Say Salimbeng Da—Sakey a Tila!
“Ginawa min tila so salimbeng mi tan ed inkatila ya inyamot mi so inkasikami.”—ISAIAS 28:15.
1, 2. (a) Dinan ya organisasyon natan so nepeg a mangimano ed agawa ed kadaanan a panarian na Juda? (b) Anton nisiwawin talek so wala ed Juda?
KASIN saratan a salita et onaplika ed Kakristianoan natan a singa ed kadaanan a duaran-tribo a panarian na Juda? Petepeteg, a ginawa ra! Tan satan a pampara so mangipasakbay ed uges na modernon agew a Kakristianoan. Kabaliksan to a say kadederal so asingger lan manalona ed apostatan relihyoson organisasyon.
2 Diad amianen na Juda et say samploran-tribo a panarian na Israel. Sanen pinaneknekan na Israel ya andian na pananisia, inabuloyan nen Jehova a sikatoy deralen na Asiria nen 740 K.K.P. Say agin panarian to, say Juda, so akapantasi ed sayan makapaermen ya ebento balet manliknan maseguron agnagawa itan ed sikato. ‘Akin,’ ilastog na papangulo to, ‘agta say templo nen Jehova so walad Jerusalem? Agta sikatayo so apaboran a totoo na Dios? Agta saray saserdote tan propeta tayo so mansalita ed ngaran nen Jehova? (Ipareng so Jeremias 7:4, 8-11.) Matalek iraman a relihyoson papangulo a sikaray asalimbengan. Balet sikara so alingo! Sikara so andian na pananisia a singa ed amianen iran kakanayon da. Kanian, no anto so agawa ed Samaria ontan met so nagawa ed Jerusalem.
3. Akin a manliknan matalek so Kakristianoan ed arapen, balet wala ta so maabig a katunongan ed talek to?
3 Diad mipadparan dalan, ibabaga na Kakristianoan a walaan na nikaduman relasyon ed say Dios. ‘Siempre,’ ilastog to ‘walaan tayo na samplon nilibon iglesia tan sakey a propesyonal a klero, tan ontan met ed nilasus minilyon iran patumbok. Walaan tayo met na Biblia, tan uusaren tayo so ngaran nen Jesus ed panagdayew tayo. Peteg, sikatayo so apaboran na Dios! Balet no anto so agawa ed kadaanan ya Israel so akatalindeg ed sakey a mapekder a pasakbay. Anggaman ed kaplesan a nikadkaduman iyaaligwas ed politikal, kabat tayo a si Jehova so asingger lan onkiwas a sumpad Kakristianoan tan amin ya arum a palson relihyon.
“Sakey a Sipanan ed Patey”
4. Anton sipanan so isisipen a walan ginawa na Juda?
4 Diad kadaanan a panaon, akawat na dakel iran pasakbay so agmatoor a Jerusalem ed panamegley na tua iran propeta na Dios, balet sikato so ag-anisia ed sikara. Imbes, inlastog to a say patey so agbalot mangala ed sikato ed Sheol, say lubok, unong ta nala to so mamaamianen a panarian na Israel. Si Isaias a propeta so apuyanan a mankuan ed Juda: “Kanian denglen yo so salita nen Jehova, sikayo a mabalaw, sikayon manuley ed sayan baley a walad Jerusalem: Lapud inkuanyo: ‘Akipakna kami na sipanan ed Patey; tan ed Sheol akinonong kami na pasingawey; say manlippuan delap, no bilbilang onlabas et ag-onsabi ed sikami, ta ginawa mi a tila so salimbeng mi tan inyamot mi so inkatila ed inkasikami.’”—Isaias 28:14, 15.
5. (a) Anto so inkuan a sipanan ed patey na Juda? (b) Anto so pasakbay ya inter ed si Arin Asa a walan alingwanan na Juda?
5 On, saray papangulo na Jerusalem so nanisip a sikaray walaan na pikasakey, a singa onman, ed patey tan Sheol pian nipreserba so syudad da. Balet kasin say inkuan a sipanan ed Jerusalem ed patey so mankabaliksan a sikato so walan nambabawi ed saray kasalanan to tan natan et mantalima ed si Jehova parad kilalaban? (Jeremias 8:6, 7) Aliwan ontan! Imbes, sikato so onarap ed atooan iran politikal a manuley parad tulong. Balet say panmatalek to ed minumundon kakaiba so sakey a palikdo, sakey a tila. Saray makamundon pansasaralan to so agmangiliktar ed sikato. Tan lapud sikato so angitalirak ed si Jehova, intalirak nen Jehova so Jerusalem. Agawa unong ed impasakbay na propeta Asarias ed si Arin Asa: “Si Jehova wala ed sikayo leleg a paneknekan yon wala ed sikato; et no sikato so anapen yo, sikato so naromog yo, balet no sikato so ikaindan yo sikayo so inkaindan to.”—2 Awaran 15:2.
6, 7. Anto iran kundang so inala na Juda pian paseguroan so salimbeng to, balet ed anton pinal a pansumpalan?
6 Matalek ed saray politikal iran alyansa, saray papangulo na Jerusalem so maseguro ya anggapo so “manlippuan delap” na onlolosob iran armada so makaasingger ed sikaran mandisturbo ed kareenan tan kaligenan. Sano nasigensigen na sakey ya alyansa na Israel tan Siria, inmarap so Juda ed Asiria parad tulong. (2 Arari 16:5-9) Saginonor, sanen dineral na saray puersa militar na Babilonia, sikato so kinmerew ed Ehipto parad suporta tan si Paraon so inmebat, ya angibaki na armadan ontulong.—Jeremias 37:5-8; Ezequiel 17:11-15.
7 Balet saray armada na Babilonia so mabiskeg a tuloy, tan saray tropa na Ehipto so walan sinmener. Say talek ya impasen na Jerusalem ed Ehipto so apaneknekan a sakey a lingo, tan nen 607 K.K.P., sikato so pinaulyanan nen Jehova parad kadederal a walan impasakbay to. Kanian saray manuley tan saserdote na Jerusalem so alingo! Say talek da so diad minumundon alyansa parad kareenan tan kaligenan so “sakey a tila” a walan inyagos na delap na saray armada na Babilonia.
Panangipulisay na “Asalin Bato”
8. Panon a say Kakristianoan et angala na kipapasen a mipadparan maong ed kadaanan a Juda?
8 Wala ta so pampara na satan a kipapasen natan? On, wala. Liknaen met na klero na Kakristianoan ya anggapo so desyang ya ontalona ed sikara. Diad epekto, inkuan da so unong ed impasakbay nen Isaias: “Sikami so akipakna ed sipanan ed Patey; tan ed Sheol ed sakey a pasingawey; say manlippuan delap, no bilbilang onlabas et ag-onsabi ed sikatayo, ta sikami so nanggawa na tila ed salimbeng tan inyamot mi so inkasikami ed inkatila.” (Isaias 28:15) Singa kadaanan a Jerusalem, say klero na Kakristianoan so mandependi ed minumundon alyansa parad kaligenan, tan ikaindan dan mangala ed salimbeng nen Jehova. Siempre, agda ni ingen inusar so ngaran to, tan sikaray nanludlurey tan amasegsegang ed saramay mangigalang ed satan a ngaran. Say klero na Kakristianoan so walan nanggawa na singa ginawa na manuna iran saserdoten Judio sanen inkaindan da si Kristo. Inkuan da, diad mipadpara, “Anggapo so ari mi noag si Caesar.”—Juan 19:15.
9. (a) Siopa so mamapasakbay ed Kakristianoan natan ed mipadparan dalan ya amasakbay si Isaias ed Juda? (b) Siopa so nepeg a pansaralan na Kakristianoan?
9 Natan, saray Tasi nen Jehova so walan amasakbay a wala so manasingger a delap na manangukom iran armada ed Kakristianoan. Niarum ni, inparungtal da so tuan pasen na salimbeng manlapud satan a delap. Inaon da so Isaias 28:16, a mankuan: “Onya so kuan na Soberanon Katawan a Jehova: ‘Nia ipasen ko dia so letnegan na Sion, sakey ya asalin bato, say mablin sukong na matalek a letnegan. Anggapo so mangagamil na pananisia a manganat.’” Siopa iyan ‘mablin baton panukong’? Inaon nen apostol Pedro irayan salita tan inyaplika ed si Jesu-Kristo. (1 Pedro 2:6) No say Kakristianoan et walan nananap na kareenan ed Ari nen Jehova, si Jesu-Kristo, komon sikato so akaarawi ed onsasabin delap.—Ipareng so Lucas 19:42-44.
10. Anto iran pibabali so walan binayuboan na Kakristianoan?
10 Anggaman ontan, agto ginawa itan. Imbes, ed pananap to na kareenan tan kaligenan, ipapatnag to so inkasikaton paborable ed politikal iran papangulo na nasyones—saya anggaman ed pasakbay na Biblia a say pikakaaro ed mundo so pibubusol ed Dios. (Santiago 4:4) Niarum ni, nen 1919 sikato so mabiskeg ya angiyalibansa ed Liga na Nasyones a bilang say sankaabigan ya ilalo na too parad deen. Nanlapulad 1945 impasen to so ilalo to ed Nasyones Unidas. (Ipareng so Apocalipsis 17:3, 11.) Alay laknab na pibabali to ed sayan organisasyon?
11. Anton panangilaman na relihyon so wala ed NU?
11 Sakey a libro ni ed saginonor so mangiter na sakey ya ideya sanen ikuanto: “Ag-onkulang ed duwamplo tan apat a Katoliko iran organisasyon so walan ilalaman na NU. Pigara ed relihyoson papangulo na mundo so walan dinmalaw ed internasyonal ya organisasyon. Sankanonotan iray indalaw na Say Sankasantosan To Papa Pablo VI legan na General Assembly na 1965 tan si Papa Juan Pablo II nen 1979. Dakel iran relihyon so walaan na nikadkaduma iran dasal, pikakasi, himno, tan saray serbisyo parad Nasyones Unidas. Say sankaimportantian ya alimbawa na saraman et say Katoliko, say Unitarian-Universalist, say Baptist tan saray Bahai a pananisia.”
Andi-Kakanaan iran Ilalo parad Kareenan
12, 13 Anggaman ed malaknab iran ilalo a say kareenan et onsasabi, akin a matalek iray Tasi nen Jehova a saray pasakbay et tua?
12 Sakey ed saray sankabiskegan a papangulo so mangipapaknol na saray ilalo na dakel sanen inkuanto: “Sayan kailalakan na totoo ed dalin so mantasi ed asingger ya agnarawian a peryodo na deen ed awaran na sibilisasyon.” Kasin sikato so duga? Kasin saray kaplesan ya iyaaligwas et mankabaliksan a saray pasakbay na saray Tasi nen Jehova a walan niparungtal nipaakar ed pangukom nen Jehova ed saray nasyones so ag-onsabi? Kasin saray Tasi nen Jehova et aliwa?
13 Andi, ag-ira alingo. Kabat da a sikaray mangibabaga na katuaan lapud ipasen da so talek da ed si Jehova tan ed Biblia, a satan so dilin Salita na Dios ed katuaan. Ibabaga na Tito 1:2: “Say Dios . . . so agmatila.” Kanian walaan ira na nagnap a talek a sano ikuan na propesiya na Biblia a sakey a bengatla so nagawa, satan so andi saew ya onsabin onsabi. Imbagan mismo nen Jehova: “Kanian say salitak ya ompaway ed sangik so napaneknekan ya ontan. Sikato naani agompawil ed siak a paoypaoy noag ingen sumpalen to naani so pangayagaan ko.”—Isaias 55:11.
14, 15. (a) Anto so ipapasakbay na saray papangulo na Juda kasakbay na kadederal na Jerusalem nen 607 K.K.P.? (b) Anto so impasakbay nen Pablo a niyabawag sakbay na biglan kadederal ya onsabi ed sayan dalin? (c) Anto so nailaloan tayo ed kapantokan ed panangiyabawag ed nipropesiya ed 1 Tesalonica 5:3?
14 Diad saray taon sakbay na kadederal na Jerusalem nen 607 K.K.P., inreport nen Jeremias a saray papangulo so mananggis, “Wala so kareenan! Wala so kareenan!” (Jeremias 8:11) Anggaman ontan, satan so sakey a tila. Aderal so Jerusalem diad panumpal ed apuyanan iran pasakbay na saray tuan propeta nen Jehova. Impasakbay nen apostol Pablo so bengatlan mipadparan nagawa natan ed agew tayo. Inkuanto a saray totoo so mananggis!” Balet diad satan, inkuanto, “biglan kadederal” so “onsabi ed sikara.”—1 Tesalonica 5:3.
15 Legan ya onloloob tayo ed 1990’s, saray diyaryo tan magasin ed inerman so mankuan ya anggapo la so Cold War tan satan a sankamundoan a kareenan so wala ed kasampotan. Balet sakey a panpapaltugan so linmesa ed Pegley Bukig. Anggaman ontan, diad agkabat a panaon ed arapen say kipapasen na mundo so nabayuboan ed punto no iner a say nanggis a “Kareenan tan kaligenan!” a nipropesiya ed 1 Tesalonica 5:2, 3 so ondaak ed pantok to. Tekep na saray ilalo tayon mapekder ed Salita na Dios, kabat tayon, legan a nadampot so kapantokan, saray pangukom na Dios so nagawan tamtampol tan mapmaples. Anggapo so kasublayan na kareenan tan kaligenan iran panangiyabawag so nepeg a manggawa ed sikatayon manisip a say nipasakbay a kadederal na Dios so ag-onsabi. Saray panangukom nen Jehova so agasalatan a nikurit ed Salita to say Biblia. Say Kakristianoan, a pati ed amin a palson relihyon, so naderal. Tan insan say makaderal iran panangukom nen Jehova so nibalikas a sumpad kabiangan na mundo nen Satanas. (2 Tesalonica 1:6-8; 2:8; Apocalipsis 18:21; 19:19-21) Lapud saray Tasi nen Jehova so matalek a si Jehova so manumpal ed salita to, sikaray nantultuloy a nansiansian manbantay ed silong na giya na matoor tan makabat ya aripen a klase tan siaalwar ya ontumbok ed no panon a niparungtal iray ebento na mundo. (Mateo 24:45-47) Manepeg, anggapo so managgaway kareenan iran gunaet na too so nepeg a manggawan manisip itayo a si Jehova so walan angipulisay ed gagala ton mangitarok na delap na kadederal a makapabelat a kasalanan a Kakristianoan.
‘Say Dios so Salimbeng Tayo’
16, 17. Panon so ikiwas na saray Tasi nen Jehova no arum so manlikna ed inkapranka na mensahe ra?
16 Arum so nayarin nasakitan ed inkapranka na saray Tasi nen Jehova ed pangiyabawag ed saya. Anggaman ontan, sano ikuan da a saray relihyoson manuley na Kakristianoan so walan angala na salimbeng ed sakey a matilan oksuyan, sikara lambengat so mangisasalaysay ed ikuan na Biblia. Sanen ikuan da a say Kakristianoan so makanepegan ed dusa lapud sikato so nagmaliw a kabiangan na mundo, ireport da lambengat no anton mismo so ikuan na Dios ed Biblia. (Filipos 3:18, 19) Niarum ni, lapud say Kakristianoan so angipasen na talek to ed saray palikdon iproponi na sayan mundo, sikato so manuporta ed dios na sayan mundo, si Satanas a Diablo, ya inkuan nen Jesus a sikato so ama na say tila.—Juan 8:44; 2 Corinto 4:4.
17 Sirin, saray Tasi nen Jehova so mangiyabawag: No parad sikami, agmi ipaseseg so palso iran ilalo ed kareenan ed mundo lapud mansasalat a politikon eksena. Imbes, sikami so mangipapaknol ed saray salita na salmista: “Say Dios so salimbeng tayo . . . Saray anak na mangaraldalin a too maapa ra, saray anak na katooan so sakey a tila. Sano simbangen ira et alenlemew nen say apa.” (Salmo 62:8, 9) Saray pakana na too a mangiyalibansa tan mangipreserba ed Kakristianoan tan arum a kabiangan na sayan sistema na bengabengatla so inkatila, sakey a tila! Amin da no pankakasakeyen so andian na pakayarin unaan iray gagala nen Jehova a kuanmono sakey a sangi na ampetang a dagem!
18. Anton pasakbay na salmista so matukotukoy natan?
18 Aonen met na saray Tasi nen Jehova so Salmo 33, bersikulo 17 ya anggad 19, a mangideklara: “Say kabayo [na Ehipto, a manisimbolo na bakal] so sakey a palikdon kililiktar, tan ed baleg a biskeg to agto mangiter na pakataynan. Nia! Say mata nen Jehova miulop ed saray ontakot ed sikato, dia ed saray manmatalek ed panangasi to, a mangiliktar na kamarerwa ed ipapatey a mismo, tan mamabilay ed sikara ed kaerasan.” Natan, saray tuan Kristianos so manmatalek ed si Jehova tan ed mangatatawen a Panarian to, say oksuyan lambengat a mangitarok na permanentin kareenan.
Kakristianoan “sakey ya Igatingatin a Pasen”
19. Akin a say panmatalek ed politikal iran organisasyon a mangitarok na deen so sakey a kugip?
19 Say panmatalek ed antokaman a ginawa na toon kasalatan parad Panarian na Dios so manggawad satan a kasalatan a bilang talintao, o sakey a bengatlan parad panagdayew. (Apocalipsis 13:14, 15) Sirin, say manamaseseg a panmatalek ed politikal iran muyongan, a singa ed Nasyones Unidas, say kareenan tan kaligenan so sakey a kugip, sakey a tila. Nipaakar ed ontan iran bengatla na palso iran ilalo, inkuan nen Jeremias: “Say inbobo a talintao to so tila, tan anggapo so panlinawa ed sikara. Sikara so kaapaan, sakey a gawa a kunkuwari. Dia ed panaon na kadalaw ed sikara naani natawtaw.” (Jeremias 10:14, 15) Sirin, say dekabayoan ya antitipikon Ehipto, salanti, say militar-politikal a biskeg a nasyones natan, so agmanalimbeng ed relihyoson pasen na Kakristianoan ed agew na krisis to. Say alyansa na saray relihyon na Kakristianoan ed sayan mundo so maseguron onsaew a manalimbeng ed sikara.
20, 21. (a) Anto so agawa ed Liga na Nasyones, tan akin a say Nasyones Unidas so agmagmaong? (b) Panon ya impanengneng nen Isaias a saray alyansa na Kakristianoan ed mundo so agmakaliktar ed sikato?
20 Isasaral na Kakristianoan iray ilalo ed Liga na Nasyones, balet satan so abagtog ya anggan sakbay na isabi na Armagedon. Natan impaarap to so katooran to ed Nasyones Unidas. Balet asingger to lan arapen so “bakal na baleg ya agew na Dios a Makapanyarin-amin,” tan agmakaliktar. (Apocalipsis 16:14) Anggan say binilay a NU so agmangitarok na kareenan tan kaligenan. Say propetikon Salita na Dios so mangipanengneng a say Nasyones Unidas a muyongan pati ed saray membron nasyones “so mibakal ed Kordero [Kristo ed pakayari na Panarian], balet, lapud sikato so Katawan na kakatawan tan Ari na arari, say Kordero so maneral ed sikara.”—Apocalipsis 17:14.
21 Mataletalek iray Tasi nen Jehova a mankuan ya anggapo so kilalaban parad Kakristianoan ed saray alyansa to ed mundo nen Satanas. Tan sano ikuan da iya, sikara lambengat so mangituturo no anto so ikuan na Biblia a mismo. Aonen na Isaias 28:17, 18 so inkuan nen Jehova: “Et gawaen ko naani so hustisya a gulis ya inkatunong a managpatar ya instrumento; tan say kristal ya uran panisen to naani so salimbengan na tila, tan saray danum delapen da naani so mogmon pasen na amotan. Tan say akisipanan yo ed Patey so maseguron natunaw, tan say pasingawey yo ed Sheol so agtinmalindeg. Say manlippuan delap, sano onlabas—sikato so magmaliw a nigatingatin a pasen.”
22. Sano say ayadyarin hustisya et niyaplika ed Kakristianoan, anto so pansumpalan?
22 Sano nasumpal so hudisyal a desisyon nen Jehova, satan so unong ed ayadyarin hustisya to. Tan say basiyan na talek na Kakristianoan, say “pisipanan to ed Patey,” so kompleton niagos a kuanmono sakey a delap. Intuloy ya inkuan nen Isaias: “Kinabuasan ya onlabas, ed agew tan ed labi; et anggapo naani noag say takot lambengat ed panawat na arum ed nadngelan.” (Isaias 28:19) Alay kataktakot ed saray mamabantay a mantasi ed nagnap a pakayari na panangukom nen Jehova! Alay ermen ed klero na Kakristianoan tan saray patumbok da a natalosan, atrasado la, ta sikaray nanmatalek ed sakey a tila!
Say Ngaran nen Jehova so sakey a “Mabiskeg Ya Ilang”
23, 24. Imbes a mananap na kaligenan ed sayan mundo, anto so gawaen na saray Tasi nen Jehova?
23 Balet komusta iray Tasi nen Jehova? Anggaman ed arap na internasyonal a panbubusolan tan panamasegsegang, sikaray nansiansian inmarawi a manlapud mundo. Agdan balot nalingwanan ya inkuan nen Jesus ed saray patumbok to: “Sikaray agkabiangan na mundo, unong ya aggak kabiangan na mundo.” (Juan 17:16) Diad loob na sarayan kaunoran ya agew, nanmatalek ira ed Panarian nen Jehova, aliwan diad pamalikdo na too. Sirin, say desyang ed Kakristianoan so agmangilanor ed saray Tasi nen Jehova a nataktakot. Unong ya inpasakbay nen Isaias: “Anggapoy manaagamil na pananisian manganat.”—Isaias 28:16.
24 Ikuan na Uliran 18:10: “Say ngaran nen Jehova so mabiskeg ya ilang. Say maptek ombatik ya onloob ed sikato tan naitdan na salimbeng.” Sirin imbitaan min amin a mala-karneron totoo a mangala na salimbeng ed si Jehova tan say Panarian to ed panamegley nen Kristo. Bilang sakey a pangiyamotan, si Jehova so aliwan inkatila! Say Panarian to ed panamegley nen Kristo so aliwan tila! Say salimbeng na Kakristianoan so sakey a tila, balet say salimbeng na tua iran Kristiano so say Katuaan.
Kasin Nisalaysay Yo?
◻ Panon ya angala na salimbeng ed sakey a tila so kadaanan a Juda?
◻ Diad anton dalan a sinalin iyamot na Kakristianoan so inkasikato ed inkatila?
◻ Panon so impangipasakbay na Juda, tan panon so impangibalikas na saray Tasi nen Jehova na satan a pasakbay natan?
◻ Panon ya aromog na Kakristianoan a say talek to et nisiwawi?
◻ Misonian ed Kakristianoan, anton talindeg so pansiasiansiaen na Tastasi?
[Kahon ed pahina 20]
ATAGEY YA ILALO PARAD NU
“Diad ununan pankanawnawa nanlapulad Guerra Mundia II say internasyonal a komunidad so nankakasakey. Say panangipangulo na Nasyones Unidas, dati lambengat ya iilaloan ya uliran, so napepekderan natan ed pasingawey na manangiletneg. . . . Sirin say mundo natan so manganamot ed sayan panakanawnawa a manumpal ed abayag lan sipan na balon mundon uksoy.”—Presidente Bush na Estados Unidos ed mensahe to ed State of the Union ed satan a bansa, Enero 29, 1991