Dedikasyon tan Kawayangan a Manpili
“Dia ed kabubulos sikatayo so imbulos nen Kristo.”—GALACIA 5:1.
1. Antoy manunan kiyaaplikaan na saray salitan Hebreo tan Griego a nipatalos a “dedication,” “inauguration,” odino “consecration”?
INUSAR na saray managsulat na Biblia so pigaran Hebreo tan Griegon salitan mangipasabi ed ideyan kisian, odino kibiig, pian onkana ed sagradon gagala. Diad Ingles iran Biblia sarayan salita so nipatalos ed salsalitan singa say “dedication,” “inauguration,” odino “consecration.” No maminsan sarayan termino so nauusar a misiglaotan ed saray uksoy—gendagendat say templo na Dios ed kadaanan a Jerusalem tan say panagdayew a nagagawa ditan. Mataltalag so pakauusar na sarayan salita diad panukoy ed agrelihyoso iran pamaakaran.
Dedikasyon ed “Dios na Israel”
2. Akin a makanepegan si Jehova a tawagen “a Dios na Israel”?
2 Nen 1513 K.K.P., inliktar na Dios iray Israelita manlapud inkaaripen ed saray Ehipsio. Kabekta, imbiig tora bilang nikaduman totoo to, ya impibali tora ed sipanan a relasyon ed sikaton mismo. Nibaga ed sikaran: “Natan sirin, no tuloken yo so bosis ko a tuatua, tan em-eman yo so sipanan ko, sikayo ed satan so pabpablien ko a pinagka-kayamanan ko a manuna nen saray amin a totoo, ta amin a dalin kien ko.” (Exodo 19:5; Salmo 135:4) Lapud pinagmaliw toray Israelitan espisyal a kayarian to, makanepegan labat a tawagen si Jehova “a Dios na Israel.”—Josue 24:23.
3. Akin ya ag-angipanengneng na panangidumaduma si Jehova diad impanpili to ed Israel bilang espisyal a totoo to?
3 Diad impanggawan nidedikan totoo toray Israelita, aliwan manangidumaduma si Jehova, ta maaron iyaansakit to met iray aliwan-Israelita. Binilin toy totoo to: “No say sakey a sankaili et miayam ed sikayo ed dalin yo, agyo gagawaen ya agmanepeg ed sikato. Say sankaili a miayam ed sikayo sikato naani nibilang a singa say nianak ed abung yo, tan aroen mo naani a singa sika a dili; ta sikayo sangsangkaili kayo met nensaman diman ed dalin ya Ehipto. Siak si Jehova a Dios yo.” (Levitico 19:33, 34) Pigaran siglo ed saginonor, say talindeg na Dios so nipurek a maong ed apostol Pedro, ya angaksobin: “Tua a nanengneng ko a say Dios anggapo so pangiduma to ed saray totoo; noag ingen dia ed balang nasyon akoen to so antakot ed sikato tan manggawa na matunong.”—Gawa 10:34, 35.
4. Antoray kondisyon na relasyon ed baetan na Dios tan Israel, tan kasin nambilay iray Israelita unong ed saratan?
4 Imanoen, met, a say pagmamaliw dan nidedikan totoo na Dios et kondisyonal. Dia lambengat ed mapeget ya itulok da ed bosis na Dios tan toorey sipanan da ed sikato a sikaray magmaliw a ‘pabpablien a pinagka-kayamanan’ to. Makapaermen, agsinumpal na Israelitas irayan kakaukolanen. Kayari impangipulisay da’d Mesias ya imbaki na Dios nen inmunan siglo K.P., naandi ray apribilihyoan a posisyon da. Si Jehova so aliwa lan “Dios na Israel.” Tan aliwa lan nidedikan totoo na Dios iray Israelita ed laman.—Ikompara so Mateo 23:23.
Dedikasyon na “Israel na Dios”
5, 6. (a) Antoy labay ya ibaga nen Jesus ed mapropetiko iran salita ton ni rekord ed Mateo 21:42, 43? (b) Kapigan tan panon a niwala so “[say] Israel na Dios”?
5 Kabaliksan ta na saya ya andian la natan si Jehova na dedikadon totoo? Andi. Diad pangaaon ed salmista, impasakbay nen Jesu-Kristo: “Agyo ta ni abasa ed saray Sulsulat, ‘Say bato ya imbantak na saray managpaalagey na abung, sikato lanlamang so agawa ya ulo na suyok. Saya nanlapu ed Katawan, et sikato so makapakelaw ed saray mata tayo’? Kanian kuanko ed sikayo, Say panariay Dios naekal naani ed sikayo, tan niiter naani ed sakey a nasyon a mamapaway na saray bungabunga to.”—Mateo 21:42, 43.
6 Say “nasyon a mamapaway na saray bungabunga to” so apaneknekan a say Kristianon kongregasyon. Legan na aganon impanpirmi to’d dalin, pinili nen Jesus iray inmunan prospektibon membro. Balet diad samay agew na Pentecostes 33 K.P., si Jehova a Dios a mismo so angiletneg na Kristianon kongregasyon diad impangikalbo toy masanton espiritu ed inmuna iran membro na satan, a manbilang na 120. (Gawa 1:15; 2:1-4) Singa insulat nen apostol Pedro ed saginonor, sayan kapkapanporman kongregasyon so nagmaliw met ya “apili a kapolian, peteg ya inkasaserdote, masanto a nasyon, sakey a baley . . . a dilin kayarian to.” Apili parad anton gagala? A sikaray kaukolan a “mangibelyaw na karlangan na saman so angekal ed [sikara] ed kabilungetan, ta tinawag to [ra] ed makapakelaw a silew to.” (1 Pedro 2:9) Saray patumbok nen Kristo, ya alanaan na masanton espiritu, so nidedikan nasyon la natan, “[say] Israel na Dios.”—Galacia 6:16.
7. Antoy panggayagaan na saray membro na Israel na Dios, tan anto sirin so nibaga ed sikaran paliisan?
7 Anggaman saray membro na masanton nasyon so ‘sakey a baley parad dilin kayarian to,’ aglara naaripen. Kasunian to, talagan panggayagaan day babaleg a kawayangan nen say samay akayarian na dedikadon nasyon ya Israel ed laman. Insipan nen Jesus ed saray prospektibon membro na sayan balon nasyon: “Nakabatan yo so katuaan, et say katuaan sikayo so gawaen to a bulos.” (Juan 8:32) Indanet nen apostol Pablo a saray Kristiano so nibulos manlapud saray kakaukolanen na Ganggan a sipanan. Nipaakar ed saya et sinimbawa toray kapananisiaan diad Galacia: “Dia ed kabubulos sikatayo so imbulos nen Kristo; magnayon kayo sirin, tan agkayo la pasakop lamet ed lepsag na pako na inkaaripen.”—Galacia 5:1.
8. Diad anton pamaakaran a say Kristianon areglo et mangiyoopresi ed saray sinansakey na babaleg a kawayangan nen say samay naeksperiensia ed silong na Ganggan a sipanan?
8 Aliwan singa say Israel ed laman nensaman, diad panaon tayo et mapeget a tutuloken na Israel na Dios iray kakaukolanen na inkidedika to. Ag-iya pankelawan ta saray membro to so bulos linawan ontulok. Bangta saray membro na Israel ed laman so nidedika lapud inkianak, saray membro na Israel na Dios so nagmaliw ya ontan lapud impamili. Diad ontan et say Kristianon areglo so midumaan a tuloy ed Judion Ganggan a sipanan, ya angipasakbat na dedikasyon ed saray sinansakey ya agda ra aabuloyan na kawayangan a manpili.
9, 10. (a) Panon ya impanengneng nen Jeremias a niwala so pananguman nipaakar ed dedikasyon? (b) Akin a nibagam ya aliwan amin a dedikadon Kristianos natan et membros na Israel na Dios?
9 Impasakbay nen propeta Jeremias so pananguman no nipaakar ed dedikasyon sanen insulat to: “‘Nia! Saray agew onsabi ra,’ kuanen Jehova, ‘a siak manggawa ak naani na sakey a balo a sipan ed abung na Israel, tan ed abung na Juda; ag-unong ed sipan a ginawak ed saray atateng da, dia ed agew ya impangitabin ko ya angipaway ed sikara ed dalin na Ehipto, “saman a sipan ko dineral da, anggan sakey ak nensaman ya asawa a laki ed sikara,” kuanen Jehova.’ ‘Balet saya so sipan a gawaen ko naani ed abung na Israel kayari na saraman ya agew,’ kuanen Jehova. ‘Yan ko naani tunong ko ed saray akindalem a kabiangan da, tan dia ed puso ra sikato so isulat ko naani; et siak naani Dios da, et sikara naani baley ko.’”—Jeremias 31:31-33.
10 Lapud say ganggan na Dios et nisulat ed “saray akindalem a kabiangan da,” a singa panangibaga, “dia ed puso ra,” napapakiwas iray membro na Israel na Dios a manumpal ed dedikasyon da. Say motibasyon da so mas malet nen say saramay Israelita ed laman, a nidedika nanlapulad inkianak, aliwan diad impamili. Natan, say mabiskeg a motibasyon ed panggawa na linawa na Dios, a singa idedemostra na Israel na Dios, so pibibiangan na masulok a limaran milyon a kaparan managdayew ed intiron mundo. Indedika ra met lay bilay da ed si Jehova a Dios pian gawaey linawa to. Anggaman anggapo’d sarayan sinansakey so ilalon bilay ed tawen a singa saramay manutugyop ed Israel na Dios, panggagayagaan day panatalaran ed maandon pambilay ed dalin diad silong na uley na mangatatawen a Panarian na Dios. Ipapanengneng day apresasyon da parad espiritual ya Israel diad aktibon panusuporta ra’d daiset lan natitilak a membro diad panusumpal ed asainmin da a “mangibelyaw na karlangan na saman so angekal ed [sikara] ed kabilungetan, ta tinawag to [ra] ed makapakelaw a silew to.”
Sikakabat a Mangaagamil na Inter-Dios a Kawayangan
11. Diad anton kapasidad a say too et pinalsa, tan panon itan ya usaren?
11 Pinalsa na Dios so totoo pian pablien so kawayangan. Pinagamoran tora na kapasidad a bulos linawa. Say inmunan sanasawan totoo so angusar ed kawayangan dan mandesisyon. Balet ta, sikaray agmakabat tan agmaaron nandesisyon ya angipaarap ed inpakaperdi ra tan ed ilalak da. Siansia, malinlinew ya idedemostra na saya ya agbalot pipiliten nen Jehova iray intelehentin pinalsa a mangala na kundang a sumlang ed akindalem iran motibo odino pilalek da. Tan lapud “say Dios aroen to so sililiket a mangiter,” say mogmon dedikasyon ya awaten to et samay nibase’d aro, bengatlan mabulbulos a ginawa tekep na inkasayaksak, a niletneg ed kawayangan a mandesisyon. (2 Corinto 9:7) Dinanman nin arum a klase so agnaawat.
12, 13. Panon ya onkakana si Timoteo bilang padron parad dugan panangibangat ed ugaw, tan antoy angitontonan na say alimbawa to ed dakel a kalangweran?
12 Diad sigpot a pamidbir ed sayan kakaukolanen, papaboran na Tastasi nen Jehova so pangidedika na sakey ed Dios, balet agdan balot dadagdagey siopaman a manggawa na ontan a dedikasyon, anggan saray dilin anak da. Midumaan ed dakel a relihyon, agbabautismoan na Tastasi so ilalak da no kapan-anak ni, a singano posibli iran piliten a mangidedika ya andiay gunggunay personal a panagpili. Say Makasulatan a padron a kaukolan a tumboken et samay tinumbok na balolakin Timoteo. Bilang sakey a wala la’d edad, imbaga ed sikato nen apostol Pablo: “Mansiansia ka ed saray bengatla ya inaral mo tan sinisiam, ya antam no siopa so nanaralan mo ed sikara; tan nanlapu ed inkaugaw mo akabatan mo so saray masanto a sulsulat, a makayari a manggawa ed sika a makabat ed kilalaban, lapu ed panamegley na pananisia a wala ed Kristo Jesus.”—2 Timoteo 3:14, 15.
13 Makatantanda ya amta nen Timoteo so masanton sulsulat lapud nibangat la ed sikato iratan nanlapulad inkaugaw to. Sinisia to la—agpinilit—pian panisiaan toray Kristianon bangat na ina tan bai to. (2 Timoteo 1:5) Bilang resulta, abidbir nen Timoteo so kakabatan ed pagmaliw a patumbok nen Kristo tan sirin et inagamil to so personal a panagpili parad Kristianon dedikasyon. Diad panaon tayo, samplon nilibon kalangweran a saray ateng da et Tastasi nen Jehova so anumbok la ed sayan alimbawa. (Salmo 110:3) Aliwan ontan ed arum. Pamaakaran itan na personal a panpili.
Pandesisyon a Magmaliw ya Aripen na Siopa?
14. Antoy ibabaga na Roma 6:16 ed sikatayo nipaakar ed sigpot a kawayangan?
14 Anggapoy toon sigpot a bulos. Amin so nalilimitaan ed kawayangan to lapud pisikal iran ley, a singa say ganggan na grabidad, ya agnayarin ibaliwala a bulos ed pakasakitan. Ontan met diad espiritual a pantalos et anggapoy sigpot a bulos. Inkatunongan nen Pablo: “Agyo amta a say pangisaklangan yo ed inkasikayo a dili a singa aripen ed katutulok, aripen kayo na samay tuloken yo; balangla say kasalanan ya onkana ed patey, o say katutulok ya onkana ed katunongan?”—Roma 6:16.
15. (a) Antoy liknaan na totoo nipaakar ed pagmamaliw ya aripen, balet anto ta so mansusumpal a gagawaen na dakel? (b) Antoran matukoy a tepet so nayarin itepet tayo ed inkasikatayo?
15 Say ideyan pagmamaliw ya aripen na sakey et mabanday so panisip na maslak a totoo ed sikato. Balet, diad katuaan to ed mundo natan et saray totoo so mabetbet a paimamaneobra tan paiimpluensiaan ed ontanlan dakel a masilib a dalan a diad kaunoran et napilitan lan manggawa ed labay a pagawa na arum ed sikara. Singa bilang, pambabanikelan na industriya na advertising tan say panagligliwaan a panparehoey kanonotan tan kiwas na totoo, a mangileletneg na saray estandarten kaukolan dan tumboken. Saray mapolitika tan relihyoson organisasyon so mangiimpluensia’d totoon manuporta ed saray ideya tan kalat da, aliwan naynay diad makakombinse iran argumento, noagta mabetbet diad panagyat na liknaay pankakasakey odino katooran. Lapud imbaga la nen Pablo ya ‘aripen itayo na samay tutuloken tayo,’ maabig no tepetan tayoy inkasikatayo, ‘Siopay akan-aripen ed siak? Siopay mangiimpluensian maong ed panagdesisyon ko tan ed kabibilay ko? Kasin saray relihyoson klerigo, mapolitikan lider, mayayaman ed pinansyal, odino saray persona ed panagligliwaan? Siopay tutuloken ko—Dios odino totoo?’
16. Diad anton pantalos a saray Kristiano et ariripen na Dios, tan antoy suston panmoria ed ontan ya inkaaripen?
16 Agmomoriaen na Kristianos so katutulok ed Dios bilang agmakatunongan ya isusumpa’d personal a kawayangan. Sibubulos dan aagamilen so kawayangan da a singa ed Uliran da, si Jesu-Kristo, ya itutukoy iray personal a pilalek tan prayuridad da ed linawa na Dios. (Juan 5:30; 6:38) Babayuboan day “kanonotan nen Kristo,” diad pangipapasakop day inkasikara ed sikato bilang Ulo na kongregasyon. (1 Corinto 2:14-16; Colosas 1:15-18) Singa iya biin miaasawa tan mabulos a mikokoopera ed lakin inad-aro to. Diad tua, say ulop na alanaan a Kristiano so nasasaglawi bilang agni adiwit a marikit a nisipan ed Kristo diad panamaley.—2 Corinto 11:2; Efeso 5:23, 24; Apocalipsis 19:7, 8.
17. Anto so pinili na amin a Tastasi nen Jehova a pagmaliwan?
17 Kada Tastasi nen Jehova, balanglan sikato so walaay mangatatawen odino mangaraldalin ya ilalo, so nanggawa la na personal a dedikasyon to ed Dios a gawaen so linawa to tan tuloken to bilang Manuley. Parad kada Tasi, say dedikasyon so personal a panpili ed pagmaliw ya aripen na Dios imbes ed pansiansian aripen na totoo. Saya so mitunosan ed konseho nen apostol Pablo: “Sikayo asaliw kayo ed sakey a bili; agkayo magmaliw ya aripen na totoo.”—1 Corinto 7:23.
Panaral ed Pakagungguna Tayon Dili
18. Kapigan a say sakey a potensyal a Tasi et onkualipika ed bautismo?
18 Sakbay ya onkualipika so too a magmaliw a sakey ed Tastasi nen Jehova, nepeg ton nakapet iray Makasulatan a kualipikasyon. Asikasoen a maong na mamatatken so panetermina no talagan natatalosan na potensyal a Tasi so sasaglawien na Kristianon dedikasyon. Talaga ta’n labay toy magmaliw a sakey ed Tastasi nen Jehova? Mabulos ta’n manumpal ed kakaukolanen na saya? No andi, sikatoy agni nayarin nabautismoan.
19. Akin ya anggapoy katunongan a sitaen so siopaman a mandesiden magmaliw a dedikadon aripen na Dios?
19 No nakapet na sakey so amin a kakaukolanen, akin, balet a sikatoy sitaen ed boluntaryon personal a desisyon ton paimpluensiaan ed Dios tan ed apuyanan a Salita To? Mairap ta ya awaten a paimpluensiaan a dili ed Dios imbes ed totoo? Odino saya so agtanton makagungguna? Ag-itan iisipen na Tastasi nen Jehova. Sigpot-puso iran miabobon ed saray salitay Dios ya insulat nen Isaias: “Siak si Jehova a Dios mo, ya angibangat ed sika na nipaakar ed nabang mo, a mangitonton ed sika ed dalan a laen mo komon.”—Isaias 48:17.
20. Diad antoran pamaakaran a saray totoo et nibubulos na katuaay Biblia?
20 Say katuaay Biblia so mangibubulos ed totoo manlapud panisia ed palso iran relihyoson doktrina, a singa say maandon panirap ed mangapuy-apuy ya impierno. (Eclesiastes 9:5, 10) Imbes, papanoen toy kapusoan da na otang a linawa lapud tuan ilalo parad inaatey—say kioli a nagmaliw a posibli diad basiyan na dondon bagat nen Jesu-Kristo. (Mateo 20:28; Gawa 24:15; Roma 6:23) Ibubulos na katuaay Biblia iray totoo manlapud inkasaew ed isasaral ed mapolitikan sipasipan a tuloytuloy ya onsasaew. Imbes, satan so mamagayagan maong ed kapusoan da ed pakaamtan say Panarian nen Jehova so manuuley la ed katawenan tan agla manbayag et manguley ed intiron dalin. Ibubulos na katuaay Biblia so totoo manlapud agagamil ya, anggaman makapasagyat ed makabos a laman et agmamagalang ed Dios tan mansumpal ed mauges ya epekto diad pormay sinmaew a relasyon, sakit, tan masakbay ya ipapatey. Diad antikey, say pagmaliw ya aripen na Dios so makagunggunan tuloy nen say pagmaliw ya aripen na totoo. Diad tua, say dedikasyon ed Dios et mangisisipan na saray gungguna “natan ed sayan panaon, . . . tan dia ed mundo ya onsabi say bilay a maando.”—Marcos 10:29, 30.
21. Panoy panmoria na Tastasi nen Jehova ed dedikasyon ed Dios, tan antoy pirawat da?
21 Agnagmaliw a dedikadon nasyon iray Tastasi nen Jehova natan lapud inkianak a singa ed Israelitas nensaman. Kabiangan iray Tastasi ed sakey a kongregasyon na dedikadon Kristianos. Kada bautismadon Tasi so nagmaliw ya ontan diad indibidual a pangaagamil na kawayangan a mandesisyon ed pangidedika. On, parad Tastasi nen Jehova, say dedikasyon so mansumpal ed maligsan personal a relasyon ed Dios a pakapatnagay mabulos a serbisyo ed sikato. Sayan magayagan relasyon so sigpot-puso ran pipilaleken a mantinien, a maandon ombebenben a malet ed kawayangan ya inkibulosan da unong ed Jesu-Kristo.
Panon Yon Ebatan?
◻ Akin a say Dios et agmanangidumaduma ed impamili to ed Israel bilang ‘pabpablien a pinagka-kayamanan to’?
◻ Akin ya ibagam a say Kristianon dedikasyon et agto sasaglawien so pakaperdi na kawayangan?
◻ Antoray gungguna na dedikasyon ed si Jehova a Dios?
◻ Akin a magmaong so pagmaliw ya aripen nen Jehova imbes ya aripen na totoo?
[Litrato ed pahina 15]
Diad kadaanan ya Israel, say dedikasyon ed Dios so nandependi ed inkianak
[Litrato ed pahina 16]
Say Kristianon dedikasyon so mandependi ed panagdesisyon