Kasmak so Takot ed Saray Inatey
Abayag lan sinmelek so agew. Sika so pasempet lan lablabi nen say labay mo. Legan na idadalan mo ed lokal a sementeryo, manpukal so pusom. Say inkareen na ambilunget a labi so manggagawa’d sikan malikas ed sankakalnaan a kalasakas. Biglan akadngel ka manlapud arawi na sakey a mantitit, makapakigtot a tanol. Inapuram so nanakar—lalon manpukal ka—bangta paarap ka’d salimbeng na ayaman mo.
ASALIM ta la so naaburido sanen sika so wala odino asingger la ed sakey a sementeryo? No ontan, nayarin sika so naimpluensyaan na sakey a relihyoson ideya a kaslakan ed sankamundoan—a say espiritu na inaatey so nayarin ontulong odino pasakitan iray mabilay.
Dakel a maaniton kaugalian so atibukel lapud sisisiaen a saray inatey so mankakaukolan na tulong na saray mabilay odino nayarian dan pasakitan iray mabilay sano sikaray agnapareen. Alimbawa, diad pigaran bansa ed Latin-Amerika, kaugalian na dakel so mamaalagey na melag ya ayaman a walaay krus ed pasen ya inateyan na sakey lapud inka-aksidente. Mangituturok so totoo na saray kandila tan mangiiyan na saray rosas diman diad gunaet a pangipanengneng na interes odino tulongan so kamarerwa odino espiritu na toon inatey. Diad arum a kaso, nikakayat iray report nipaakar ed “mamilagron” eba-ebat na saray pikakasi, kanian oonlan mabetbet so totoo diman ed pasen na animita, say melag a panayaman na kamarerwa odino espiritu na inatey ya indibidual. Diman ira manggawa na saray manda, odino sipasipan, a no sikaray tulongan na toon inatey pian manggawa odino mangawat na sakey a bengatla—anganko sakey a mamilagron panagtambal—ipanengneng da so otang a maong-a-linawa ra diad nikadkaduman paraan. Diad biek a dapag, nayarin irereport a say kamarerwa na sakey a too so ompanengneng ed kabilungetan na labi, a sengegay pakataktakot na saramay wadman. Kaslakan ya ibabagan saratan a kamarerwa so penando, a didisturboen iray mabilay lapud apalabas iran agawa.
Diad dakel a daldalin, saray totoo so mangugunaet a pareenen “iray espiritu” na saray inatey. Saray maartin piesta so gagawaen, mangiyaapay na saray bagat, mangisasalita na saray malamoyot iran salita—amin diad gunaet a naamper so panangibales manlapud espiritu na inatey a too. Iisipen a say pamaliket ed espiritu so mansumpal ed saray tumang tan saray bendisyon parad saramay ataynanan.
“Dakel so manisia ya anggaporay nagagawan ‘ordinaryo odino diad natural a paraan,’” so kuan na sakey a report manlapud Aprika. “Antokaman ya inkagawa—balanglan satan so pansakit, desyang, inka-lepes, kairapay panag-bilay, alabas ya uran odino sinag na agew, saray aksidente, inkabuyak na pamilya, ipapatey—so iisipen ya itatarok na agnanengneng ya espiritu, a walaay pakayarin mas mabiskeg nen say too, so walad benegan na sayan amin.” Onia so kuan na sakey nin report: “Sisiaen na totoo a say espiritu na saray inmunan atateng da so walaay posisyon ed tawen tan naynay a manbabantay ed saray ataynanan da ed dalin. Saray inmunan atateng so sisiaen a walaay labas-nen-natural iran pakayari, a nausar da pian bendisyonan tan salimbengan iray kanayon da ed dalin odino dusaen ira, dependi ed pamagalang odino pangibaliwala na kakanayon ed saray inatey.”
Balet kasin satan so mitunosan ed Salita na Dios? Anto so opinyon mo?
[Litrato ed pahina 4]
Sakey ya “Animita” ed Chile