Mapublikon Mangiyabawag ed Ngaran nen Jehova
“Mangisaklang itayo ed Dios a naynay na bagat a panangidayew, salanti, say bunga na saray bibil a mangiwakawak na ngaran to.”—HEBREOS 13:15.
1. Anto so insimbawa nen Oseas ed kapara ton Israelitas a gawaen?
SAY propeta nen Jehova a si Oseas so awalaan na importantin mensahe parad kapara ton Israelitas. Diad komawalon siglo sakbay na Komon a Panaon, sinimbawa toray bangar a kapanaonan to a manpataoli. Impaseseg to: “Alaen yo ed sikayo so saray salita, et ompawil kayo ed Jehova: ikuan yo ed sikato, Ekalen mo ya amin so inkauges, tan awaten mo so maong; dia ed ontan yapay mi naani a singa saray baka a kalakian so bagat na saray bibil mi.” (Oseas 14:2) Diad panisimbawa ed totoon iyapay ed si Jehova ‘iray baka a kalakian na bibil da,’ say propesiya nen Oseas so mamapaseseg ed saray Israelita a manpataoli tan mangisaklang na saray bagat na masimoon a dayew ed Dios.
2. Anton klase na bagat so impaseseg nen apostol Pablo ed saray Kristiano ya iyapay?
2 Iyaapay na Tastasi nen Jehova ‘iray baka a kalakian na bibil da’ natan. Sikara met so manusumpal ed simbawa nen apostol Pablo, ya angiparungtal ed saraman a salita nen propeta Oseas sanen insulat to: “Lapu ed sikato [Jesu-Kristo] sirin mangisaklang itayo ed Dios a naynay na bagat a panangidayew, salanti, say bunga na saray bibil a mangiwakawak na ngaran to.” Kanian, sigagayagan mandadayew iray ariripen na Dios ed si Jehova, a singa diad kimey dan panangipulong ed Panarian.—Mateo 24:14.
3. Panon tayon makapangiyapay na “bagat na panangidayew” ed si Jehova, tan siopan kimkimey so usisaen tayo natan?
3 Say mapublikon panangiyabawag ed ngaran nen Jehova so sakey ya agkanepegan a pribilihyo parad ag-ayadyarin totoo. Agaylay liket tayo a makapangibaga ed arum nipaakar ed Dios, diad ontan et makapangiyaapay ed si Jehova na “bagat na panangidayew,” ‘saray baka a kalakian na bibil tayo’! Pian napaseseg itayo ed mapublikon pangipulong na maong a balita na Panarian natan, usisaen tayo so ibabaga na Biblia nipaakar ed saray propeta na Dios tan arum niran ariripen nen Jehova. Diad kurang na impanbilay da, baleg so naaralan tayo ya ontulong ed sikatayo pian makapangayaga ed kimey tayon panagpulong.—Roma 15:4.
Say Betang na Saray Propeta
4, 5. (a) Diad orihinal a lenguahe na Biblia, anto so manunan kabaliksan na saray salitan nipatalos a “propeta”? (b) Anto so mangipapanengneng a saray propeta so walaan na makanan betang ed oksuyan na Dios?
4 Saray propeta nen Jehova so apribilihyoan pian mangiyabawag ed mensahe to diad publiko. Say Hebreon termino parad “propeta” (na·vi’ʹ) so walaan na agpihon lapuan, balet say inkausar to ed Biblia so mangipapanengneng a saray tuan propeta so sangiyan parad si Jehova, totoo na Dios a walaay apuyanan a mensahe. Say Griegon salitan nipatalos a “propeta” (pro·pheʹtes) so literal a mankabaliksan a “sakey a managsalita,” a mangibaga na bengatla “ed arap na” odino ed “arapan” na siopaman. Say propeta so sakey a mangiwawakawak na saray mensahen walaay madibinon lapuan. Mabetbet, balet aliwan naynay, saray tuan propeta na Dios so angipasakbay na saray ebento ed arapen.
5 Nipaakar ed importantin betang na saray propeta ed oksuyan na Dios, onia so kuan na M’Clintock and Strong’s Cyclopœdia: “No maminsan sikaray kekerewan na simbawa . . . Balet mas mabetbet a nalilikna ran pakikiwasen na akindalem da a mansalita ed totoo anggaman agkekerewen so simbawa ra, tan sikaray ag-antakot ya ontalindeg ed saray lugar a ditan et say kiwawala ra, anganko, so amalesa na sanok tan inkakebbiew.” (Tomo VIII, pahina 640) Kunsideraen paray pigaran alimbawa no anto so anagdag ed saray propetan mangala na ontan a makpel a talindeg.
Saray Liknaan tan Motibasyon
6, 7. Anto so impakan nen Jehova ed propeta ton Ezequiel, tan antoy epekto na saya ed sikato?
6 Sakbay na kadederal na Jerusalem nen 607 K.K.P., si Jehova so nansalita ed saray Judion kautibo ed Babilonia ed panamegley na propeta ton Ezequiel. Imbaga nen Jehova ed sikato: “Anak na too, kanen mo so naromog mo; kanen mo so saya a lokot, tan onla ka, mansalita ka ed abung na Israel.” Tinmulok si Ezequiel. Inkuanto: “Kanian sinmangi ak, tan inpakan to ed siak imay lokot. Et inkuanto ed siak, Anak na too, gawaen mo a say eges mo mangan komon, tan peselen mo ray pait mo ed saya a lokot ya iter ko ed sika. Saman sikato so kinan ko; et wala ed sangik a singa dilo so samit to.”—Ezequiel 3:1-3.
7 Saray laman tayo so makala na sustansya manlapud taganon kakanen tayo, tan diad sakey a pantalos et saraya so magmamaliw a kabiangan tayo. Mipadpara, say “lokot” a kinan nen Ezequiel—mensahe nen Jehova a kaukolan ya iyabawag na propeta—so nepeg a magmaliw a kabiangan to, a mangapekta ed saray liknaan to. Saray salita na Dios so ontanlan anagyat ed akindalem a tuloy iran liknaan nen Ezequiel a say pangiyabawag na saratan ed publiko so makapaliket parad sikato. No sikayo so sakey a Tasi nen Jehova, kasin pangagayagaan yo so mapublikon panangiyabawag ed mensahe na Dios?
8, 9. Anto so amakiwas ed si Amos a manpropesiya?
8 Kunsideraen pa met, si propetan Amos. Lapud nambilay ed komasiam a siglo K.K.P., sikato so kabiangan na saramay inmunan Hebreon propeta a nansulat ed libro na Biblian ningaran ed sikato. Singa si Ezequiel, si Amos so sakey a mapekder a manangiyabawag ed salita nen Jehova. Agayla, say balikas ya “onia so kuan nen Jehova” so 11 a danay ya inulit ed interon libro a ningaran ed sikato! (Amos 1:3, 6, 9, 11, 13; 2:1, 4, 6; 3:12; 5:4; 7:17) Alikna nen Amos so pankaukolan ya iyabawag iray salita na Dios ed publiko.
9 Bilang propeta na Dios, kinmiwas si Amos ed madibino iran panangiyabawag diad tampol ya inkiwas to. Diad panamegley nen Amos, inkuan na Dios: “Inmengak so leon; siopa so ag antakot? Si Katawan a Jehova nansalita; siopa naani so ag manprofeta?” (Amos 3:8) Say propeta so apakiwas a tuloy pian mangiyabawag ed mensahe nen Jehova.
10. Panon a saray kaplesan-ya-agew ya ariripen nen Jehova so onkikiwas sano say panagpulong a kimey da so susumpaen?
10 Diad paraan a singa leon si Jehova so mangiyaaglem na saray mensahe na panangukom ed kaplesan a marelmeng a sistema na mundo. Singa si Amos, say modernon-agew ya ariripen nen Jehova so makakaliknan nakaukolan day onkiwas a mangiyabawag ed publiko ed saray salita na Dios. Anggan sikaray pagyawen na saray sumusumpa, tumboken da so alimbawa na saray apostol Pedro tan Juan, a mabisbiskeg ya angiyabawag: “Ta agmi nayari’n ag salitaen so anengneng tan nadngel mi.” Pinekderan na apostoles met: “Nakaokolan ya onoren mi so Dios, nen saray totoo.” (Gawa 4:20; 5:29) Sirin, komusta itayo met? Maabig ya usisaen iray liknaan tayo nipaakar ed mapublikon panangiyabawag ed ngaran nen Jehova.
“Dia ed Inkadaakan na Puso”
11. Anto so nepeg a managdag ed sikatayo a manseet ed mapublikon panangiyabawag ed ngaran nen Jehova?
11 Anggapoy panduaruwa a saray propeta nen Jehova so misadsalamat ed saray pribilihyo ra. Say mipadparan pisadsalamat ed si Jehova so nepeg a mamakiwas ed sikatayo pian mapublikon mangiyabawag ed ngaran to. Onia so ibabaga na Salmo 145:1, 2: “Itandoro taka, Dios ko, O Arik; tan igalang ko so ngaran mo lawas tan lawas. Agewagew ya igalang taka; tan idayew ko so ngaran mo lawas tan lawas.” Kasin saratan a salita so mangiwawandag na awawey yo? Say regular a panagaral na Biblia so ontutulong ed sikatayon mamaaralem na panamabli tayo ed ginawa, gagawaen, tan gawaen nen Jehova parad sikatayo. Tan sano mankakasakey tayon aralen so Biblia bilang sakey a pamilya, agta naromog tayon say Salitay Dios et mangisekar na pakayari, a gawaen ton labay tayoy mansalita nipaakar ed sikato tan saray gagala to? (Hebreos 4:12) Ta pian magmaliw ya epektibo ed mapublikon panangiyabawag ed ngaran nen Jehova, kaukolan tayo met a sigpot ya usaren iray Kristianon palapagan ya itatarok nen Jehova a Dios diad panamegley na alanaan a “matoor tan makabat ya aripen.”—Mateo 24:45-47.
12. Panon a namparan ontulong ed sikatayo iray Kristianon miting tan panagdalepdep ed panggawa na mapublikon panangiyabawag?
12 No sikatayo so mangidayew ed si Jehova lapud impapuson pisasalamat, kaukolan tayon maparanay ya atendian iray Kristianon miting. Amin a totoo nen Jehova so nepeg a manumbok ed simbawa nen apostol Pablo: “Manpapagalangan itayo ed sakey tan sakey pian manaayatan itayo ed aro tan dia ed saray maabig a gawa. Ya ag tayo paulian so saray panmomoyong tayo, singa ugali na saray arum, no ag ingen mansisimbawaan itayo; tan nagkalalo la, lapud nanengneng yo a manasinger so agew.” (Hebreos 10:24, 25) Kasin sikayo so maparanay a presenti ed saray Kristianon miting? Kasin mabetbet yon itotongtong so nipaakar ed Makasulatan iran katuaan, saray marakep ya eksperiensia, tan saray makapasagyat a balita na teokratikon ilalaknab a nadngelan yo ed saray miting na totoo na Dios? No sikayo so masuyat a mangibalikas ed inkasikayo nipaakar ed si Jehova tan saray gagala to, mangigetar na panaon pian dalepdepen so Salita to ta pian saray kanonotan to et ontanek a tuloy ed puso yo. (Salmo 77:12; 143:5) On, namparan saray Kristianon miting tan regular a panagdalepdep ed Salita na Dios so nepeg ya ontulong ed sikayo a mangapresya ed makapakelaw a pribilihyon mapublikon panangiyabawag ed ngaran nen Jehova.
13. Panon tayon ‘ipapaway so maabig’ manlapud kapusoan tayo?
13 Tekep na kapusoan a napno na pisasalamat ed si Jehova, sikatayo so mangipapaway na maong iran bengatla. “Say maong a too ipaway to so maabig dia ed maabig a kayamanan na puso to,” inkatunongan nen Jesus, “et say mauges a too ipaway to so kaugsan dia ed mauges a kayamanan: ta dia ed inkadaakan na puso say sangi to mansalita.” (Lucas 6:45) Wala ta ni so magmaong a paraan ed ‘pangipaway na maabig’ nen say mapublikon pangiyabawag ed ngaran nen Jehova tan pangitongtong nipaakar ed saray gagala to ed kakaabay tayo, kakanayon tayo—on, ed amin a naabet tayo?
Saray Resulta na Mapublikon Panangiyabawag
14. (a) Anto so naeksperiensia na manangiyabawag tan dumerengel ed mensahe na Panarian? (b) Anto so nasusumpal diad panamegley na kimey a panangipulong ed Panarian?
14 Aromog na saray propeta na Dios so gayaga ed serbisyo ra, tan say imbaga ra ya akagungguna’d saray dinmengel. Diad mipadparan dalan, say mapublikon panangiyabawag na mensahe na Panarian so mangitatarok na baleg a gayaga ed saray manangiyabawag to. (Gawa 20:35) Tan agaylan makagungguna itan ed saray maapresyan dumerengel! Say pangaawat ed maong a balita so ontutulong ed totoon taloen so gonigon odino talonaan itan. Saray inateyan so mangayaga ed saray sipan nipaakar ed kioli. Intalirak na saray sugapa so inka-aripen ed nikotina, heroin, tan arum niran makailuam. Dakel so nipapaatagey ed moral, tan amin a mangaawat ed katuaan na Biblia so mangamor na espiritual a kawayangan. (Juan 5:28, 29; 8:32) Say pangiyabawag ed Panarian bilang say mogmon ilalo na katooan so onkakana met a pasakbay ed saray marelmeng, legan a mamapawala na maliket a kiwas ed saray matuan impanpuso. Kanian saray totoo so nibibiig balang la diad “dusa ya andi angaan” odino parad “bilay ya andi angaan” sano ondapo so madibinon panangukom ed sayan marelmeng a mundo. (Mateo 24:14; 25:31-46; Ezequiel 33:1-9; 1 Timoteo 2:3, 4) Say kimey tayon panagpulong so agnaparaan a panangiliktar, say sankalaknaban tan sanka-awangan a pangiyaanunsyon panangiyabawag ya agawa ed kapiganman ed dalin!
15. Anto so nagawaan pian natulongan iray prospektibon makanepegan ed pantatasian tayon teritorya?
15 Bilang modernon-agew a Tastasi nen Jehova, sigagayaga tan situtulok itayon paaripen parad mangatatawen ya Ama tayo. (Roma 12:11) Kanian, maliket tayon mangigetar na panaon diad pibiang ed maparanay a kimey a panangipulong na maong a balita diad publiko tan diad kabkaabungan. (Gawa 5:42; 20:20) Saray sankamundoan a report so mangipapatnag a wala niray makanepegan a walad teritorya tayo. Legan a manguuman iray kipapasen diad mundo, saray totoo so naapektaan ed nanduruman paraan. Dakel so ag-inilaloan a magmaliw a takas (refugee), sankaili ed biek-tawen a daldalin. Anganko ta walaray pigara ed sarayan totoo ed pantatasian tayon teritorya. No wala, gawaen tayoy anggaay nayarian tayon tulongan ira ed espiritual legan a mantutultuloy tayo diad “masanton kimey na maong a balita.” (Roma 15:16, NW) Arum a Kristianos so nanaral na sananey a lenguahe pian niyabawag so maong a balita na Panarian ed saratan a totoo.
16. Anto so makatulong ed sikatayo pian panseetan so pangiyabawag ed ngaran nen Jehova?
16 Dakel ed saray propeta na Dios so walaan na mairap a tuloy iran asainmin. Agmainomay parad sikara so pangiyabawag ed madibino iran mensahe ed totoon agmangawat. Mipadpara, aliwan amin a dedikado ed si Jehova et makaromog a mainomay so mapublikon panangiyabawag ed ngaran To, nagkalautla ed saray teritoryan manunan anggapoy kiwas. Anggaman ontan, diad panamegley na talek a resulta na atekepay pikakasin panaral ed Salita na Dios a katekep toy biskeg ya iiter nen Jehova, napanseetan tayo so pangiyabawag ed mensahe na Panarian. (Filipos 4:13; Apocalipsis 14:6) Nipaakar ed saya, anto ni so naaralan tayo manlapud saray propeta nen Jehova tan ed arum niran ariripen ed kadaanan a panaon?
Pakawalaan na Kaulop ed Lawak a Ministeryo
17. Antoray pigaran Makasulatan ya alimbawa na makagunggunan panulop diad serbisyo ed Dios?
17 Diad pangaasikaso ed asainmin to, diad kagapo ni et tinulongan la so propeta na Dios a si Moises na kuya to, si Aaron. Imbaga nen Jehova ed si Moises: “[Si Aaron] naani pinagkalaman mo ed katooan; et nagawa naani a sikato so pinagkasangim.” (Exodo 4:16) Kunsideraen pa met, iray agew na saray propeta a si Elias tan Eliseo, sanen “saray anak na profeta” so dinmakel la. Pinmatnag a saraya so grinupon ariripen na Dios a nankakasakey a nankimey, agpanduaruwaan a pangagayagaan so marakep a panuulop ed balang sinansakey. (2 Arari 2:3-5; 4:38; ipareng so 1 Samuel 10:5, 10.) Siempre, si Moises tan Aaron tan “saray anak na profeta” so ag-angiyabawag ed maong a balita na Panarian. Anggaman kuan, say pililimog da so akagungguna ed sikaran amin. Pigaran siglo so linmabas, 70 babangatan so imbaki nen Jesu-Kristo ed ministeryo “a sanderua,” tan agpanduaruwaan a saraya so agunggunaan ed saman ya impanuulop.—Lucas 10:1-16; ipareng so Gawa 17:10, 11; 20:20.
18. Panon a say panulop ed ministeryo so mausar ed importantin gagala natan?
18 Nen 1953, saray Tasi nen Jehova so angigapo na sakey a programa a saray manangiyabawag na Panarian so mankimey a manuulop ed lawak na ministeryo. Siempre, saya so agginawa lapu lambengat ed panuulop. Sayan programa na panangipasal so adesinyo pian magmaliw a lalon epektibon managbangat tan manangipulong na maong a balita iray ariripen na Dios. Tekep na satan a gagala ed kanonotan, dakel ya eksperiensiado iran manangipalapag na Panarian so akibiang ed ministeryo a kaiba iray balo ni. Sayan programa na panangipasal ed panagkabkaabungan so akagunggunan tuloy tan ontutulong ed totoo nen Jehova ya onaligwas ed mapublikon panangiyabawag ed ngaran to. (1 Timoteo 4:16) Natan, say inkaligen so sananey nin sengegan no akin ya importanti parad Kristianos a gawaen so ministeryo “a sanderua,” nagkalautla ed pigaran lugar.
19. Anto so nepeg ya ipaslep ed kanonotan nipaakar ed personal iran kalat ed ministeryo?
19 Balanglan sikayo so mankikimey a kaibay kapananisiaan ed ministeryo odino sikayo so manbukbukor ya oonla ed sakey ya abung, panggunaetan a dampoten so pigaran personal a kalat odino gagala. Satan so nepeg a realistiko, nadampot. Kasin nakaukolan yo so tulong ed pangiyadapta na introduksion yo pian managyat na interes ed totoo diad teritorya yo? No ontan, anganko ta nayarian yoy miulop ed sakey a payunir a sigpot-panaon lan manangiyabawag na Panarian odino sakey a manangipalapag, a nagkalautlan epektibo ed panangusar na maabig iran introduksion. Say kaulop yo so nayarin mangasisti ed sikayo diad panparaan tan pangusar na saray introduksion a nidatak ed Ministeryo Tayo ed Panarian odino say libron Reasoning From the Scriptures. Diad saray pankanawnawa sano sikayo so sanulop ed panagkabkaabungan, talinengen a maalwar iray presentasyon na kaulop yo. Insan salien yon mismo so mipadparan presentasyon anggad nikabisado yo la iyan kabiangan na ministeryo yo.
20, 21. Panon a nagkalautlan makatulong so panulop diad lawak a ministeryo?
20 Komusta no mankaukolan kayo na tulong ed panggawa na saray epektibon panagpawil tekep na panmorian makapangigapo na sakey a panangiyaral na Biblia ed ayaman? Nayarin diad panamegley na konduktor na Panagaral na Libro ed Kongregasyon et makapanggawa na saray oksuyan pian naulop kayo ed lawak a serbisyo a kaiba so sakey a manangipalapag na Panarian ya epektibo ed panangigapo na saray panagaral na Biblia. Agkayo magmamaliw a kaulop ya andi-esel sano manulop ed saray panagpawil. Imbes, kayarin nipanengneng na kaulop yo no panon ton gagawaen so sakey a panagpawil, nayarin satan so naimano yon makagungguna ed panggawa na mipadparan presentasyon ed ontumbok a panagpawil yo. Say kaulop yo so wadman ya ontulong tan mangiter na simbawa kayari to.—Ipareng so Galacia 6:6.
21 Say ontan a maaron tulong manlapud kaulop ed lawak a serbisyo so makatulong ed sikayon makadampot ed saray gagala yo ed ministeryo. Sayan tulong tan say aralem ya apresasyon yo parad maaron-kaabigan nen Jehova diad pangiyaabuloy ed sikayo ed sayan apribilihyoan a kimey so manggawa ed sikayon magmaliw a lalon epektibo diad saray kimey yo ed panangipulong na Panarian. Tan komon ta pablien yo so pribilihyo yon mamendito ed si Jehova diad panamegley na naynay a pansalita na maong nipaakar ed sikato tan diad maparanay a mapublikon panangiyabawag ed ngaran to.—Salmo 145:1, 2, 9-13.
22. Antoran tepet so ontulong ed sikatayo ya ebatan na ontumbok a panaral tayo?
22 Bilang Tastasi nen Jehova, sikatayo so naulit-ulit ya ombibisita diad panagkabkaabungan a ministeryo tayo. Dakel so ontatalineng ed maong a balita tekep na aralem ya apresasyon. Anggaman ontan, say arum so masuyat ya ontalineng ed mensahe na Panarian. Anto so gawaen tayo ed ontan iran sirkumstansya? Panon tayon makapantultuloy ed kimey ya impabtang ed sikatayo nen Jehova ed totoo to? Antoran Makasulatan ya alimbawa so makapangasisti odino makapangigiya ed sikatayo? Sarayan tepet so naebatan ed ontumbok ya artikulo.
Kasin Atalosan Yo Irayan Punto?
◻ Anto so imbaga nen Oseas tan si apostol Pablo nipaakar ed saray bagat ed Dios?
◻ Anto so amakiwas ed si Ezequiel tan si Amos a manpropesiya?
◻ Panon so nepeg a panmoria tayo ed kimey a panagpulong ed Panarian?
◻ Antoran gungguna so nagamoran manlapud panuulop diad lawak a ministeryo?
[Saray litrato ed pahina 13]
Say walaay gagalan panuulop so makatulong ed sikatayon onaligwas ed ministeryo