Kasin Mameperdona Kayon Singa ed Panamerdona nen Jehova?
“No perdonaen yo ‘ray totoo ed kaugsan da, say Ama yo’n mangatatawen perdonaen to kayo met. Balet no ag yo perdonaen so saray totoo ed saray kaugsan da, agto kayo met perdonaen nen Ama yo ed saray kaugsan yo.”—MATEO 6:14, 15.
1, 2. Anton nengneng na Dios so kaukolan tayo, tan akin?
“SI Jehova so mapangasi tan magracia, mabanayar a manpasnok tan daakan ed panangasi. Sikato ag mialaan na salita lawas; nisay pokoken to so petang na olo to lawas. Sikato agto ginawa ed sikatayo so unong na kanepegan na saray kasalanan tayo, nisay intomang to ed sikatayo so kanepegan na saray kasulitan tayo. Ta unong a say tawen et atagey nen say dalin, ontan so kabaleg na maaron abig na linawa to ya onkana ed saraman so ontakot ed sikato. Unong na kaarawi’ letakan a manlapu ed seselekan, ontan so kaarawi angibantakan to ed saray inpakasumsumpa tayo ya inekal to ed sikatayo. Unong a say sake’ ya ama abageyen to so saray anak to, ontan met nen Jehova abageyen to so saray ontakot ed sikato. Ta sikato kabat to so inkagawa tayo; sikato nanodnonotan to a sapok itayo.”—Salmo 103:8-14.
2 Lapud sikatayo so ninginew ed kasalanan tan niyanak ed kasulitan tekep na atawir ya ag-ayadyarin naynay a manasalin mangipaarap ed sikatayo pian magmaliw a kautibo na ganggan na kasalanan, nakaukolan tayo lambengat so sakey a Dios a ‘nanonotan ton sapok itayo.’ Talon lasus a taon so linmabas kayari impangiretrato nen David ed si Jehova ya agaylan dakep diad koma-103 na Salmo, sakey nin managsulat ed Biblia, si Miqueas, so nandinayew ed saya met a Dios ed mipadparan paraan lapud panamerdona to ed saray kasalanan ya aminsan ya agawaan: “Siopan dios so makapipara ed sika: a mangeekal na lingo, mameperdona ed kasalanan, agpapablien so sanok anggan kapigan noagta maliket ed pangipanengneng na abagey? Maminsan nin kasian kami, iray lingo-lingo mi, diad kaaralman na dayat ibantak ya amin so kasalanan mi.”—Miqueas 7:18, 19, The Jerusalem Bible.
3. Anto so kabaliksan na mamerdona?
3 Diad Griegon Kasulatan, say salita parad “pamerdona” so mankabaliksan na “pangibulos.” Imanoen a si David tan Miqueas, ya inaon ed tagey, so angiter na parehon kabaliksan diad makaroyroyo, manangiretraton salita. Pian sigpot a naapresya so makapakelkelaw a laknab na panamerdona nen Jehova, repasoen tayo so pigara ed dakel ya alimbawa na saraya unong ed saray agawa. Say ununa et mangipapanengneng a say kanonotan nen Jehova so nayarin manguman manlapud kadederal a mamaarap ed panamerdona.
Amegley si Moises—Tinmalineng si Jehova
4. Saray Israelita so siansian antakot ya onloob ed Insipan a Dalin kayari na antoran panangidemostra na pakayari nen Jehova?
4 Maligen ya intarok nen Jehova so nasyon na Israel ya impaway ed Ehipto tan inyasingger ed dalin ya insipan to ed sikara bilang sakey a dilin-nasyon, balet impulisay da so onabanti, lapud takot da ed saray lalaki lambengat diad Canaan. Kayarin anengneng so impangiliktar nen Jehova ed sikara manlapud Ehipto diad panamegley na samploran makaderal a bakbak, impamelsay ed Ambalangan Dayat pian makataynan, impaneral ed saray armadan Ehipsio a mangegetman mangusil ed sikara, impangigapo ed sikara diad Palandey Sinai na sakey a Ganggan a sipanan a nanggawa ed sikara pian magmaliw a pinilin nasyon nen Jehova, tan mamilagron angitarok ed sikara na manna ed inagew-agew manlapud tawen pian sikaray manbilay, sikaray antakot ya onloob ed Insipan a Dalin lapud pigaran singa-higantin taga Canaan!—Numeros 14:1-4.
5. Panon a sinali na duaran matoor ya espiya a pabiskegen so Israel?
5 Agotgot si Moises tan Aaron lapud takot na totoo ed lalaki. Sinali nen Josue tan Caleb, duaran matoor ya espiya, a pabiskegen so Israel: ‘Say dalin so agaylay abig, sakey a dalin a managagos so gatas tan dilo. Agkayo antakot ed saray totoo; si Jehova walad sikatayo!’ Imbes a napabiskeg ed onman iran salita, saray atalagnaw, rebelyoson totoo so analin manupak ed si Josue tan Caleb.—Numeros 14:5-10.
6, 7. (a) Anto so dinisiden gawaen nen Jehova sanen impulisay na Israel a manmartsan onloob ed Insipan a Dalin? (b) Akin a sinmumpa si Moises ed panangukom nen Jehova ed Israel, tan anto so nansumpalan?
6 Sinmanok si Jehova! “Et si Jehova inkuan to ed Moises, Kaonongan kabayag so panbalaw da’d siak na sayan katooan? Panon kabayag so agda panisia ed siak, lapu ed saray amin a tanda a ginawak ed saray nanleleetan da? Deriaen ko ra naani na salot, tan agko ra naani patawiran, tan gawaen ta ka naani a sakey a nacion a baleg tan lalon makapanyari nen say sikara. Et si Moises inkuan to ed kinen Jehova, No ontan saray taga Egipto naamtaan da naani; lapu ed inagwat mo so sayan katooan ed pakayarim ed nanleleetan da. Et ibaga ra naani ed saray manaayam ed sayan dalin, . . . Natan no pateyen mo naani so saya a katooan a singa sakey a too, saray naciones ed satan ya akadngel la na dayew mo, salitaen da naani a kuan da, Lapu ed si Jehova agto ayarian ya inloob so saya a katooan ed dalin ya insipan to a sinambaan ed sikara, kanian sikato so akasengeg na amateyan to ed sikara ed kalawakan.”—Numeros 14:11-16.
7 Kinmerew si Moises na panamerdona, nisesengeg ed ngaran nen Jehova: “Kerewen ko ed sika a perdonaen mo so inkamakasalanan na saya a katooan ya unong na katokoyan na kinabaleg na maaron abig na linawam, tan unong ed ipamerdonam ed saya a katooan, a nanlapu ed Egipto tan anga ni ed natan lanti. Et si Jehova inkuan to, Pinerdonak la unong na salitam.”—Numeros 14:19, 20.
Say Panagtalintao nen Manases tan Pikakalugoran nen David
8. Anton klase na rekord so ginawa nen Arin Manases na Juda?
8 Say sakey a matalonggaring ya alimbawa na panamerdona nen Jehova et say agawa ed si Manases, say ilalak na maong ya Arin Hezekias. Si Manases so manedad na 12 sanen ginmapon manuley ed Jerusalem. Sikato so angipaalagey na atagey a pasen, angipasen na altar parad saray Baal, nanggawa na masanto iran lusek, dinmakmomo ed saray bitewen ed tawen, amawala na saray mahiko tan managkulam, angipasen na saray agamilen na espiritismo tan panagpalar, angipasen na inukit ya imahen ed templo nen Jehova, tan pinadalan ed apoy iray dilin ilalak to ed Lawak na Hinnom. “Nangawa na dakel a kaugsan dia ed pakanengneng nen Jehova” tan “tinokso to so Juda tan saray manaayam ed Jerusalem, dia ed ontan a nangawa ra na mauges a lalo nen say ginawa na saray nacion a binagbag nen Jehova ed arap na saray anak na Israel.”—2 Awaran 33:1-9.
9. Panon ya apaamo so lupa nen Jehova parad si Manases, tan tekep na anton resulta?
9 Diad kaunoran, imbaki nen Jehova iray taga Asirya sumpa ed Juda, tan adakep da si Manases tan inawit ed Babilonia. “Et sanen wala ed kairapan, inanap to si Jehova a Dios to, tan nanpaabeba na balbaleg ed arap na Dios na saray ateng to. Et nanpikasi ed sikato; et sikato so akerewan, tan dinengel to so kerew to, tan inyakar to lamet ed Jerusalem ed nanarian to.” (2 Awaran 33:11-13) Kayari to et inekal nen Manases iray sankailin dirios, idolo, tan altar tan imbantak iratan ed paway na syudad. Ginapoan ton mangisaklang na saray bagat ed altar nen Jehova tan pinagapoan so Juda ed panaglingkor ed tuan Dios. Saya so sakey a makapaingganyon panangipatnag na pagmaliw ya akaparaan nen Jehova a mamerdona sano say inkamapaabeba, pikakasi, tan panametek so mangiiter na saray bungan mitukoyan ed panagbabawi!—2 Awaran 33:15, 16.
10. Panon a sinali nen David ya iyamot so impankasalanan to ed asawa nen Urias?
10 Say kasalanan nen David a pikakalugoran ed asawa nen Urias ya Heteo so kabkabat a tuloy. Aglambengat akikalugoran ed sikato noagta inmaneobra to ni ingen so pangiyamot ed sikato sanen nanlukon. Inikdan na ari si Urias na bakasyon manlapud bakalan, diad ilalon sikato so onsempet tan miakdol ed asawa to. Balet, lapud respeto ed kapara toran mibabakal ed pasen na bakalan, impulisay nen Urias. Kayari to et sikato so inimbitaan nen David a mangan tan sikatoy binuek, balet ta siansian agsinmempet si Urias ed asawa to. Diad ontan et angipawit na mensahe si David ed heneral to ya ipasen si Urias ed sankasentroan na bakalan ta pian napapatey si Urias, a saman so agawa.—2 Samuel 11:2-25.
11. Panon a nitarok si David ed pagbabawi parad kasalanan to, ingen anto so asagmak to?
11 Imbaki nen Jehova ed si David so propeta to a si Nathan pian iwalwal so kasalanan na ari. “Et si David inkuan to ed Natan, Nankasalanan ak sumpa ed Jehova. Et si Natan inkuan to ed David, si Jehova met inekal to so kasalanan mo; agka ompatey.” (2 Samuel 12:13) Agonigon a tuloy si David ed kasalanan to tan imbalikas to so pagbabawi to diad sakey ya impapuson pikakasi ed si Jehova: “Ta sika agmo panliketan so bagat; ta no andi sikato so yapay ko komon: sika agmo pakarambaan so bagat a pinoolan. Saray bagbagat ed Dios saray maralit ya espiritu: say sakey a puso a maralit tan mansisibkel, agmo la balbalawen, O Dios.” (Salmo 51:16, 17) Agbinalaw nen Jehova so pikakasi nen David ya intarok manlapud sakey a maralit a puso. Anggaman ontan, nanirap si David ed ambelat a dusa, mitunosan ed balikas nen Jehova nipaakar ed panamerdona ed Exodo 34:6, 7: “Agto ibilang ya malinis so nankasalanan.”
Say Panangidedika nen Solomon ed Templo
12. Anto so kinerew nen Solomon ed panaon na dedikasyon ed templo, tan anto so ebat nen Jehova?
12 Sanen asumpal nen Solomon so impangipaalagey ed templo nen Jehova, inkuanto ed pikakasi to ed dedikasyon: “Et denglen mo komon so saray kerew na ariripen mo, tan saray kerew na baley mo, ya Israel, sano mikasi ra ya arap ed saya a pasen: on, ondengel ka komon manlapu ed ayaman mo a pasen, salanti manlapud ed tawen; et sano narengel mo, perdonaen mo.” Inmebat si Jehova: “No kapotan ko so saray tawen dia ed ontan ya angapo so uran, odino no igangan ko so duron pian akmonen to so dalin, odino no ibakik so salot ed nanleleetan na baley ko. No say baley ko, ya atawag ed panamegley na ngaran ko, manpaabeba ra, tan mikasi ra, tan anapen da so lupak, tan magbabawi ra ed saray mauges a dalan da; diad ontan ondengel ak a manlapu ed tawen, tan perdonaen koy kasalanan da, tan tambalen ko so dalin da.”—2 Awaran 6:21; 7:13, 14.
13. Anto so ipapanengneng na Ezequiel 33:13-16 nipaakar ed panmoria nen Jehova ed sakey a too?
13 Legan ya onnenengneng si Jehova ed sika, aawaten to ka no anto ka natan, aliwan no anto ka nensaman. Saya so magmaliw a singa ed ibabaga na Ezequiel 33:13-16: “No kuan ko ed matunong, a sikato manbilay naani ya andi saew; no sikato manmatalek ed inkatunong to, et mangawa na mauges, angapo naani ed saray matunong a gawa to so nanonotan; no ag ingen say inkauges to a ginawa to, dia ed sikato ompatey naani. Lamet, no kuan ko ed marelmeng, Ompatey ka naani ya andi saew; no magbabawi ed kasalanan to, tan gawaen to so nikatunongan tan maptek; No say marelmeng ipawil to so inala to a tinakew, manakar ed saray panontonan na bilay, ya ag mangawa na inkauges, sikato manbilay naani a petepeteg, ag naani ompatey. Angapo naani ed saray kasalanan to a ginawa to so nanonotan a sumpa ed sikato; sikato ginawa to so unong ed tunong tan maptek; sikato manbilay naani ya andi saew.”
14. Anto so pakakabatan nipaakar ed panamerdona nen Jehova?
14 Say panamerdonan itatarya nen Jehova a Dios parad sikatayo so walaan na nikaduman pamaakaran, sakey a mairap parad pinalsan totoo ya itekep ed panamerdonan iyaapay da ed balang sinansakey—sikato so namparan mameperdona tan mangililingwan. Say pigaran totoo so mangibabaga, ‘Naperdonak so ginawa, balet agko nalingwanan (odino lingwanan) iman.’ Diad kasuniyan to, imanoen so imbaga nen Jehova a gawaen to: “Perdonaen ko naani inkauges da, tan agko la na-ani nonoten so kasalanan da.”—Jeremias 31:34.
15. Anton rekord na panamerdona so walad si Jehova?
15 Nilibon taon lan peperdonaen nen Jehova iray managdayew to ed dalin. Pinerdona toray kasalanan a kabat dan nagagawaan ontan met ed saray agda namamantaan. Say probisyon ton panangasi, andukey-a-panagtepel, tan panamerdona so anggapoy anggaan. Kuan na Isaias 55:7: “Say marelmeng paulian to komon so dalan to, tan say too ya aliwa a maptek so saray kanonotan to; et ompawil komon ed Jehova, et sikato naani kasian to; tan ed Dios tayo, ta sikato perdonaen to naani daakan.”
Panamerdona ed Kristianon Griegon Kasulatan
16. Akin a nibaga tayo a say pangagamil na panamerdona nen Jesus so mitunosan ed si Jehova?
16 Napnapno na saray salaysay na panamerdona na Dios so rekord na Kristianon Griegon Kasulatan. Mabetbet ya ibabaga iya nen Jesus, ya ipapanengneng a sikato so mitunosan ed kanonotan nen Jehova no nipaakar ed sayan bengatla. Say panag-isip nen Jesus so manlalapud si Jehova mismo, sikato so eksakton retrato nen Jehova; say pakanengneng ed sikato et singa pakanengneng ed si Jehova.—Juan 12:45-50; 14:9; Hebreos 1:3.
17. Panon ya inyilustra nen Jesus so panamerdona nen Jehova ed “daakan [a paraan]”?
17 A si Jehova so daakan ed panamerdona so ipapanengneng ed sakey ed saray ilustrasyon nen Jesus, nipaakar ed ari ya amerdona ed sakey ya aripen ed otang a 10,000 talento (ngalngalin $33,000,000, E.U.). Balet sanen say aripen so agmamerdona ed kaparan aripen ya akaotang na sanlasus a denario (ngalngali $60, E.U.), agayla so sanok na ari. “Sika marelmeng ya aripen, pinerdonak ed sika so amin ya utang mo, lapu’d akikaskasi ka’d siak: Ag mo komon met nepeg sirin ya kinasian so ibam ya aripen, a singa say inpangasik ed sika? Et samay katawan to apasnokan, et sikato’y inyawa’to ed saray managpairap, anga ed pakabayar to na amin ya inutang to.” Insan nanggawa si Jesus na panangiyaplika: “Ontan met naani gawaen nen Amak a mangatatawen ed sikayo, no sakey tan sakey ed sikayo ag to perdonaen so agi to a manlapu ed puso yo.”—Mateo 18:23-35.
18. Panon a nikumpara so panmoria nen Pedro tan si Jesus nipaakar ed panamerdona?
18 Sakbay ni na impangiter na ilustrasyon nen Jesus a walad tagey, inmasingger si Pedro ed si Jesus tan nantepet: “Katawan maminpiga kasi a mankasalanan naani ed siak so agik, tan maminpiga a perdonaen ko? anga ed maminpito?” Say abaloan nen Pedro et sikato so mabunlok a tuloy. Anggaman saray eskriba tan Pariseo so angiter na limitasyon nipaakar ed panamerdona, inkuan nen Jesus ed si Pedro: “Ag ko ikuan ed sika, Anga ed maminpito; ingen, Anga ed maminpitomplo ya pito.” (Mateo 18:21, 22) Say maminpiton danay so agmagenap ed sakey ya agew, a singa inkuan nen Jesus: “Nengnengen yo so inka sikayo lanlamang: no mankasalanan so agim, sikato’y banoen mo; et no magbabawi, sikato’y palabasen mo. Et no mamimpito ed inagewagew a mankasalanan sumpa ed sika, et mamimpito ya ompawil ed sika, a kuan to, Magbabawi ak: sikato so palabasen mo.” (Lucas 17:3, 4) Sano si Jehova so mameperdona, agto bibilangen iray kasalanan tayo—satan so makapaliket ed sikatayo.
19. Anto so nepeg tayon gawaen pian nagamoran so panamerdona nen Jehova?
19 No walaan tayo na mapaabeban pagbabawi ed saray kasalanan tayo tan ipatua iray kasalanan tayo, si Jehova so mabulos ya onkiwas a paborabli parad pankaabigan tayo: “No inkonfesal tayo so saray kasalanan tayo, sikato matoor tan matunong a mamerdona na saray kasalanan tayo, tan linisan to itayo ed ganagana ya ag nikatunongan.”—1 Juan 1:9.
20. Anton inkamabulos na pamerdona ed kasalanan so impanengneng nen Esteban?
20 Say patumbok nen Jesus a si Esteban, diad sakey a makatantandan espiritu na panamerdona, so kinmelyaw diad sayan balikas legan a tutupaken na saray sinmanok ya ulop: “Katawan ko a Jesus, akoen mo so espirituk. Et nen tinmalimokor, inkasil to so voces to: Katawan, ag mo ipasakbat ed sikara so saya’n kasalanan. Et nen kapansalita to na saya naugip [ed patey] ed Katawan.”—Gawa 7:59, 60.
21. Akin ya ontanlan makapakelaw so inkamabulos nen Jesus a mamerdona ed saray sundalon Romano?
21 Angipanengneng ni si Jesus na mas makapakelkelaw iran alimbawa na pagmaliw ya akaparaan a mamerdona. Sikato so inerel na saray kabusol to, inusay ed ilegal a paraan, sikato so hinusga, nileglemew, nilukdaan, nilatiko na napno na saray sabit na saray pukel tan balatyang ya akasingger ed saraya, tan diad kaunoran tinaynan ya akapasak ed sakey a kiew ed loob na pigaran oras. Talagan nalalanor a tuloy iray Romano. Ingen, legan a manpapanabos si Jesus ed satan a panamairapan a kiew, inkuanto ed mangatatawem ya Ama to nipaakar ed saray sundalon angipasak ed sikato: “Ama, perdonam ira; ta ag da amta so gawaen da.”—Lucas 23:34.
22. Antoran salita manlapud Sermon ed Palandey so nepeg tayon panggunaetan ya agamilen?
22 Diad Sermon to ed Palandey, inkuan nen Jesus: “[Mantultuloy ya] aroen yo ray kabosol yo, tan pikasi [iray] mamasegsegang ed sikayo.” Anggan kasampotan na ministeryo to ed dalin, tinumbok ton mismo iyan prinsipyo. Kasin satan so ambelat parad sikatayo, a mipupuligesgesan ed kaleteyan na makasalanan a laman tayo? Diad antokaman et panggunaetan tayon agamilen iray salitan imbangat nen Jesus ed saray patumbok to kayari impangitarok to ed sikara na modelon pikakasi: “Ta no perdonaen yo ’ray totoo ed kaugsan da, say Ama yo’n mangatatawen perdonaen to kayo met. Balet no ag yo perdonaen so saray totoo ed saray kaugsan da, agto kayo met perdonaen nen Ama yo ed saray kaugsan yo.” (Mateo 5:44; 6:14, 15) No mamerdona tayo a singa ed panamerdona nen Jehova, sikatayo so mamerdona tan mangilingwan.
Kasin Natandaan Yo?
◻ Panon a midedeneng si Jehova ed saray kasalanan tayo, tan akin?
◻ Akin ya impawil si Manases ed inkaari to?
◻ Anton pakakabatan a pamaakaran ed panamerdona nen Jehova so sakey ya angat parad totoo ya aligen?
◻ Panon ya ontanlan makapakelaw so inkamabulos nen Jesus a mamerdona?
[Litrato ed pahina 24]
Tinulongan nen Nathan si David a nanengneng so pankaukolan na panamerdona na Dios