Panamasiansia na Pantutunosan ed Baetan na Mamatatken tan Ministeryal ya Ariripen

AG-ABAYAG kayari na Pentecostes 33 K.P., sakey a emerhensya so linmesa ed kapkapan-porman Kristianon kongregasyon. Sakey ya uksoyan so niletneg para’d pangasikaso na mankakaukolan iran balo. Balet kasalilikna “nantalabotob so saray Griego a Judio ya onsumpa ed saray Hebreos, lapu’d saray bibii a babalo ed sikara napapaolian ira ed pannanabangan ya inagewagew.”​—Gawa 6:1.

Sarayan reklamo so nadngelan na apostoles. “Saray labindua tinipon da so moyong na saray binangatan, et inkuan da: Ag manepeg a paolian mi so Salita na Dios pian manlinkor kami ed dulang. Anapen yo sirin, agagi, dia ed sikayo so pitora’n lalaki a maong so dengel da, napno na espiritu tan kakabatan, a sikara so igaton tayo ed sayan’ gawa.”​—Gawa 6:2, 3.

Saya so mangiyiilustra ed importanten prinsipyo na organisasyon ed limog na Kristianon kongregasyon. Arum a responsablin lalaki so nausar a mangasikaso para’d rotina iran pamaakaran, bangta arum so mangasikaso ed ambebelat iran espiritual a pamaakaran. Saya so walaan na pangaligan. Diad kadaanan ya Israel, si Aaron tan saray kailalakan to so aturo pian manlingkor bilang saserdote pian manggawa na panangiyapay ed Dios. Anggaman ontan, inganggan nen Jehova a saray Levita so ontulong ed sikara ya ‘apigeren ya amin a kagawaan na abung na doypo.’ (Numeros 3:5-10) Mipadpara, saray manangasikaso natan so tutulongan na ministeryal ya ariripen.

Say Betang na Mamatatken tan Ministeryal ya Ariripen

Say Kasulatan so angidatak na atagey iran kualipikasyon para’d namparan mamatatken tan ministeryal ya ariripen. (1 Timoteo 3:1-10, 12, 13; Tito 1:6-9) Sikara so agmilalaslasan balet mankimey para’d parehon kalat​—say kipaalagey na kongregasyon. (Ipareng so Efeso 4:11-13.) Anggaman kuan, wala so pigaran pandurumaan na kimey a gagawaen da ed loob na kongregasyon. Diad 1 Pedro 5:2, nibaga ed saray manangasikaso: “Pastolan yo so saray polok na Dios ya wala ed sikayo, panpagaan yo ra ya ag iparalan ed kabiskegan, no ag dia ed kalakal a mabolos unong ed linaway Dios; aliwa a lapu’d mabanday a pananobo no ag lapu ed ataria’n kalakal.” Sikara so mangisaklang na eebatan ed Dios ed no panon so panumpal da ed sayan sagradon talek.​—Hebreos 13:17.

Komusta met iray ministeryal ya ariripen? Say Kasulatan so agmankaukolan a sikaray magmaliw a kualipikado ed abilidad dan manbangat. Say obligasyon da so bengatlan duma manlapud saray mamatatken. Nen inmunan siglo K.P., anggapoy duaruwan dakel a bengatlan materyal, rotina, odino mekanikal a nengneng a mankakaukolan na imano, anganko et pati say pansaliw na materyal para’d pangopya na saray Kasulatan odino anggan say pangopya a mismo.

Natan, saray ministeryal ya ariripen so mantutultuloy a manusumpal ed nanduruman importantin kimkimey ed loob na kongregasyon, a singa say pangasikaso ed kuenta na kongregasyon tan saray teritorya, panangibunog na saray magasin tan libro, tan panangasikaso ed Kingdom Hall. Arum a ministeryal ya ariripen a walaan na abilidad so nayari ni ingen a nausar ed panagbangat, no maminsan et diad panangikondukta ed Panagaral na Libro ed Kongregasyon, pangasikaso na saray betang ed saray Miting ed Serbisyo, tan pangiter na publiko iran paliwawa.

Sano saray mamatatken tan ministeryal ya ariripen so mankimey a mankakasakey a walaan na pantutunosan, saray pankaukolan na kongregasyon​—namparan diad espiritual tan organisasyonal—​so naasikaso ed asimbang a paraan. Diad ontan et saray membro na kongregasyon so magmaliw a maliket, mabiskeg, tan mabunga ed espiritual. Nonoten so insulat nen Pablo ed saray alanaan ed Efeso: “Say amin a laman maong so inkasangal to tan mankakasakey ed sikato met lamlamang ed panamegley na mangiter na nanlalangoan, onong ed pangagawa na sukat na balang sakey a kabiangan, pabalegen to so laman ed pangipaalagey to ed sikaton dili ed aro.”​—Efeso 4:16.

Saray mamatatken tan ministeryal ya ariripen so kaukolan a manggunaet ed pamaaligwas na miulibay a pantutunosan, salanti, pipaknaan, pi-abobon, pikoopera, tan pankakasakey. Anggaman ontan, say ontan a pantutunosan so aliwan automatikon niwala. Satan so nepeg a nabayuboan tan maalwar a salimbengan.

No Anto so Nagawaan na Mamatatken

Say sakey ya importantin kundang et say pamidbir a say siglaotan na sakey a matatken tan sakey a ministeryal ya aripen et aliwan sakey a katawan na sakey ya aripen odino ed sakey ya amo na sakey ya empleado. Pian niwala so pantutunosan, saray mamatatken so manmoria ed ministeryal ya ariripen bilang kaparan ministros na Dios. (Ipareng so 1 Corinto 3:6-9.) “Dia ed galang manpapalabian kayo,” ibabaga na Roma 12:10. Sirin, paliisan na mamatatken so pantrato ed ministeryal ya ariripen ed paraan a nayarin ompatnag a mamaong odino makapaabeba. Sikaray mangipaseseg na mabunigas a panangiyuna, imbes a manismaya. Say pantrato ed ministeryal ya ariripen tekep na respeto so mamabaleg na sankaabigan iran kualidad ed sikara tan ontulong ed sikara pian manggayaga ed kimey da ed kongregasyon.

Nepeg met a nonoten na saray mamatatken a say kimey dan panpastol ed pulok na Dios a nipuder ed sikara so mangilalaktip ed agagin manlilingkor bilang ministeryal ya ariripen. Tua, saray ontan a responsablin lalaki so iilaloan a magmaliw a matatken iran Kristiano. Anggaman kuan, singa arum ed pulok, sikaray mankaukolan na personal ya imano a pana-panaon. Saray mamatatken so nepeg ya interesadon tuloy ed espiritual ya iyaaligwas da.

Alimbawa, sanen akabat nen apostol Pablo so tobonbalon Timoteo, tampol ton atebek so potensyal nen Timoteo tan “kinaliktan nen Pablo a mila ed sikato.” (Gawa 16:3) Si Timoteo so nanlingkor bilang kaiba nen Pablo ed panagbaroy, a nansumpal ed impakaawat to na mabalor a tuloy a panangipasal. Agayla, pigaran taon ed saginonor et nayarian nen Pablo ya isulat ed saray Kristiano ed Corinto: “Inbakik ed sikayo si Timoteo, ya ana’ ko ya inararok tan matoor ed Katawan, a sikato so mangipanonot ed sikayo ed ibabangat ko ed amin a pasen ed balang iglesia.”​—1 Corinto 4:17.

Sikayoran mamatatken, kasin ginapoan yo lan usaren so sigpot a potensyal na ministeryal ya ariripen ed kongregasyon yo? Kasin tutulongan yo’ran onaligwas diad pangiter ed sikara na personal a panangipasal ed publikon pansalita tan pansukimat ed Biblia? Kasin inimbitaan yo’ray kualipikado a miulop ed sikayo ed panagpastol ya idadalaw? Kasin mikikimey kayo ed sikara ed lawak na ministeryo? Diad parabolo nen Jesus ed saray talento, inkuan na katawan ed matoor iran ariripen to: “Maabig a gawa, maong tan napanmatalkan ya aripen!” (Mateo 25:23) Kasin sikayo met so mabunlok ed pangidayew tan panangomenda nipaakar ed ministeryal ya ariripen a masimpit a manusumpal ed saray asainmin da ed maabig a paraan? (Ipareng so Uliran 3:27.) No andi, kasin liknaen dan say kimey da so agnaapresya?

Say pitatalosan met so makana ed mantutunosan a siglaotan ed pankikimey. (Ipareng so Uliran 15:22.) Saray obligasyon so agnepeg ya ipabtang nisay alaen ed agmakatunongan odino agmauksoy a paraan. Saray mamatatken so nepeg a sipipikasin mangisingbat ed no panon a saray abilidad na sakey ya agin laki so sankaabigan a nausar ed kongregasyon. (Ipareng so Mateo 25:15.) Sano nipabtang so sakey ya asainmin, say sakey ya agin laki so nepeg a sigpot a nabilin ed no anto so eksakton kakaukolanen ed sikato. “No iner so kaandian na makabat a manangitonton,” so ipapasakbay na Uliran 11:14, “say baley nipasag.”

Aliwan sankaabigan so pangibaga lambengat ed sakey ya agin laki a mangasikaso ed departamento na saray kuenta, magasin, odino literatura manlapud sananey ya aripen. No maminsan say balobalo nin apabtangan ya aripen so manalor ed karakel na aliwan susto odino aliwan kompleto iran rekord. Agaylan makapadismaya! “Nagawa komon so sarayan amin ed kasimpitan tan maoksoy,” so igaganggan na 1 Corinto 14:40. Saray mamatatken so nepeg a mangiyuna ed pangisanay ed agagin lalaki, ya ipaikabisado ed sikara iray kongregasyonal a paraan tan pangiletneg na alimbawa ed inkasikara ed panumbok na saratan a paraan. Alimbawa, saray mamatatken so mangiyuksoy ed saray kuenta na kongregasyon a na-audit kada taloy bulan. Say pangibaliwala ed ontan ya importantin uksoyan so mangitonton ed saray problema tan mamakapoy ed respeto na ministeryal ya ariripen ed organisasyonal iran totontonen.

Balet bilbilang ta say agin laki so ompapatnag a mapaulyan ed panangasikaso na sakey ya asainmin? Imbes a tampol a sikato so ekalen manlapud asainmin to, nepeg ya itongtong na mamatatken iray pamaakaran ed sikato. Anganko ta say problema et say kakulangan na panangipasal. No say agin laki so siansian walaan na saray kairapan ed pamenben ed asainmin to, anganko et sikato so makapankimey a maong ed sananey ya asainmin.

Saray mamatatken met so makapangiyalibansa na pitutunosan diad pangipatnag na kaumildian. Papasesegen na Filipos 2:3 iray Kristiano a manggawa na “angapo’n balot komon so gawaen yo a lapud kasusumpa o panpasirayew, noag dia ed kaabebaan na kalakal balang sinansakey ibilang to so arum a magmaong nen say sikato’n dili.” Say matatken sirin so nepeg a manggunaet a mikoopera no say sakey ya attendant so mangidirehi ed sikaton onyurong ed sakey a yurongan ed hall, ya agmangikatunongan a lapud sikato so matatken, et agto nakaukolan so ontulok. Anganko et say attendant so basta manutumbok ed suherin onyurong ed nanduruman seksyon ed hall, anggaman kaukolan ton tandaan ya anggapo so totontonen a nepeg a gawaen na amin so ontan.a Paliisan na sakey a matatken so agnakaukolan a panamalakbat iran desisyon a nipabtang ed sakey a ministeryal ya aripen.

Saray Ministeryal ya Ariripen so Makikimey para’d Pantutunosan

“Saray ministeryal ya aripen so nepeg met a magmaliw a seryoso,” ibabaga nen apostol Pablo. (1 Timoteo 3:8, NW) Say panmoria ed saray asainmin da a seryoso​—bilang kabiangan na sagradon serbisyo ra—​so walaan na baleg a nagawaan ed pakasalimbeng ed saray pakaaburidoan manlapud iyaligwas. No sakey kan ministeryal ya aripen, kasin gagawaen mo’ray obligasyon mo tekep na entusiasmo? (Roma 12:7, 8) Kasin inyaplikam so inkasika pian magmaliw ya onsiano ed pangasikaso na saray obligasyon mo? Kasin sika so napanmatalkan tan napandependian? Kasin ipapanengneng mo so mabulos ya espiritu no nipaakar ed saray asainmin? Sakey a ministeryal ya aripen ed sakey a dalin diad Africa so mangaasikaso na taloran nanduruman asainmin ed kongregasyon. Say ugali to? “Bueno, kabaliksan na satan so nagkalalo nen say impasyan kimey,” inkuanto, “tan say impasyan kimey so agmamatey ed sika.” On, saraman so mabulos ed inkasikara so manggayaga ed sankaliketan.​—Gawa 20:35.

Baleg met so nagawaan mo ed pangiyalibansa na pantutunosan diad sigpot a pikoopera ed saray mamatatken. “Ontolo’kayo ed saray wala a manuley ed sikayo, tan pauleyan kayo ed sikara,” so ibabaga na Hebreos 13:17, “ta manbabantay ira lapu ed saray kamarerwa yo, a singa sikara so mangiter naani pipalinewan: pian sikato ya so gawaen da a sigagayaga, tan aliwa a sieermen: ta saya ag makapaabig ed sikayo.” Tua, saray mamatatken so ag-ayadyarin lalaki, tan mainomay so pakarumog na kakapuyan ed sikara. Ingen say kritikon walna so mamawala na kakulangan na talek. Satan so maneral na gayaga yo tan mapalalon mangapekta ed arum ed kongregasyon. Si apostol Pedro sirin so angiter ed sayan simbawa: “Mamalangwer, toekan yo so masiken. On, amin yo balkesan yoy inkasikayo na panagpaabeba, a manlilinkoran so sinansakey . . . Mangabeba kayo sirin ed silong na makapanyarin lima’y Dios, pian itandoro to kayo ed kanepegan ya panaon.”​—1 Pedro 5:5, 6.

Say ontan a simbawa so nagkalautlan matukoy no liknaen yon nibabaliwala kayo para’d saray pribilihyo ed serbisyo. Anganko et sikayo so “manadampot ed betang na manangasikaso,” balet ta anggapo so ginawan pananuro. (1 Timoteo 3:1, NW) Say kaabebaan na nonot so makatulong ed sikayo ed pamasiansian ‘manilalo ed sikato.’ (Tagleey 3:24) Imbes ya ombarong ed saray mamatatken​—a seguradon maneral ed maabig a siglaotan yo​—tepeten ed sikara no kasin walaray pamaakaran a nayarian yon paaligwasen. Say puron inkamabulos yon mangawat tan mangiyaplika ed simbawa so andi-duaruwan naimano bilang ebidensya na ibubulaslas yo ed espiritual.

Say maridios a kaumildian tan kasimpitan so makatulong ed sakey a ministeryal ya aripen ed pamasiansia na inkasimbang to no sikato so walaan na nikadkaduma iran abilidad odino edukasyonal tan sosyal iran bentaha. Agaylan nayarin makasagyat para’d sikato so panalin manpangta ed saray mamatatken odino pangipaimano ed dili iran abilidad to! Ipapanonot na Uliran 11:2 ed sikatayo a “saray mapaabeba wala so kakabatan.” Say masimpit ya agin laki so makaamta ed saray limitasyon to. Sikato so mabulos a mankimey a mareen ya anggan agnaiimano tan mangusar ed saray abilidad to ed panuporta ed saray mamatatken. Say inkasimpit so nayari met ya ontulong ed sikato ed pakamoria a bangta sikato so nayarin walaan na dakel a kakabatan ed minumundon paraan, sikato so nayarin kulang ni ed importantin pamaakaran ed espiritual a kakabatan tan pakatebek​—kualidades a nayarin saray mamatatken so ontalona.​—1 Corinto 1:26–2:13; Filipos 1:9.

Malinew, saray mamatatken tan ministeryal ya ariripen so manggawa ed makana iran betang. Baleg so nagawaan da a nankakasakey ed pamabiskeg ed amin ed loob na kongregasyon. Balet pian nagawaan so ontan, sikara so nepeg a mankimey a mankakasakey a mantutunosan, “tinekepan na amin a kaabebaan na linawa tan kaoyamoan, pati panagsungdo, manoonoran so sakey tan sakey ed sikayo ed aro; a sesegan yo ya imatonan so pankakasakey na Espiritu ed balor na kareenan.”​—Efeso 4:2, 3.

[Paimano ed leksab]

[Saray litrato ed pahina 27]

Ipasen na mamatatken so ministeryal ya ariripen, bilang aliwan onsasaginonor, noagta bilang kaparan ministros na Dios