Say Panangukom nen Jehova Sumpad Saray Palson Managbangat
“Ed saray profeta na Jerusalem akanengneng ak met na sakey a makapakebiew a bengatla, sikara akikalogoran ira, tan manakar ira ed tilatila . . . Sikara ya amin magmaliw ira ed siak a singa Sodoma, tan saray manaayam ed sikato a singa say Gomorra.”—JEREMIAS 23:14.
1. Akin a say sakey a manggagawa na madibinon panangibangat so walaan na ambelat a tuloy a responsabilidad?
SIOPAMAN a manggagawa ed madibinon panangibangat so walaan na ambelat a tuloy a responsabilidad. Ipapasakbay na Santiago 3:1: “Agagik ira, agkayo komon magmaliw a dakel a bumabangat, bangta amta tayo ya akoen tayo naani ambelbelat a dusa.” On, saray managbangat na Salita na Dios so walaan na nagkalalon ambelat a responsabilidad ed pangisaklang na naabobonan a pikuekuentaan nen say saray Kristiano ed inkalapagan. Anto so kabaliksan na saya para’d saraman so napapaneknekan a palson managbangat? Imanoen tayo so kipapasen ed agew nen Jeremias. Nanengneng tayo no panon a satan so mangireretrato ed nagagawa natan.
2, 3. Anton panangukom so inter nen Jehova ed panamegley nen Jeremias no nipaakar ed palso iran managbangat na Jerusalem?
2 Nen 647 K.K.P., nen koma-13 a taon na uley nen Arin Josias, si Jeremias so inganggan bilang propeta nen Jehova. Si Jehova so walaan na reklamo sumpad Juda, kanian imbaki to si Jeremias pian paiyabawag itan. Saray palson propeta na Jerusalem, odino managbangat, so manggagawa na “[saray] makapakebiew a bengatla” ed imaton na Dios. Say inkauges da so mapalalon tuloy ya impareng na Dios so Jerusalem tan Juda ed Sodoma tan Gomorra. Isasalaysay na Jeremias kapitulo 23 so nipaakar ed saya. Onia so ibabaga na Jer 23 bersikulo 14:
3 “Ed saray profeta na Jerusalem akanengneng ak met na sakey a makapakebiew a bengatla, sikara akikalogoran ira, tan manakar ira ed tilatila; tan pabiskegen da so lima na saray mangagawa na mauges, ta pian angapo so ompawil a manlapu ed inkauges to. Sikara ya amin magmaliw ira a singa Sodoma, tan saray manaayam ed sikato a singa say Gomorra.”
4. Panon a nipareng so inkauges ed moral ya alimbawa na saray managbangat ed Jerusalem ed Kakristianoan natan?
4 On, sarayan propeta, odino managbangat, so angipanengneng na mauges ya alimbawa ed moral, diad tua et amaseseg ed totoon manggawa met na ontan. Imanoen iray kipapasen ed Kakristianoan natan! Agta saraya so kaparan tuloy na saramay kipapasen ed agew nen Jeremias? Natan aabuloyan na klero iray mikakaluguran tan homoseksual a mansiansia ed kipapasen da bilang membro na klero tan aabuloyan da ni ingen iran mangimaton ed saray serbisyo ed simbaan. Kasin pankelawan ni a dakdakel a membro na iglesia so imoral met?
5. Akin a say imoral a kipapasen na Kakristianoan so mapalalo ni nen say Sodoma tan Gomorra?
5 Impareng nen Jehova iray manaayam ed Jerusalem ed saraman so walad Sodoma tan Gomorra. Balet say imoral a kipapasen na Kakristianoan so mapalalo ni nen say Sodoma tan Gomorra. On, saya so nagkalalo nin makasalanan ed imaton nen Jehova. Saray managbangat to so manusumlang ed Kristianon moral a ganggan. Tan saya so mangidadalangirang na kipapasen na panangipaabeba ed moral a walaray makatangguyor a makaderal ed amin a nengneng na gawan-marelmeng. Malaknab lan tuloy iyan kipapasen ed moral a say inkauges natan so ipapasen a normal.
‘Manaakar Ira ed Inkatila’
6. Anto so imbaga nen Jeremias nipaakar ed inkauges na saray propeta ed Jerusalem?
6 Imanoen natan no anto so ibabaga na Jer 23 bersikulo 14 nipaakar ed saray propeta ed Jerusalem. “Manakar ira ed tilatila.” Tan diad kaunoran a kabiangan na Jer 23 bersikulo 15 so mangibabaga: “Ta nanlapu ed saray profeta na Jerusalem pinmaway so agpangingalngalep [apostasya, NW] ed Dios ya onla ed saray amin a dalin.” Insan inyarum na Jer 23 bersikulo 16: “Onia so kuan nen Jehova na saray ejercito, Agyo talinengen so saray salita na saray profeta a manprofeta ed sikayo. Ibangat da kayo na andi kakanaan to; mansalita ra na sakey a pasingawey na dili a puso ra ya aliwa a manlapu ed sangi nen Jehova.”
7, 8. Akin a say klero na Kakristianoan so singa saray palson propeta na Jerusalem, tan panon a saya so mangaapekta ed saray mimimisa?
7 Singa saray palson propeta ed Jerusalem, say klero na Kakristianoan so manaakar met ed inkatila, mangikakayat ed saray doktrina na apostasya, bangabangat ya agnaromog ed Salita na Dios. Anto so arum ed sarayan palson bangat? Say ag-ipapatey na kamarerwa, say Trinidad, purgatoryo, tan impiernon-apuy ya agmanganggan mamapairap ed totoo. Sikara met so mangikiki ed saray kalayagan na dumerengel da diad pangipupulong ed no anto so labay na totoon dengelen. Uulit-uliten da met ya anggapo so kalamidad ya arapen na Kakristianoan lapud sikato’y walaan na kareenan na Dios. Balet say klero so mansasalita “na sakey a pasingawey na dili a puso ra.” Saman so katilaan. Saraman so manisisia ed ontan iran katilaan so nasasamalan ed espiritualidad. Sikaray napapalikdo a mamaarap ed kadederal da!
8 Konsideraen so ibabaga nen Jehova ed sarayan palson managbangat ed Jer 23 bersikulo 21: “Agko inbaki so saraya a profeta, angan ontan binmatik ira. Agak nansalita ed sikara, angan ontan nanprofeta ra.” Kanian natan, say klero so ag-inbaki na Dios, nisay sikara so mangibabangat ed saray katuaan to. Say resulta? Sakey a makapakebbiew ya inkawaweng so wala ed limog na saray mimimisa lapud saray ministro ra so mangibabangat ed sikara na minumundo iran pilosopya.
9, 10. Antoran klase na kugip so wala ed palso iran managbangat na Jerusalem? (b) Panon a say klero na Kakristianoan so mipadparan angibangat na “saray tila a kogkogip”?
9 Nagkalalo ni, say klero natan so mangikakayat na palso iran ilalo. Imanoen so Jer 23 bersikulo 25: “Nadngel ko so salita na saray profeta a manprofeta na saray tila ed ngaran ko, a kuan da, Nankogkogip ak, nankogkogip ak.” Antoran klase na kugip iraya? Ibabaga na Jer 23 bersikulo 32 ed sikatayo: “Nia, onsumpa ak ed saray manprofeta na saray tila a kogkogip, kuan nen Jehova, tan ibaga ra ed sikara, tan palingoen da so baley ko lapu ed saray tila ra, tan lapu ed saray andi kakanaan a panpasirayew. Angan ontan agko ra inbaki, agko ra met binilin; et agda met pinabangen so saya a baley a mogmo, kuan nen Jehova.”
10 Antoran palson kugip, odino ilalo, so ibabangat na klero? Agayla, say mogmon ilalo na too para’d kareenan tan kaligenan natan et say Nasyones Unidas. Diad apalabas iran taon tinawag da so NU a “say unor ya ilalo ed panpapakna tan kareenan,” “say atagey a pinagkasentro na kareenan tan hustisya,” “say manunan sekular ya ilalo para’d kareenan na mundo.” Agaylan impakapalikdo! Say mogmon ilalo na katooan et say Panarian na Dios. Balet say klero so agmangipupulong tan mangibabangat ed katuaan nipaakar ed satan a mangatatawen a gobierno, a satan so manunan tema na panagpulong nen Jesus.
11. (a) Saray palson managbangat na Jerusalem so awalaan na anton mauges ya epekto ed mismon ngaran na Dios? (b) Miduma ed Jeremias a klase, anto so gagawaen na palso iran relihyoson managbangat natan no nipaakar ed madibinon ngaran?
11 Say Jer 23 bersikulo 27 so mangibabaga ed sikatayo na nagkalalo ni. “Nonoten da a palingoanan so ngaran ko ed baley ko lapu ed saray kogkogip da a sikato so ibaga ra balang too ed kaabay to, a singa saray atateng da nilingoanan da so ngaran ko lapu ed Baal.” Saray palson propeta na Jerusalem so sengegan na inpakalingwan na totoo ed ngaran na Dios. Agta saray palson relihyoson managbangat natan so manggagawa na ontan met? Mauges ni, iyaamot da so ngaran na Dios, a Jehova. Ibabangat da a satan so agnakaukolan ya usaren, tan satan so inekal da ed saray patalos a Biblia ra. Sikaray onsusumpan mabiskeg ed siopaman a mangibabangat ed totoo a say ngaran na Dios et Jehova. Balet say Jeremias a klase, say nakdaan na alanaan-ed-espiritun Kristianos, pati kakaiba ra, so manggagawa ed singa ginawa nen Jesus. Babangatan da so minilyon a totoo nipaakar ed ngaran na Dios.—Juan 17:6.
Panangiwalwal ed Inkauges Da
12. (a) Akin a wala so baleg ya inpankasalanan ed dala ed biang na palso iran relihyoson managbangat? (b) Anto so betang na klero ed duaran sankamundoan a bakal?
12 Say Jeremias a klase so naulit-ulit ya angiwalwal ed klero bilang saray palson managbangat a mangiwawanwan ed saray pulok da a mamaarap ed maawang a dalan na kadederal. On, say nakdaan so mangipapalinew no akin a saraman a managkugip so makanepegan na masebeg a panangukom nen Jehova. Alimbawa, mabetbet a saray ariripen nen Jehova so natutukoy ed Apocalipsis 18:24, a mangibabaga a say Babilonia a Baleg so akalmoan na dala na “amin da a pinatey dia ed dalin.” Nonoten so amin a bakal a nanlalabanan lapud panduruma na relihyon. Agaylan baleg ya inpankasalanan-ed-dala na saray palson relihyoson managbangat! Saray bangat da so nansengegan na inkaapag-apag tan amalalo ed panag-gula ed saraman so walaay piduduma iran pananisia tan nasyonal iran grupo. No nipaakar ed Guerra Mundial I, onia so ibabaga na Preachers Present Arms: “Saray clerc [saray klero] so angiter ed bakal na espiritual a kabaliksan tan ligsa. . . . Diad panamegley na saman say iglesia so nagmaliw a kabiangan tan alanor a tuloy ed sistema na bakal.” Ontan met ed Guerra Mundial II. Say klero so sigpot ya anuporta ed manbabakal iran nasyon tan amendisyon ed saray tropa ra. Duaran sankamundoan a bakal so ginmapo ed Kakristianoan a no iner et nanpapateyan so mankakarelihyon. Say sekular tan relihyoso iran grupo ed loob na Kakristianoan so nantultuloy a sengegan na panagpaagos na dala anggad kaplesan a panaon. Agaylan makapataktakot iray epekto na palso iran bangat da!
13. Panon a say Jeremias 23:22 so napapaneknekan a say klero na Kakristianoan so andiay pisiglaotan ed si Jehova?
13 Ipangasin imanoen so Jeremias kapitulo 23, bersikulo 22: “No nanalagey ira komon dia ed pananimbawaan ko, dia ed ontan inpandengel da komon so baley ko ed saray salitak, tan inpawil da ra a manlapu ed mauges a dalan da, tan manlapu ed inkauges na saray gawa ra.” No saray propeta na relihyoson Kakristianoan so tinmalindeg komon ed grupon maapit ed si Jehova, diad maapit a siglaotan ed sikato a singa sakey a matoor tan makabat ya aripen, diad ontan sikara met komon so manbilay unong ed saray estandarte na Dios. Sikara met komon so makapanggawa ed totoo na Kakristianoan ya ondengel ed dilin salita na Dios. Imbes, saray modernon-agew a palson managbangat so manggagawa ed saray patumbok da a bulag ya ariripen na Kabusol na Dios, si Satanas a Diablo.
14. Anton mabiskeg ya inpangiwalwal ed klero na Kakristianoan so nipaway nen 1958?
14 Say panangiwalwal na Jeremias a klase ed klero so mabiskeg. Alimbawa, diad 1958 Madibinon Linawa ya Internasyonal ya Asamblea na saray Tasi nen Jehova ed New York City, say bise presidente na Watch Tower Society so angiparungtal na sakey a balikas ya onia so nibaga ed kabiangan: “Anggapo so antokaman a duaran salita odino inkamasuyat ya iyabawag tayo iyan sengegan na amin a krimen, kaugsan, gula, pankokolkol, panangidumaduma, . . . tan ambagel a pakawetwet a magmaliw a palson relihyon, say palson relihyon; a say wala ed benegan to et say agnanengneng a kabusol na too, si Satanas a Diablo. Saray totoo a walaan na baleg a responsabilidad ed kipapasen na mundo et saray relihyoson managbangat tan papangulo; tan say tetelen a tuloy ed saraya et saray relihyoson klero na Kakristianoan. . . . Kayari na amin na sarayan taon nanlapulad Guerra Mundial I, say talindeg na Kakristianoan ed siglaotan nipaakar ed Dios so mipara ed Israel ed agew nen Jeremias. On, say Kakristianoan so onaarap ed sakey a kadederal a nagkalalon makapataktakot tan makadesyang nen say anengneng nen Jeremias ya agawa ed Jerusalem.”
Panangukom ed Saray Palson Managbangat
15. Antoran propesiya na kareenan so ginawa na klero? Kasin saratan so nasumpal ni?
15 Diad biek na sayan pasakbay, panon so inkiwas na klero nanlapulad saman? Mipadpara ed irereport na Jer 23 bersikulo 17: “Sikara kuan da a naynay ed saray manbabalaw ed siak, Si Jehova inkuan to, wala naani deen yo; et dia ed balang sakey a manakar ed inkaawet na puso to a dili kuan da, Angapo so mauges ya onsabi naani ed sikayo.” Kasin tua iya? Andi! Iwalwal nen Jehova so inkatila na sarayan propesiya na klero. Agto sumpalen so ibabaga a nibase ed ngaran to. Anggaman ontan, say palson panamaseguro na klero ed kareenan ed Dios so makapalikdon tuloy!
16. (a) Anton moral a kipapasen na sayan mundo, tan siopa so natetel ed satan? (b) Anto so gagawaen na Jeremias a klase nipaakar ed mabanday iran moral a panmoria na sayan mundo?
16 Kasin iisipen yo, ‘Anto, napalikdo ak na palso iran bangat na klero? Andin balot!’ Bueno, agka maniseguro! Tandaan a saray palson bangat na klero so mangiyaalibansa na makadesyang, makapakebbiew no nipaakar ed moral. Say malukak iran bangat da so mangikakatunongan ed ngalngalin amin a bengatla, anggan panon lay inkauges to. Tan sayan abulok ed moral so onlalaknab ed amin a lawak na panagligliwaan, pelikula, TV, magasin, tan musika. Sirin, sikatayo so nepeg a mangagamil na panag-alwar a tuloy, ompan sikatayo so napelag ed silong na impluensya na abulok balet masilib ya ompapatnag a malinis ed moral. Saray kalangweran so nayarin napalikdo na mabanday iran video tan musika. Tandaan a sayan awawey na totoo natan a nayari-angan-dinan so direktan resulta ed palso iran bangat na klero tan say insaew to ed pangitandoro ed matunong iran estandarte na Dios. Babakalen na Jeremias a klase irayan imoral a panmoria tan ontutulong ed ariripen nen Jehova ed pangipulisay na inkauges a mangaakmon ed Kakristianoan.
17. (a) Unong ed si Jeremias, anton panangukom so onsabi ed marelmeng a Jerusalem? (b) Anto so asingger lan nagawa ed Kakristianoan?
17 Anton panangukom so awaten na palso iran managbangat na Kakristianoan manlapud si Jehova, say baleg ya Ukom? Saray Jer 23 bersikulo 19, 20, 39, tan Jer 23:40 so onebat: “Nia, say bagyo nen Jehova, salanti sanok to, pinmaway, on, sakey ya alimbosabos a bagyo. Sikato naani ombetag ed tapew na olo na marelmeng. Say sanok nen Jehova ag naani ompawil, anga ed nagawa to, tan nasumpal to so saray kanonotan na puso to. . . . Et yakar ko naani naynay a poot ed sikayo, tan maando a kibabaing, a sikato naani ag nalingoanan.” Amin na satan so agawa ed marelmeng a Jerusalem tan say templo to, tan natan sakey a miparan kalamidad so magano lan nagawa ed marelmeng a Kakristianoan!
Panangiyabawag na “Awit nen Jehova”
18, 19. Anto so “awit nen Jehova” ya inyabawag nen Jeremias ed Juda, tekep na anton suheri?
18 Kanian, anto so responsabilidad na Jeremias a klase tan saray kakaiba ra? Say Jer 23 bersikulo 33 so mangibabaga ed sikatayo: “Et no saya a baley, no say profeta, no say sakey a sacerdote pibalita to ed sika a kuan to, Anto so awit nen Jehova? Kuan mo sirin naani ed sikara, [Sikayon totoo—O agaylan sakey a makapabelat!, NW] Anto ya awit? Ibantak takayo naani, kuan nen Jehova.”
19 Say salitan Hebreo para’d “awit” so walaan na duaran kabaliksan. Nayarin ontukoy ed sakey ya ambelat a madibinon panangiyabawag odino ed bengatlan mamapabelat ed sakey tan mamapakesaw ed sakey. Dia say balikas ya “awit nen Jehova” so ontutukoy ed sakey ya importantin propesiya—say impangiyabawag a say Jerusalem so naukom ed kadederal. Kasin nilabay na totoon dengelen so ontan ya ambelat a mapropetikon panangipasakbay ya inulit-ulit nen Jeremias ya inter ed sikara a nanlapu ed si Jehova? Andi, saray totoo so nanludlurey ed si Jeremias: ‘Anton propesiya (awit) so wala ed sika natan? Naseguro mi a say propesiyam so magmaliw a sakey nin makapakesaw ya awit!’ Balet anto so imbaga nen Jehova ed sikara? Saya: “[Sikayon totoo—O agaylan sakey a makapabelat!, NW] Anto ya awit? Ibantak takayo naani.” On, sarayan totoo so makapabelat ed si Jehova, tan ekalen tora pian agla ra makapabelat ed sikato.
20. Anto so “awit nen Jehova” natan?
20 Anto so “awit nen Jehova” natan? Satan et say importantin mapropetikon mensahe a nanlapu ed Salita na Dios. Satan so napno na panangukom, a mangiyaabawag ed asingsingger lan kadederal na Kakristianoan. No nipaakar ed totoo nen Jehova, walaan tayo na importantin responsabilidad a mangiyabawag ed sayan “awit nen Jehova.” Legan a manasingger so anggaan, nepeg tayon ibaga ed amin a saray anawet-ulon totoo na Kakristianoan so sakey ya “awit,” on, “O agaylan sakey a makapabelat!” ed si Jehova a Dios, tan asingger to lan ekalen iyan “awit” diad panamegley na pangikaindan ed Kakristianoan pian naderal.
21. (a) Akin ya aderal so Jerusalem nen 607 K.K.P.? (b) Kayari na impakaderal na Jerusalem, anto so agawa ed palso iran propeta tan ed tuan propeta nen Jehova, a mangiiter ed sikatayo na anton panamaseguro natan?
21 Say panangukom nen Jehova so indapo ed agew nen Jeremias sanen saray taga Babilonia so aneral ed Jerusalem nen 607 K.K.P. Unong a niproresiya, satan so ‘makapabanday tan makapabaing’ para’d saraman so bangar, agmatoor ya Israelitas. (Jeremias 23:39, 40) Satan so angipanengneng ed sikara a si Jehova, ya inulit-ulit dan agginalang, so diad kaunoran et angikaindan ed sikara pian nasagmak iray pansumpalan na inkauges da. Saray sangi na saray mapangtan palson propeta ra so diad kaunoran et apepe. Ingen, say sangi nen Jeremias so nansiansian mangipropropesiya. Sikato so ag-kinaindanan nen Jehova. Bilang kasumpalan na saya, si Jehova so ag-mangikaindan ed Jeremias a klase sano say importantin desisyon to so mansumpal ed pamatey ed klero na Kakristianoan tan ed saraman so mananisia ed saray tila da.
22. Diad anton kipapasen so kitarokan na Kakristianoan lapud saray panangukom nen Jehova?
22 On, say aderal, agnapanayaman a kipapasen na Jerusalem kayari na 607 K.K.P. so eksakton magmaliw a kipapasen na relihyoson Kakristianoan kayarin sikato so nalakseban na kayamanan to tan niwalwal ed kababaingan. Saya so makanepegan a panangukom ya impakseb nen Jehova sumpad palso iran managbangat. Satan a panangukom so ag-onsaew. No panon ya asumpal iray impuyan a mensahe na pasakbay nen Jeremias, saratan so nasumpal met ed modernon-agew tayo. Kanian komon ta magmaliw itayon singa si Jeremias. Sikatayo komon so andi-takot a mangiyabawag ed totoo na mapropetikon awit nen Jehova, ta pian nakabatan da no akin a say sigpot a belat na matunong a panangukom to so onsasabi ed amin a palson relihyoson managbangat!
Repason Tepetepet
◻ Panon inkauges so kadaanan a Jerusalem manlapud punto-de-vista nen Jehova?
◻ Diad antoran paraan a say Kakristianoan so ‘manaakar ira ed inkatila’?
◻ Panon a say inkamakasalanan na klero ed modernon-panaon so niwalwal?
◻ Anton “awit nen Jehova” so niyaabawag natan?
[Litrato ed pahina 8]
Saray propeta na Jerusalem so nanggawa na “saray makapakebiew a bengatla”
[Litrato ed pahina 9]
‘Sikaray nansalita na pasingawey na dili ran puso’
[Litrato ed pahina 10]
Say Jerusalem kayari na inpakaderal to so mangiyiilustra ed kaunoran a pansumpalan na Kakristianoan