Tastasi nen Jehova ed Interon Mundo​—Nigeria

SAY Nigeria so nigaet ed kurba ed bandad leksab na atagey a kabiangan na mamasagur ya Aprika. Lapud nipasen ed Gulpo na Guinea, saya so walad bandad amianen na ekuador tan walaay masulok ya 88 milyon a manaayam.a

Legan na apalabas a duaran serbisyon taon, say sangan opisina na Watch Tower Society diad Nigeria so angiter na nikadkaduman imano ed saray kalangweran. Sakey a surbey diad saray kongregasyon na Tastasi nen Jehova so angipanengneng a 80 porsiento na saramay ginmapon nampulong na maong a balita diad Nigeria legan na 1992 so manedad na 10 ya anggad 20 a taon. Diad saray abautismoan ed saman a taon, 63 porsiento so walad grupo a walaay ontan ya edad.

Saray Tobonbalo so Manpapayunir

Dakel a kalangweran so onloloob ed sigpot-panaon a panagpulong a kimey bilang payunir. Onia so kuan na sakey a payunir a manngaran na Hannah: “Sanen ngalngali ak la nasumpal ed paneeskuelak, binisitak iramay onaatendi ed Eskuelaan na Payunir a Serbisyo, a ditan et akabat ko so duaran akulaw ya agagi. Inisip ko, ‘No saraman a dua et makapanpapayunir, akin a siak et andi?’

“Kanian kayarin asumpal ko so paneskuela, siak so nagmaliw a payunir. Taloy bulan ed saginonor et akabat ko so 26 años a si Josephine, sakey a managdayew na juju. Inkuanto: ‘Sikayon Tastasi nen Jehova so mauges a totoo. Agyo seselebraan so Krismas odino mangusar na saray anting-anting.’ Bilang ebat, imbagak ed sikato a no abuloyan ton iyaralan ko na Biblia et naaralan to no akin ya agmi aagamilen iraman a bengatla. Siak so inimbitaan ton ompawil. Ag-abayag et sikatoy ginmapon onatendi ed saray miting tan dakel a pananguman so ginawa to’d bilay to. Nen Disyembre 1990 sikato so abautismoan. Nanlapulad Agosto 1991, si Josephine so sakey a payunir. Sanen sikato so onaatendi ed Eskuelaan na Payunir a Serbisyo nen katantaon, inkabat toak ed saray kaklase to bilang espiritual ya ina to!”

Say Video tan say Kingdom Hall

Sakey ed saray video recording na Sosyedad so akatulong ed sakey a melag a kongregasyon pian makala na dalin parad sakey a Kingdom Hall. Diad gunaet a makasaliw na dalin, apatiran agagin lalaki so inmasingger ed Onojie, say tradisyonal a manuley ed saman a lugar. Inyopresi to’d sikara so sakey a lote a mankantidad na 20,000 naira [$1,025, E.U.]. Agsarag na kongregasyon a bayaran iman a kantidad, lapud 17 lambengat so manangipalapag a manuporta ed proyekto. Kanian inkuan na Onojie a mannonot ni na arum a lugar.

Pigaran bulan ed saginonor, sakey ed saray mamatatken na kongregasyon so binmisita ed abung na Onojie. Say Onojie so manbabantay na video recording na koronasyon to. Inkuan na matatken: “Walaan ak na sakey a video a labay kon bantayan mo. Saya so tatawagen a Jehovah’s Witnesses​—The Organization Behind the Name.”

Diad saginonor, tinepet na matatken no anto so nibaga nen Onojie ed samay video. “Binantayan ko so pelikula ya aminliman danay,” so inkuan na Onojie. Impanonot na matatken ed Onojie iray Kingdom Hall ya anengneng to ed video tan insalaysay to a say lokal a kongregasyon so mankaliktan a mangipaalagey na sakey a mipadpara ed saman. Kayari to et intepet to no nayarin saliwen na kongregasyon so dalin a kaabay na melag a loten kayarian to. Inmebat so Onojie: “Kalabbian kayari impanbantay ko ed video, ontan met so walad isip ko.” Diad saman lanlamang, say Onojie so nansukat na anemiran metro manlapud loten kaabay na kayarian na kongregasyon. “Nayarian yon naala iya,” so kuanto. “No padukey, naala yo so anggad kaukolan yo. Iparaan yoray papeles, tan pirmaan ko iratan.”

[Paimano ed leksab]

[Kahon ed pahina 9]

SAY KIPAPASEN NA BANSA

1993 Serbisyon Taon

PANTOK A BILANG NA MANTATASI: 174,582

RATIO: 1 a Tasi ed Kada 507

INMATENDI ED MEMORYAL: 473,245

PROMEDYON MANANGIPALAPAG A PAYUNIR: 19,777

PROMEDYON PANANGIYARAL NA BIBLIA: 242,028

BILANG NA ABAUTISMOAN: 8,888

BILANG NA SARAY KONGREGASYON: 3,289

SANGAN OPISINA: BENIN CITY, EDO STATE