Saray Bunga​—Maong tan Mauges

“Si Jehova inpatnag to ed siak, et nia, duaran boksot ya higos . . . Sakey a boksot so walaan nen saman na saray sankaabigan ya higos, singa saray higos ya unona a naloto; et say sakey a boksot walaan nen saman na sankaugsan ya higos, ya ag nayari a kanen, ta sikara so mapalalo ya uges nen saman.”​—JEREMIAS 24:1, 2.

1. Panon ya impanengneng Jehova so panangabagey ed totoo to, say Israel, balet panon so inkiwas da?

SAY taon so 617 K.K.P. Saman so samploran taon labat sakbay a say manepeg a panangukom nen Jehova so nidapo sumpad Jerusalem tan ed totoo diman. Si Jeremias so magunaet a nanpulong ed loob na 30 taon la. Imanoen so mabitar a panangiletrato nen Esdras ed situasyon, a singa say naromog ed 2 Awaran 36:15: “Et si Jehova, a Dios na saray atateng da, nanbaki ed sikara ed panamegley na saray igagangan to, a binangon to ya asaksakbay tan inbaki to, lapu ed walaan na pangabagey ed baley to, tan ed ayaman to a pasen.” Tan anto so resulta na amin na sayan sagpot? Makapaermen, intuloy nen Esdras ya isalaysay ed 2 Awa. 36 bersikulo 16: “Balet niludlurey da so saray igagangan na Dios, tan minodmora ra so saray salita to, tan binalaw da so saray profeta to, anga ed say sanok nen Jehova inmalagey sumpa ed baley to, anga ed angapo so pamaakaran.”

2, 3. Deskrebien so makatawag na imanon pasingawey ya impanengneng nen Jehova ed si Jeremias.

² Kasin kabaliksan na saya a say nasyon na Juda so sigpot a napunas? Pian naromog so ebat, konsideraen tayo pa so sakey ya importantin pasingayew ya inter nen Jeremias ed saman a nikurit ed Jer kapitulo 24 ed libron ningaranan to. Angusar so Dios na duaran boksot na higos ed sayan pasingawey pian isimbolo iray nagawgawa ed limog na kasipanan ton totoo. Saraya so magmaliw a manangilaman na duaran nandumaan a klase na saray bunga, say maong tan mauges.

³ Say Jeremias kapitulo 24, bersikulo 1 tan 2, so manisdeskribe ed anengneng na propeta na Dios: “Si Jehova inpatnag to ed siak, et nia, duaran boksot ya higos a nipasen ed arap na templo nen Jehova, kayari na intainan nen Nabucodonosor ya ari na Babilonia a dinakep si Jeconias ya anak a laki nen Joacim, ari ed Juda, tan saray principe na Juda, pati saray maronong a komikimey tan panday a taga Jerusalem et inyakar da ra ed Babilonia. Sakey a boksot so walaan nen saman na saray sankaabigan ya higos, singa saray higos ya unona a naloto; et say sakey a boksot walaan nen saman na sankaugsan ya higos, ya ag nayari a kanen, ta sikara so mapalalo ya uges nen saman.”

Pasingawey Nipaakar ed Maong ya Higos

4. Anton makaligliwan mensahe so intarok na pasingawey na saray higos para’d matoor ya Israelita?

⁴ Kayarin tinepetan si Jeremias nipaakar ed no anto so anengneng to, si Jehova so nantultuloy ya angibaga ed Jer 24 bersikulo 5 ya anggad 7: “Singa saray maong ya higos, ontan naani pangigatonan ko ed saray dinakep ed Juda, a sikara so pinapaway ko ed saya a pasen ya inyakar ed dalin na saray Caldeo a nipaakar ed maong. Ta inengneng ko naani so saray matak ed sikara nipaakar ed maong, tan yakar kora lamet ed saya a dalin; et sikara naani ipaalagey ko, ya agko ra ipaabeba; et itanem kora naani: ya agko ra naani baguten. Et itdan kora naani na puso a mangamta ed siak, a siak si Jehova: et sikara naani baley ko, tan siak naani Dios da; ta ompawil ira naani ed siak ed simoon a puso ra.”

5, 6. (a) Panon a say arum ya Israelita so ‘pinapaway para’d pankamaongan da’ ed Caldea? (b) Panon a ‘[si Jehova] so mangimano para’d pankamaongan’ na matoor iran Israelita ed inkadakep?

⁵ Kanian satan so singa nibase ed imbaga nen Jehova diad maabig iran panaon ya onsasabi, a say nasyon a Juda so agsigpot napunas. Balet anto so kabaliksan na sayan boksot na maong iran higos?

⁶ Si Jeconias, odino Joachim, so nanari ed Juda ed loob labat na taloy bulan tan samploran agew sakbay a sikato so sibubulos ya angisuko ed Jerusalem ed si Arin Nabucodonosor. Saray akautibon kaiba to ya adakep et si Daniel tan say taloran Hebreon kaiba to a sikara di Abednego, Mesac, tan Sedrac, ontan met ed si Ezequiel. Say bilay da so inliktar na ari na Babilonia, kanian nibaga a si Jehova so mangiimano ed amin na sarayan akautibo bilang nibaki ed pankaabigan na dalin na saray Caldeo. Kasin naimanom a si Jehova met so angisipan a ‘mangimano para’d pankamaongan da’? Panon iyan asumpal? Nen 537 K.K.P., kayari na 80 taon ed saginonor, ginawa nen Jehova a si Arin Ciro so mangipakseb na sakey a ganggan ya abuloyan so nakdaan na kailalakan da pian onpawil ed dalin na Juda. Sarayan matoor a Judio so angipaalagey lamet ed syudad na Jerusalem; sikaray angipaalagey na sakey a balon templo para’d panagdayew ed Dios da, si Jehova; tan sikaray pinmawil ed sikato tekep na interon puso. Kanian diad amin na saya, para’d si Jehova sarayan akautibo tan saray kailalakan da so singa maong a tuloy iran ununan higos.

7. Kapigan tan panon a say mata nen Jehova ‘so maong’ ed modernon Jeremias a klase?

⁷ Nayarin natandaan yo a diad inmunan artikulo nipaakar ed mapropetiko iran salita nen Jeremias, naaralan tayo a sikara so walaan na kabaliksan para’d koma-20 a siglo tayo. Tan say Jer kapitulo 24 so andian na panangipuera. Legan na maudyem iran taon na Guerra Mundial I, dakel ed dedikadon ariripen nen Jehova so walad silong na panangimpluensya na Babilonia a Baleg ed nanduruman paraan. Balet say maimanon mata nen Jehova so “[walad] sikara nipaakar ed maong.” Kanian diad panamegley na Babaleg a Ciro, si Kristo Jesus, dineral nen Jehova so pakayari na Babilonia a Baleg tan kalkalnan angitarok ed sikara ed espiritual a paraiso. Sarayan espiritual ya Israelita so inmebat tan pinmawil ed si Jehova ed interon puso ra. Insan, nen 1931, nangayagaan dan inawat so ngaran a Tastasi nen Jehova. On, nibaga natan a sikaray nagmaliw a singa say boksot na maong a tuloy iran higos ed imaton nen Jehova.

8. Diad anton paraan ya iyaabawag na saray Tasi nen Jehova ed arawin pasen so singa-higos ya inkasamit na mensahe na Panarian?

⁸ Tan saray Tasi nen Jehova so ag-akasaew ed gagala na agkanepegan a panangasi na Dios diad inpangibulos ed sikara manlapud Babilonia a Baleg. Agda sinulo so singa-higos ya inkasamit na mensahe na maong a balita na Panarian, noagta inyabawag da itan ed arum bilang panumbok ed saray salita nen Jesus diad Mateo 24:14: “Ta saya ya evangelio na panarian nipulong naani ed sankamundoan ya onkanan pamintuaan ed saray amin a naciones; et saman la onsabi angaan.” Tan anto so resulta? Masulok a 4,700,000 a kinmarneron totoo ya aliwan espiritual ya Israelitas so akabulos manlapud Babilonia a Baleg!

Pasingawey Nipaakar ed Mauges ya Higos

9. Siopa so inrepresenta na mauges iran higos ed pasingawey nen Jeremias, tan anto so nagawa ed sikara?

⁹ Balet komusta so nipaakar ed satan a boksot na mauges iran higos ed pakanengneng nen Jeremias? Natan et iteteen nen Jeremias so imano to ed saray salita nen Jehova a naromog diad Jeremias kapitulo 24, bersikulo 8 anggad 10: “Et singa saray mauges ya higos a sikara so ag nayari a kanen, ta sikara so mapalalo a mauges, petepeteg onia so kuan nen Jehova, Ontan naani pamaolian ko ed Sedekias ya ari na Juda, tan saray principe tan say kera ed Jerusalem, a natilak ed saya a dalin, tan saray manaayam dia ed dalin na Egipto. Paulian kora naani a nibantak a pawilpawil ed nanleleetan na saray amin a nanarian na dalin nipaakar ed mauges; pian magmaliw a sakey a balaw tan sakey ya uliran, sakey a lurey tan sakey ya ayew, ed saray amin a paspasen a pangipaarapan ko ed sikara naani. Et ibakik so kampilan, say eras, tan say salot, ed naleleetan da, anga ed naopot ira a manalpu ed dalin ya initer ko ed sikara tan ed saray atateng da.”

10. Akin ya impasen nen Jehova si Zedekias a sakey a ‘mauges ya higos’?

¹⁰ Kanian si Zedekias so peteg a nagmaliw a sakey a ‘mauges ya higos’ ed imaton nen Jehova. Sikato so aglabat nanrebeldi sumpa ed si Arin Nabucodonosor diad impamuyak na samba na katooran a ginawa to ed satan ya ari ed ngaran nen Jehova noagta sikato met so sigpot ya angipulisay ed panangabagey nen Jehova ya impatnag ed sikato ed panamegley nen Jeremias. Diad tua, et inpaipangaw to ni ingen si Jeremias! Agpankelawan a sinegek nen Esdras so awawey na ari unong a ginawa to diad 2 Awaran 36:12: “Et ginawa to so mauges dia ed pakanengneng nen Jehova a Dios to; ag nanpaabeba ed arap nen Jeremias a profeta a nansalsalita a nanlapu ed sangi nen Jehova.” Diad imaton nen Jehova si Zedekias tan saraman so natitilak ed Jerusalem so singa boksot na saray mauges, abulok ya higos!

Piguratibon Abulok Iran Higos ed Agew Tayo

11, 12. Siopa so nabibidbiran natan a bilang mauges ya higos, tan anto so nagawa ed sikara?

¹¹ Mangimano ed kabangibang na mundo natan. Kasin naisip yo a sikatayo so makaromog na sakey a piguratibon boksot na mauges iran higos? Konsideraen tayo paray katuaan diad pangipareng ed agew tayo ed panaon nen Jeremias. Diad sayan koma-20 siglo, uusaren nen Jehova so Jeremias a klase, say alanaan a nakdaan, pian mantultuloy a pasakbayan iray nasyon ed onsasabin sanok diad baleg a kairapan. Impaseseg to ed grupo na saray nasyon ya iter da ed sikatoy galang a kanepegan na ngaran to, pian sikatoy dayewen ed espiritu tan katuaan, tan pian bidbiren so manaarin Anak to, si Kristo Jesus, bilang makanepegan a Manuley na dalin. Anto so kiwas da? Singa met ed agew nen Jeremias. Saray nasyon so mantutultuloy a manggagawa na mauges ed imaton nen Jehova.

¹² Siopara so mangisosogsog ed sayan rebelyoson awawey? Siopa so mansiasiansian manluludlurey ed sarayan singa-Jeremias ya ibabaki na Dios diad panusuppiat ed autoridad da ya onkiwas bilang ministro na Dios? Siopa so mansiasiansian mamubosol ed Salita na Dios? Siopa natan so walad benegay maslak a panamasegsegang ed Tastasi nen Jehova? Say ebat so malinlinew a nanenengneng na amin​—satan et say Kakristianoan, nagkalalo la et say klero! Tan imanoen labat so amin a bulok, mauges iran bunga na Kakristianoan ya asingbat ed akaunan artikulo. Peteg, on, talagan wala so sakey a simbolikon boksot na mauges iran higos ed dalin natan. Diad tua, ibabaga nen Jehova a sikaray “ag nayari a kanen, ta sikara so mapalalo a mauges.” Saray salita nen Jehova ed panamegley nen Jeremias so onaaniweng ed agew tayo: “Naopot ira”! Say sanok nen Jehova sumpad Kakristianoan so agmakapaliis.

Sakey a Pasakbay a Leksyon Para’d Sikatayo

13. Diad liwawa na saray salita nen Pablo a naromog ed 1 Corinto 10:11, panon so nepeg a pantalos tayo ed pasingawey a duaran boksot na higos?

¹³ Legan ya uusisaen tayo iray suhestion ed apuyanan a mensahen pasakbay nen Jeremias, saray salita nen apostol Pablo diad 1 Corinto 10:11 so onaaniweng ed pakarengel tayo: “Natan saraya’n bengatla agawa ed sikara a singa uliran, tan nisulat ira a bilin ed sikatayo, ya asabian da so kasumpalan na saya’n panaon.” Kasin personal ya ipapapuso tayo so pasakbay ya ipapamoria ed sikatayo na sayan pasingawey na duaran boksot na higos? Say sisingbaten tayo so sakey a makanan kabiangan na saray bengatlan agawa ed Israel bilang sakey ya alimbawan pasakbay para’d sikatayo.

14. Panon so inkiwas na Israel ed matamoy a panangasikaso nen Jehova?

¹⁴ Kaunoran, tandaan tayo iray salita nen Jehova ed si Arin David nipaakar ed Israel, a singa naromog ed 2 Samuel 7:10: “Et mangitoro ak na pasen a nipaakar ed baley ko ya Israel, tan sikara so itanem ko, pian manayam ira ed dili a pasen da, tan ag ira natenieg la; tan ag ira paermenen la na saray anak na inkauges, singa nen inmona.” Matamoy ya aasikasoen nen Jehova so totoo to, say Israel, diad amin a pamaakaran. Wala so amin a rason para’d saray Israelita ed pamawala na maong iran bunga ed kabibilay da. Kaukolan labat a sikaray ontalineng ed madibinon panangibangat nen Jehova tan manumpal ed saray ganggan to. Ingen, daiset lambengat ed sikara so nanggawa na ontan. Say karaklan so bangar tan anawet-ulon amawala na mauges, abulok iran bunga.

15. Panon so ikikiwas na espiritual ya Israel natan tan saray kaibaran kinmarnero ed panangabagey nen Jehova?

¹⁵ Bueno, komusta ed agew tayo? Si Jehova so angipanengneng na baleg a panangabagey ed nakdaan na espiritual ya Israel tan say kinmarneron kakaiba ra. Say mata so lawas akateen ed sikara nanlapulad espiritual ya inkibulos da nen 1919. A singa impasakbay to ed panamegley nen Isaias, sikara so inagew-agew a mangaawat na madibinon panamilin manlapud sankabalgan a Managbangat ed sankatalbaan, si Jehova a Dios. (Isaias 54:13) Sayan madibinon panangibangat, a gagawaen ed panamegley na pinablin Anak to, si Jesu-Kristo, so nansumpal ed daakan a kareenan ed limog da tan mabiskeg ya angitarok ed sikara ed maapit a siglaotan ed si Jehova. Agaylan makapakelkelaw ya espiritual a kaliberliber so itatarok na saya para’d amin tayo pian nakabatan si Jehova, pian ontalineng ed sikato, tan pian mantultuloy a mangipanengneng na maong iran bunga ed kabibilay tayo​—bungabunga a mangitatarok na dayew ed si Jehova! Kabaliksan na satan so bilay tayon mismo!

16. Anton personal a panangiyaplika so nagawaan na balang sakey ed sikatayo nipaakar ed pasingawey na duaran boksot na higos?

¹⁶ Balet diad biek na amin na agkanepegan a panangasi nen Jehova, wala niran siansia so arum a magmamaliw a rebelyoso tan anawet-impanpuso, a singa ginawa na dakel ed Juda nensaman, tan amawala na mauges, abulok iran bunga ed kabibilay da. Agaylan makapaermen iya! Komon ta anggapo ed sikatayo so mangibaliwala ed sayan pasakbay a leksyon ya ipapaimano ed sikatayo na sarayan duaran boksot na higos tekep na saray bunga ra​—maong tan mauges. Legan a say manepeg a panangukom nen Jehova sumpad apostatan Kakristianoan so napapapeles, komon ta sikatayo so mangipapuso ed bilin nen apostol Pablo: “Mankorang kayo a makana ed Katawan (Jehova, NW) ya onarap ed amin a makapaliket, mamabunga ed ganagana’n maabig a gawa, tan onbaleg ed kakabatan na Dios.”​—Colosas 1:10.

Panagrepaso “Saray Bunga​—Maong tan Mauges” tan saray parapo 1-4 na “Say Pisasangsangan nen Jehova ed Saray Nasyon”

◻ Anto so irerepresenta na boksot na maong iran higos?

◻ Panon ya onliliwawa so pasingawey na boksot na mauges iran higos?

◻ Anton pasakbay a leksyon so itatarok na mensahe nen Jeremias ed sikatayo?

◻ Anto so makatantanda nipaakar ed taon 607 K.K.P.? tan 1914 K.P.?

[Litrato ed pahina 15]

Singa saray maong ya higos, say totoo na Dios so angitarok na masamit iran bunga na Panarian

[Litrato ed pahina 15]

Say Kakristianoan so mamapaneknek a singa sakey a boksot na mauges iran higos