Tobonbalo​—Antoy Gegemtanen Yo?

“Balet tainan ka ed saray ibibeg ya inougaw, tan tombo’ka ed kaptekan, pananisia, aro, kareenan, a miolop ka ed saray ontawag ed Katawan a sililinis so puso’ra.”​—2 TIMOTEO 2:22.

1. Anto so ilalo tayo parad saray kalangweran ed limog tayo?

INYABAWAG na dyaryon Dagen (Say Agew) na Suecon Pentecostal a “Saray Tasi nen Jehova so tugyopen na say grupo a manatalo lapud sankabalgan a bilang na balo iran membro ed kada taon tan walaay sankarakelan ya ulop na saray tobonbalo.” Palagi ta kabiangan kayo na sayan ulop na malinis, matakot-ed-Dios iran tobonbalo. Nayarin sikatayoy pinabaleg ed Kristianon dalan nanlapulad inkaugaw, odino nayarin nadngelan tan kinmiwas kayon mismo ed mensahe na Panarian. Antokaman so situasyon, maliket kami ed inkiwala yo ed limog mi. Tan manilalo kami a gemtanen yo so kursoy inkatunong, unong a ginawa na saray matoor a Kristianon tobonbalo nen inmunan siglo. Dugarugay impaneskribe na saray salita nen apostol Juan ed sikayo: “Ta mabiskeg kayo, tan say salita na Dios manayam ed sikayo, tan dinaeg yo so samay mauges.”​—1 Juan 2:14.

2. Antoran bengatla so manggawan mairap ed pangegemtan na matunong a kundang legan na “bulaklak na taon”?

² Dakel​—on, karaklan ed Kristiano iran tobonbalo natan so akatalindeg sumpad saray desdes na mundo. Anggaman ontan, naromog yon mairap so pansiansia ed ontan a kurso. Sano wala kayo ed “bulaklak na taon,” nalikna yon nalipos na balo tan alabas iran emosyon. (1 Corinto 7:36) Ontan met, nayarin liknaen yon ondaraak so belat na saray responsabilidad ed eskuelaan, diad abung, tan diad kongregasyon. Wala ni ingen so desdes manlapud si Satanas a Diablo a mismo. A determinadon napalikdoy dakel ni, pupuntiryaen toramay ompatnag a mainomay a natukso​—a singa ginawa to ed tanamanan na Eden. Nensaman, impaarap to so makaingganyon pakana to, aliwan diad matatatken, lalon makabat ya Adan, noagta ed malalangwer tan ag-eksperiensiadon bii, si Eva. (Genesis 3:1-5) Pigaran siglo ed saginonor, inusar nen Satanas so pareho iran taktika ed balo nin kongregasyon na Kristianos ed Corinto. Inkuan nen apostol Pablo: “Balet antakot ak, ompan lamang no, singa say uleg a tinilaan to si Eva ed kasiliban to, saray kanonotan yo naderal ira manlapu ed kalinewan tan kasimpitan ya mamaarap ed Cristo.”​—2 Corinto 11:3.

3, 4. Antoray arum ya uusaren nen Satanas a Diablo a pamalikdo ed kalangweran, tan diad anton posiblin pansumpalan?

³ Natan et nayarin mapaga met iray Kristianon atateng yo ed sikayo. Aliwan lapud nononoten dan onkikiling kayo ed marelmeng, balet amta ra diad eksperiensia a saray kalangweran so nagkalautlan mainomay a natukso ed “saray pangalot” nen Satanas. (Efeso 6:11, paimanod leksab, NW) Arawi ed kipatnag a makapataktakot, saray patit nen Satanas so ginawan nengneng toy lablabayen, kalkaliktan. Sisisilib ya ipaparungtal na telebisyon so materyalismo, bulgar a sekso, mabitabitar a karawalan, tan espiritismo bilang panligliwaan. Saray malangwer a kanonotan so nayarin napanoy bengabengatlan aliwan ‘matua, gagalangen, matunong, malinew, tan daydayewen.’ (Filipos 4:8) Say desdes na kaedaran so sananey a mabiskeg ya uusaren nen Satanas. Nayarin desdesen kayon maong na saray kaedaran pian mipakna kayo ed estiloy-panagbilay, panangawes, tan panag-ayos da. (1 Pedro 4:3, 4) Insulat na kolumnistay dyaryo a si William Brown: “No wala so sakey ya agrelihyoson Dios parad tinedyer, satan so Dios na inkapakna. . . . Say pagmaliw a duma manlapud saray kaedaran na sakey so sankaugsan a bengatlan nagawa parad sikato.” Impatua na sakey a Tasin bii ed Italya: “Ambaing ak a naamtaan na saray kaeskuelak a sakey ak a Tasi. Tan lapud amtak ya agmaliket si Jehova ed siak, siak so maermen tan dismayado.”

⁴ Agnapapalikdo​—kaliktan nen Satanas ya ipaarap kayo ed kaderal yo. Dakel a kalangweran a taga-paway so managmak ed kabalang na saray bilay da legan na baleg a kairapan lapud inabuloyan da so inkasikaran napalikdo. (Ezequiel 9:6) Say mogmon paraan ed kiliktar et say pangegemtan ed maptek.

Manbantay Sumpad Mauges a Pililimog

5, 6. (a) Antoran angat so nidungetan nen malangwer a Timoteo legan a manaayam ed Efeso? (b) Anton konseho so inter nen Pablo parad si Timoteo?

⁵ Satan so segek na simbawan inter nen apostol Pablo ed malangwer a Timoteo. Diad loob na masulok a samploy taon, akiulop si Timoteo ed si apostol Pablo ed saray misioneron impanbaroy to. Diad panaon a manlilingkor si Timoteo ed paganon syudad na Efeso, si Pablo so walad prisoan na Romano a manaalagar na ipapatey to. Legan a manasingger so ipatey to, andi duaruwan mapaga si Pablo no panon so ikurang nen Timoteo. Say Efeso so kabkabat a syudad lapud kayamanan, imoralidad, tan abeba ed moral a panligliwaan to, tan si Timoteo so andian lay tulong na maaron managbangat to.

⁶ Kanian sinulatan nen Pablo so “inararo [ton] anak” na onggendan: “Balet dia ed sakey ya abung a baleg, aliwa labat ya wala so saray vaso a balitok tan pilak, no ag met saray agawa ed kiew tan pitek; et saray arum sikara so kirayewan, tan saray arum makapabaing. Kanian no wala so mangogol ed inkasikato ed saraya, sikato naani sakey a vaso a kirayewan, apasantos, nitalaga ya ikana na makankien, sipaparaan ed ganagana ya gawa’n maabig. Balet tainan ka ed saray ibibeg ya inougaw, tan tombo’ka ed kaptekan, pananisia, aro, kareenan, a miolop ka ed saray ontawag ed Katawan a sililinis so puso’ra.”​—2 Timoteo 1:2; 2:20-22.

7. (a) Antoray ‘vaso a makapabaing’ ya impasakbay nen Pablo? (b) Panon na saray tobonbalo a niyaplika natan iray salita nen Pablo?

⁷ Kanian pinasakbayan nen Pablo si Timoteo ya anggan diad limog na kaparan Kristianos et walaray ‘vaso a makapabaing’​—sinansakey ya agkinmiwas a maptek. Kanian no say pilimog ed arum ya alanaan a Kristianos so makaderal ed si Timoteo, sirin agaylan makarisgo ed Kristianon tobonbalo natan so minumundon pililimog! (1 Corinto 15:33) Agkabaliksan na saya so pagmaliw ya agmakaaro ed saray kaeskuela yo. Balet nepeg yo so manasikaso ta pian agtanton napilanlanor ed sikara, anggan ompatnag a sikayoy manbukbukor no maminsan. Saya so mairap a tuloy. Kuan na sakey a biin taga-Brazil: “Mairap. Naynay ak ya iimbitaan na saray kaeskuelak ya onla ed saray party tan paspasen ya agmanepeg parad Kristianon tobonbalo. Ikuan dan: ‘Anto! Agka mila? Makulangkulang ka!’”

8, 9. (a) Panon a say pililimog, anggan diad saray singa maabig a taga-paway so mangiter na kapeligroan ed sakey a Kristiano? (b) Iner so pakaromogan yo na maabig a kakaaro?

⁸ Arum a minumundon tobonbalo so ompatnag a maong lapu labat ta ag-ira mansisigarilyo, mansasalitay mauges, odino mibibiang ed imoral a sekso. Anggaman ontan, no agda gegemtaney kaptekan, magmainomay da kayon impluensyaan ed saray silalaman a panagnonot tan awawey da. Sakey ni, kaonongay panparaan yo ed saray agmananisia? (2 Corinto 6:14-16) Siempre, saray espiritual ya estandarten aakbibiten yo so “kakulangkulangan” lambengat ed sikara! (1 Corinto 2:14) Kasin namantine yo so pikakaaro ra ya ag-iikokompromiso iray prinsipyo yo?

⁹ Kanian arawian yoray mauges a kalimog. Geteran so pililimog yo ed saray sinononot ed espiritual a Kristianos a peteg a mangaaro ed si Jehova. Alwaran yoray tobonbalon negatibo odino kritiko ed loob na kongregasyon. Legan na ibubulaslas yo ed espiritual, nayarin ondumay pilien yon kakaaro. Kuan na tinedyer a Tasin bii: “Walaan ak na balon kakaaro ed nanduruman kongregasyon. Inpamoria to ed siak ya agkaukolan iray minumundon kakaaro.”

Taynan Iray Mauges a Pilalek

10, 11. (a) Anto so kabaliksan na ‘tainan toray ibibeg ya inougaw’? (b) Panon na sakey ya ‘ibatikan so lawanan’?

¹⁰ Pinaseseg met nen apostol Pablo si Timoteo a ‘tainan toray ibibeg ya inougaw.’ Sano sikayoy malangwer, say pankaliktan ya onpopular, manliket, odino pamenek ed saray seksual a pilalek so singa kapilitan. No agnausisa, saratan a panpilalek so ompugta ed pankasalanan yo. Kanian inkuan nen Pablo a taynan iray makaderal a pilalek​—ombatik a kuanmono akapusta so bilay na sakey.a

¹¹ Alimbawa, say seksual a pilalek so mangipapaarap ed dakel a Kristianon tobonbalo ed espiritual a kadederal. Kanian maabig so gagala na Biblia ed pangibabaga to’d sikatayon ‘ibatikan so lawanan.’ (1 Corinto 6:18) No say laki tan bii so mankakarawan, mi-dadate, niyaplika ra iyan prinsipyo diad iyarawi ed makatukso iran sirkumstansya​—a singa say panbukbukor dan dua ed apartment odino diad akaparadan kotse. Say pakawalaan na kaulop (chaperon) so singano kadaanan la, balet ta satan so magmaliw a peteg a salimbeng. Tan anggaman matukoy so pangibalikas na panangaro diad saray salita tan kiwas, nepeg ya iletneg iray makatunongan a limitasyon ta pian naarawian so marutak a kondukta. (1 Tesalonica 4:7) Say panaynan ed pilalawanan et laktipen to met so iyarawi ed saray sine odino babantayan ed TV a nayarin managyat na mauges a pilalek. (Santiago 1:14, 15) No walaray imoral a panagnonot ya onloob ed kanonotan yo, umanen yo so tema na kanonotan yo. Manakar; mamasa; mankimey ed abung. Say pikakasi so nagkalautlan mabiskeg a tulong ed sayan pamaakaran.​—Salmo 62:8.b

12. Panon yon naaralan a gulaen so mauges? Iyilustra.

¹² Sankaimportantian, nepeg yon aralen a gulaen, busolen, tan dimlaen so mauges. (Salmo 97:10) Panon yon gulaen so bengatlan diad ununa et makapaliket odino kalkaliktan? Diad pannonot ed saray pansumpalan to! “Ag kayo komon nalingo; say Dios ag nayarin naludlurey. Ta say antokaman ya itanem na too satan met so anien to. Ta say mantanem na nipaakar ed laman ton dili, dia ed laman manani na kabolok.” (Galacia 6:7, 8) Sano natukson onsuko ed pilalek, isipen so babaleg a pansumpalan​—no panon iyan mamasakit ed si Jehova a Dios. (Ipareng so Salmo 78:41.) Isipen met so posibilidad na agkaliktan a panlukon odino kaalisan ed sakit, singa say AIDS. Nonoten so kaermenan tan panirap lapud pakaandian na dilin-respeto. Nayarin wala met iray manbayag iran pansumpalan. Aksobien na sakey a Kristianon bii: “Sikami nen masiken ko so walaan na seksual ya impirelasyonan ed arum a totoo sakbay ya akapankabat kami. Anggaman sikamin duay Kristiano natan, say apalabas a bilay mi ed sekso so lapuan na kolkolan tan imon ed panamaley mi.” Agmet lilingwanan so kabalang na saray teokratikon pribilihyo yo odino say posibilidad na pakaekal manlapud Kristianon kongregasyon! (1 Corinto 5:9-13) Kasin mas mabli so antokaman a maganganon panliket?

Pangegemtan na Maapit a Siglaotan ed si Jehova

13, 14. (a) Akin ya agmagenap a taynan so mauges? (b) Panon na sakey ya ‘ontombok a mangamta ed si Jehova’?

¹³ Anggaman ontan, agmagenap so itaynan ed mauges. Apaseseg met si Timoteo ya ‘ontombok ed kaptekan, pananisia, aro, kareenan.’ Ipapabitar toy impasyan kiwas. Mipadparan kinerew nen propetan Oseas ed agmatoor a nasyon na Israel: “Dago kayo tan ompawil itayo ed Jehova . . . tan ontombok itayo komon a mangamta ed Jehova.” (Oseas 6:1-3) Kasin ginawa yo so satan a gegemtan ed inkasikayon mismo? Lalanoren to so nagkalalo nen say basta iyaatendi ed saray miting tan piulop ed saray atateng yo ed lawak a serbisyo. Inpatua na sakey a Kristianon bii: “Pinabaleg ak na atateng ko ed katuaan, tan abautismoan ak ed asakbay ya edad. . . . Anggapo lawariy asaew kon miting tan anggapon balot so asaew ed panaglingkor ed kada bulan, balet agkon balot abayuboan so maapit a personal a siglaotan ed si Jehova.”

¹⁴ Aksobien met na sananey a tobonbalo a sikato met so sinmaew a mangamta ed si Jehova bilang Kaaro tan Ama, a mas momoriaen ton singa teoryan Espiritu. Sikato so naplag ed imoralidad tan nagmaliw ya agkasadon ina diad edad a 18. Agyo gagawaen so parehon lingo! ‘Ontombok a mangamta ed si Jehova,’ unong ya impaseseg nen Oseas. Diad pikakasi tan inagew-agew a panakar a kaibay Jehova, sikato so magmaliw a napanmatalkan a kaaro yo. (Ipareng so Miqueas 6:8; Jeremias 3:4.) “Sikato so . . . ag arawi ed sinansakey ed sikatayo,” no anapen tayo. (Gawa 17:27) Say regular a programa na personal a panagaral na Biblia so makana sirin. Say ontan a rutina so agnakaukolan a maarte odino kumplikado. “Inagew-agew a babasaen ko so Biblia ed loob na ngalngali 15 minuto,” kuan na malangwer a biin manngaran na Melody. Mangigetar na panaon a basaen so kada paway na Say Panag-Bantayan tan Awake! Manparaan parad saray miting ed kongregasyon ta “pian manaayatan itayo ed aro tan dia ed saray maabig a gawa.”​—Hebreos 10:24, 25.

Lukasan so Pusom ed Atateng Mo

15. (a) Akin a no maminsan et mairap a tuloken iray atateng na sakey? (b) Akin a say katutulok so gendagendat a parad pankaabigan na tobonbalo?

¹⁵ Saray matakot-ed-Dios ya atateng so nayarin magmaliw a lapuan na tuan tulong tan suporta. Balet imanoen so betang a nepeg yon gawaen: “Sikayon anak, ontolo’kayo ed saray kaatatengan yo dia ed Katawan; ta saya sikato so matonong. Igalang mo so amam tan inam (a sikato so manonan gangan ya wala so sipan to). Ta makapaabig ed sika tan makapanbilay ka na andukey dia ed tapew na dalin.” (Efeso 6:1-3) Tuan ontatatken kayo tan nayarin malabay na nagkalalon kawayangan. Nayarin ondaraak so pakabibidbir yo met ed saray limitasyon na atateng yo. “Saray atooan ya atateng tayo,” inaksobi nen apostol Pablo, “so makagawa lambengat ed no antoy nonoten dan sankaabigan.” (Hebreos 12:10, The Jerusalem Bible) Anggaman kuan, diad pangunsidera ed amin a gungguna, siansian pankaabiganan yo so itulok ed sikara. Inaro kayo na atateng yo tan mas kabkabat da kayo nen say siopaman. Anggaman agkayo lawas mipakna ed sikara, gendagendat a nononoten day pankaabiganan yo. Akin a barangkaan iray sagpot da diad pamabaleg da’d sikayo ed “kadudusa tan panamilin na Katawan [Jehova, NW].” (Efeso 6:4) Peteg, a “modmoraen [na makulangkulang] so panangibangat na ama to.” (Uliran 15:5) Say makabat a tobonbalo so mamidbir ed autoridad na ateng to tan mangiter na suston panagrespeto.​—Uliran 1:8.

16. (a)Akin ya agmakabat parad saray tobonbalo ya iyamot iray problema ra ed atateng da? (b) Anto so nayarin gawaen na saray tobonbalo pian napaaligwas so pitatalosan ed saray atateng da?

¹⁶ Ilaktip to itan so pangipatua ed atateng yo, ipaamta ed sikara no walaan kayo na saray problema, a singa say panduaruwa ed katuaan odino niiyan ed kuestionablen kondukta. (Efeso 4:25) Say pangiyamot ed saratan a makapagonigon a situasyon ed atateng so mamalesay dakel nin problema. (Salmo 26:4) Iyaliling lan agpanggunaetan a tuloy na atateng so mitalosan. “Agbalot akiyurong a mitongtong ed siak si nanay,” inreklamo na malangwer a bii. “Andian ak na tepel a mangibaga’d naliliknak lapud natatakot ak ompan balawen to ak.” No wala kayo’d mipadparan situasyon, sikakabat a pilien yo so dugan panaon pian ipaamta ed atateng yo so liknaan yo. “Ana’ko, iter mo ed siak so pusom,” ipaseseg na Uliran 23:26. Salien yon maparanay a singbaten iray kapagaan yo ed sikara, sakbay ya onlesa iray seryoson problema.

Mantultuloy a Gegemtanen so Inkatunong!

17, 18. Anto so ontulong ed tobonbalon mantultuloy ed gegemtan to ed inkatunong?

¹⁷ Diad kasampotan na komaduan sulat to, sinimbawa nen Pablo si Timoteo: “Mansiansia ka ed saray bengatla ya inaral mo tan sinisiam.” (2 Timoteo 3:14) Ontan met so nepeg a gawaen yo. Agyo aabuloyan so siopaman odino antokaman a manukso ed sikayon onarawi manlapud pangegemtan yoy inkatunong. Say mundo nen Satanas​—pati ed amin iran panangingganyo to—​so napno na karelmengan. Agmabayag satan tan amin a kabiangan to so manirap ed kadederal. (Salmo 92:7) Determinadon agnapideral a kaiba na ulop nen Satanas.

¹⁸ Sinononot ed sayan gagala, nepeg a sikayo so naynay a manusisa ed saray kalat, pilalek, tan interes yo. Tepetan yo so inkasikayo, ‘Kasin pansiasiansiaen koy atagey ya estandarte na panagsalita tan kondukta sano agak nanenengneng na atateng ko tan saray membro na kongregasyon? Anton nengneng na kakaaro so pipilien ko? Kasin saray minumundon kaedaran so mangiwawanwan ed panangawes tan panag-ayos ko? Antoran kalat so inletneg ko parad inkasiak? Kasin pilalek kon tuloy so iloob ed sigpot-panaon a ministeryo​—odino ed karera diad ompapatey a sistemay bengabengatla nen Satanas?

19, 20. (a) Akin a nepeg ya agliliknaen na tobonbalo ya anggapoy nagawaan to ed saray kakaukolanen nen Jehova? (b) Diad antoran probisyon a nagunggunaan na saray tobonbalo so inkasikara?

¹⁹ Angangko ta namoria yo so pankaukolan na pigaran pananguman ed panagnonot yo. (2 Corinto 13:11) Agyo liliknaen ya anggapoy nagawaan. Tandaan, ag-iilaloan nen Jehova ed sikayo so labas nen say makatunongan. Tinepet nen propetan Miqueas: “Anto ta so kaokolan nen Jehova ed sika, no ag say mangawa lambengat na inkatunong, tan mangaro na kaabigay linawa, tan manakar a maoy-oyamo ed Dios mo?” (Miqueas 6:8) Saya so agtanton mairap no usaren yoray probisyon nen Jehova ya ontulong ed sikayo. Mansiansian maapit ed emosyon tan mental ed atateng yo. Regular a milimog ed Kristianon kongregasyon. Nagkalautlan panggunaetan a mikabkabat ed saray mamatatken ed kongregasyon. Sikaray sinononot nipaakar ed bunigas yo tan nayarin magmaliw a lapuan na suporta tan ligliwa. (Isaias 32:2) Manuna ed amin, bayuboan so maapit, ampetang a siglaotan ed si Jehova a Dios. Ikdan to kayo na biskeg tan say determinasyon pian gegemtanen yo so maptek!

²⁰ Anggaman ontan, napapakapuy na arum a tobonbalo iray sagpot da ed ibulaslas ed espiritual diad itatalineng ed mabanday a musika. Say onggendan ya artikulo so mangiter na nikabkabiig ya imano ed sayan tema.

[Saray paimano ed leksab]

Kasin Nanonotan Yo?

◻ Akin a saray tobonbalo so nagkalautlan magmainomay a natukso ed saray “masilib a kiwakiwas” nen Satanas?

◻ Akin a say maapit a pililimog ed saray minumundon tobonbalo so mapeligro?

◻ Panon yon nibatikan so seksual ya imoralidad?

◻ Panon yon nagegemtan so maapit a siglaotan ed si Jehova?

◻ Akin ya importante so pitalosan ed saray atateng yo?

[Litrato ed pahina 16]

Saray mankakarawan so sikakabat a mangamta ed balang sakey diad saray lugar, a singa say panag-ice skating, ya ag-arawi manlapud arum a totoo