Alaen Bilang Pan-uliranan Iray Propeta na Dios

“Pan-uliranan yo, agagik, so inpantepel [ed kaugsan, NW] tan say anos na saray profetas, a nansalita’ra ed ngaran na Katawan [Jehova, NW].”​—SANTIAGO 5:10.

1. Anto so ontutulong ed ariripen nen Jehova pian magmaliw a magayaga anggaman sikaray napapasegsegang?

DIAD ariripen nen Jehova a napapatnagan so gayaga anggaman ed kaermenan a kasmak ed sankamundoan diad sarayan kaunoran ya agew. Saya so lapud kabat dan napapaliket da so Dios. Saray Tasi nen Jehova so makapansungdo met ed silong na panamasegsegang tan isusumpa ed mapublikon ministeryo ra lapud namomoria a sikaray maniirap nisesengeg ed inkatunong. Imbaga nen Jesu-Kristo ed saray patumbok to: “Mapalar iray apasegsegang la nisengeg ed katonongan: ta sikara’y makankien na panaria’y tawen. Mapalar kayo sano balawen da kayo’y totoo, tan pasegsegangen da kayo, tan salitaen da’y amin a nengneng na mauges a sumpa’d sikayo, nisengeg ed siak, ya mantila ra.” (Mateo 5:10-12) On, kapiganman a nidudunget so ariripen na Dios ed saray subok na pananisia, ipapasen daraya a gayaga.​—Santiago 1:2, 3.

2. Unong ed Santiago 5:10, anto so makatulong ed sikatayon mangagamil na anos?

² Insulat nen babangatan a si Santiago: “Pan-uliranan yo, agagik, so inpantepel [ed kaugsan, NW] tan say anos na saray profetas, a nansalita’ra ed ngaran na Katawan [Jehova, NW].” (Santiago 5:10) Inukeran na saray leksikograpo a di W. F. Arndt tan si F. W. Gingrich so Griegon salitan nipatalos dia a “pan-uliranan” (hy·poʹdeig·ma) bilang “alimbawa, modelo, pan-uliranan, diad maong a pantalos a singa sakey a [bengatlan] manasagyat odino nepeg a managyat ed sakey pian mangalig ed satan.” Singa nipanengneng ed Juan 13:15, “saya so nagkalalo ni nen say sakey ya alimbawa. Satan so pihon orihinal a modelo.” (Theological Dictionary of the New Testament) No ontan, sirin, nayarin laen na modernon-agew ya ariripen nen Jehova iray matoor a propeta to bilang pan-uliranan no nipaakar ed “impantepel ed kaugsan” tan ed “anos.” Anto ni so natebek tayo sano aralen tayoray impanbilay da? Tan panon iyan makatulong ed sikatayo ed kimey tayon panagpulong?

Sikaray Nantepel ed Kaugsan

3, 4. Panon so inkiwas nen propetan Amos ed isusumpan nanlapud si Amasias?

³ Mabetbet a saray propeta nen Jehova so nantepel ed kaugsan odino mauges a tratamento. Alimbawa, nen koma-siam a siglo K.K.P., say saserdote a si Amasias a managdayew ed kilaw a baka so agaylan marelmeng a sinmumpa ed propetan Amos. Sititilan ibabaga nen Amasias a si Amos so akinonong sumpad Jeroboam II diad pangipropropesiyan say ari so ompatey diad panamegley na kampilan tan say Israel et nadakep. Si Amasias so agmangingalngalep ya angibaga ed si Amos: “O sika managnengneng, onla ka, ontainan ka ed dalin na Juda, tan kanen mod’man so tinapay, tan manprofetacad’man. Balet agka la komon manprofeta ed Bethel; ta sikato so kawalaan na santuario na ari, tan sikato so abung na maari.” Ag-adismaya ed sayan insalitan panangataki, inmebat si Amos: “Siac aliwaak nen saman [a] profeta, tan aliwaak met ya anak na profeta, noag ingen bantayak nen saman na polok, tan manaalila ed saray kiew a sikomoro. Ed si Jehova insian toak ed katotombok ed polok, et si Jehova inkuan to ed siak, Onla ka, manprofeta ka ed baley ko ya Israel.”​—Amos 7:10-15.

⁴ Say espiritu nen Jehova so amakayari ed si Amos pian makpel a mangipropesiya. Isipen so inkiwas nen Amasias ed imbaga nen Amos: “Natan sirin denglen mo so salita nen Jehova; Kuan mo, agka manprofeta na sumpa ed Israel, tan agka met mansalita na sumpa ed abung nen Isaac; Kanian, onia so kuan nen Jehova: Say asawam balangkantis naani ed ciudad, et saray anak mo a lalaki tan bibii nipasag ira naani ed kampilan, tan say dalin mo panapagan da naani ed panamegley na lubir, et sika lanlamang ompatey ka naani ed dalin ya ag malinis, tan say Israel ag onlaron a napatainan naani ed baley to a nadakep.” Satan a propesiya so asumpal. (Amos 7:16, 17) Agaylan akebbiew si apostatan Amasias.

5. Anton panparaan so nanengneng ed baetan na situasyon na modernon-agew ya ariripen nen Jehova tan ed samay situasyon nen propetan Amos?

⁵ Saya so mipadpara ed situasyon na totoo nen Jehova natan. Sikatayoy manasagmak na kaugsan bilang manangiyabawag ed saray mensahe na Dios, tan dakel a totoo so agmangingalngalep a mansasalita nipaakar ed kimey tayon panagpulong. Tua, say autorisasyon tayo a manpulong et agnanlapud sakey a seminaryo na teolohya. Imbes, say masanton espiritu nen Jehova so manadagdag ed sikatayon mangiyabawag ed maong a balita na Panarian. Agtayo uumanen nisay pabebetelen so mensahe na Dios. Imbes, singa si Amos, situtulok tayon iyaabawag itan, antokaman so ikiwas na saray dumerengel tayo.​—2 Corinto 2:15-17.

Sikaray Nan-anos

6, 7. (a) Antoray mananda na panagpropesiya nen Isaias? (b) Panon a saray kaplesan-ya-agew ya ariripen nen Jehova so onkikiwas a singa si Isaias?

⁶ Saray propeta na Dios so nan-anos. Alimbawa, say anos so impanengneng nen Isaias, a nanserbin propeta nen Jehova nen koma walon siglo K.K.P. Imbaga na Dios ed sikato: “Onla ka, tan ibagam ed saya a baley, Dengdenglenyo [naulit-ulit, NW] a tua, balet agyo natalosan; et nengnengen yo a tua, balet agyo nibiig. Gawaen mo so puso na saya a baley a mataba, tan gawaen mo so saray layag da ya ambelat, tan saniban mo so saray mata ra; ompan makanengneng ira ed saray mata ra, tan makadngel ira ed saray layag da, tan makatalos ira ed puso ra, tan magbabawi ra, tan natambal ira.” (Isaias 6:9, 10) Talagan ontan so inkiwas na totoo. Balet kasin saya so sengegan na itunda nen Isaias? Andi. Imbes, sikato so siaanos tan siseseseg ya angiyabawag ed saray pasakbay a mensahe nen Jehova. Say Hebreon inkasangal na saray salita na Dios a kapkapanaon so manusuporta ed pantalos ya “abayaglan pantutultuloy” na saray panangiyabawag na propeta, a “naulit-ulit” a nadngelan na totoo.​—Gesenius Hebrew Grammar.

⁷ Natan dakel so onkikiwas ed epekto na maong a balita a singa ed inkiwas na totoo ed saray salita nen Jehova ya impasabi nen Isaias. Anggaman ontan, singa say matoor a propeta, ‘paulit-ulit’ tayon ipaparungtal so mensahe na Panarian. Gagawaen tayo itan tekep na seseg tan siaanos a maseeseet lapud saya so linawa nen Jehova.

“Onman ya Onman so Ginawa Ra”

8, 9. Diad antoran dalan a say propeta nen Jehova a si Moises et sakey a maabig ya alimbawa?

⁸ Si propetan Moises so uliran ed anos tan katutulok. Pinili to so pangala na talindeg a kaibay inaripen ya Israelitas, balet ta sikatoy kinaukolan a manalagar a siaanos parad kililiktar da. Diad loob na 40 a taon et sikatoy nanayam ed Midian ya anggad sikatoy inusar na Dios a mangitonton ed totoo nen Israel manlapud inkaaripen. Sanen si Moises tan say agi ton si Aaron so walad arap na manuley na Ehipto, situtulok dan imbaga tan ginawa so inganggan na Dios. Diad tua, “onman ya onman so ginawa ra.”​—Exodo 7:1-6, NW; Hebreos 11:24-29.

⁹ Siaanos si Moises a nansungdo ed 40 a taon ya impanirap na Israel ed kalawakan. Sikato met so situtulok a tinmumbok ed madibinon panangiwanwan diad impamaalagey na tabernakulo na Israel tan diad impanggawa na arum niran bengatlan parad panagdayew ed si Jehova. Ontanlan inkaapit so impanumbok na propeta ed saray bilin na Dios a nabasa tayo: “Onia so ginawa nen Moises: say nitukoy ed amin ya imbilin nen Jehova ed sikato, sikato so ginawa to.” (Exodo 40:16) Diad panumpal ed ministeryo tayo diad pilimog ed organisasyon nen Jehova, tandaan tayo so katutulok nen Moises tan iyaplika so simbawa nen apostol Pablo ya ‘ontulok ed saramay mangidadaulo ed limog tayo’​—Hebreos 13:17, NW.

Sikaray Awalaan na Positibon Awawey

10, 11. (a) Anto so mangipapanengneng a si propetan Oseas so walaan na positibon awawey? (b) Panon tayon napansiansia so positibon awawey sano aasinggeran tayoy totoo ed saray teritorya tayo?

¹⁰ Kaukolan a nawalaan iray propeta na positibon awawey legan ya ipapasabi daray manangukom a mensahe ontan met ed saray propesiyan mangisisindag ed maaron panagpaga na Dios parad saray matoor ya ataytayak diad Israel. Saya so tua ed si Oseas, a propeta ed loob na ag-onkulang a 59 a taon. Diad positibon paraan, sikatoy nantultuloy a mangipapasabi ed saray mensahe nen Jehova tan sinampotan to so mapropetikon libro to ed saray salitan: “Siopa so makabat a makatalos na saraya a bengatla? Makalakal, pian naamtaan to ra? Ta saray dalan nen Jehova sikara so maptek, tan saray matunong manakar ira naani ed sikara; balet saray masusumpa napelag ira naani ed sikara.” (Oseas 14:9) Anggad aabuloyan nen Jehova itayon mangiter na pantasi, nawalaan itayo na positibon awawey tan mansiansian anapen iramay sikakabat a mangawat ed agkanepegan-a-panangasi na Dios.

¹¹ Pian ‘anapen iray makana,’ kaukolan tayon manseet tan moriaen iray pamaakaran diad positibon paraan. (Mateo 10:11) Alimbawa, no agtayo amtay akapanginan na saray tombok tayo, nayari tayon sansasakeyen a pawilen iray nanlapuan tayo. Nayarin naromog tayo lambengat itan kayari paulit-ulit a panggawa ed saya. Ontan met komon so panseet a pananap tayo’d saray singa-karneron totoo. Agaylay gayaga tayo sano sikaray onkiwas ed epekto na maong a balita diad natatayek a teritorya! Tan agayla so pangayaga tayo ed pamebendisyon na Dios ed kimey tayo diad daldalin a datin walaray panameget ed mapublikon ministeryo tayo!​—Galacia 6:10.

Saray Lapuan na Panamaseseg

12. Anton propesiya nen Joel so walaan na kasumpalan ed koma-20 siglo, tan panon?

¹² Saray salita na saray propeta nen Jehova so nayarin magmaliw a baleg a kapasesegan tayo diad ministeryo tayo. Alimbawa, konsideraen pa so propesiya nen Joel. Satan so mankarga na saray manangukom a mensahe a nipaarap ed apostatan Israelitas tan arum diad koma siam a siglo K.K.P. Ingen, si Joel met so apuyanan a mangipropesiya: “Et nagawa naani ed kayari to, ya ikalbok naani so Espirituk ed amin a laman; et saray anak yo a lalaki tan bibii manprofeta ra naani, saray mamasiken yo mankogkogip ira naani na saray kogkogip; saray tobonbalo yo a lalaki makanengneng ira naani na saray pasingawey: Tan ontan met ed saray ariripen a lalaki tan bibii dia ed saratan ya agew ikalbok naani so Espirituk.” (Joel 2:28, 29) Saya so apaneknekan a tua ed saray patumbok nen Jesus nanlapulad Pentecostes 33 K.P. a nampatuloy. Tan agaylan engrande so kasusumpalan na sayan propesiya ed sayan koma-20 siglo! Natan et minilyon so ‘manpropropeta,’ odino mangiyaabawag ed mensahe nen Jehova​—walad limog da so masulok a 600,000 a walad sigpot-panaon a payunir a serbisyo.

13, 14. Anto so makatulong ed saray kalangweran a Kristiano a naromog so gayaga diad lawak a ministeryo?

¹³ Dakel a manangiyabawag na Panarian so kalangweran. Aglawas mainomay parad sikara so mitongtong ed saray maedad la nipaakar ed Biblia. No maminsan saray tobonbalon ariripen nen Jehova so babagaan: ‘Dadaraken yoy panaon yo ed panagpulong,’ tan ‘nepeg a duma so gagawaen yo.’ Sitataktikan onebat iray malangwer a Tasi nen Jehova tan ibagan panermenan da ya onman manaya so liknaan na too. Aromog na sakey a tobonbalon managpulong na maong a balita a makatulong so pangibaga ni na: “Talagan naliliknak a nagugunggunaan ak ed pitotongtong ko’d saray maedad la a singa sikayo, tan pangagayaan ko itan.” Siempre, say panangipulong na maong a balita so maseguron aliwan panagdarak na panaon. Saray bilay so nalalanor. Diad panamegley nen Joel, imbaga ni na Dios: “Et nagawa naani, ya angan siopa ya ontawag ed ngaran nen Jehova, nilaban naani.”​—Joel 2:32.

¹⁴ Saray anak a miuulop ed saray ateng da ed kimey a panangipulong na Panarian so mangaabrasa ed tulong na atateng ed panangigetar na personal iran kalat. Kalnakalnan saratan a katayatdang so onaligwas manlapud panbasa na sakey a kasulatan anggad pangisalaysay na nibased-Biblian ilalo ra tan diad pangiyopresi na matukoy a literatura ed interesadon totoo. Legan a naiimano ra so dilin aligwas da tan bendisyon nen Jehova, saray kalangweran a manangipalapag na Panarian et makakaromog na baleg a gayaga diad panangipulong na maong a balita.​—Salmo 110:3; 148:12, 13.

Say Seseg tan Sakey ya Awawey a Makaalagar

15. Panon a say alimbawa nen Ezequiel so makatulong pian parangaten so seseg tayo ed kimey a panangipulong ed Panarian?

¹⁵ Saray propeta na Dios so alimbawa met diad namparan panangipanengneng na seseg tan awawey a makaalagar​—saray walnan kaukolan tayo ed ministeryo tayo natan. Sanen inmunan naaralan tayo so katuaan manlapud Salita na Dios, maseguron sikatayoy atenyeg tekep na seseg ya amakiwas ed sikatayo pian mansalitan sipapakpel. Balet nayarin dakel lan taon so linmabas nanlapulad saman, tan nayarin mabetbet tayon nakokobrian so teritoryan pantatasian tayo. Nayarin dagdaiset a totoo so mangawat natan ed mensahe na Panarian. Kasin saya so amakesay ed seseg tayo? No ontan, konsideraen pa si propetan Ezequiel, a say ngaran to et mankabaliksan na “Papabiskegen na Dios.” Anggaman si Ezequiel so nidunget ed anawet-impanpuson totoo ed kadaanan ya Israel, sikato so pinabiskeg na Dios tan diad piguratibon paraan et ginawa ton anawnawet so moling to a mas anawet nen say anaw-awet a bato. Diad ontan et asarag nen Ezequiel a sumpalen so ministeryo to ed loob na dakerakel a taon, balanglan ontalineng odino andi iray totoo. Ipapanengneng na alimbawa to a nagawaan tayo met itan, tan satan so makatulong ed sikatayo pian parangaten so seseg tayo ed kimey a panagpulong.​—Ezequiel 3:8, 9; 2 Timoteo 4:5.

16. Anton awawey nen Miqueas so nepeg tayon bayuboan?

¹⁶ Makatantanda ed inka-anos to et si Miqueas, a nampropesiya diad koma walon siglo K.K.P. “Balet no nipaakar ed siak,” insulat to, “onnengnengak naani ed Jehova; alagden ko naani so Dios na kilalaban ko: say Dios ko talinengen to ak naani.” (Miqueas 7:7) Say talek nen Miqueas so nilamot ed mabiskeg a pananisia to. Singa si propetan Isaias, kabat nen Miqueas a say ginagala nen Jehova et maseguron sumpalen To. Amta tayo met iya. (Isaias 55:11) Bayuboan tayo sirin so awawey a makaalagar nipaakar ed kasumpalan na saray sipan na Dios. Tan ipulong tayo so maong a balita tekep na seseg, anggan diad saray lugar a saray totoo et mangipapanengneng na samet ya interes ed mensahe na Panarian.​—Tito 2:14; Santiago 5:7-10.

Pangagamil na Anos Natan

17, 18.Antoran kadaanan tan modernon alimbawa so makatulong ed sikatayon mangagamil na anos?

¹⁷ Arum ed saray propeta nen Jehova so siaanos a nanseet ed saray asainmin da ed loob na dakel a taon balet agda anengneng so kasumpalan na saray impropesiya ra. Ingen, say maanos ya impanseet da, mabetbet legan a sikaray maniirap ed mauges a tratamento, so ontutulong ed sikatayon moriaen a nayarian tayon sumpalen so ministeryo tayo. Nagunggunaan tayo met manlapud alimbawa na saray matoor a nakdaan diad saray asakbay a dekada na koma-20 siglo. Anggaman say mangatatawen iran ilalo ra so ag-amorian tampol unong ed iilaloan da, agda inabuloyan so kadismaya ed singano inkaabala a mamakesay na seseg da ed panggawa na linawa na Dios unong ya imparungtal to ed sikara.

¹⁸ Diad loob na saray taon, dakel ed sarayan Kristiano so maparanay a mangibubunog ed Say Panag-Bantayan tan say kaiba ton magasin, say Awake!, (a datin tinawag a The Golden Age tan diad saginonor et Consolation). Siseseseg dan imbunog irayan makanan magasin ed totoo diad saray lansangan tan diad saray ayaman da a tatawagen tayo natan a saray rota na magasin. Sakey a maedad lan agin bii ya akasumpal la ed mangaraldalin a kurang to so kailiw a tampol na saray ondadalan ya asanay dan nanengneng iyan mantatasi ed saray lansangan. Agaylan panagtasi so initer to legan na saray dakel a taon na matoor a serbisyo, a singa impanengneng na maapresyan balikas na saramay mangiimaton ed sikato ed mapublikon ministeryo! Bilang sakey a manangiyabawag na Panarian, kasin sikayo so maparanay a mangipapalima na Say Panag-Bantayan tan Awake! diad totoon naabet yo ed ministeryo yo?

19. Anton panamaseseg so iyoopresi ed sikatayo na Hebreos 6:10-12?

¹⁹ Kunsideraen pa met, so anos tan matoor a serbisyo na saray agagin manlilingkor bilang membro na Mananguley ya Ulop na Tastasi nen Jehova. Pigara ed sikara la natan so walad koma siam odino koma samplon dekada na bilay da, balet siansian sikaray manangiyabawag na Panarian a siseseg a mangaasikaso ed saray nipabtang a kimey da. (Hebreos 13:7) Tan komusta met so nipaakar ed saray maedad lan walaan na mangatatawen ya ilalo tan ontan met ed arum a walad limog na “arum a carnero” a maedad la ra? (Juan 10:16) Naseguro ra a say Dios so aliwan agmatunong pian lingwanan iray gawa ra tan say aron ipapanengneng da parad ngaran to. Kaiba iray malalangwer a kapananisiaan, komon ta manseet iray Tasi nen Jehova diad panggawa na anggaay nayarian da, a mangagamil na pananisia tan mangipanengneng na anos diad serbisyo ed Dios. (Hebreos 6:10-12) Insan, balanglan diad kioli, a singa saray propeta nen inmuna, odino diad kiliktar a mismo ed onsasabin “baleg a kairapan,” anien da so mayaman a tumang a maandon bilay.​—Mateo 24:21.

20. (a) Anto so naaralan yo manlapud say “pan-uliranan” ya intilak na saray propeta? (b) Panon a makatulong ed sikatayo so impan-anos na saray propeta?

²⁰ Agaylan maabig a pan-uliranan so intilak ed sikatayo na saray propeta na Dios! Lapud sikaray nansungdo ed kairapan, angagamil na anos, tan angipatnag na nanduruman maridios a kualidad, sikaray apribilihyoan a mansalita diad ngaran nen Jehova. Bilang modernon-agew a Tastasi to, aligen tayora tan magmaliw a desidido a singa si propetan Habacuc, ya angiyabawag: “Onalagey ak naani ed tapew na panbantayan ko, tan onyorongak naani ed tapew na ilang, tan onimaton ak naani ya onnengneng no anto so salitaen to ed siak, tan no anto so yebat ko nipaakar ed pandalem ko.” (Habacuc 2:1) Komon ta nawalaan tayo na mipadparan determinasyon legan ya aagamilen tayo so anos tan sigagayagan mantultuloy ed mapublikon pangiyabawag ed maglorian ngaran na Engranden Manamalsa tayo, si Jehova!​—Nehemias 8:10; Roma 10:10.

Kasin Atalosan Yo Irayan Punto?

◻ Anton makpel ya alimbawa so inletneg nen Amos?

◻ Diad antoran paraan a nagmaliw a sakey a maabig ya alimbawa si propetan Moises?

◻ Panon a makakiwas iray modernon-agew a Tasi nen Jehova a singa di Amos tan Isaias?

◻ Anto so nayarin naaralan na Kristianon ministros manlapud kondukta nen Oseas tan Joel?

◻ Panon tayon nagunggunaan manlapud saray alimbawa nen Ezequiel tan si Miqueas?

[Litrato ed pahina 16]

Anggaman ed alabas ya isusumpa nen Amasias, say espiritu nen Jehova so amakayari ed si Amos a mangipropesiyan sipapakpel

[Litrato ed pahina 18]

Saray matoor ya alanaan so angipanengneng na sakey a maabig ya alimbawa diad pangagamil na anos diad serbisyo ed si Jehova