Akin ya Idedikam so Inkasika ed si Jehova?

“Kalabian inmalagey ed abay ko so sakey ya anghel na Dios a makankien ed siak.”​—GAWA 27:23.

1. Antis na bautismo, anto la ray ginawa na saray kandidato, tan antoray nitepet nipaakar ed satan?

“BASE ed bagat nen Jesu-Kristo, kasin nagbabawian yo la ray kasalanan yo tan indedika yo lay inkasikayo ed si Jehova pian gawaen so linawa to?” Sakey iya ed saray duaran tepet ya eebatan na saray kandidato ed bautismo diad banda’d sampot na paliwawa parad bautismo. Akin a kaukolan ya idedika na saray Kristiano so inkasikara ed si Jehova? Panon a makagunggona ed sikatayo so pagmaliw a dedikado ed Dios? Akin a nibagan agnaawat na Dios so panagdayew tayo no aliwa itayon dedikado ed sikato? Ta pian naamtaan tayo iray ebat, kaukolan tayo nin talosan no anto so dedikasyon.

2. Antoy kabaliksan na pangidedika na inkasika ed Dios?

² Antoy kabaliksan na pangidedika na inkasika ed Dios? Imanoen pay impaneskribe nen apostol Pablo nipaakar ed relasyon to ed Dios. Sanen napepeligro so bilay to tan saramay kaiba ton akalugan ed barko, imbaga to a si Jehova so “Dios a makankien ed siak.” (Basaen so Gawa 27:22-24.) Amin a tuan Kristiano et kien nen Jehova. Balet, say interon mundo et “walad pakayari na samay sakey a mauges.” (1 Juan 5:19, NW) Magmaliw a kayarian nen Jehova iray Kristiano no manggawa ra na naabobonan a pangidedika ed inkasikara panamegley na pikakasi. Satan a dedikasyon et samba na kada indibidual, tan tumbokan itan na bautismo ed danum.

3. Antoy isisimbolo na bautismo nen Jesus, tan panon a naalig na papatumbok to so ehemplo to?

³ Angipanengneng si Jesus na ehemplo sanen sikatoy personal a nandesisyon a gawaen so linaway Dios. Lapud sikatoy nianak ed dedikadon nasyon na Israel, sikatoy dedikado la ed Dios. Kanian, aliwan say dedikasyon so rason na impanpabautismo to. Ipapaimano na Salita na Dios ya oniay inkuan to: “Nia, siak onsabi ak . . . pian gawaen ko, O Dios, so linawam.” (Heb. 10:7; Luc. 3:21) Say bautismo nen Jesus sirin et simbolo na impangiparungtal toy inkasikato ed Dios pian gawaey linawa To. Aaligen na papatumbok to so ehemplo to sano manpabautismo ira. Balet, diad kipapasen da, say bautismo’d danum et panangipatnag ed publiko a ginawa da lay personal a dedikasyon da ed Dios panamegley na pikakasi.

No Panon a Makagunggona so Dedikasyon

4. Antoy ipapatnag ed sikatayo na impankaaro nen David tan Jonatan nipaakar ed pisisipanan?

⁴ Say dedikasyon na sakey a Kristiano et seryoson bengatla. Aliwa labat itan ya ordinaryon pisisipanan odino pipapaknaan. Balet, panon a makagunggona ed sikatayo so panggawa na dedikasyon? Pian lalo tayon natalosan, pantongtongan tayo pa no antoray gunggona na pisisipanan ed arum a too. Say sakey ya alimbawa et say pikakaaro. Pian maliket so pankakaaro, nepeg mon awaten so responsabilidad mo bilang kaaro. Say kabaliksan na satan et ipasen mon obligasyon so pangiyansakit ed kaarom. Sakey ed saray sankaabigan a pankakaaro ya asalambit ed Biblia et samay impankaaro di David tan Jonatan. Nansipanan ni ingen ira. (Basaen so 1 Samuel 17:57; 18:1, 3.) Anggaman mataltalag so walaay ontan a kaaralem na pankakaaro, sano saray sankaaro et matoor odino ipapasen dan walay obligasyon da ed balang sakey, onelet so pankakaaro ra.​—Uli. 17:17; 18:24.

5. Antoy gawaen na sakey ya aripen pian permanentin nagunggonaan ed pagmaliw ton kayarian na maong a katawan?

⁵ Idedeskribe na inter na Dios a Ganggan ed Israel so sananey nin klase na relasyon a pakagunggonaan sano manggaway paknaan. No labay na sakey ya aripen a sikatoy permanente lan kayarian na maong a katawan to, nayarian toy manggawa na agnauman a pipapaknaan ed katawan to. Oniay inkuan na Ganggan: ‘No say aripen et ikuan to a malinlinew, Inarok so katawan ko, say asawak a bii tan saray ana’ko; agko labay so ompaway a nabulos. Diad satan say katawan to yakar to ed Dios, tan yakar to ed pinto, odino angga ed patukok na pinto; tan say katawan to tebengen to so layag na aripen na sakey ya eser; et manserbi la ed sikato ya angga ed angga.’​—Exo. 21:5, 6.

6, 7. (a) Panon a makagunggona ed saray totoo so pisisipanan odino pipapaknaan? (b) Antoy ipapabitar na satan nipaakar ed relasyon tayo ed si Jehova?

⁶ Say panangasawa et sakey a relasyon a mankaukolan na seryoson pisisipanan. Pisisipanan itan ed sakey a too, aliwan ed sakey a kontrata. No say duara et agkasal, agda naseguro a mansiansiay panaamong da, tan pati saray anak da et naapektaan. Balet no nansipanan ira panamegley na mapagalang a panangasawa, walay mabiskeg tan Makasulatan a rason pian maaron pansagpotan da a resolbien iray onlesan problema.​—Mat. 19:5, 6; 1 Cor. 13:7, 8; Heb. 13:4.

⁷ Nensaman, agunggonaan iray totoo diad impanggawa ray paknaan ed negosyo tan trabaho. (Mat. 20:1, 2, 8) Ontan met natan. Singa bilang, antis tayon mannegosyo odino mantrabaho’d sakey a kompanya, pakagunggonaan tayo no walay nisulat a paknaan odino kontrata. Kanian, no say pisisipanan odino pipapaknaan et paeleten toy relasyon ed pankakaaro, panangasawa, tan trabaho, seguradon mas pakagunggonaan tayo so sigpot-puson dedikasyon tayo ed si Jehova! Natan, amtaen tayo no panon a say dedikasyon na saray totoo ed si Jehova nensaman et akagunggonaan da. Amtaen tayo met no akin ya aliwa itan ya ordinaryo labat a pisisipanan.

No Panon ya Akagunggona ed Israel so Dedikasyon ed Dios

8. Antoy kabaliksan na dedikasyon na Israel ed si Jehova?

⁸ Say interon nasyon na Israel et nagmaliw a dedikado ed si Jehova sanen nanggawa ira na samba ed sikato. Tinipon ira nen Jehova diad abay na Palandey Sinai, tan inkuanto’d sikara: “No tuloken yo so boses ko a tuatua, tan em-eman yo so sipanan ko, sikayo ed satan so pabpablien ko a pinagka-kayamanan ko a manuna nen saray amin a totoo.” Et oniay nankakasakey ya ebat na saray totoo: “Amin a sinalita nen Jehova gawaen mi.” (Exo. 19:4-8) Say pagmaliw a dedikado na Israel et kabaliksan ton ag-ira labat akipakna a gawaen so sakey a bengatla, noagta sikaray kien nen Jehova, tan impasen to iran ‘pabpablien a pinagka-kayamanan’ to.

9. Panon ya akagunggona ed Israel so dedikasyon da ed Dios?

⁹ Agunggonaan iray Israelita sanen nagmaliw iran kien nen Jehova. Sikatoy matoor tan maasikaso ed sikara, a singa ed panangasikaso na sakey ya ateng ed anak. Oniay inkuan na Dios ed Israel: “Nayarian ta na sakey a bii a lingwanan so anak to a mansuso, ya agto komon kasian so anak na eges to? On, saraya makalingwan ira, balet agak makalingwan ed sika.” (Isa. 49:15) Inwanwan ira nen Jehova panamegley na Ganggan, pinaseseg to ira panamegley na saray propeta, tan sinalimbengan to ra panamegley na saray anghel. Oniay insulat na salmista: “Ipanengneng to so salita to ed Jacob, saray panangitunongan to tan saray panangukom to ipanengneng to ra ed Israel. Sikato agnanggawa na ontan ed dinanman a nasyon.” (Sal. 147:19, 20; Basaen so Salmo 34:7, 19; 48:14.) No panon a nensaman et inasikaso nen Jehova so nasyon a kien to, ontan met so pangasikaso to ed saray dedikado ed sikato natan.

No Akin ya Idedika Tayoy Inkasikatayo ed Dios

10, 11. Kasin kabiangan itayo la na sankatalbaan a pamilya na Dios sanen nianak itayo? Ipaliwawa.

¹⁰ Walaray arum a manduaruwa no kasin idedika ray inkasikara tan manpabautismo. Oniay itetepet da, ‘Agko kasi nayarin dayewen so Dios anggano agko la idedikay inkasiak?’ Mas onlinew so ebat sano natalosan tayo no antoy kipapasen tayo ed imaton na Dios. Tandaan a lapud kasalanan nen Adan, amin tayo et nianak ya agkabiangan na pamilyay Dios. (Roma 3:23; 5:12) Kanian, kaukolan ya idedika tayoy inkasikatayo ed Dios pian magmaliw itayon kabiangan na sankatalbaan a pamilya to. Nengnengen tayo no akin.

¹¹ Lapud aliwan perpekto iray kaamaan tayo, agda nipatawir ed sikatayo so bilay ya inggetma na Dios parad sikatayo, salanti, perpekton bilay. (1 Tim. 6:19) Ag-itayo nianak ya anak na Dios, lapud nen nankasalanan iray inmunan ateng tayo et nisian lay amin a totoo ed maaron Ama tan Manamalsa. (Ikompara so Deuteronomio 32:5.) Manlapu la’d saman, say interon katooan et agla kabiangan na sankatalbaan a pamilya nen Jehova.

12. (a) Panon a magmaliw a kabiangan na pamilya na Dios so aliwan perpekton totoo? (b) Antoray kaukolan tayon gawaen antis na pampabautismo?

¹² Anggaman ontan, sarag na balang sakey ed sikatayo a kerewen ed Dios ya awaten to itayo ed pamilya ton tutugyopen na saray aabobonan ton lingkor.a Panon itan a nagawa, anta makasalanan itayo? Oniay insulat nen apostol Pablo: “Anta kabusol itayo, akapipulangan [odino akapikareenan] itayo ed Dios ed panamegley na patey na Anak to.” (Roma 5:10) Diad pampabautismo, kekerewen tayo ed Dios a nawalaan itayo na malinis a konsiensia pian naawat to itayo. (1 Ped. 3:21) Balet, sakbay na satan, wala ray kaukolan tayon gawaen. Nepeg tayon kabaten so Dios, aralen a sikatoy panmatalkan, magbabawi, tan manguman ed kagagawa tayo. (Juan 17:3; Gawa 3:19; Heb. 11:6) Tan wala ni sakey a gawaen tayo pian awaten itayo na Dios ed pamilya to. Anto itan?

13. Akin a manepeg labat ya idedika na sakey a too so inkasikato ed Dios pian magmaliw a kabiangan na pamilya To?

¹³ Antis a magmaliw a kabiangan na pamilya na Dios so sakey a nisian ed sikato, kaukolan to ni manggawa na impapuson sipan ed si Jehova. Pian natalosan iya, nengnengen tayoy sakey ya ilustrasyon. Walay sakey a rerespetoen ya ama ya ontan lay panangasi to’d sakey ya ulila kanian labay ton tagibien. Sayan ama et kabkabat a maong a too. Balet, wala ni labay ton isipan na ugaw sakbay ton awaten. Kanian oniay ibaga to, “Antis ta kan awaten, labay kon naseguro no aroen tan respetoen mo ak bilang amam.” Awaten labat na ama so ugaw ed pamilya to no impapuson isipan itan na ugaw. Agta makatunongan iya? Ontan met, say aawaten labat nen Jehova ed pamilya to et saramay mabulos a mangidedika na inkasikara ed sikato. Oniay kuan na Biblia: “Iyapay yoy inkasikayon mismo ed sikato: bilang mabilay a bagat, dedikado tan makanepegan na panangabobon to.”​—Roma 12:1, The New English Bible.

Pakapatnagan na Panangaro tan Pananisia

14. Panon a say dedikasyon et balikas na panangaro?

¹⁴ Say dedikasyon tayo ed si Jehova et balikas na impapuson panangaro ed sikato. Wala ray piparaan na satan ed sipanan ed kasal. Ibalikas na Kristianon nobyo so panangaro to diad pangisipan a sikatoy manmatoor ed nobya to, antokaman so nagawa. Aliwa itan a basta sipan a gawaen so sakey a bengatla, noagta samba itan ed sakey a too. Natatalosan na Kristianon nobyo ya agto nayarin iyamong so nobya to no agmanggaway pisisipanan ed panangasawa. Mipadpara, no agtayo idedikay inkasikatayo ed si Jehova, ag-itayo sigpot a nagunggonaan lapud ag-itayo magmaliw a kabiangan na pamilya to. Kanian, idedika tayoy inkasikatayo ed Dios, lapud anggaman ag-itayo perpekto, pilalek tayoy magmaliw a kien to tan determinado tayon manmatoor ed sikato, antokaman so nagawa.​—Mat. 22:37.

15. Akin a say dedikasyon et panangipatnag na pananisia?

¹⁵ Sano idedika tayoy inkasikatayo ed Dios, ipapanengneng tayoy pananisia ed sikato. Akin ya ontan so nibaga tayo? Lapud no walay pananisia tayo ed si Jehova, matalek itayon pankaabigan tayo so iyapit ed sikato. (Sal. 73:28) Amta tayon aliwan naynay a mainomay so pangunor ed Dios ta manbibilay itayo ed sayan “pikewet tan maramsak a kailalakan,” balet, manmamatalek itayo ed sipan na Dios a tulongan to itayo ed pansasagpot tayo. (Fil. 2:15; 4:13) Amta tayo ya aliwa itayon perpekto, balet matalek itayo a maabagey odino mapangasi si Jehova anggaman makakagawa itayoy lingo. (Basaen so Salmo 103:13, 14; Roma 7:21-25.) Kombinsido itayo a tumangan nen Jehova so pansasagpot tayon pansiansiaen so katooran tayo.​—Job 27:5.

Panlapuay Liket so Dedikasyon ed Dios

16, 17. Akin a manresulta ed liket so dedikasyon tayo’d si Jehova?

¹⁶ Manresulta’d liket so pagmaliw a dedikado ed si Jehova lapud kabiangan ed satan so pangiter ed inkasikatayo. Oniay imbaga nen Jesus a katuaan: “Mas makapaliket so mangiter nen say mangawat.” (Gawa 20:35, NW) Sigpot ya alikna nen Jesus so liket ed panangiter sanen gagawaen toy ministeryo to diad dalin. No maminsan, lapud panutulong to’d arum pian naromog day bilay et agto la naarap so mangan, manpainawa, tan nawalaay komportablen kabibilay. (Juan 4:34) Nanggayagaan nen Jesus a paliketen so Ama to. Oniay inkuan to: ‘Lawas kon gagawaen iray bengatlan makapaliket ed sikato.’​—Juan 8:29; Uli. 27:11.

¹⁷ Kanian, imbangat nen Jesus ed saray patumbok to no anton klase na bilay so makapenek sanen inkuan ton: “No say siopaman a too et labay toy ontumbok ed siak, benegan toy dili ya inkasikato.” (Mat. 16:24) No gawaen tayo itan, mas onapit itayo ed si Jehova. Wala ta ni arum a mas napanmatalekan tayo a maaron mangiyansakit ed sikatayo?

18. Akin a lalo itayon maliket no manbilay itayo unong ed dedikasyon tayo ed si Jehova nen say no iter tayoy panaon tayo ed siopaman odino ed antokaman?

¹⁸ No idedika tayoy inkasikatayo ed si Jehova insan manbilay unong ed satan a dedikasyon diad panggawa ed linawa to, lalo itayon maliket nen say no iter tayoy panaon tayo ed siopaman odino ed antokaman. Alimbawa, dakel a totoo so mangiyuupot ed amin lawarin panaon da pian onyaman balet ta anggapoy tuan liket da tan ag-ira nakokontento. Balet, saramay dedikado ed si Jehova et walaay magnayon a liket. (Mat. 6:24) Maliket ira lapud pribilehyo ra bilang “kakimeyan na Dios,” ingen ta say dedikasyon da et aliwan diad sakey a kimey noagta diad maapresyan Dios. (1 Cor. 3:9) Anggapo lay arum a mas maapresya ed sakripisyo ra nen say sikato. Ipawil to ni ingen so kaksilan na saray matoor a lingkor to pian nagunggonaan ira ed panangasikaso to ed andi-angga.​—Job 33:25; basaen so Hebreos 6:10.

19. Anto so pribilehyo na saramay dedikado ed si Jehova?

¹⁹ No idedikam so bilay mo ed si Jehova, onapit ka ed sikato. Inkuan na Biblia: “Onapit kayo ed Dios, tan sikatoy onapit ed sikayo.” (Sant. 4:8, NW; Sal. 25:14) Aralen tayo ed onsublay ya artikulo no akin a sankaabigan a desisyon so pagmaliw a kien nen Jehova.

[Paimano ed leksab]

Antoy Ebat Mo?

• Antoy kabaliksan na pangidedikam na inkasika ed Dios?

• Panon a makagunggona ed sikatayo so pagmaliw a dedikado ed Dios?

• Akin a kaukolan a dedikado ed si Jehova iray Kristiano?

[Litrato ed pahina 6]

Panlapuay magnayon a liket so pambilay unong ed dedikasyon tayo