Kasin Naala Kayon Miabet ed Tawen?

SISIAEN na dakel a totoo a sikaray onla ed tawen sano sikaray ompatey. Balet isisipen na arum a sikaray naalan miabet diad tawen ed tatawagen a rapture. Kasin ontan so iilaloan yo?

Say rapture so “biglan kaandi na nilaksalaksan tuloy a totoo ya anggapo so antokaman a pakatandaan no iner so nila ra!” Ontan so inkuan na sakey a Protestanten ebanghelista. Unong ed Evangelical Dictionary of Theology, tutukoyen na terminon “rapture” so “kiyapasakey na iglesia ed si Kristo diad komaduan isasabi to.”

Parad arum et mangogonigon so pannonot ed panaynan ed saray kakaaro tan membro na pamilya pian miabet ed Jesu-Kristo. Ingen, sisiaen na dakel a nepeg a nagawa so rapture. Kasin nagawa itan? No ontan, kapigan?

Nanduruman Opinyon Nipaakar ed Rapture

Ipapanengneng na Biblia a sakbay na gapo na nisipan a Sanlibon Taon ya Uley nen Kristo et niwala so sakey a peryodon atawag a “baleg ya irap.” Inkuan nen Jesus: “Ta wala naani baleg ya irap ed satan, ya angapo so ontan a nanlapu’d gapo na mundo ya anga ed natan, angapo, angapo la naani.” (Mateo 24:21; Apocalipsis 20:6) Ipapasen na arum so rapture sakbay na panaon na baleg ya irap. Arum et alagden da itan legan na satan (baleg ya irap) a panaon. Saray arum et siansia nin isipen dan say rapture so onsabi kayari na satan ya agnaparaan a kairapan.

Say kayari-irap (post tribulation) a panmoria so manunaan ya angga ed asasakbay a koma-19 siglo. Insan diad Inglatera et diman atibukel so sakey a panangipakurang ya inpangulo na datin klero na Iglesia na Irlandia, a si John Nelson Darby. Sikato tan saray kapara-ed-kanonotan ya Anglikano so nagmaliw a kabkabat bilang Brethren. Manlapud niletnegan na iglesia to diad Plymouth, si Darby so nambaroy pian manpulong ed Switzerland tan arum iran pasen ed Europa. Inyabawag to a say ipapawil nen Kristo so nagawa ed duaran paraan. Onggapo itan ed sakey a sekreton rapture, a ditan naala iray “sasanto” pian miabet sakbay na pitoy-taon a peryodo na irap a maneral ed dalin. Insan si Kristo so onapireng a nanengneng, a kaulop na sarayan “sasanto,” tan mankakasakey iran manguley ed dalin diad loob na sanlibon taon.

Indanet nen Darby so pankaukolan ed pagmaliw a biig manlapud mundo, tan saramay mibibiang ed saray panmoria to so diad kaunoran et nagmaliw a kabkabat bilang say Eksklusibon Brethren. Inpangulo nen B. W. Newton so sananey a grupon anisia ed rapture balet aliwan diad samay sakbay-na-irap (pretribulation). Say manangidepensa ed kayari-irap a si Alexander Reese so amekder a “saray teorya ed Sekreton-Rapture so mameligro ed ilalon Isasabi nen Kristo.”

Sisiaen na saray manangiyalibansa ed sakbay-na-irap a sayan pandumaan ed panmoria so seryoson tuloy a mangapekta ed “nengneng na ilalo [ran] mitunosan ed isasabi nen Kristo.” Manmatalek iray arum ed “teoryan kabiangan (partial) a rapture,” a manisisian saramay matoor a tuloy ed Kristo so na-rapture ya ununa tan diad saginonor et na-rapture a nagkalalo iray minumundo.

Dakel iran ebanghelikon grupo so mangiyaabawag ed magano lan onsabin rapture na matoor a Kristianos. Anggaman ontan, a nisesengeg ed mandumaan iran opinyon, kuan na sakey a bokletan impalapag na Elim Pentecostal Church na Britanya: “Anggaman manisia kami ed malaknab a datak na saray ebenton misiglaotan ed ipapawil nen Katawan a Jesus . . . , niyabuloy so kawayangan ed pangipatalos na propesiya unong ed kumbiksyon na indibidual. Aawaten na dakel so aliwan-dogmatikon kipapasen, a siaanus a manalagar ed saray mismon ebenton mangiparungtal ed mapropetikon programa.”

Say impuyan a Salita na Dios, say Biblia, so estandarten kaukolan a panukatan tayo ed inkamatua na amin a sisisiaen. (2 Timoteo 1:13; 3:16, 17) Sirin, anto so ibabaga to nipaakar ed rapture?