloy iyan importantin kimey. (1 Corinto 15:58) No agtayo abuloyan a deralen na ag-inkayadyari na too so katooran tayo ed organisasyon nen Jehova tan no paliisan tayoray masilib a pormay agkatooran a singa say nisuawin katooran, diad ontan et akaparaan tayon maong no bilang ta pirmin nasubok so katooran tayo. Diad antokaman a kaso, komon ta lawas tayon napaseguroan ed ag-onsaew a katooran nen Jehova ed saray matoor ya ariripen to. (2 Samuel 22:26) On, asikasoen toray matoor to.​—Salmo 97:10.

[Saray paimano ed leksab]

Panon so Pangebat Yo?

◻ Panon tayon napaliisay ag-inkayadyari na arum a mangitonton ed agtayo panmatoor?

◻ Diad antoran dalan a say agtayo inkayadyari et ipaarap to itayo ed agmatoor a kondukta?

◻ Panon tayon naresistian so tendensyan isuawi so katooran tayo?

◻ Antoy ontulong ed sikatayon napansiansia so katooran tayo anggan diad panaon na panamasegsegang?

[Kahon ed pahina 9]

Sitotoor a Manlilingkor ed Bethel

“Nagawa komon so sarayan amin ed kasimpitan tan mauksoy.” Ontan so insulat nen apostol Pablo. (1 Corinto 14:40) Amta nen Pablo a pian onkurang so sakey a kongregasyon et nakaukolan so ‘uksoy,’ parad kaorganisa. Ontan met natan, kaukolan a desisyonan na mamatatken iray praktikal a pamaakaran, a singa say panangiasain ed saray kakongregasyon ed nanduruman pasen na panagaralay libro, panangiyuksoy ed saray miting parad lawak a serbisyo, tan panangusisa’d pakakokobri na teritorya. Saratan ya uksoyan so no maminsan et pakakasubokay katooran. Ag-iratan apuyanan na Dios a ganggan, tan ag-iratan mamenek ed panlabayan na amin ya indibidual.

Naiirapan ka ta no maminsan a manmatoor ed pigaran praktikal iran uksoyan ed loob na Kristianon kongregasyon? No ontan, naromog mon makatulong so alimbawa ed Bethel. Say ngaran a Bethel, Hebreon terminon kabaliksan toy “Abung na Dios,” so ningaran ed amin a 104 sanga na Watch Tower Society, pati saray hedkuarter ed E.U.* Kaliktan na saray boluntaryon manaayam tan mantratrabaho ed saray pasilidad na Bethel a sarayan pasen et pakapatnagay galang tan takot parad Jehova. Kakaukolanen na saya so katooran ed biang na balang sakey ed sikara.

Mabetbet a nasasaglawi na saray ombibisita ed Bethel so inkauksoy tan kalinisan na satan. Saray komikimey so organisado tan maliket; say panagsalita tan kakikiwas, tan anggan say itsura ra so pakapatnagay matatken, nipasal-ed-Biblian Kristianon konsiensia ra. Amin a membro na pamilyan Bethel so sitotoor ya ontutulok ed saray estandarte na Salitay Dios.

Niarum ni, tataryaan ira na Mananguley ya Ulop na manwal ya apauloan na Dwelling Together in Unity, a sipapangasin angiletneg na pigaran praktikal iran uksoyan a nakakaukolan parad ontan a kabaleg na pamilya ta pian makapaniiban mankimey a maong. (Salmo 133:1) Singa bilang, sasaglawien to so panagpundoan, panangan, kalinisan, panangawes tan panag-ayos, tan mipadpara niran pamaakaran. Sitotoor a susuportaan na membroy pamilyan Bethel tan tutuloken iratan ya oksuyan, anggan sano say personal a panlabayan da et nayarin mangipaarap ed sananey a direksion. Momoriaen da iyan manwal, aliwan bilang sakey a tugyop na mapeget a tutumboken tan regulasyon, noagta sakey a datak na mausar a giyan denisinyon mangiyalibansay pankakasakey tan pantutunosan. Matoor iray manangasikaso a manusuporta ed sarayan nibase’d-Biblian totontonen, tan uusaren da iratan diad positibon dalan pian paeleten tan pasesegen so pamilyan Bethel a gegemtanen so sagradon serbisyo ra ed Bethel.

* Sarayan pasilidad a pagawaan, opisina, tan residensyal et agda tugyopen so baleg ya espiritual a templo, odino abung na Dios. Say espiritual a templo na Dios so uksoyan to parad puron panagdayew. (Miqueas 4:1) No ontan, ag-itan nigetar labat ed dinanman a literal a paalagey ed dalin.

[Kahon ed pahina 10]

Say Loyalista tan Legalista

Nen 1916, inkuan la na Encyclopædia of Religion and Ethics a “sayan pandumaan ed baetan na loyalista tan ed legalista so naromog lawari ed amin a panaon tan ed amin a pasen.” Insalaysay to: “Wadtan so legalista a gagawaen toy imbaga ed sikato, ya agmamubuyak na antokaman a totontonen; tutumboken to so nisulat a salita. Wadtan so loyalista a manggagawa ed saya balet ta nayarin . . . napanpiyaan ed dakel ni, a sinononot ed susumpalen to, a babayuboan toy awawey to a mitunosan ed espirituy gagala na lilingkoran to.” Saginonor, saya met lamlamang a palapagan so nankuan: “Say pagmaliw a matoor et mas ni nen say pagmaliw a matulok ed ley. . . . Say matoor a too et nibiig ed matulok ed ley a too bilang sakey a manseserbi ed intiron puso tan kanonotan . . . Anggapoy ginagalan kasalanan a ginawa, odino ag-agawaan, odino ag-amta so iyabuloy ton nagawa.”