Dedikado​—ed Siopa?

“Amin a sinalita nen Jehova gawaen mi, tan matolo’kami.”​—EXODO 24:7.

1, 2. (a) Diad anto a say arum a totoo so debotado? (b) Kasin say dedikasyon so limitado lambengat ed saraman so walaan na relihyoson pisisiglaotan?

“NEN Pebrero 1945, saray piloto na Zero-fighter na Yatabe Flying Corps na Hapon so nantitipon ed sakey ya auditoryum. Balang sakey so dinerewan na sakey a papel a pangisulatan no kasin manboluntaryon magmaliw a membro na kamikaze attack force. “Inisip kon saman so tawag ed siak pian isakripisyoy sarilik ed panaon na nasyonal a krisis,” kuan na sakey ya opiser a wadman ed saman a panaon. “Tekep na inkaabagey, siak so apaskar ya ipresenta’y inkasiak, inyopresik so inkasiak parad kimey.” Sikatoy insanay a mamaandar tan mamatekkiab ed sakey ya Ohka (panggueran panturobos ya eroplano) tan ipasabog itan ed kalaban a panggueran-bapor. Anggaman ontan, say bakal so tinmunda la sakbay a sikatoy awalaan na pankanawnawan manggawa ed satan tan pian ompatey parad bansa to tan ed emperador to. Sanen atalo so Hapon ed bakal, say pananisia to ed emperador so abuyak.

² Aminsan, dakel ed Hapon so debotado ed emperador, a sisiaen dan sikatoy mabilay a dios. Diad arum a daldalin, wala niran siansia so arum a pangipapaarapay debosyon. Minilyon so debotado ed si Maria, Buddha, odino arum nin dirios​—a mabetbet ya irerepresenta na saray talintao. Diad impakaimpluensya’d malamoy a talumpati, arum so mangiter na nanirapan-dan-inanap a kuarta ed saray ebanghelisador na TV bilang sigpot-puson pananuporta a kasimbangan na debosyon. Kayari bakal, saray adismayan taga Hapon so nananap na balon bengatlan pakapangidedikaan na saray bilay da. Parad arum, satan a bengatla et say trabaho. Balanglan taga Bukig odino taga Sagur, dakel so mangidededika na inkasikara ed panagtipon na saray kayamanan. Dakel a kalangweran so mangiyaapasakey na bila-bilay da ed saray komakanta, ya aaligen iray istiloy kabibilay da. Dakerakel natan so nagmaliw a managdayew ed sarili, ya ipapaarap so debosyon da ed dilin pilpilalek da. (Filipos 3:19; 2 Timoteo 3:2) Balet kasin saratan a bengatla odino ontan a totoo so peteg a makanepegan ed sigpot-kamarerwan debosyon na sakey a too?

3. Panon a say arum iran pangipapaarapan na debosyon so apaneknekan ya andi-kakanaan?

³ Sano nidunget ed kapetegan, saray managdayew ed idolo so mabetbet a nadidismaya. Say debosyon ed saray idolo so mansusumpal ed kadismaya sano namoria na saray managdayew a saray idolo ra so basta “gawa [labat] na limalima na totoo.” (Salmo 115:4) Sano niwalwal iray makapabanday a mangilalanor ed saray prominentin ebanghelisador, saray masimoon a totoo so nalemay. Sano manampot so “singa-buran” ekonomiya, saray komikimey so makasagmak na inkaaburidon tuloy diad impakaimanon sikaray walad listaan na saraman so naekal ed trabaho. Saray agano niran recession so amairap a tuloy ed saray managdayew nen Mammon. Saray otang lapud ilalon makapawala na dakel a kuarta so nagmaliw a pabelat a samsamet so ilalon pakabayar. (Mateo 6:24, paimanod-leksab) Sano inatey la odino linmaos laray iidoloen a rock star tan arum nin artista, saray managdayew da so nataynan a begtebegtew. Tan saraman so nankurang ed dilin-panagpaliket so mabetbet a manani na ampait a bunga.​—Galacia 6:7.

4. Antoy mamapakiwas ed totoon mangidedika na bilay da ed andi-kakanaan iran bengatla?

⁴ Anto so mamapakiwas ed totoo a mangidedika’d inkasikara ed ontan ya inkaapa? Diad kabalgan, satan et say espiritu na mundo a walad silong nen Satanas a Diablo. (Efeso 2:2, 3) Say impluensya na sayan espiritu so nanenengneng ed nanduruman paraan. Say sakey so nayarin kontroladoy tradisyon na pamilya ya inpabangon manlapud inmunan atateng to. Say edukasyon tan say paraan na impamabaleg so mabiskeg a makaimpluensya ed panagnonot. Say kaliber-liber na pantratrabahoan so nayarin managdag ed “saray mibabakal na korporasyon” ed pagmaliw a workaholic a nayarin mameligro ed bilay da. Say panpilalek na dakel ni so resulta na materyalistikon walna na mundo. Say kapusoan na dakel so onuuges, a mamapakiwas ed sikaran idebotoy inkasikara ed dilin sinisiblet iran pilalek da. Sikaray onsasaew a mangusisa no kasin sarayan gegemtan so makanepegan na ontan a debosyon.

Sakey a Dedikadon Nasyon

5. Anton dedikasyon ed si Jehova so ginawa ed masulok lan 3,500 a taon lay apalabas?

⁵ Masulok lan 3,500 a taon lay apalabas, sakey a nasyon na totoo so akaromog na sakey a talagan makanepegan a pangipaarapay debosyon. Indedika ra so inkasikara ed soberanon Dios, si Jehova. Bilang sakey a grupo, say nasyon na Israel so angiyabawag na dedikasyon da ed Dios ed kalawakan na Sinai.

6. Anto so talagan kabaliksan na ngaran na Dios ed saray Israelita?

⁶ Anto so amakiwas ed Israel ya onkiwas ed onian paraan? Sanen sikaray naaripen ed Ehipto, ginanggan nen Jehova si Moises ya idaulo ira ed kawayangan. Tinepet nen Moises no panon ton ipabidbir so Dios ya angibaki ed sikato, tan imparungtal na Dios so inkasikato bilang “paneknekan ko so inkasiak unong ed pagmaliwan ko.” Indirihe to si Moises a mangibaga ed saray anak na Israel: “Paneknekan ko so inkasiak unong ed saman so angibaki ed siak ed sika.” (Exodo 3:13, 14, NW) Sayan balikas so angipatnag a si Jehova so magmamaliw no antokaman so nakakaukolan ta pian nasumpal iray gagala to. Iparungtal toy inkasikato bilang Mananumpal na saray sipan diad paraan ya agbalot naamtaan na inmunan atateng na Israel.​—Exodo 6:2, 3.

7, 8. Antoran paneknek so walad saray Israelita a si Jehova a Dios so makanepegan ed debosyon da?

⁷ Atasian na Israelitas so irap na dalin na Ehipto tan totoo to diad panamegley na Samploran Bakbak. (Salmo 78:44-51) Insan, nayarin masulok a taloran milyon ed sikara, pati bibii tan ugugaw, so nanbalkot tan inmalis ed dalin na Goshen ed sakey a labi, a satan a mismo so makatantandan gawa. (Exodo 12:37, 38) Insan, diad Ambalangan Dayat et impatnag nen Jehova so inkasikato bilang “sakey a silalakin mibabakal” sanen inliktar toy totoo to manlapud armada nen Paraon diad impamelsay ed dayat pian makabeltang iray Israelita tan diad saginonor et impawil itan pian nalener iray onuusil ya Ehipsio. Bilang nansumpalan, “anengneng na Israel so sankabalgan a kanonotan a ginawa nen Jehova ed saray Egipcios, et saray katooan tinmakot ira ed Jehova; tan anisia ra ed Jehova.”​—Exodo 14:31; 15:3, NW; Salmo 136:10-15.

⁸ A singa kulang nin siansia so paneknek ed no antoy kabaliksan na ngaran na Dios, saray Israelita so nanmeremere sumpad si Jehova tan ed manangilaman ton si Moises nipaakar ed kakisiray tagano tan danum. Angibaki si Jehova na saray sikling, amauran na mana, tan amapaway na danum ed dampay na Meriba. (Exodo 16:2-5, 12-15, 31; 17:2-7) Inliktar met nen Jehova iray Israelita manlapud panangataki na Amalekitas. (Exodo 17:8-13) Saginonor, anggapoy rason a niburi na Israelitas ya inyabawag nen Jehova ed si Moises: “Jehova, Jehova, Dios a mapangasi tan maaro, mapalna ya onsanok, daakan ed maaro ya abig na linawa, tan katuaan. A mangigagana na maaro ya abig na linawa ed saray nilibu, mamerdona na inkauges, tan inpakasumpa, tan kasalanan.” (Exodo 34:6, 7) On, apaneknekan nen Jehova so inkasikato a makanepegan a pangipaarapan na debosyon da.

9. Akin ya inikdan nen Jehova iray Israelita na pankanawnawan mangibalikas na dedikasyon da ed panlingkor ed sikato, tan panon so inkiwas da?

⁹ Anggaman walaan na kanepegan si Jehova ed pankayarian ed saray Israelita lapud sikaray dinondon to manlapud Ehipto, sikato, bilang maong tan mapangasin Dios, so angiter ed sikara na pankanawnawan bulos a mangibalikas na pilalek dan manlingkor ed sikato. (Deuteronomio 7:7, 8; 30:15-20) Indatak to met iray kondisyon parad sipanan ed baetan to tan saray Israelita. (Exodo 19:3-8; 20:1–23:33) Sanen inbinsa-binsa nen Moises irayan kondisyon, inyabawag na Israelitas: “Amin a sinalita nen Jehova gawaen mi, tan matolo’kami.” (Exodo 24:3-7) Diad kawayangan da, sikaray nagmaliw a sakey a nasyon a nidedika ed Soberanon Katawan a Jehova.

Say Apresasyon so Mangitonton ed Dedikasyon

10. Diad anto so nepeg a pangibasiyan na dedikasyon tayo ed si Jehova?

¹⁰ Anggad natan si Jehova, say Manamalsa, so mantutultuloy a makanepegan na sigpot-kamarerwan debosyon tayo. (Malaquias 3:6; Mateo 22:37; Apocalipsis 4:11) Anggaman ontan, say dedikasyon tayo so nepeg ya agnibased basta panisia labat, pabigla-biglan liknaan, odino lapud panamasoot na arum​—anggan saray ateng. Satan so nepeg a nibased suston pikakabat ed katuaan nipaakar ed si Jehova tan apresasyon ed nagagawaan nen Jehova parad sikatayo. (Roma 10:2; Colosas 1:9, 10; 1 Timoteo 2:4) No panon ya inikdan nen Jehova iray Israelita na pankanawnawan bulos a mangibalikas na dedikasyon da, ontan met ya iikdan to itayo na pankanawnawan bulos ya idedikay inkasikatayo tan gawaen itan a dedikasyon ed publiko.​—1 Pedro 3:21.

11. Anto so ipaparungtal na panaaral tayo na Biblia nipaakar ed si Jehova?

¹¹ Diad panamegley na panaral ed Biblia, nakakabatan tayo so Dios bilang sakey a persona. Say Salita to so ontutulong ed sikatayon natebek iray kualidad to unong a nipapatnag ed palsa. (Salmo 19:1-4) Natalosan tayo’d Salita to a sikatoy aliwan misteryoson Trinidad ya agnatalosan. Sikatoy agnatatalo ed baka-bakal tan sirin et agkaukolan ya italirak so inka-Dios to. (Exodo 15:11; 1 Corinto 8:5, 6; Apocalipsis 11:17, 18) Lapud susumpalen toray sipan to, sikatayoy napapanonotan ed no antoy kabaliksan na masanting a ngaran ton Jehova. Sikatoy Engranden Managgagala. (Genesis 2:4, paimanod-leksab; Salmo 83:18; Isaias 46:9-11) Diad panaral ed Biblia, natalosan tayon malinew no panon a sikato so matoor tan napanmatalkan.​—Deuteronomio 7:9; Salmo 19:7, 9; 111:7.

12. (a) Anto so pakakasagyatan tayo ed si Jehova? (b) Panon a say tua-ed-bilay iran eksperiensia a nirekord ed Biblia so mamapakiwas ed sakey a mankaliktan a manlingkor ed si Jehova? (c) Anto so liknaan yo nipaakar ed panaglingkor ed si Jehova?

¹² Say nagkalautlan makakasagyat ed sikatayo ed si Jehova et say maaron personalidad to. Ipapanengneng na Biblia no panon a sikatoy maaro, manamerdona, tan mapangasi diad pidedeneng to’d totoo. Isipen pa no panon ton pinaaligwas si Job kayari sitotoor ya impamasiansia nen Job na katooran to. Say eksperiensia nen Job so mangipapabitar a “si Jehova so matamoy a tuloy ed panangaro tan mapangasi.” (Santiago 5:11, NW; Job 42:12-17) Isipen pay impideneng nen Jehova ed si David sanen sikatoy akikalugoran tan amapatey. On, si Jehova so mabulos ni ingen a mamerdona ed saray seryoson kasalanan, sano say managkasalanan so onsingger ed sikato tekep na “puso a maralit tan mansisibkel.” (Salmo 51:3-11, 17) Isipen pay paraan ya impideneng nen Jehova ed si Saulo na Tarsus, a diad inmuna et sakey a determinadon manamasegsegang ed totoo na Dios. Sarayan alimbawa so mangipapabitar ed panangasi tan mabunlok ya inkamabulos na Dios pian usaren iray managbabawi. (1 Corinto 15:9; 1 Timoteo 1:15, 16) Alikna nen Pablo a sikato so makapangimatalek ed mismon bilay to diad panlingkor ed sayan maaron Dios. (Roma 14:8) Kasin ontan met so nalilikna yo?

13. Anton baleg a balikas na aro ed biang nen Jehova so mamapakiwas ed saray maptek-impanpuso pian idedika ray inkasikara ed sikato?

¹³ Parad saray Israelita, intarok nen Jehova so kililiktar manlapud inkaaripen ed Ehipto, tan sikatoy angiparaan la na saray paraan pian iliktar itayo manlapud inka-aripen ed kasalanan tan patey​—say dondon bagat nen Jesu-Kristo. (Juan 3:16) Ibabaga nen Pablo: “Bangbalet say Dios ipurek to so dilin aro to ed sikatayo, ta anta, makasalanan itayo ni, si Cristo inatey lapud sikatayo.” (Roma 5:8) Sayan maaron uksoyan so mamapakiwas ed saray maptek-impanpuso pian idedika ray inkasikara ed si Jehova ed panamegley nen Jesu-Kristo. “Ta say aro nen Cristo pasooten to kami; ta isipen mi, a no inatey so sakey lapu ed amin, sirin amin da inatey ira nen saman; tan sikato so inatey lapud amin, pian saray mabilay ag ira manbilay komon na andokdokey ed sikaran dili, no ag dia ed saman so inatey lapu ed sikara tan inmolin binmilay lamet.”​—2 Corinto 5:14, 15; Roma 8:35-39.

14. Kasin say basta pikakabat ed saray pidedeneng nen Jehova so magenap pian mamakiwas ed sikatayon mangidedikay bilay tayo ed sikato? Isalaysay.

¹⁴ Siansia ni, say pakawalaan na pikakabat ed personalidad nen Jehova tan ed saray pidedeneng to’d katooan so aliwan magenap. Nepeg a nabayuboan so personal ya apresasyon ed si Jehova. Panon itan a nagawaan? Diad pangiyaplika’d Salita na Dios ed kabibilay tayo tan diad pakakaeksperiensia tayon mismo a saray prinsipyon naromog ditan so peteg ya epektibo. (Isaias 48:17) Kaukolan tayon liknaen a si Jehova so mangililiktar ed sikatayo manlapud lunek na sayan marelmeng a mundo diad silong na uley nen Satanas. (Ipareng so 1 Corinto 6:11.) Diad pipupuligesgesan tayo ed panggawa na maptek, naaralan tayo so onsaral ed si Jehova, tan naeksperiensia tayo’d inkasikatayo a si Jehova so mabilay a Dios, say “Dumerengel na Pikakasi.” (Salmo 62:8; 65:2, NW) Agmabayag et nalikna tayoy inkaapit tayon tuloy ed sikato tan nayarian tayon imatalek so akindalem iran liknaan tayo ed sikato. Say ampetang ya aro parad si Jehova so ombaleg ed sikatayo. Saya so andi-duaruwan mangitonton ed sikatayo ed pangidedikay bilay tayo ed sikato.

15. Anto so amakiwas ed sakey a laki, a datin dedikado ed anapan to, pian manlingkor ed si Jehova?

¹⁵ Dakel so makakapikabat ed sayan maaron Dios, si Jehova, tan indedika daray bilay da pian lingkoran. Alaen ya alimbawa so ehemplo na sakey ya elektrisyan a walaan na matalonan anapan. Walaray panaon sano sikatoy onggapon mantrabaho ed kabuasan tan mantrabaho ed interon sanagew tan anggad labi, ya onsempet ed abung ed ala-singko ed ontumbok a kabuasan. Kayari panpainawa ton ngalngali sakey oras, sikatoy onla ed sananey lamet a trabaho. “Siak so dedikado ed kimey ko,” nanonotan to. Sanen ginmapon nanaral na Biblia so asawa to, sikatoy akibiang ed sikato. Inkuanto: “Amin a dirios ya amtak anggad saman a panaon so basta labat manatalaran a nalingkoran, ya anggapoy gagawaen parad pankaabigan tayo. Balet si Jehova so mabulos tan angibaki ed bogbogtong ya Anak to ed dalin tekep na personal a panagsakripisyo.” (1 Juan 4:10, 19) Diad loob na samploran bulan, sayan laki so nidedika ed si Jehova. Linmoob ed sigpot-panaon a ministeryo tan apakiwas a manlingkor ed lugar a babaleg so pankaukolan. Sikato, singa saray apostol, so ‘angitalirak ed amin a bengatla tan tinmumbok ed si Jesus.’ (Mateo 19:27) Kayari duaran bulan, sikato tan say asawa to so tinawag a manlingkor ed sanga na Watch Tower Bible and Tract Society ed bansan panaayaman da, ta pian sikato so makatulong ed elektrikal a kimey. Diad loob na masulok a 20 taon, sikato so mankikimey ed sanga, manggagawa na kimey a paborito to​—aliwan parad inkasikato noagta parad si Jehova.

Gawaen a Mapubliko so Dedikasyon Yo

16. Antoray pigaran kundang ya alaen na sakey diad panggawa na dedikasyon ed si Jehova?

¹⁶ Kayari impanaral ed Biblia, namparan saray kalangweran tan mamatatken so mangapresya’d si Jehova tan ed nagagawaan to parad sikara. Saya so nepeg a mamakiwas ed sikaran mangidedika na inkasikara ed Dios. Nayarin sakey kayo ed saraya. Panon yon nidedika so inkasikayo ed si Jehova? Kayari pangalay suston pikakabat manlapud Biblia, nepeg kayon onkiwas a mitunosan ed satan a kakabatan tan mangagamil na pananisia ed si Jehova tan ed si Jesu-Kristo. (Juan 17:3) Manpataoli tan italirak so antokaman ya apalabas a makasalanan a kurang. (Gawa 3:19) Insan sikayo so makarateng ed dedikasyon, ya ibalikas itan ed masimoon iran salita na pikakasi ed si Jehova. Sayan pikakasi so andi-duaruwan mangitilak na magnayon ya impresyon ed kanonotan yo, lapud satan so gapoan na balon siglaotan ed si Jehova.

17. (a) Akin a saray mamatatken so mangirerepaso ed saray niparaan a tepet ed saray balobalo nin dedikado? (b) Anton importantin kundang so nepeg ya alaen a tampol kayari dedikasyon na sakey, tan ed anton gagala?

¹⁷ No panon ya insalaysay nen Moises ed saray Israelita iray kondisyon diad pibiang ed sakey a sipanan a pisisiglaotan ed si Jehova, saray mamatatken ed kongregasyon na Tastasi nen Jehova so ontutulong ed saraman so angidedika ed agano ni pian pihon usisaen no anto so nalalanor. Sikaray manguusar na niparaan iran tepet pian pekderan a balang sakey so sigpot a makakatalos ed manunan bangabangat na Biblia tan mikabat ed no anto so nalalanor ed pagmaliw a Tasi nen Jehova. Insan, say seremonya pian gawaen a mapublikoy dedikasyon so matukotukoy lambengat. Natural, say kapkapandedikado lambengat so magunaet a mangipaamta ed arum a sikatoy akarateng ed sayan apribilihyoan a siglaotan ed si Jehova. (Ipareng so Jeremias 9:24.) Saya so matukotukoy a nagawaan diad panamegley na bautismo ed danum bilang simbolo na dedikasyon. Say kipalgep tan say iyimuas so mangisisimbolo’d pangitalirak ed datin dilin sinisiblet a kurang na bilay tan kibangon ed balon dalan na bilay, salanti say panggawa ed linaway Dios. Satan so aliwan sakramento, nisay sakey a ritual a singa say kaugalian na Shinto a misogi a ditan et say sakey so ipapasen a nalinisan diad danum.a Imbes, say bautismo so mapublikon deklarasyon na dedikasyon a ginawa la ed pikakasi.

18. Akin a makapanmatalek itayo a say dedikasyon tayo so aliwan inkaapa?

¹⁸ Sayan seryoson okasyon so agnalinglingwanan ya eksperiensia, a mangipapanonot ed balon aripen na Dios ed magnayon a siglaotan to’d si Jehova. Aliwan singa say dedikasyon a ginawa na piloto na kamikaze parad bansa tan emperador to, sayan dedikasyon ed si Jehova so aliwan inkaapa, lapud sikato so andi-anggaan a makapanyarin amin a Dios a manusumpal ed amin ya imbaga ton gawaen. Sikato, tan sikato lambengat, so makana ed sigpot-kamarerwan debosyon tayo.​—Isaias 55:9-11.

19. Anto so singbaten ed ontumbok ya artikulo?

¹⁹ Anggaman ontan, nagkalalo ni so nalalanor ed dedikasyon. Alimbawa, panon a say dedikasyon so mangaapekta ed inagew-agew a panagbilay tayo? Saya so singbaten ed ontumbok ya artikulo.

[Paimano ed leksab]

Kasin Nanonotan Yo?

◻ Akin a say dedikasyon a nagagawa ed mundo so mansusumpal ed pakakadismayaan?

◻ Antoy amakiwas ed saray Israelita a mangidedika’d inkasikara ed si Jehova?

◻ Antoy mamapakiwas ed sikatayo a mangidedika na inkasikatayo natan ed si Jehova?

◻ Panon tayon idedika so inkasikatayo ed Dios?

◻ Anto so kabaliksan na bautismo ed danum?

[Litrato ed pahina 10]

Idedidika na Israel diad Sinai so inkasikato ed si Jehova