Apenek so Pilalek na Puso To

PANPIPILALEKAN ta na puso yo a nanengneng so sigpot a panguley na Mesianikon Panarian? No ontan, panpipirawatan tan ipipikasi yoray nisipan a mangaraldalin a bendisyon ed silong na satan a mangatatawen a Panarian. Mananos, sirin, ta “say pilalek onsabi, sikato so kiew na bilay.”​—Uliran 13:12; Santiago 5:7, 8.

Ngalngali 2,000 a taon la’y apalabas, si Simeon a toon “matunong tan mapangako [magalang, NW]” so nanayam ed Jerusalem. Sikatoy walaan na pananisia ed saray Mesianikon propesiya, tan siaanos “ya aalagden to so ligliwa na Israel.”​—Lucas 2:25.

Mangiiter na Ilalo Iray Mesianikon Propesiya

Si Jehova so responsabli ed inmunan Mesianikon propesiya​—sakey ya angiter na ilalo ed makasalanan tan manpapanabos a katooan. Impropesiya na Dios so isabi na Bini na “bii” to, odino sankatalbaan ya organisasyon.​—Genesis 3:15.

Saman a Sakey so abidbir bilang bini nen Abraham, tan impropesiya nen Jacob so isabi to. (Genesis 22:17, 18; 49:10) Say gloria na Panarian na Mesias so nidalangirang ed saray salmo. (Salmo 72:1-20) Impropesiya nen Isaias a say Bini so iyanak na sakey a birhin, tan impropesiya nen Miqueas a say pangiyanak so nagawa ed Betlehem. (Isaias 7:14; Miqueas 5:2) Saraya so pigara labat ed dakel a Mesianikon propesiya.

Anggapo Ni so Mesias!

Umamengen so apalabas, tan isipen a say ununan siglo K.P. so asingger la. Say orihinal a Mesianikon propesiya na Dios so 4,000 taon la natan. Asagmak na saray Judio so inkaderal na templo nen Jehova, say inkabalatar na binalegan dan dalin, 70-taon na inkakautibo ed Babilonia, tan 500 a taon ni ed silong na pakauley na saray Hentil a manuley. Siansian aggapo ni so Mesias!

Agaylan panpirpirawatan na saray matakot-ed-Dios a Judios so isasabi na Mesias! Manlapud sikato iray bendisyon ya onagus ed sikara tan ed amin a nasyones.

Sakey a Magalang a Laki

Sakey a magalang ed saray Judio a manpipirawat tan angipikasi ed isabi na Mesias et si Simeon, matoor a masiken lan aripen nen Jehova a manaayam ed kabiseran syuda na Judea. Wala so nikadkaduman bengatlan agawa ed si Simeon.

Inter na Dios so masanton espiritu to ed si Simeon tan tinumangan na sakey a pasingawey. Ag-ompatey si Simeon anggad nanengneng to so Sakey a magmaliw a Mesias. Balet ta onlalabas laray agew tan bulan. Si Simeon so ontatatken la tan ngalngali la anggapoy ilalon manbayag ni so bilay to. Nasumpal kasi so sipan na Dios ed sikato?

Sakey ya agew (nen 2 K.K.P.), sakey a walad-kalangweran a sanasawa a walaay anak so sinmabi ed templo a nanlapud Bethlehem. Imparungtal na masanton espiritu ed si Simeon a saya la so abayag-lan-aalagaren ya agew. Sikato so linma ed templo, a diman to nanengneng so sakey ya insulat na saray propeta. Anggad niyabuloy na makapkapuy a laman to lapud inkatatken, nanapura pian nanengneng ira di Jose, Maria, tan say ugaw.

Agaylay gayaga to nen inampopo to so ugaw a Jesus ed saray taklay to! Sayan Sakey so magmaliw a say nisipan a Mesias​—“say Kristo nen Jehova, NW.” Diad saman ya edad, agmakapanilalo si Simeon a naimatonan to ni so panumpal nen Jesus ed mangaraldalin a misyon To. Ingen, talagan makapaligsa so pakanengneng ed sikato bilang sakey a melag ya ugaw. Saray Mesianikon propesiya so ginmapo lan nasumpal. Agaylay liket nen Simeon! Natan et sikato la so kontenton unogip ed ipapatey anggad kagawa na kioli.​—Lucas 2:25-28.

Saray Mapropetikon Salita nen Simeon

Diad pamapakasil nen Simeon na boses to ed pandayew ed si Jehova, sikato so narengelan tayon mangibabagan: “Natan pasipot mo, Katawan, so aripen mo, A mareereen, unong ed salitam; ta anengneng na saray matak so panangilaban mo, a sikato so intadiam ed arap na amin a totoo; sakey a Silew a panagkapuyan ed saray Gentiles, tan galang na baley mo ya Israel.” Si Jose, ya anagibi ed si Jesus, tan si Maria, ya Ina to, so nantultuloy a manumameng nipaakar ed sarayan salita.​—Lucas 2:29-33.

Masigla so lupa nen Simeon legan a bebendisyonan to si Jose tan si Maria, a mapatnag ton panpitamitam so panamendisyon nen Jehova para’d sikara diad panumpal da ed saray responsabilidad da ed ugaw. Insan nagmaliw a seryoso so lupa na masiken. Ipapaarap toray balikas to ed si Maria lambengat, inyarum to: “Nia, saya’n ugaw nigaton pian kagapolan tan ki-alageyan na dakel ed Israel; tan panagkatanda a sumpaen da: On, tan sakey ya kampilan talosento so dili a kamarerwam; pian nipatnag so kanonotan na dakel a kapusoan.”​—Lucas 2:34, 35.

Say Imbaga nen Simeon ed si Maria

Nonoten pa so liknaan nen Maria. Anto kasi so labay ya ibaga nen Simeon? Arum so mangawat ed Kristo tan nitalindeg manlapud naplag a kipapasen da. Anggaman ontan, arum so mangipulisay ed sikato, natiror ed sikato, tan napelag. Unong a nipropesiya, si Jesus so nagmaliw a baton pakatiroran ed dakel a Judio. (Isaias 8:14; 28:16) Saray salita nen Simeon so agmankabaliksan a kada Israelita so napelag ni ed agpanisia tan insan ombangon ed panisia diad pangawat ed si Jesus. Imbes, saray reaksion nipaakar ed sikato so manduruma ed nanduruman indibidual, a mamapaway ed saray katunongan na dakel a puso tan mangitonton ed panangukom na Dios ed sikara balanglan diad pankaabigan da odino kaugsan da. Para’d saray agmananisia, sikato so magmaliw a sakey a tanda, odino sakey a bengatlan kadimlaan. Diad pakawalaay pananisia ed sikato, arum so nitalindeg manlapud ipapatey lapud saray pakalukso tan kasalanan tan pian pangayagaan so matunong a talindeg ed Dios. Saray kiwas na totoo ed Mesias so mangipanengneng no anto so walad kapusoan da.

Komusta met iray salita nen Simeon: “Sakey ya kampilan talosento so dili a kamarerwam”? Anggapoy Makasulatan a pakanengnengan a literal a kampilan so tinmalos ed si Maria. Ingen, say impangipulisay ed si Jesus na karaklan so mamaermen ed sikato. Tan agaylan makapaot-ot ed si Maria a nanengneng si Jesus ya akapasak ed palitek! Saya so singano sakey lan kampilan a pinatalos ed sikato.

Iyaaplika nen Simeon Iray Mapropetikon Propesiya

Pinakiwas si Simeon na espiritu na Dios pian iyaplika ed si Jesus iray Mesianikon propesiya. Nayari lan taynan nen Simeon so bilay to a walaay kareenan, odino inkapalna, ‘ta saray mata to akanengneng ed saray paraan na panangilaban na Dios, sikato so intadia To ed arap na amin a totoo; sakey a Silew a panagkapuyan ed saray Gentiles, tan galang na baley To ya Israel.’ (Lucas 2:30-32) Agaylan niyaplika iyan tuloy ed saray mapropetikon salita nen Isaias!

Satan a propeta so nampropesiya. “Say gloria nen Jehova nipatnag naani, tan amin a laman sikato so nanengneng da a sankatipon.” “Iter ta ka met naani a silew na saray Gentil, pian makapagmaliw ka a pangilaban ko anga ed sampot na dalin.” (Isaias 40:5; 49:6; 52:10) Say Kristianon Griegon Kasulatan tan saray aktual ya agawgawa so mamaneknek a say Mesias, si Jesu-Kristo, so tuan liwawa na nasyones, say Sakey a mangekal ed sakbong na espiritual a kabilungetan tan mangitarok na kilalaban ed totoo.

Anggapo la so ibabaga na Salita na Dios nipaakar ed masiken lan Simeon. Angangko ta sikato so inatey la sakbay a nilukasan nen Kristo so dalan ed mangatatawen a bilay. Agmanbayag, sirin et si Simeon so napaoli ed bilay diad dalin. Agaylan gayaga so naeksperiensia to​—tan sikayo—​ed balon mundo diad silong na Mesianikon Panarian na Dios!