Onkiwas ed Saray Sipan na Dios Diad Pangagamil na Pananisia
“Niiter ed sikatayo [nen Jehova a Dios] so sankablian tan ankabaleg a sipasipan.”—2 PEDRO 1:4.
1. Anto so manggawa ed sikatayon mangagamil na tuan pananisia?
KALIKTAN nen Jehova a mangagamil tayo na pananisia ed sipasipan to. Ingen, “angapo so pananisia ra.” (2 Tesalonica 3:2) Sayan kalidad so bunga na masanton espiritu, odino aktibon puersa na Dios. (Galacia 5:22, 23) Kanian, saramay iwawanwan lambengat na espiritu nen Jehova so makaagamil na pananisia.
2. Anto so “pananisia” unong ed si apostol Pablo?
2 Balet anto so pananisia? Saya so tatawagen nen apostol Pablo a “panangipatnag ed saray bengatla ya ag ni anengneng.” Say ebidensya na sarayan agnanengneng a kapetegan so ontanlan mabiskeg a misimbangan so pananisia ed satan. Nikuan met a say pananisia so “ag panduarua ed saray bengatla ya iilaloan” lapud saramay walaan na onian kalidad so walaan na garantiya ya amin ya insipan nen Jehova a Dios so ontanlan peteg a singa met la asumpal.—Hebreos 11:1.
Pananisia tan Saray Sipan nen Jehova
3. Anto so naeksperiensia na alanaan a Kristianos no mangagamil ira na pananisia?
3 Ta pian napaliket si Jehova, nepeg tayon mangagamil na pananisia ed sipasipan to. Impanengneng iya nen apostol Pedro diad komaduan impuyan a sulat to, a nisulat ed ngalngali 64 K.P. Imparungtal to a no mangagamil na pananisia iray kapara ton alanaan a Kristianos et nanengneng da so kasumpalan na “sankablian tan ankabaleg a sipasipan” na Dios. Bilang pansumpalan et “minabang [ira] ed inkadios to” bilang kaiban mananawir nen Jesu-Kristo ed mangatatawen a Panarian. Tekep na pananisia tan tulong nen Jehova a Dios, akabatik la ra ed panangaripen na abulok iran ugali tan ag-agamil na sayan mundo. (2 Pedro 1:2-4) Tan isipen pa labat! Saramay mangaagamil na tuan pananisia so mangagayaga ed parehon anggapoy kaparan kawayangan natan.
4. Antoran kalidad so nepeg ya itekep tayo ed pananisia tayo?
4 Say pananisia ed saray sipan nen Jehova tan say otang a linawa lapud inter-Dios a kawayangan tayo so nepeg a mamakiwas ed sikatayon gawaen so anggaay nayarian pian magmaliw ya uliran a Kristianos. Inkuan nen Pedro: “Diad panamegley na ikikiwas yo ed magunaet a sagpot yo, itekep ed pananisia yo so say kaabigan, dia ed kaabigan yo say pikakabat, dia ed pikakabat yo say dangka, dia ed dangka yo say panagsungdo, dia ed panagsungdo yo say maridios a debosyon, dia ed maridios a debosyon yo say kaoyamoay sanaagi, dia ed kaoyamoay sanaagi say aro.” (2 Pedro 1:5-7, NW) Diad ontan et iikdan itayo nen Pedro na listaan a makabat ya ipatlep tayo. Nengnengen tayo pan maapit irayan kalidad.
Makana Iran Kabiangan na Pananisia
5, 6. Anto so kaabigan, tan panon tayon nitekep iya ed pananisia tayo?
5 Inkuan nen Pedro a say kaabigan, pikakabat, dangka, panagsungdo, maridios a debosyon, kaoyamoay sanaagi, tan aro so kaukolan ya itekep ed balang sinansakey tan ed pananisia tayo. Pasyaen tayon kimeyan ta pian sarayan kalidad so magmaliw a makanan kabiangan na pananisia tayo. Alimbawa, say kaabigan so aliwan kalidad ya ipanengneng tayon biig ed pananisia. Ipapabitar nen leksikograpon W. E. Vine a diad 2 Pedro 1:5, “say kaabigan so niaarum bilang importantin kalidad diad pangagamil na pananisia.” Balang sakey ed arum niran kalidad a sinalambit nen Pedro so kaukolan met a kabiangan na pananisia tayo.
6 Ununa, nepeg tayon itekep so kaabigan ed pananisia tayo. Say pagmaliw a walaan na kaabigan et kabaliksan to so panggawa na maong ed imaton na Dios. Ta say salitan Griegon nipatalos dia a “kaabigan,” so uusaren na arum a bersyon a “kamaongan.” (New International Version; The Jerusalem Bible; Today’s English Version) Say kaabigan so mamayubo ed sikatayon onarawi ed panggawa na mauges odino pamasakit ed kapara tayon too. (Salmo 97:10) Saya met so manadagdag ed makpel a panggawa na maong parad espiritual, pisikal, emosyonal a kagunggunaan na arum.
7. Akin ya itekep tayo so pikakabat ed pananisia tan kaabigan tayo?
7 Akin a sasagyaten itayo nen Pedro ya itekep so pikakabat ed pananisia tan kaabigan tayo? Bueno, legan a nipapaarap tayo ed saray balon angat ed pananisia tayo, nakaukolan tayo so pikakabat no labay tayon nibiig so maptek ed mauges. (Hebreos 5:14) Diad panamegley na panag-aral na Biblia tan eksperiensia ed panangiyaplika ed Salita na Dios tan diad pangaagamil na praktikal a kakabatan ed inagew-agew a kabibilay, naaruman tayo so pikakabat tayo. Diad ontan et saya so manggawa ed sikatayon mamasiansia ed pananisia tayo tan mantultuloy a manggawa na maabig sano sikatayo so nisilong ed subok.—Uliran 2:6-8; Santiago 1:5-8.
8. Anto so dangka, tan panon itan a mitukoyan ed panagsungdo?
8 Ta pian natulongan tayon mangabet ed saray subok tekep na pananisia, kaukolan tayon tekepan so pikakabat tayo na dangka. Say salitan Griego parad “dangka” so mangipapatnag na abilidad a pan-adya ed inkasikatayo. Sayan bunga na espiritu na Dios so ontutulong ed sikatayon mamanlong ed kanonotan, salita, tan kondukta. Diad pantultuloy a pangagamil na dangka, nitetekep tayo ed satan so panagsungdo. Say terminon Griego parad “panagsungdo” so mankabaliksan na makpel a pansiansian malet, aliwan maermen ya impanlupa lapud agnaarawian a kairapan. Akapansungdo ed panamairapan a kiew si Jesus lapud gayagan niiyan ed arap to. (Hebreos 12:2) Say inter-Dios a biskeg a nisiglaot ed panagsungdo so mamapabiskeg ed pananisia tayo tan ontutulong ed sikatayon mangayaga ed kairapan, barangkaan so tukso, tan arawian so pikokompromiso sano napapasegsegang.—Filipos 4:13.
9. (a) Anto so maridios a debosyon? (b) Akin a nepeg tayon tekepan na maridios a debosyon so kaoyamoay sanaagi? (c) Panon tayon natekepan na aro so kaoyamoay sanaagi tayo?
9 Dia ed panagsungdo tayo et kaukolan ya itekep tayo so maridios a debosyon—panamagalang, panagdayew, tan panaglingkor ed si Jehova. Ombulaslas so pananisia tayo legan ya aagamilen tayo so maridios a debosyon tan nanengneng no panon a pidedenengan nen Jehova so baley to. Ingen, ta pian nipanengneng so inkamaridios, kaukolan tayo’y kaoyamoay sanaagi. Ta say, “ag mangaro ed agi to, anta anengneng to, ag to nayarian ya aroen so Dios ya ag to anengneng.” (1 Juan 4:20) Say kapusoan tayo so nepeg a mamakiwas ed sikatayon mangipanengneng na tuan panangaro ed ariripen nen Jehova tan anapen so pankaabigan da ed amin a panaon. (Santiago 2:14-17) Balet akin a sikatayo so binagaan a tekepan na aro so kaoyamoay sanaagi tayo? Mabitar a labay ya ibaga nen Pedro a nepeg tayon ipanengneng so panangaro ed amin a totoo, aliwa lambengat ed agagi tayo. Sayan aro so nagkalautlan nipapanengneng diad panangipulong na maong a balita tan pananulong ed totoo diad espiritual a paraan.—Mateo 24:14; 28:19, 20.
Nandumaan Iran Epekto
10. (a) Panon so ikiwas tayo no nitekep ed pananisia tayo so kaabigan, pikakabat, dangka, panagsungdo, maridios a debosyon, kaoyamoay sanaagi, tan aro? (b) Anto so nagawa no say mankuan a Kristiano so onkulang ed sarayan kalidad?
10 No itekep tayo ed pananisia tayo so kaabigan, pikakabat, dangka, panagsungdo, maridios a debosyon, kaoyamoay sanaagi, tan aro, sikatayo’y mannonot, mansalita, tan onkiwas unong ed inabobonan-na-Dios iran paraan. Diad kasuniyan to, no say sakey a mankuan a Kristiano so onsaew a mangipatnag ed sarayan kalidad, sikato’y magmamaliw a bulag ed espiritual. Sikato so “bulag, nanenengneng to labat so asinger” manlapud Dios tan nalilingwanan ton sikato’y nilinisan la’d apalabas iran kasalanan. (2 Pedro 1:8-10; 2:20-22) Agtayon balot komon onsaew diad satan a paraan tan diad ontan et nabalang so pananisia tayo ed saray sipan na Dios.
11. Anto so makanepegan a nailaloan tayo ed saray matoor ya alanaan?
11 Saray matoor ya alanaan a Kristianos so walaan na pananisia ed sipasipan nen Jehova tan panggugunaetan dan ikdan na panamaseguro so impanawag tan impanpili to’d sikara. Anggan walaray pakatiroran ed basbas da, nailaloan tayon mangipanengneng ira na maridios iran kalidad. Parad saray matoor ya alanaan ‘masolosolok so kiabuloy da ed iloloob ed andi angaan a nanarian nen Jesu-Cristo’ diad panamegley na kioli ra ed espiritun bilay diad tawen.—2 Pedro 1:11.
12. Panon tayon talosan iray salita ed 2 Pedro 1:12-15?
12 Amoria nen Pedro a sikatoy asingger lan ompatey, tan inilaloan ton naawat to diad kaunoran so kioli ed mangatatawen a bilay. Bangta sikato so mabilay ed “sayan tabernaculo”—say atooan a laman to—nanggunaetan ton pinabiskeg so pananisia na saray kapananisiaan tan niliing tora diad impangipanonot na saray bengatlan nakakaukolan parad madibinon pabor. Kayari impatey to, saray agagin lalaki tan bibii nen Pedro ed espiritual so napabiskeg ed pananisia ra diad pakanonot ed saray salita to.—2 Pedro 1:12-15.
Pananisia ed Mapropetikon Salita
13. Panon ya angitarya so Dios na manamabiskeg-pananisian pantasi nipaakar ed isasabi nen Kristo?
13 Say Dios a mismo so angiter na manamabiskeg-pananisian pantasi nipaakar ed inkapeteg na isasabi nen Jesus “a napno’y pakayari tan baleg a gloria.” (Mateo 24:30; 2 Pedro 1:16-18) Kulang na ebidensya, saray paganon saserdote so angi-estorya na tilan bengabengatla nipaakar ed dirios da, bangbalet di Pedro, Santiago, tan Juan so tasin akanengneng ed karlangan nen Kristo diad impanguman a nengneng. (Mateo 17:1-5) Sikato so anengneng dan nigloria tan nadngel da so tanol na dilin boses na Dios a mamibidbir ed si Jesus bilang say bogbogtong ya Anak To. Saman a panamidbir tan say masnag ya inyapireng a nipagamor nensaman ed Kristo so panangiter ed sikato na galang tan gloria. Nisesengeg ed sayan madibinon pasingawey, saman a lugar so tinawag nen Pedro, angangko ta diad toktok na Hermon a “say masanton palandey.”—Ipareng so Exodo 3:4, 5.
14. Panon a say pananisia tayo so naapektaan na say impanguman a nengneng nen Jesus?
14 Panon a say impanguman a nengneng nen Jesus so mangapekta’d pananisia tayo? Inkuan nen Pedro: “Wala met ed sikami so salita na profecia a lalo’n maando; et maong no imatleken yo a singa bilang sakey a silewan a onsisinag ed pasen ya ambilunget, anga ed ipelnak na kabkabuasan, tan say bitewen ed kabuasan onpelnak ed kapusoan yo.” (2 Pedro 1:19) Mapatnag ya aglabat laktipen na “salita na profecia” iray propesiya na Hebreon Kasulatan nipaakar ed Mesias noag ontan met ed balikas nen Jesus a sikato so onsabi a “napno’y pakayari tan baleg a gloria.” Panon sirin a say salita so ‘ginawan lalo’n maando’ diad panamegley na say impanguman a nengneng [nen Jesus]? Satan ya ebento so amaneknek ed mapropetikon salita nipaakar ed maglorian isasabi nen Kristo a walaay pakayari ed Panarian.
15. Anto so nalalanor diad panangimano ed mapropetikon salita?
15 Pian napabiskeg so pananisia tayo, nepeg ya imanoen tayo so mapropetikon salita. Lalanoren na saya so panaral ed satan a salita, paningbat ed satan ed saray Kristianon miting, tan pangiyaplika ed konseho to. (Santiago 1:22-27) Abuloyan tayon magmaliw itan a “sakey a silew a manliwawa ed ambilunget a pasen,” a silewan toray kapusoan tayo. (Efeso 1:18) Diad ontan lambengat a paraan a sikatayoy niwanwan anggad say “kabontatala,” odino say “masnag a dia ed kabuasan,” si Jesu-Kristo, so mangiparungtal ed inkasikato dia ed gloria. (Apocalipsis 22:16) Satan a pasingawey so mankabaliksan na kadederal parad saray andiay pananisia tan bendisyon parad saramay mangaagamil na pananisia.—2 Tesalonica 1:6-10.
16. Akin a makapanisia tayo ya amin a mapropetikon sipan diad Salita na Dios so nasumpal?
16 Saray propeta na Dios so aliwa labat a matudion totoo a nanggawa na saray makabat a panangipasakbay, ta inkuan nen Pedro: “Angapo so inprofeta a sulat ya inpatpatalos ya indumaduma. Ta angapo so profecia a nanlapu ed linawa na too, no ag saray totoo nansalita ra a nanlapu ed Dios, diad inpanenieg ed sikara na Espiritu Santo.” (2 Pedro 1:20, 21) Alimbawa, inkuan nen David: “Say Espiritu nen Jehova nansalita ed panamegley ko.” (2 Samuel 23:1, 2) Tan insulat nen Pablo: ‘Amin a Sulat so inpuyan na Dios.’ (2 Timoteo 3:16) Lapud saray propeta na Dios so apuyanan diad panamegley na espiritu to, makapanisia tayo ya amin a sipan ed Salita to so nasumpal.
Sikaray Awalaan na Pananisia ed Sipasipan na Dios
17. Anton sipan so letnegan na pananisia nen Abel?
17 Saray sipan nen Jehova so letnegan parad pananisia na ‘baleg a lurem’ na tastasi to sakbay na panaon-Kristiano. (Hebreos 11:1–12:1) Singa bilang, si Abel so walaan na pananisia ed sipan na Dios nipaakar ed sakey a “bini” a sugatan to so “uleg” ed ulo. Wala so prueba ed inkasumpal na sintinsya na Dios ed atateng nen Abel. Diad paway na Eden, si Adan tan say pamilya to so angan na tinapay diad dilin linget da lapud say nisamban dalin so amawala lambengat na dikarika tan satsabitan. Nayarin naimano nen Abel so alabas a pankaliktan nen Eva ed masiken to tan anengneng ton sikato’y dominado nen Adan. Seguradon sinalita to’y panpasakit ed impanlukon to. Tan say lolooban ed tanamanan na Eden so binantayan na saray kerubin tan say mantelektelek a mandarlang a kampilan. (Genesis 3:14-19, 24) Amin na saya so manibukel ed “panangipatnag” a mamapaseguro ed si Abel ya onsabi so kililiktar diad panamegley na insipan a Bini. Diad inkiwas tekep na pananisia, si Abel so angisaklang ed Dios na bagat ya apaneknekan a babaleg so kablian to nen say imbagat nen Cain.—Hebreos 11:1, 4.
18, 19. Diad antoran dalan a si Abraham tan Sara so angagamil na pananisia?
18 Saray patriarka a di Abraham, Isaac, tan Jacob so awalaan met na pananisia ed saray sipan nen Jehova. Si Abraham so angagamil na pananisia’d sipan na Dios ya amin a pamilya ed dalin so nabendisyonan ed inkasikara diad panamegley to tan say bini to so naikdan na dalin. (Genesis 12:1-9; 15:18-21) Say ilalak ton si Isaac tan say apo ton Jacob so “mitawir ed saman met a dilin sipan.” Lapu ed pananisia si Abraham so “nanayam a singa sankaili ed dalin ya insipan” tan aalagden to so “baley ya wala so cimiento to [syudad a walaan na saray peteg a letnegan, NW],” say mangatatawen a Panarian na Dios a diad silong na satan et sikato so napaoli ed bilay diad dalin. (Hebreos 11:8-10) Kasin walaan kayo na mipadparan pananisia?
19 Say akulaw nen Abraham, si Sara, so ngalngali 90 años la tan talagan linmabas la ed taon na panaglukon sanen sikato so angagamil na pananisia ed sipan na Dios tan naikdan na pakayarin “mangilokon na sakey ya anak” tan angiyanak ed si Isaac. Kanian, manlapud si 100-años ya Abraham, a “singa la inatey” no nipaakar ed panag-ilalak, so diad kaunoran et “pinmaway so karaklan ya ag nabilang a singa saray bitewen.”—Hebreos 11:11, 12; Genesis 17:15-17; 18:11; 21:1-7.
20. Anggaman ag-anengneng na saray patriarka so kumpleton kasumpalan na saray sipan na Dios nensaman, anto so ginawa ra?
20 Saray matoor a patriarka so inatey ya agda anengneng so kumpleton impakasumpal na sipasipan na Dios ed sikara. Ingen, “anengneng da [saray nisipan a bengatla] tan sikara so inbano ra nanlapu ed arawi, tan inpatua’ra a sikara so sankaili tan manaakar ed tapew na dalin.” Dakel a kailalakan so linmabas sakbay ya akayarian na ilalak nen Abraham so Insipan a Dalin. Anggaman ontan, diad interon bilay da, saray matakot-ed-Dios a patriarka so angagamil na pananisia ed sipasipan nen Jehova. Lapud agdan balot abalang so pananisia, sikara so asingger lan napaoli ed bilay diad mangaraldalin a sakup na “syudad” ya intarya na Dios parad sikara, say Mesianikon Panarian. (Hebreos 11:13-16) Diad mipadparan dalan, lapud pananisia sikatayo so makapansiansian matoor ed si Jehova anggano agtayo nanengneng so tampol a kasumpalan na amin a makapakelaw a sipasipan to. Say pananisia tayo met so mamakiwas ed sikatayon ontulok ed Dios, a singa ginawa nen Abraham. Tan unong a sikato so angipasa na espiritual a tawir ed ilalak to, ontan met a natulongan tayoray anak tayo a mangagamil na pananisia ed mablin sipasipan nen Jehova.—Hebreos 11:17-21.
Say Pananisia so Makana Parad Saray Kristiano
21. Ta pian naabobonan na Dios natan, anto so nepeg a niarum ed pangagamil tayo na pananisia?
21 Siempre, wala so nagkalalo ni ed pananisia nen say pakawalaan labat na talek ed kasumpalan na sipasipan nen Jehova. Diad interon awaran na too, kapilitan so pangagamil na pananisia ed Dios diad nambabangil a dalan no kaliktan tayon pangayagaan so panangabobon to. Impabitar nen Pablo a “no anggapo so pananisia ag nayarin paliketen [si Jehova a Dios]: ta say ondago ed Dios nakaokolan a sisiaen to ya wala, tan sikato so niiyan a mananumang ed saray mananap ed sikato.” (Hebreos 11:6) Ta pian naabobonan nen Jehova natan, say sakey a too so nepeg a mangagamil na pananisia ed si Jesu-Kristo tan ed dondon bagat ya intarya na Dios diad panamegley to. (Roma 5:8; Galacia 2:15, 16) Kapara iman ed inkuan nen Jesus a mismo: “Ta ontan la’y inpangaro na Dios ed mundo, ya inter to so bogbogtong ya Anak to, pian siopaman a manisia ed sikato agnatawtaw, no ag ingen wala so bilay to’n andi angaan. Say manisia ed Anak wala’y bilay ton andi angaan; balet say agmangonod ed Anak ag to nanengneng so bilay, say sanok ingen na Dios so manayam ed sikato.”—Juan 3:16, 36.
22. Say Mesianikon Panarian so mangitarok na kasumpalan ed anton sipan?
22 Si Jesus so walaan na makanan betang diad pananumpal ed sipasipan na Dios nipaakar ed Panarian ya ipipikasi na Kristianos. (Isaias 9:6, 7; Daniel 7:13, 14; Mateo 6:9, 10) Singa impanengneng nen Pedro, pinaneknekan na impanguman a nengneng [nen Jesus] so mapropetikon salita’d isasabi nen Jesus a walaay pakayari tan gloria na Panarian. Itarok na Mesianikon Panarian so kasumpalan na sananey nin sipan na Dios, lapud insulat nen Pedro: “Alagden tayo so saray tawen a balo tan dalin a balo, a sikara so pana-ayaman na katunongan.” (2 Pedro 3:13) Sakey a mipadparan propesiya so asumpal sanen saray akautibon Judio diad Babilonia so nipawil lamet ed dilin-dalin da nen 537 K.K.P. ed silong na gobierno a say gobernador et si Zerubabel tan si Josue so atagey a saserdote. (Isaias 65:17) Bangbalet tinukoy nen Pedro so sakey ya arapen a panaon sano “saray tawen a balo”—say mangatatawen a Mesianikon Panarian—so manguley ed “sakey a balon dalin,” say matunong a sosyedad na toon manbibilay ed sayan globo.—Ipareng so Salmo 96:1.
23. Antoran tepet nipaakar ed kaabigan so ontumbok a singbaten tayo?
23 Bilang matoor iran ariripen nen Jehova tan papatumbok na inadaron Anak to, si Jesu-Kristo, panpipilalekan tayo so insipan a balon mundo na Dios. Kabat tayon asingsingger la itan, tan walaan tayo na pananisia ya amin ed mablin sipan nen Jehova so nasumpal. Ta pian makapanakar a naabobonan ed imaton na Dios tayo, nepeg tayon pabiskegen so pananisia tayo diad pangitekep na kaabigan, pikakabat, dangka, panagsungdo, maridios a debosyon, kaoyamoay sanaagi, tan aro ed pananisia tayo.a Diad sayan bekta, nayarin nitepet, Panon tayon nipanengneng so kaabigan? Tan panon a say pagmaliw tayon maabig so mangungguna’d sikatayo tan ed arum, nagkalautla’d saray kalimog tayon Kristianos, a kinmiwas ed sipasipan na Dios diad pangaagamil na pananisia?
[Paimano ed leksab]
a Say pananisia tan kaabigan so nasisingbat ed sayan paway na Say Panag-Bantayan. Say pikakabat, dangka, panagsungdo, maridios a debosyon, kaoyamoay sanaagi, tan aro so nagkalalon nakunsidera ed arapen iran paway.
Antoray Ebat Yo?
◻ Anto so labay ya ibaga na “pananisia”?
◻ Unong ed 2 Pedro 1:5-7, antoran kalidad so nepeg ya itekep ed pananisia tayo
◻ Anto so nepeg ya epekto na impanguman a nengneng nen Jesus ed pananisia tayo?
◻ Antoran alimbawa na pananisia so impanengneng di Abel, Abraham, Sara, tan arum ni ed akauna iran panaon?
[Litrato ed pahina 15]
Kasin amta yo no panon a makaapekta ed pananisia na sakey a too so impanguman a nengneng nen Jesus?