Anto so Kipapasen na Saray Inatey?

SAY takot ed saray inatey so base ed sakey a padesir​—a saray inatey so walaay sakey a kamarerwa odino espiritu a manbilay kayari na ipatey. No malinew ya isasalaysay na Biblia a sayan ideya so palso, sirin say problema nipaakar ed no kasin nayari odino agnayarian na saray inatey a pasakitan ka so aresolbi la. No ontan, anto so ibabaga na Biblia?

Nipaakar ed kipapasen na saray inatey, onia so ibabaga na Salita na Dios: “Ta saray mabilay amta ra a sikara ompatey ira: balet saray inaatey agda amta so bengatla, ag ira met nawalaan la na tumang; ta say pakanonot ed sikara alingoanan. No panon so aro ra, ontan so gula ra tan siblet da, atawtaw ya abayag la; andian ira la na betang lawas dia ed angan anto ya agawa ed leksab na banwa.”​—Eclesiastes 9:5, 6.

Nisengeg ed satan, sika ta so nayarin tulongan odino pasakitan na saray inatey? Andi, so kuan na Kasulatan. Saray inatey so anggapoy liknaan tan mareen la. Sikaray andian na pakayarin mitalosan ed saray mabilay odino mangibalikas na antokaman ya emosyon​—panangaro odino panggula—​odino manggawa na antokaman a kiwas. Agka nakaukolan ya ontakot ed sikara.

‘Bueno, on, nayarin tua itan no say tutukoyen mo et say ipatey na pisikal a laman,’ nayarin ikuan na arum. ‘Balet say pisikal ya ipapatey so aliwan say anggaan na bilay; satan lambengat so ilukpos na espiritu manlapud laman. Satan ya espiritu so makatulong odino makapanpasakit ed saray mabilay.’ Ontan so nalilikna na minilyon a totoo ed dalin.

Alimbawa, diad Madagascar say bilay so ipapasen a sakey lambengat a pansalat, kanian say ponpon tan say pankotkot ed bangkay so ipapasen a mas importanti nen say kasal. Ipapasen a say too so nanlapud saray inmunan atateng to tan ompapawil ed sikara diad ipapatey. Kanian, saray abung a parad saray mabilay so ginawa ed tabla tan adobe, materyales a nagaygay diad ilalabas na panaon, bangta saray pantyon, “saray ayaman” parad inaatey, so kaslakan a mas maarti tan mas matibay. Diad pankotkot ed bangkay, liknaen na pamilya tan kakanayon a sikaray nabendisyonan, tan sisiaen na saray bibii a no diwiten daray pukel na inaatey a kakanayon, sikaray magmaliw a maanak. Balet, lamet, anto so ibabaga na Salita na Dios?

Agginetma so Ipapatey Parad Katooan

Makapasagyat a naimano a pinalsa nen Jehova a Dios so too pian manbilay, tan sinaglawi to lambengat so ipapatey bilang resulta na itutunganga. (Genesis 2:17) Makapaermen, nankasalanan so inmunan laki tan bii, tan bilang nansumpalan, say kasalanan so kinmayat ed amin a sankatooan bilang makapatey a tawir. (Roma 5:12) Kanian nibagam a say ipapatey so sakey a kapetegan ed bilay nanlapulad intunganga na inmunan paris, on, sakey a makapagonigon a katuaan ya arapen tayo ed bilay. Sikatayo so pinalsa pian manbilay, a diad sakey a kabiangan et mangisasalaysay no akin a mairap parad minilyon a totoo ya arapen so ipapatey bilang say anggaan.

Unong ed salaysay na Biblia, nanggunaetan nen Satanas a palikdoen so inmunan paris a too no nipaakar ed ipapatey diad panamegley na impanumlang ed pasakbay na Dios a say itutunganga so mangitarok na ipapatey. (Genesis 3:4) Anggaman kuan, diad inlabas na panaon, nagmaliw a malinew a saray totoo so ompapatey unong ya inkuan na Dios a nagawa ed sikara. Kanian, diad loob na saray siglo et kinmiwas si Satanas diad panamegley na sakey nin tila​—a say espiritun kabiangan na too so mantultuloy a manbilay diad ipatey na laman. Say ontan a panamalikdo so matukoy parad si Satanas a Diablo, a deneskribe nen Jesus bilang “ama na tila.” (Juan 8:44) Diad kasuniyan, say kiwas na Dios ed ipapatey so sakey a makapaseseg a sipan.

Anton Sipan?

Satan so sipan a kioli parad dakel. Say Griegon salita ya impatalos a “kioli” so a·naʹsta·sis. Satan so literal a mankabaliksan a “sakey a pamaalagey lamet,” tan tutukoyen to so sakey a pamangon manlapud ipapatey. On, say too so akadokol diad ipapatey, balet sikato so nayarin ikdan lamet na Dios na bilay. Say Anak na Dios, si Jesu-Kristo, so nankuan ya “onsabi horas, ya amin so saray wala ed saray lobok narengel da so voces to. Et ompaway ira.” (Juan 5:28, 29) Imbalikas nen apostol Pablo so ‘ilalo [to] ed Dios . . . ya wala naani kioli ed bilay na saray matunong tan ag matunong.’ (Gawa 24:15) Si Job, sakey a matoor ya aripen na Dios sakbay na Kristianon panaon, so angiyabawag met ed ilalo to ed sakey a kioli: “No say sakey a too ompatey, ombilay ta lamet? Amin iray agew na pibabakal ko alagden ko, anga ed say kabolos ko onsabi. Ontawag ka, et onebatak ed sika.”​—Job 14:14, 15.

Agta papaneknekan na malinew a sipan na kioli a tila so ideyan saray inatey so mabilay ed espiritual a nengneng? No saray inatey so manbibilay tan mangagayaga ed kiwawala ed tawen odino diad mundo na saray espiritu, anto ni so gagala na kioli? Agda ta naawat la so tumang odino kapalaran da? Ipaparungtal na panagaral na Salita na Dios a saray inatey so talagan inatey, anggapoy liknaan, naugip anggad baleg a panamangon diad panamegley na kioli ed sakey a balon mundo​—sakey a paraiso—​ya insipan na maaron Ama tayo, si Jehova. Balet no say ipapatey so agmankabaliksan na isian na laman tan espiritu tan no say espiritu so agmantultuloy a manbibilay, komusta met so nipaakar ed saray kaso na ompatnag a pitatalosan manlapud mundo na saray espiritu?

Pitatalosan Manlapud Pasen na Saray Espiritu

Agnabilang iran kaso so nireport a pitatalosan ya ipapasen a nanlapud saray espiritu. Anton talaga so nanlapuan na saraya? Papasakbayan itayo na Biblia a “si Satanas a mismo so mankuankuanan bilang sakey ya anghel na liwawa. Kanian sakey a simplin bengatla parad saray ahente to a mankuankuanan bilang saray ahente na kamaongan.” (2 Corinto 11:14, 15, The New English Bible) On, pian mas mainomay a palikdoen tan palingoen so totoo, mitatalosan iray demonyo (rebelyoso iran anghel) ed saray mabilay, no maminsan et mankuankuanan ya ontutulong.

Si apostol Pablo so mangiiter na kaaruman a pasakbay nipaakar ed sayan kampanyan panamalikdo: “Saray arum so onsian ira ed pananisia, a denglen da so saray espiritu a manangilawan tan saray bangat na saray demonio.” (1 Timoteo 4:1) Kanian antokaman a kiwas ya ipapasen a nanlapud saray inatey so maseguron nanlapud saray demonyo a mankuankuanan bilang “ahente na kamaongan” tan mangiyaalibansa na sakey a relihyoson katilaan, a pakaaripenan na totoo ed saray anito a mangiyaarawi ed sikara manlapud katuaan na Salita na Dios.

Diad pamaneknek a saray inatey so agmakapangibaga na antokaman, makagawa na antokaman, odino makalikna na antokaman, onia so kuan na Salmo 146:3, 4: “Ag yo iyan so panmatalek yo ed saray priprinsipe, nisay dia ed anak na too, a dia ed sikato angapo so tulong. Say panlinlinawa to ompaway, ompawil ed dalin to; dia ed satan lanlamang ya agew saray nonot to natawtaw ira.” Anton espiritu so “ompaway”? Saman et say puersa na bilay na sakey a too a susustinaen na panlinawa. Kanian, sano ontunda lay panlinawa na inatey, agla ongana iray sentido to. Sikatoy onloloob ed sakey a kipapasen na kumpleton anggapoy liknaan. Kanian imposiblin makakontrol ed saray mabilay.

Kanian ikukumpara na Biblia so ipapatey na sakey a too ed ipapatey na sakey ya ayep, ya ibabagan saratan a dua so naandian na liknaan ed ipapatey tan ompawil ed dabok a nanlapuan da. Onia so kuan na Eclesiastes 3:19, 20: “Ta say nagawa ed saray anak a lalaki na totoo nagawa ed saray ayep; sakey lanlamang a bengatla so nagawa ed sikara: singa say sakey ompatey, ontan met ompatey so sakey; on, walaan ira ya amin na sakey a panlinawa: et say too andian na katageyan ed saray ayep: ta amin sikato so kaapaan. Amin onla ed sakey a pasen; amin nanlapu ed dabok, tan amin ompawil ed dabok lamet.”

Diad pakaamta a saray demonyo so magunaet a mamalikdo ed totoo ed pannonot a sikaray makapitalosan tan naapektoan na saray inatey, si Jehova a Dios so amasakbay ed totoo to, say inmuna ’ran Israelita: “Angapo naani narumog ed sika ya angan . . . sakey a manaagamil na panagparles, sakey a managsuma, odino sakey a managsalamangka, odino manag-anito, odino sakey a manangipelag, odino manaanito ed saray mankukulam, odino sakey ya asuang, odino sakey ya wala so anting-anting to. Ta siopaman a mangawa ra nia sikato so kadimdimla nen Jehova: et lapu ed saraya a kadimlaan, patainanen ira nen Jehova a Dios mo ed arap mo.”​—Deuteronomio 18:10-12.

Malinew, say ideya a nayari itayon pasakitan na saray inatey so agnanlapud Dios. Sikato so Dios na katuaan. (Salmo 31:5; Juan 17:17) Tan sikato so walaan na makapakelkelaw ya arapen parad saray manangaro ed katuaan a mangidadayew ed sikato ed “espiritu tan katuaan.”​—Juan 4:23, 24.

Si Jehova, Dios na Katuaan tan Aro

Say maaron mangatatawen ya Ama tayo, “ya agto nayarian so mantila,” so angisipan: Minilmilyon ya inatey tan imponpon so napaoli tekep na ilalon andi-anggaan a bilay ed sakey a balon mundo na inkatunong! (Tito 1:1, 2, NW; Juan 5:28) Sayan maaron sipan nipaakar ed kioli so mangipaparungtal a si Jehova so walaan na aralem ya interes ed pankaabigan na totoon pinalsa tan nawalaan na impapuson pilalek a panampoten so ipapatey, ermen, tan ot-ot. Kanian agnakaukolan so itakot ed saray inatey odino nagonigon a tuloy nipaakar ed sikara odino ed saray iilaloan da. (Isaias 25:8, 9; Apocalipsis 21:3, 4) Say maaro tan maptek a Dios tayo, si Jehova, so walaay pakayari a sikaray paolien, tan gawaen to itan, ya ekalen so ermen lapud ipapatey.

Say Salita na Dios, say Biblia, so napno na saray deskripsyon no antoray magmaliw a kipapasen ed dalin ed satan ya insipan a balon mundo na inkatunong. (Salmo 37:29; 2 Pedro 3:13) Satan so magmaliw a sakey a panaon na kareenan tan liket tan aro parad amin a kaparan totoo. (Salmo 72:7; Isaias 9:7; 11:6-9; Miqueas 4:3, 4) Amin so nawalaan na maligen, maabig iran ayaman, ontan met ed makapagayagan kimey. (Isaias 65:21-23) Niwala so daakan a tagano parad amin. (Salmo 67:6; 72:16) Amin so mangayaga ed sigpot a bunigas. (Isaias 33:24; 35:5, 6) Bangta saray apostol tan say kaaruman ya ageteran a bilang so manuley diad tawen a kaiba si Jesus, agsasaglawien na Biblia so abendisyonan iran kipapasen ed tawen parad saray kamarerwa na arum nin inatey. (Apocalipsis 5:9, 10; 20:6) Saya so magmaliw a nikaduma-duma no saray binilyon ya inatey so mantultuloy a manbibilay.

Balet satan so agnikaduma-duma no amta tayo so malinew a bangat na Biblia: Saray inatey so anggapo la ed kiwawala bilang mabilay a kakamarerwa. Agda ka nayarian a pasakitan. Saramay walad pakanodnonotan a lubok so manpapainawa lambengat, anggapoy liknaan anggad sikara so paolien na Dios ed nigetar a panaon. (Eclesiastes 9:10; Juan 11:11-14, 38-44) Saray ilalo tan pirpirawat, sirin et mandependi ed Dios. “Manliket tan mangayaga itayo dia ed panangilaban to.”​—Isaias 25:9.

[Litrato ed pahina 7]

Unong a malinlinew ya ipapanengneng na Salitay Dios, saray inatey so kumpleton inaktibo anggad kikioli