Report na Saray Manangiyabawag na Panarian

Si Jehova so Mas Mabiskeg nen Saray Kabusol To

ABAYAG lan panggugunaetan na Diablo tan saray demonyo ya amperen so panangipulong na maong a balita diad panamegley na palson relihyon tan espiritismo. Sasalambiten na Biblia so nipaakar ed mauges a getma nen Satanas diad 2 Corinto 4:4 ya ibabaga to ditan a “say dios na saya’n panaon binulag to so kaisipan da lapu’d ag panisia, pian say silew na evangelio na gloria nen Cristo a sikato so talintao na Dios, ag komon onsinag ed sikara.”

Balet si Jehova so mas mabiskeg nen si Satanas. Anggapoy nagawaan na kakabusol nen Jehova pian patundaen so kasumpalan na madibinon linawa to, salanti “saray amin a totoo nilaban ira komon, tan ondago’ra ed pakapikabat ed katuaan.” (1 Timoteo 2:4) Saray onggendan a report manlapud saray manangiyabawag na Panarian diad Australia so mangipabitar ed saya.

◻ Kayari 20-taon ya insian ed relihyon, ginapoan a basaen-lamet na sakey a bii so Biblia. Awalaan na dakel a tepet lapud nipawil-lamet so interes to ed Biblia, kanian sikatoy nampikasi ed Dios parad tulong pian naromog iray ebat. Labay ton anapen so katuaan, balet amta ton agnaresobli iray problema to diad ipawil to’d datin relihyon to. Imbes, ginapoan ton anapen diad imbisita ed panaglakoay segunda-manon liblibro.

Anonotan na akankayarian na puesto a sikatoy awalaan na relihyoson libro, balet ta andi ed puesto noagta dia ed ayaman. Say paulo na libro et Makapambilay Kayo na Ando lan Ando ed Paraiso diad Dalin, ya impalapag na Tastasi nen Jehova. Sigugunaet so biin manbasa ed libro tan aromog toray ebat ed dakel a tepet to ed Biblia. Kayari impananap ed saray Tasi nen Jehova diad direktory na telepono, diad kaunoran et atawagan tora tan ginapoan to so regular a panagaral na Biblia.

◻ Binayaran na sakey a marikit so serbisyo na lokal a peryodiko pian iyanunsio so panlako ed sakey ya anting-anting. Tinukoy iman na anunsyo bilang sakey ya ‘anting-anting ed kapegleyan a panaon a makapanyarin tuloy.’ Sakey ed saray Tasi nen Jehova so akaimano ed satan ya anunsyo. Deniside ton tawagan ed telepono so numeron wadman tan mitongtong ed bii nipaakar ed lapuan na inkuan a pakayari na anting-anting. Say kalangweran a biin walaay anting-anting so angipatua a sakey agew ed asasakbay et sikatoy nampikasi ed Dios pian patulongan ed saray problema to ed demonyo. Akiuksoyan so Tasi parad sananey a tongtongan ed telepono.

Sanen tinmawag, anggapo’d man so marikit. Say ina to so inmebat ed telepono tan inkuanto: “Agko amta no antoy imbagam ed sikato, balet say agawa so sakey a milagro!” Insalaysay to a kayari inmunan impantongtong da ed telepono, say anak ton bii so angibantak ed amin a satanikon retrato tan libro to tan ginapoan ton binasa so Biblia.

Kayari ton tuloy, ginawa iray oksuyan pian personal a nabisita iyan marikit. Inawat ton tampol so sakey a regular a panagaral na Biblia a kaiba iray Tasi nen Jehova. Ginapoan to met so milimog ed Tastasi diad iyaatendi ed Kristianon miting da. Lamet, tinalo nen Jehova iray demonyo diad panguusar na suston pikakabat ed saray katuaan na Biblia ya onsindag.