Report na Saray Manangiyabawag na Panarian

Say Maong a Balita na Panarian so Nipulong

DIAD loob na saray siglo, say manunan kabusol na Dios, si Satanas a Diablo, so sisisilib a manguusar ed saray mapulitikan gobierno tan palson relihyon diad gunaet ton pangamper ed kilaknab na tuan Inkakristiano. Balet sarayan metodo so onsaew. Impasakbay nen Jesus a say “maong a balita na panarian so kaukolan a nipulong [aliwan, “nayarin nipulong” odino, “naipulong”] diad amin a panaayaman a dalin parad pantasi ed amin a nasyon.”​—Mateo 24:14, NW.

Say insaew nen Satanas so napapaneknekan diad Gresya. Diad satan a dalin et sinali na Greek Orthodox Church a sebelan so Tastasi nen Jehova ed panangipulong na maong a balita na Panarian. Balet, singa impabitar na onggendan ya eksperiensia, diad kaunoran et saray katuaan na Biblia so akasabi’d matuan-impanpuson totoo anggaman ed isusumpa.

Ngalngali 30 taon ed apalabas, sakey a parin Greek Orthodox so angawat ed maong a balita tan imbalikas to ni ingen so pilalek ton magmaliw a sakey ed saray Tasi nen Jehova. Anggaman ontan, alablabas so insumpa na kakanayon to ed sayan kundang tan dinesdes dan paliisan toy pililimog ed saray Tasi. Pian paliketey pamilya to, intuloy to so gegemtan ton karera bilang sakey a pari; ingen, lawas ton bibidbiren a saray Tasi nen Jehova so akatulong ed sikaton akaaral ed katuaan tan inkaindan to itan lapud sakey a posisyon na inka-prominenti diad palson relihyon.

Anggaman kuan, no maminsan sikatoy mansalita ed pabor na saray Tasi nen Jehova sano onlesa so pankanawnawa. Diad pigaran inkagawa et sinimbawa to ni ingen so totoo a no labay dan aralen iray katuaan ed Biblia, nepeg day miaral ed saray Tasi. Diad loob na saray taon et talagan pigara ed sikara so tinmumbok ed rekomendasyon to.

Diad agano ni et say pari so naninagem a tuloy tan amoria ton agmanbayag et sikatoy ompatey. Legan a walad ospital, impatawag toray ilalak to, tan sikaran amin so nandaragup ed diking na dokolan to.a Insalaysay to ed sikara a no sikatoy ompatey, sikatoy nayarin nanengneng da lamet. Sinaglawi to ed sikara so nipaakar ed bangat na Biblia a panamaoli nen Jehova ed katooan pian manbilay ed paraison dalin, balet no labay dan sikatoy talagan napinengnengan lamet, kaukolan ya aralen da so katuaan manlapud Biblia tan onsian manlapud palson relihyon. Kinerew ton sikaray milimog ed saray Tasi nen Jehova tan aralen manlapud sikara no panon so pagmaliw a puron Kristianos.

Ag-abayag et inatey so pari. Anggaman ontan, say manamatanir a simbawa to ed saray ilalak to so nanani na maong iran resulta. Say anak ton bii, singa met ed maslak a kakanayon to, so mapalalon tuloy a sumpa’d Tastasi nen Jehova tan say kimey da. Balet agto nibaliwala so masimoon a kerew na manpapanabos ya ama to, kanian ag-abayag et akapiabet ed Tastasi nen Jehova tan ginapoan to so panagaral na Biblia. Agano ni et sikaton mismo so nagmaliw a sakey a Tasi, ya indedika so bilay to ed si Jehova a Dios tan insimbolo itan a dedikasyon diad bautismo ed danum.

Diad Gresya, unong ed masulok a 230 niran daldalin, manmamatalek iray Tasi nen Jehova ed pakayari masanton espiritu. Satan so lapud sigpot a pananuporta ed masanton espiritu a sikaray makapibiang ed kasumpalan na propesiya nen Jesus: “Mangawat kayo na pakayari, no onsabi ed sikayo so Espiritu Santo: et sikayo so tasik ed Jerusalem, tan ed amin a Judea tan Samaria, tan anga ed kasampotan na dalin.”​—Gawa 1:8.

[Paimano ed leksab]