‘Naalan Miabet ed Katawan’​—Panon?

SAY paleksab a panbilang (countdown) ed anggaan na kaplesan a marelmeng a sistema so mantutultuloy ya agmanguman. Diad ilalabas na kada oras, kada minuto, kada segundo et onaasingger itayo ed importanten tuloy iran ebenton abayag lan nipropesiya. Kasin say rapture so sakey ed saraya? No ontan, kapigan tan panon a nagawa itan?

Agpinmatnag so salitan “rapture” ed Biblia. Balet saramay manisia ed satan so mangisitas ed saray salita nen apostol Pablo diad 1 Tesalonica 4:17 bilang basiyan na sisisiaen da. Usisaen tayo pa so konteksto na sayan kasulatan. Insulat nen Pablo:

“Et ag mi labay komon ya onpasen kayo ya andi amta, agagi, no nipaakar ed saray naugip [ed patey, NW]; pian ag kayo onermen, onong na singa saray arum, ya angapo so ilalo ra. Ta no sisiaen tayo a si Jesus so inatey tan inmolin binmilay, ontan met a saray naugip [ed patey, NW] ed Jesus awiten ira na Dios naani a piolopen ed sikato. Ta saya so ibaga mi ed sikayo lapud salita na Katawan, a sikatayon mabilay, ya atilak ya anga ed isasabi na Katawan, ag tayon balot onaan so saray naugip [ed [patey, NW]. Ta say Katawan a dili onlasor a manlapu ed tawen, pati sakey ya eyag, pati voces na arkangel, tan say trumpeta na Dios: et saray inaatey ed Cristo onbilay ira ya onona: Insan sikatayo a mabilay, ya atilak naabot [naala, NW] tayo’ra naani a piolopen ed saray kalureman, a miabet ed Katawan diman ed tagey: et ontan miayam itayo lawas ed Katawan. Kanian manligliwa so sakey tan sakey komon ed saraya a salita.”​—1 Tesalonica 4:13-18.

Say kongregasyon ed Tesalonica so balo nin tuloy sanen sinulatan nen Pablo iray Kristiano diman ed ngalngali 50 K.P. Agonigon iray membro na kongregasyon ya arum ed sikara so “naugip ed patey.” Anggaman ontan, say insulat nen Pablo so nanligliwa ed saray taga Tesalonica nipaakar ed ilalo diad kioli ed bilay.

“Kiwawala” nen Kristo

Anggaman pepekderan a napaoli iray matoor a Kristianos ya inatey nensaman, inkuan met nen Pablo: “Sikatayon mabilay, ya atilak ya anga ed isasabi na Katawan, ag tayon balot onaan so saray naugip [ed patey, NW].” (Bersikulo 15) Peteg a makatantanda so impanukoy na apostol ed “kiwawala” na Katawan. Dia et uusaren na orihinal-a-lenguahen teksto so Griegon salitan pa·rou·siʹan, a literal a kabaliksan toy “miulop.”

Sano say pangulo na Estado so ombisita ed sananey a bansa, saray petsa na kiwawala to so gendagendat ya iyaabawag. Tua iya ed kiwawala nen Katawan a Jesu-Kristo. Mantutultuloy ya ipaparungtal na The Watchtower odino Say Panag-Bantayan so ebidensya ed saray matuan-impanpuson estudyante na propesiyay Biblia a say kiwawala nen Jesus ed pakayari na mangatatawen a Panarian so ginmapo nen 1914. Saray ebento nanlapulad satan a taon so mamaneknek ed agnanengneng a kiwawala nen Jesus. (Mateo 24:3-14) Kanian say pangibaga ya arum ed Kristianos a manbibilay legan na kiwawala na Katawan so ‘naalan. . . miabet ed Katawan diman ed tagey,’ et labay ya ibaga nen Pablo a saramay makaliktar so miabet ed Kristo, aliwan diad liwang na dalin, noagta diad agnanengneng a mangatatawen a pasen a no iner akayurong si Jesus ed nikawanan a lima na Dios. (Hebreos 1:1-3) Balet siopara?

“Say Israel na Dios”

Dakel so ibabaga na Kasulatan nipaakar ed silalaman iran Israelita tan sasalitaen [to] met so espiritual ya “Israel na Dios.” Saray Judio tan Hentil a mananisia so manugyop ed kumpleton bilang na sayan grupon nilanaan na masanton espiritu na Dios, odino aktibon puersa. (Galacia 6:16; Roma 11:25, 26; 1 Juan 2:20, 27) Ipapanengneng na libron Apocalipsis a say dagup a bilang na espiritual ya Israel so 144,000, ya amin da so niretraton kaulop na say Kordero, si Jesu-Kristo, diad mangatatawen a Palandey Sion. Kaiba si Kristo, sikara so magmaliw ya arari tan saserdote ed tawen. (Apocalipsis 7:1-8; 14:1-4; 20:6) Niulop ed sikara et saray indibidual ed antokaman a rasa odino abenegan a nasyonalidad ya akilimog ed saray kongregasyon diad Tesalonica tan arum iran pasen.​—Gawa 10:34, 35.

Sakbay a naawat na siopaman ed matoor iran membro na espiritual ya Israel so mangatatawen a tumang, kaukolan a mibiang ira ed sakey a pakasalian. Unong a say impatey nen Jesus ed panamairapan a kiew so tinumbokan na inkioli to ed bilay diad katawenan, kanian saray Kristiano a walaan na mangatatawen ya ilalo so nepeg ya ompatey sakbay dan awaten so tumang da. (1 Corinto 15:35, 36) Tua itan ed saray membro na espiritual ya Israel a manbibilay ed inmunan siglo K.P. tan ed saray indibidual a manbibilay natan.

Kayari impanaglawi ed “kiwawala na Katawan,” inturo nen Pablo so panaon no kapigan a saray matoor ya espiritual ya Israelitan inatey so mangawat na mangatatawen a tumang da. Insulat to: “Ta say Katawan a dili onlasor a manlapu ed tawen, pati sakey ya eyag, pati voces na arkangel, tan say trumpeta na Dios: et saray inaatey ed Cristo onbilay ira ya onona.” (Bersikulo 16) Kanian, bektan say kiwawala nen Jesus bilang Ari so onggapo, nailaloan tayon onggapo so mangatatawen a kioli ed saramay espiritual ya Israel ya inatey la bilang manamenben na katooran. (1 Corinto 15:23) Sikara la natan so manlilingkor a kaiba nen Jesus ed tawen. Balet komusta so medyo daiset ya alanaan a Kristianos a siansian manbibilay diad dalin? Kasin alagden da so rapture?

“Naala”​—Panon?

Kayari impanukoy ed inatey ya alanaan a Kristianos, inyarum nen Pablo: “Insan sikatayo a mabilay, ya atilak naabot tayo’ra naani a piolopen ed saray kalureman, a miabet ed Katawan diman ed tagey: et ontan miayam itayo lawas ed Katawan.” (Bersikulo 17) Say “mabilay” et saramay manbilay legan na kiwawala nen Kristo. Sikara so “naala” a miabet ed Katawan a Jesus. A singa ed kipapasen na asakbay a matoor a Kristianos, sikara so kaukolan ya ompatey bilang too pian mikasakey ed Kristo diad tawen.​—Roma 8:17, 35-39.

Diad impansulat ed Kristianos ed Corinto, imbaga nen Pablo: “Natan saya so kuan ko, agagi, say laman tan dala ag da nayarian a tawiren so nanarian na Dios; tan say naderal ag to natawir so ag naderal. Nia, tongtongen ko ed sikayo so sakey a misterio: Ag itayo naugip ya amin, balet nauman itayo ya amin, Dia ed kabekta, dia ed sankakirem, dia ed onor a turmpeta; ta say turmpeta ontanol, tan saray inatey onolira ed bilay ya ag naderal, tan nauman itayo.” (1 Corinto 15:50-52) Diad ipatey ed katooran legan na kiwawala nen Kristo, balang sakey ed nakdaan na espiritual ya Israel so tampol a makaawat ed mangatatawen a tumang to. “Dia ed sankakirem,” sikato so napaoli bilang espiritun pinalsa tan “naala” pian miabet ed Jesus tan manlingkor bilang kaiban manuley diad Panarian na katawenan. Balet komusta so nipaakar ed amin nin arum a mandadayew ed si Jehova? Unong a manasingger so anggaan na sayan marelmeng a sistema, kasin sikara met so naala ed tawen?

Kililiktar​—Balet Aliwan Diad Panamegley na Rapture

Unong a say maarin kiwawala nen Jesus so ginmapo la nen 1914, sikatayo natan so asingsingger la ed “panaon na kasumpalan” na sayan mundo. (Daniel 12:4) Impasakbay nen Pablo: “Et nipaakar ed saray panaon tan saray panaon a manepeg, agagi, ag yo nakaokolan ya isulat ko ed sikayo. Ta sikayon dili amtayon maong a say agew na Katawan onsabin singa matakew ed labi. Sano ibabagaray, Kareenan tan andi paga, insan biglan kaderal so onsabi ed sikara, a singa pasakit na biin malokon; tan ag ira makaliktar.” (1 Tesalonica 5:1-3) Balet saray alerton Kristianos so makaliktar. Panon?

Say kelyaw a “Kareenan tan kaligenan!” so mangipaniring ed peryodon tinawag nen Jesus a “baleg ya irap.” Diad paneskribe ed “sakey a baleg ya ulop” na saray matoor a walaan na ilalo ed andi-geter a panbilay diad mangaraldalin a paraiso, kuan na libron Apocalipsis: “Saraya sikara so nanlapu ed baleg ya irap, tan inorasan da so kawekawes da, tan sikara so pinapoti ra ed dala na Cordero.” (Apocalipsis 7:9, 14; Lucas 23:43) Andi, say ilalo ra et aliwan say rapture. Imbes, sikaray walaan na ilalon kililiktar dia a mismo ed dalin. Pian makapanparaan ed satan, nepeg a sikaray mansiansian aliing ed espiritual. Panon yon nagawaan iya tan makaliktar ed anggaan na sayan sistema?

Kaukolan yo so ‘manbantay tan isulong so kinlong na pananisia tan aro tan say ilalo ed kilalaban a pinagkatakoko.’ (1 Tesalonica 5:6-8, NW) Natan la so panaon a pangimano ed mapropetikon Salita na Dios, say Biblia. Legan na ilalabas na panaon ya anggad anggaan na sayan sistema, imanoen so konseho nen Pablo: “Agyo modmoraen so saray profecias; Salsalien yo ya ami ganagana; et mansiansia kayo ed maong.” (1 Tesalonica 5:20, 21) Kanian aabrasaen kayo na saray Tasi nen Jehova ed saray Kingdom Hall da, a ditan et makapibiang kayo ed panagaral da na saray propesiya na Biblia tan arum iran nengneng na impuyan a Salita na Dios.

Legan na ibubulaslas yo ed suston pikakabat tan pananisia, natebek yo so kasusumpal na gagala nen Jehova a Dios diad pangekal na kakabusol to ed talba tan gawaen-lamet a paraiso so dalin. Diad pangagamil na pananisia, nayarin sikayo met so magmaliw a kaiba na saray makaliktar ed baleg ya irap, ya apribilihyoan a mangabrasa ed nilaksalaksan napaoli ed bilay diad dalin. Tan agaylan gayaga so panbilay ed silong na Panarian na Dios diad saray lima nen Jesu-Kristo tan saray kaiba ton manuley, a sikaray ‘naalan miabet ed Katawan’ diad kioli [ra] ed bilay diad mangatatawen a pasen!

Sirin, parad matulok a katooan diad interamenti, anto so tuan Makasulatan ya ilalo? Aliwan say rapture. Imbes, say andi-geter a bilay diad dalin ed silong na uley na Panarian na Dios.

[Litrato ed pahina 7]

Saray makaliktar ed baleg ya irap so mangabrasa ed saray apaoli ed bilay diad paraison dalin ed silong na uley nen Jesus tan saramay “naalan miabet” ed tawen